Ŋgwal ŋa məmbə̀ɗà à gəzləŋ a, tsəna medzeye ya?
13
1 Akahər ata ka,
gà mburma duwa tə daha a təv Yesuw,
tə daha ka,
ta gwaɗar:
«Pilatus aka bats gà Galile duwa i təv ana ta riŋ i təv batsah ga Mbulum,
ta vile a dukw masakəŋana a Mbulum a.
Məmbəz gà dukw ata ta bats a,
a gaw ba akaba nda biy tar a təv ilik ŋa.»
2 Yesuw a gwaɗa a tar aaka:
«Dite kà dzalum dze ana,
gà Galile ata ta bats tar ana,
tar gà ɓəzla bakal bə̀ba ŋa ika gà asiŋ gà Galile ŋgiɗ a ya?
3 A riŋ tsa.
Iye ihər i gweɗe a kurum ŋa:
Ama kàa mbəɗum à gà gəzləŋ kurum tsəka,
ki ta metwim a fit,
kamala tar a mbaŋa.
4 Dite gà mburma ana kurwa gəra tsamakər ŋa ata,
batsah ga zubul ŋa ata a mbazla aka tar i Siluwam i Yeruzalem,
ta mata fit ana,
wànà kà dzalum dze ana,
tar gà ɓəzla bakal bə̀ba ŋa ika gà asiŋ gà mburma ŋgiɗ ana a riŋ i fata ya ya?
5 A riŋ tsa.
Iye ihər i gweɗe a kurum ŋa:
Ama na kàa mbəɗum à gà gəzləŋ kurum tsəka,
ki ta metwim a fit kamala tar ata ya mbaŋa.»
Bazlam minew dizl ɗaf ana a we a tsiye
6 I dəba ŋa ya,
Yesuw a tsik a tar bazlam minew,
a gwaɗa a tar:
«Wele duwa,
guvah ŋgar a riŋ,
a dzàv aɗəm dizl ɗaf duwa ar kamala guruv a,
mawà ŋa a dzəm hinne.
A ta megeha i dəba ŋa ya ka,
wele ata a dawa a guvah ŋgar ata,
a waya meŋgilera ihər mawà ŋa ya zləmana.
Ama aka ŋgat ihər duwa ya tsa.
Ndizìŋ kataya,
ndizìŋ kataya.
7 Tsam ka,
a gwaɗa a mala megemir ŋa:
“Samata kwaŋ,
kige kinehe mive makər dze,
na i dawara aà mayaha ihər mawà ŋa ya.
Ama i ŋgatara ihər duwa ya tsidze.
Kinehe ka,
ŋgulum sàs iɗəm a.
Aàmala na a zle a təv aaha məfara ŋa ya?”
8 Ama mala megemir ŋgar ata a gwaɗar aaka:
“Əbay,
miyak dər viyina asa dzekwiŋ.
I ler a à ahəɗ aà sik ŋa ya,
dite i ti nde ahər a hìrɗe.
9 Na Yàa ge dər kataya ka,
biy tsa,
a we a ndizìŋ kuɗa.
Na aka wa tsa asa ka,
dite ki ses a iɗəm a kuɗa.”»
Yesuw a mbəl à məkəs duwa magàha a bəɗ ŋa,
a pat mesifikaba
10 A pat duwa,
Yesuw a riŋ a tsik a guma ŋgar a mburma a pat mesifikaba.
Bazlam ata a tsik a ya ka,
i ga Mbulum gà Yahuda ana ta hamawa iɗəm a.
11 Məkəs duwa a riŋ ŋgwala tsa,
sitene i ba ŋgar,
i liwiŋ gà na ti dze a zləm a bazlam ŋgar ata i fata ya.
Ama sitene ata aka ndza ihər ka,
daga mive kurwa gəra tsamakər.
Aka geha à ŋgat a bəɗ fit kweleŋ.
Aka ŋguv akaba ŋgat.
A sle a aà mehitse ndiɗ asa tsa.
12 Aləka Yesuw a ŋgatar ka,
a zalaraha a təv ŋgar.
Aləka a daha ka,
a gwaɗar:
«Məkəs aaha,
kàa mbəl i dukw məməta yak a.»
