Bazlam minew meslìgè daw
4
1 A pat duwa,
Yesuw a mbəɗ gər aà guva duluv Galile asa.
A waya metsìkè guma ŋgar a mburma.
Gà mburma hinne virisìkw tə daha a təv ŋgar.
Aɗaba taŋa,
a daha,
a tsəl a slə̀làh yam duwa a riŋ aà guva duluv ata ika gər yam.
A sìrìk dər aà gìgìze ya aka gər yam zaakwa.
A ndza aɗəm a fata.
Gà mburma mandza ŋa ɗa ika gìgìze.
2 Dite a ɗe a tarəra iɗəm à guma ŋgar a hinne ndaka bazlam minew a.
I huɗ guma ŋgar ata ya ka,
a gwaɗa a tar:
3 «Tsarakum,
dzùmar zləm lele.
Wele duwa a riŋ,
a ndzək hwife daw.
A da dər a dala aà meslige.
4 I təv ana a riŋ a slige a ya ka,
wur daw ata a dza aka vatwa.
Gà ɗiyeŋ tə daha,
ta pala.
5 Asiŋ ŋa a dza aà sik kuvəl,
a təv ana ahəɗ ikəka hinne tsiye.
A ɗeba bise,
a sləl tsara,
aɗaba ana biye iɗəm tsiye.
6 Aləka pat a zlara ahər a mbulum a ka,
a wànà daw ata,
a kula tsara,
aɗaba ahəɗ ata ka,
ɗùɗùrwàkùŋŋa biye iɗəm tsa.
7 Wur ŋa i ŋgiɗ pam asa,
a dza aà huɗ adak.
Adak ata a zlala aakahər zlàlaw zlàlaw,
a dza aaka mezite.
Daw ata aka ge ba asa tsa,
a mətsaha siter.
8 Ama wur ŋa i ŋgiɗ pam asa,
a dza aka ahəɗ ana ŋgwal ŋa ya.
Ŋgat ka,
a sləl,
a gəl ba kwitsikw,
a da a bəra,
dite a ge ba hinne:
biy ŋgiɗ dzìsl gèher a kəzləm,
biy ŋgiɗ asa fàhha,
biy ŋgiɗ ibam,
tìs aɗəm.»
9 I dəba ŋa ya,
Yesuw a gwaɗa a tar:
«Dzùmar zləm lele,
na gər kurum aka ge aà metsereke ya.»
Aɗaba la na Yesuw a fàfəl ndaka bazlam minew a
10 Aləka i dəba ŋa ya,
gà Yesuw nda gà ɓəzla mazazama ŋgat a kurwa gəra sula ŋa aaha,
dite nda gà asiŋ gà mburma ana tə tsaraka bazlam ŋgar ata ya,
ta hitse i fata ya,
tə da.
A təv ana ti de a,
ti ndze diriŋ aà gà mburma ya ka,
ta gwaɗa a Yesuw:
«Bazlam ata ndeɗiŋa kà tsik ndaka bazlam minew a ka,
maa tsaraka tsəna,
ɗif a mə̀r dər te.»
11 Yesuw a gwaɗa a tar:
«Kurum ka,
Mbulum aka ɗif a kurum à dukw ana makàhà ŋa i mekwere ŋgar a.
Ama gà misle ŋgiɗ tì dze a zləm ka,
a dukw ana ti tsik a ter a ndaka bazlam minew a pəra.
12 *Taŋa a riŋ mewetse ŋa i wakita Mbulum ka,
a gwa:
“Ku mege ta fir ahər a lele tekeɗe ka,
ndə̀tàràmàŋŋa ta ŋgeter a tsa.
Ku mege tàa dzar zləm lele tekeɗe ka,
ndəkəmma ti tsereke a ɓav tsa asa.
Aɗaba na mege tə sər ka,
ta mère a a dəba a təv Mbulum a,
dite mə̀ pəl a tar à bakal tar.”»
Yesuw a ɗif à bazlam minew meslìgè daw
13 I dəba ŋa ya,
Yesuw a gwaɗa a tar:
«Kàa tsarakum bazlam minew gà ata tsiye?
Na kàa tsarakum tsəna,
meme na dite ki tserekwim a gà bazlam minew ŋgiɗ pampam a?
14 Aɗaba taŋa na i tsik a.
Wele ata a slige hwife daw ata ya ka,
ŋgat a ne ka,
mala metsìkè bazlam Mbulum.
