Əbay sitene ana a dzik à Yesuw a
4
1 Aləka Yesuw a rah nda Mezite Mesife Mbulum lele ka,
a dara i dulwa Yurdan a.
Dite Mezite Mesife Mbulum ata a da à ŋgat a kusak.
2 A daha,
a ge riŋ mehinne dzik faɗ ka,
tar nda Əbay sitene.
I huɗ mehinne ata ya ka,
Əbay sitene ata a riŋ a dzik a à ŋgat pərra.
Aka mə̀ndzər duwa tsidze.
Aləka i dəba ŋa ya ka,
may a dza ahər ba kuɗa.
3 Əbay sitene ata a gwaɗar:
«Na kù gwa,
iye Kəla Mbulum ka,
gwaɗa a kur aaha,
ma ne ɗaf.»
4 *Ama Yesuw a gwaɗar aaka:
«Mewetse ŋa a riŋ i wakita Mbulum ka,
a gwa:
“Mburma a sle aà mendze a ka,
nda ɗaf ɗekɗek tsa.”»
5 I fata ya tsara ka,
Əbay sitene ata a tsəl à ŋgat a gər kwite asa.
A daha,
a patar à gà ahəɗ ana pampam ika gər ahəɗ tserdze ya tsara.
6-7 A gwaɗar:
«Ta vəl mekwere gà ahəɗ aaha fit ka,
a iye.
Ama i sle a aà məvəla a wur ana i waya ya mbaŋa.
Na kàa dziŋ gurmits a bəɗ ka,
i vilek a gər ahəɗ aaha fit dze ya,
a ahər yak,
nda limana ana ikəka ya fit,
ki kweriŋa.»
8 *Yesuw a gwaɗar aaka:
«Mewetse ŋa a riŋ i wakita Mbulum asa ka,
a gwa:
“Zàmbaɗa à Mbulum Batsah yak ŋa,
dite ka zazam ŋgat ilik pəra.”»
9 I dəba ŋa ya,
Əbay sitene a da à ŋgat a Yeruzalem.
A daha,
a tsəl à ŋgat aka zligiɗìŋ aka gər ga Mbulum batsah ŋana.
I fata ka,
a hitse à ŋgat aka tseke zəraŋaŋŋà ŋana.
A gwaɗar:
«Na kər Kəla Mbulum kaɗəŋ ndzer ka,
kal à ba yak a bəɗ i faha ya.
10 *Aɗaba mewetse ŋa a riŋ i wakita Mbulum ka,
a gwa:
“Mbulum a ta gweɗe a a gà gawla ŋgar ka,
ta kasla kər.”
11 *A tsik mbaŋa ka:
“Dite tə ta kətsawa kər,
aɗaba kà dəɗ a bəɗ,
kur ma ta gik mbəlak tsa.”»
12 *I dəba ŋa ya,
Yesuw a gwaɗar aaka:
«Mewetse ŋa a riŋ i wakita Mbulum mbaŋa asa ka,
a gwa:
“Ka ti dzik à Mbulum Batsah yak ŋa tsa.”»
13 I dəba medzike à Yesuw ana Əbay sitene a dzik dər nda təv gà dukw ŋgiɗ pampam a ka,
a ya ba masakəŋa.
I dəba ŋa ya,
a daba i təv ŋgar a tsara,
haa a pat ŋgiɗ asa.
Mege megemir Yesuw ana a dza ahər ba ika ahəɗ Galile ya
14 I dəba ŋa ya,
Yesuw a mbəɗ gər aka ahəɗ Galile ka,
maràhà ŋa nda gà ndzəɗa Mezite Mesife Mbulum i ba ŋgar hinne.
Gà mburma tə dza ba aà maɗə̀vàr zləm i gà kwite ana i fata ya.
15 A dzeŋgewa guma ŋgar a mburma i gà ga mahàmà a Mbulum.
I dəba ŋa ya,
gà mburma ata i fata ya tserdze ka,
tə zləbawa à ŋgat.
Gà mburma ana i Nazaret a, ta gəs Yesuw nda gəzləŋ tsa
16 Dite i dəba ŋa ya,
Yesuw a dara a Nazaret a,
a təv ana a gəl iɗəm ba ya.