13 A dza ahər aka məkəs ata.
I fata ya tsara ka,
a hitse ndiɗ lele kuɗa.
Dite a dza ba aà mazàmbàɗà a Mbulum.
14 Ama a tsəɓ a batsah mala mahàmà a Mbulum ata hinne,
aɗaba ana Yesuw a mbəl à məkəs ata a pat mesifikaba ya.
Batsah mala mahàmà a Mbulum ata a dza ba aà mifefile a gà mburma ata i fata ya.
A gwaɗa a tar:
«Na kà wayum mege megemir ka,
mehinne ndilik.
I huɗ mehinne ndilik ŋa ata ya ka,
dumara,
ta mbala à kurum,
tsəka,
a pat mesifikaba tsa.»
15 Əbay Yesuw a gwaɗar aaka:
«Dukw gà mimbèhè are kurum ata,
bəla a pat mesifikaba ana ku weke i liwiŋ kurum a,
a pə̀lawa à sla ŋgar,
kige tsa à hezweŋe ŋgar,
dite ma sa yam dze ana,
pam a?
16 Wànà məkəs aaha,
ŋgat i gwala Abəraham,
Əbay sitene a dàn ŋgat mive kurwa gəra tsamakər ana,
lele tsiye,
na məpəla à ŋgat i mesewere are ŋgar a,
a pat mesifikaba ya?»
17 Bazlam Yesuw ata a tsik a tar kataya ya ka,
a gəs dərraha ahəm aà are a gà ɓəzla mene are ŋgar ata i fata ya fit.
Ama ka,
gà asiŋ gà mburma ana i fata ya,
ta ŋgayaba hinne,
aɗaba gà dukw Yesuw ana fit dze a geyewa ŋgwal ŋa ya.
Bazlam minew wur dukw ana hinne tsiye
18 I dəba ŋa ya,
Yesuw a gwaɗa a tar:
«Mekwere Əbay Mbulum a ndzikiɗ ba ana,
dukùla?
I geye a dər akaba ana,
nda dukùla?
19 A ndzikiɗ ba ka,
wur dukw ana hinne tsa,
kamala wur meserek a,
wura a zle a,
a slige a a guvah ŋgar a.
I dəba ŋa ya,
wur dukw ata a sliliŋa,
a gil a ba,
a ne a dizl ɗaf batsah ŋa,
dite gà ɗiyeŋ ti dehe a,
ta ŋgereye a ga tar aà ahər ŋa.»
Bazlam minew giɗe ana a kwasawa à duwa ya
Mata 13:33
20 Yesuw a gwaɗa a tar asa:
«I geye a akaba a à mekwere Əbay Mbulum dze ana,
nda dukùla asa ya?
21 A ndzikiɗ ba ka,
giɗe ana a kwasawa à duwa ya.
Taŋa məkəs duwa a ndzək gùfa a batsah kəzləm makər,
dite a nda aaka giɗe,
a həlaɓ dər akaba.
I dəba ŋa ya ka,
dzìdzèrègìffe a kwasa dər fit kuɗa.»
Biye hərmaga ana hinne tsiye
22 I dəba ŋa ya,
Yesuw a mah ba i fata ya,
a de a a Yeruzalem.
I təv ana a riŋ a de a mba ya ka,
a daya nda gà kwite ana aà vatwa ya,
ku mege kəla ŋa,
ku mege batsah ŋa tekeɗe.
A tsikewa iɗəm bazlam Mbulum a mburma.
23 I təv ana a riŋ ihər a tsik a bazlam ŋgar ata ya ka,
wura ilik a tsam ahər,
a gwaɗar:
«Əbay,
wànà gà mburma ta mbil a ka,
əŋgal dze ana,
kaɗəŋ a?»
Yesuw a gwaɗar aaka:
24 «Mərum aba aà mede ndaka biye hərmaga ana hinne tsiye.
Aɗaba iye ihər,
i gweɗe a kurum a nda ndzer:
Gà misle ŋgiɗ a riŋ hinne a ti ses a ter a aà mede ndaka vatwa ata,
ta waya mimbile,
ama ti sle a tsa.
25 Na mala ga aka hitse,
aka hə̀ndə̀k a ga gədzə̀zl ka,
ki ti ndzwim a i bəra.