15 Gà misle ŋgiɗ ka,
ti ndzikiɗ ba wur daw ata a dza aka vatwa ya ɗekɗek.
Taŋa ka,
a ndzikiɗ ba biy gà mburma ana ti tsereke a bazlam ata ka,
ama Əbay sitene a dehe a tsara,
a ndzehe a bazlam ata ta gəs a gəzləŋ tar a.
16 Gà misle ŋgiɗ pam asa,
ti ndzikiɗ ba wur daw ata a dza aà sik kuvəl a.
Ta gis a bazlam ata a gəzləŋ tar nda gà maŋgayaba tsara.
17 Ama bazlam ata a ŋge a zlile aà mendze i gəzləŋ tar tsa.
Mendze tar a riŋ ika vatwa Mbulum hinne tsa.
Zàkwayiya,
na bəla mawùràba bazlam,
kige tsa mesewere are aka ge a tar ba a gər ka,
ŋgwìɗik ta miyek a à magəsa bazlam ata tsara.
18 Gà misle ŋgiɗ pam asa,
ti ndzikiɗ ba wur daw ata a dza aà huɗ adak a.
Ti tsereke a bazlam Mbulum,
19 ama madzala gà gər mesewere are a be a tar i gəzləŋ a hinne.
Tar ihər ti dzele a gà gər aka limana,
a bene a tar,
nda mege are aka dukw mburma tserdze.
Aɗaba taŋa,
gà dukw ata tserdze ya ka,
ta bets a bazlam Mbulum i gəzləŋ tar a.
Ta gis a ka,
gà dukw ata ɗekɗek.
Bazlam Mbulum a ge a ter a ŋgulum asa tsa.
20 Gà misle ŋgiɗ pam ka,
tar ti ndzikiɗ ba wur daw ata a dza aka ahəɗ ŋgwal ŋa ya.
Ti tsereke a bazlam Mbulum,
ta gis a a gəzləŋ tar nda ndzer.
Tar ka,
ti ne kamala wur daw ata a sləl ika ahəɗ ata ŋgwal ŋa,
dite a ge ba hinne ya:
biy ŋgiɗ ilik ka,
dzìsl gèher a kəzləm,
biy ŋgiɗ asa ka,
fàhha,
dite biy ŋgiɗ ka,
tìs aɗəm.»
Bazlam minew lalampa ana i təv dzəgəɗaf ŋa ya
21 I dəba ŋa ya,
Yesuw a gwaɗa a tar asa:
«Wura a sle a aà mezlera lalampa,
dite a tike a aà huɗ maàslə̀làh à,
kige tsa aà huɗ tasà ya?
A tike a ana,
a təv ana,
dzəgəɗaf a tsiye?
Tsəka,
wura a ŋget a a dzaydzay ŋa a riŋ,
a ge a ŋgulum tsa.
22 Kamala taŋa ya,
dukw ana makàhà ŋa kinehe ya ka,
aləka aka miɗ mba ka,
a ta pèt a aba lele.
Dite dukw ana gà mburma tə sər kinehe tsiye ka,
aləka aka miɗ ka,
a sir a ba lele.
23 Aɗaba taŋa,
dzùmar zləm lele,
na gər kurum aka ge aà metsereke ya.»
24 Yesuw a gwaɗa a tar asa:
«Ama ka,
gwim metsehe a dukw ana i tsik a kurum a ya lele,
dite ki gwim a metsehe a dukw ana ki gwim a a gà mburma ŋgiɗ pampam a asa.
Dukw ana kàa gwim a tar a ka,
Mbulum tekeɗe,
à me a kurum a dər aɗəm ka,
kamala taŋa ya mbaŋa.
Ama ŋgat kəla ka,
à zè a dər biy na kì gwim a ter a fit.
25 Aɗaba wur ana aka gəs bazlam ana i tsik a ya ka,
a sər *mekwere Mbulum ana a kwere a ya,
Mbulum à sikehe a dər aaka asa.
Wur ana aka gəs kwizikw a ka,
Mbulum à dzik a ihər kwizikw ŋa ata ya mbaŋa asa.»
Bazlam minew hwife ana ti slige ka, dite a slil a ya
26 Yesuw a gwaɗa a tar asa:
«*Mekwere Mbulum a ndzikiɗ ba ka,
hwife ana mburma a slige a ya.
Wele ata a slige hwife ata a guvah ŋgar.
27 I dəba ŋa ya,
hawa a ge ka,
a de a a ma.
A ndze a are.
Mbulum aka dəv ka,
a hitse a asa.