Aləka pat mesifikaba a ndzera ka,
a da a ga mahàmà a Mbulum tar,
kamala ana a gewa dər a.
A daha,
a hitse aà mbulum,
aɗaba a sasar aà medzeŋge a tar bazlam Mbulum.
17 Tə daha,
ta vəlarra wakita Ezaya,
mala məmà à bazlam Mbulum ana a tsikewa ya,
a tsik a ter a iɗəm a.
A pəl ikaba à wakita ata ya.
A le aɗəm aà bazlam ana mewetse ŋa iɗəm a.
A gwa:
18 «Iye i ahər Mezite Mesife Mbulum,
aɗaba
a zla iye aà meɗìfè à bazlam ŋgwal ŋana
a gà ɓəzla matawak.
A slərra iye ya ka,
a təv gà ɓəzla daŋgay a,
aà meɗife a tar à məpala à tar.
Dite aà mahə̀ndə̀kà are
a gà ɓəzla guluf mbaŋa
nda gà aà mibeyè à gà na
ti sèwèrewa a tar are ya.
19 *Aà meɗìfè à mive ana Mbulum a sasar
a ta ge a ŋgwal ŋa a gà mburma ŋgar a
asa mbaŋa.»
20 I dəba ŋa ya,
Yesuw a paɗa akaba wakita ata,
a mà dər a mala meslire ga Mbulum ata,
a daha,
a ndza a bəɗ.
Gà mburma ana i fata i ga mahàmà a Mbulum ata ya,
tə dza are aà Yesuw tserdze.
21 Ama Yesuw a gwaɗa a tar:
«Bazlam ana i tsik i wakita Mbulum a ta ge a ba ya ka,
aka ndze aɗəm kuɗa.
Ku mege kamala ana kinehe i dzeŋge,
kà tsarakum a tekeɗe ya.»
22 Ama gà mburma ata tserdze ya,
ta màraha aba,
tə dzala i gər tar,
ta gwa:
«Bazlam ata a tsik a ya ka,
a da a kwa a gər.»
Ta fə̀r ahər ka,
ta gwa:
«A ŋgatara metsehe aaha dze ana,
i ŋga ya kataya ya?
Aɗaba ŋgat ka,
kəla Yasufa ya?»
23 I dəba ŋa ya,
Yesuw a gwaɗa a tar aaka:
«Ki ti sewlwim aà iye a nda bazlam ata,
pàrsa iɗəm tsa.
Ki gweɗwim a ka:
“Kər kà ne dàkwtar,
mbəl à ba yak dukw yak.”
Ki ta gweɗwim a mbaŋa ka:
“Maa tsaraka gà dukw ana ki ge i Kafarnahum a.
Ama kinehe ka,
ge i faha,
i kwite ana ta gəl iɗəm kər a asa mbaŋa.”»
24 I dəba ŋa ya,
Yesuw a gwaɗa a tar aaka asa:
«Iye ihər i gweɗe a kurum a nda ndzer,
pàrsa iɗəm tsa:
Wura ta wa ŋgat i fata,
a gəl ba tekeɗe,
i kwite ata,
dite à me à bazlam Mbulum i fata asa ka,
wura à gis a bazlam ŋgar nda gəzləŋ,
ta ger a magəɗa lele tsa.
25 Iye ihər i tsik a kurum a ka,
nda ndzer,
màhaw iɗəm tsa:
Akahər ana Iliya a màwa à guma Mbulum a mburma ya ka,
gà madakwa gà məkəs duwa a riŋ hinne ika ahəɗ Isərayel.
Ama ka,
yam aka dza tsa mive makər nda kiye ndilik.
I fata ya ka,
batsah may a ndəv gà mburma ana i fata ya fit.
26 *Ama Mbulum aka slər Iliya a təv gà madakwa gà məkəs ata ɓav tsa.
A slər ŋgat ka,
a təv madakwa məkəs duwa a riŋ mandza ŋa i Sarapta ika ahəɗ Sidun.
27 *Akahər ana Iliyaza a màwa à guma Mbulum a tekeɗe ka,
gà ɓəzla vèdègwè a riŋ i kwite Isərayel hinne mbaŋa asa.