Ki dzwìm a ba aà malàkàyà a biye hərmaga,
ki gweɗwimerehe a:
“Kamkam Əbay,
hə̀ndə̀k a mə̀r i ga ya te.”
Ama a gweɗe a kurumara a ka:
“Kurum gà là?
I sər kurum tsa.”
26 Dite ki ta gweɗwimer aakaha a:
“Mər,
kàa zəmakwa akaba dukw mezime nda gà kər,
kàa sakwa akaba dukw mese nda gà kər tserdze mbaŋa.
Dite kàa dzeŋge guma yak a mburma i kwite mə̀r.”
27 *Ama a ta gweɗe a kurumara a asa:
“Kurum ana,
gà la?
Iye ka,
i sər kurum tsa,
dum i təv ga ya.
Kurum ka,
ki slwim a aà madàra a faha ya tsa.
Aɗaba bakal a riŋ a be a kurum ka,
hinne.”
28 I fata ya kuɗa ka,
ki ti tiwimiŋa.
Ki pèpìɗwim a dər zlir.
Ki ta ŋgetwime a a gà Abəraham nda gà Izak,
nda gà Zakup,
dite nda gà ɓəzla məma à guma Mbulum ana tserdze i *mekwere Mbulum a ka,
kurum ka,
tàa mbər medzewe à kurum a bəra.
29 Gà mburma ti deyere a i kadwa ya,
nda gà i gwa ya,
gà naha i guva i guva ya,
ku mege i ŋga ya tserdze,
ti ndzeye a a təv ilik ŋa aà mazəma ɗaf i mekwere Əbay Mbulum i fata.
30 Ama kuɗa kəla ka,
gà asiŋ gà mburma ana kinehe,
ti tike tar aà ahər tsiye ka,
ti ti ne a gà ɓəzla aka miɗ mba ika miɗ Mbulum.
Dite gà asiŋ gà mburma ana kinehe ta gwa,
gà mə̀r ŋa ya ka,
ti ti ne a gà ɓəzla dəba ika miɗ Mbulum mbaŋa asa.»
Yesuw a tuwa, aɗaba gà mburma ana i Yeruzalem a
31 I təv ana Yesuw a fàfəl aba ya tsara ka,
gà *Farisa duwa tə daha a təv ŋgar.
Tə daha,
ta gwaɗar:
«Da i faha ya,
daba a təv ŋa,
aɗaba Əbay *Hiridus a ta kiɗ a kər.»
32 Yesuw a gwaɗa a tar aaka:
«Dumaha,
gwaɗum a wele ata a ne aka iye kəra dala ya ka:
“Ama ka,
i delewe a gà sitene aà mburma ya,
dite i mbele a à ter a mbakum nda ndidwe dzekwiŋ,
dite i huɗ mehinne makər a ka,
i ndìv a à megemir gà kuɗa.
33 Ama ka,
i de a à megemir ŋa aka miɗ mbakum nda ndidwe,
dite ndidwe aaka asa.
Aɗaba a da dər tsa na ta kiɗ a mala məmà à bazlam Mbulum i təv ŋgiɗ pam a,
na i Yeruzalem asa tsiye ya.”»
34 I dəba ŋa ya,
a gwaɗa a tar asa:
«A kurum gà mburma ana riŋ i Yeruzalem a,
i Yeruzalem a.
A kurum ana kà batsawum gà ɓəzla məma à guma Mbulum,
dite kə̀ kalawum gà na Mbulum a slərawaha tar a təv kurum a nda kur a.
Wànà sik ndaw na a sèsiŋ magəsa aàba gər a gà mburma kurum,
kamala məmər mendzikwir ana a yehe a gər a gà ɓəza ŋgar aà huɗ gwezleviyek a.
Ama ka,
a sàs a kurum dər akaba ɓav tsa asa.
35 Aɗaba taŋa,
gà ga kurum ti ti ne a rəŋga hùhwayhwayyà,
wura a ge a iɗəm tsa.
Aɗaba iye ihər i gweɗe a kurum a nda ndzer ŋa:
Ki ta ŋgetwimiŋ a asa tsa,
haa a pat ana ki ta gweɗwim a:
“Mipise ahəm ika gər wur ana Mbulum a slərra ŋgat a faha ya*.”»