Kəla pat kataya.
Zàkwayiya ka,
daw ata a sliliŋa.
A slil a dze ana,
meme ka,
wura a sər tsa.
28 Ahəɗ a slil a daw ata à gər ŋgar.
Malahalah ŋa ka,
simir ŋa dzekwiŋ.
I dəba ŋa ya ka,
a gil a ba dambasl ŋa,
a de a a bəra,
sùput ŋa,
dite à nèh a,
a ge a wur kuɗa.
29 *Na daw ata aka nah,
aka kula,
masasa ŋa ide ka,
mala guvah aaha ndeɗiŋa ya,
a zle a matuhwa,
à ses a dər daw ŋgar aaha.»
Bazlam minew wur dukw ana hinne tsiye
30 Yesuw a gwaɗa a tar asa:
«Wànà i gweɗe a kurum a,
*mekwere Mbulum a ndzikiɗ ba ana,
dukùla asa ya?
I ɗe a dər dze ana,
ndaka bazlam minew awara asa ya?
31 Aɗaba mekwere Mbulum a ndzikiɗ ba ka,
wur dukw ana hinne tsa kamala wur meserek a.
Ar ka,
kwizikw ika magər gà dukw medile ana ti slige a dze ya.
32 Ama tàa slige ka,
a sliliŋa,
kwitsikw a de a aà mbulum hinne,
à zè a gà dukw medile tserdze.
A zlele a ahər zlàlaw zlàlaw hinne asa mbaŋa.
Dite gà ɗiyeŋ ti ndze aɗəmiŋa,
ta ge aɗəm a ga tar.»
33 I dəba ŋa ya,
Yesuw a tsik a tar bazlam minew ŋgiɗ pampam hinne asa.
A live dər aba nda gà dukw ata pampam a tsik a tar a.
A tsikewa a tar ka,
dukw ana gà mburma ata ti tsereke a lele ya.
34 Aɗaba a tsikewa bazlam ŋgar ze bazlam minew tsa pəra.
Ama i təv ana tar nda gà ɓəzla mazazama ŋgat a ka,
a ɗe a tar à bazlam minew ata fit dze.
Yesuw a kwara akaba gà himbiɗ nda yam
35 Pat ata Yesuw a tsik a tar aba bazlam ata ya tsara ka,
ndaàwa ŋana a gwaɗa a gà ɓəzla mazazama ŋgat:
«Tàkwa aka lìdè duluv ŋgiɗ.»
36 Gà ɓəzla mazazama ŋgat ata,
tə tsaraka kataya tsara ka,
tə tsəlaha a slə̀làh yam ata ŋgat iɗəm a.
Ta mah ba,
tə da.
Tə zla dər ŋgat.
Ta miyak à gà asiŋ gà mburma ata a fata.
Gà asiŋ gà mburma ŋgar ŋgiɗ i liwiŋ gà mburma ata mbaŋa.
Tə ndzaya a gà biy ŋgiɗ,
tə zazamaha ŋgat.
37 Ti ndze a magər duluv ka,
himbiɗ batsah ŋa a dza ba aà mege.
Yam a tsele akaba a hinne,
a de aka terehe aɗəmiŋa.
38 Ama Yesuw ka,
ŋgat a riŋ ika mendze are aà dəba tar.
A tike gər aka təv gər.
Gà ɓəzla mazazama ŋgat ata,
ta ge magəɗa hinne,
ti dzedzeriŋa.
Ta piɗeke à ŋgat.
Ta gwaɗar:
«Əbay,
kər ka,
ki ndze a are ana,
meme?
Ki dzèkwe a a yam.»
39 Aləka Yesuw a hitse aà mbulum ka,
a kwara akaba himbiɗ ata.
Dite a gwaɗa a yam aaha asa:
«Ndza ɗikɗik,
kà ɓə̀zl aba asa tsa.»
Gà himbiɗ ata nda yam a ka,
ta gəs bazlam ŋgar tsara,
tàa ɓazla aba asa tsa.
40 Dite Yesuw a gwaɗa a gà ɓəzla mazazama ŋgat ata:
«Aɗaba la na ki gwim a magəɗa dze ya?
Wànà kàa gəsum iye a gəzləŋ kurum zukw tsiye?»
41 Ama medzedzere i ba tar mba hinne.
Ta gwaɗaba ika magər tar:
«Naha dze ana,
weke ɗara,
na a kwere akaba a gà himbiɗ nda yam ka,
ta gis ahər a ahəm a?»