Ama wura aka mbəl ika magər tar a ilik tsidze.
Say Naaman ana ika ahəɗ Siriya ya ɗekɗek.»
28 Gà bazlam ata Yesuw a tsik i ga mahàmà a Mbulum a ka,
a wur aà gà mburma ana i fata ya tserdze.
Ta ge arəv nda təv ŋgar hinne.
29 Tə daha,
ti tsiheyerra ahər i kə̀sà ya.
Tə da à ŋgat aka gər zalaŋ ana zəraŋaŋŋà ŋana,
aà melìmer aɗəm zləmana.
30 Ama i dəba ŋa ya,
Yesuw a dara ika magər tar a tsìrìɗ tsìrìɗ tsìrìɗ,
a mà aka vatwa ŋgar dukw ŋgar.
Wele ana sitene a darra i ba ya
31 Aləka i dəba ŋa ya,
Yesuw a da i fata ya ka,
a da riŋ a Kafarnahum ika ahəɗ Galile i fata.
A daha a fata ka,
a dza ba aà metsìkè guma ŋgar a gà mburma i ga mahàmà a Mbulum i fata,
a pat mesifikaba.
32 *Ama guma ŋgar ata a tsik a ka,
arəv a da dər aà tar a,
a ge aà tar kamala dukw mene aà mburma ya.
Aɗaba bazlam ŋgar ana a tsik a ya ka,
sləsla ihər,
kamala biy Mbulum a.
33 Ama ka,
wele duwa a riŋ i ga ata,
duwa a gasawa ŋgat.
A dza ba aà Mewideye hinne nda ndzəɗa.
34 A gwaɗa a Yesuw:
«Ki yehe a aà mə̀r la ya,
na kər ana kà dara i Nazaret a?
Kà dara ana,
aà medzeye à mə̀r kəla ya?
I sər kər lele.
Kər ka,
wur ana bakal ŋgar a riŋ tsa,
Mbulum a slərra a faha ya.»
35 Yesuw a tirɓe akaba sitene aka lele.
A gwaɗar:
«Kà fàfəl asa tsa,
tsəma,
dara i ba wele aka ya.»
Sitene ata a yà wele ata a bəɗ aka miɗ gà mburma ata.
Dite a darra i ba ya nda zèyezèye ŋa ya,
aka ger madzək tsa seyiŋ.
36 A ge aà gà mburma ata i ga ata ya tserdze kamala sunwa ya.
Ta gwaɗaba ika magər tar:
«Yweh,
yweh,
medzibe mifefile là na naha,
wele aaha a kwara akaba gà sitene aaha nda ndzəɗa ka,
dite ta gəs ahər ahəm,
tə dara i ba mburma ya?»
37 I dəba ŋa ya,
gà mburma ata tserdze ya,
ti ɗewa zləm à Yesuw ika ahəɗ ata hinne.
Yesuw a mbala à gà ɓəzla dukw məməta hinne
38 Aləka i dəba ŋa ya,
Yesuw a da i ga mahàmà a Mbulum ata ya,
a da a bəra Simun.
A daha ka,
dzìdze Simun a riŋ mahə̀nà ŋa ika slə̀làh,
màràɓàraɓ a geriŋa.
Gà mburma ana i fata ya,
ta gwaɗa a Yesuw:
«Mbəl à ŋgat te.»
39 Yesuw a daha,
a kirik aakaha a bəɗ,
a kwara akaba màràɓàraɓ ata kwirik kwirik,
dite a ndala aà məkəs ata ya tsara.
I dəba ŋa ya,
məkəs ata a hitse aà mbulum,
a sle aà mege a tar mbəlakw lele kuɗa.
40 Aləka pat a dəɗ ka,
gà na gà masla tar a riŋ nda gà dukw məməta pampam hinne ya,
tə ndzakara tar a təv Yesuw a.
A dzaya aka tar ahər,
aka gər gà ɓəzla dukw məməta ata ilik ilik tserdze.
Dite ta mbala i dukw məməta tar a.
41 A beye à tar i ahər sitene ya,
dite tə dara i ba tar a nda gà Mewideye ya hinne mbaŋa.
Ta gwaɗa a Yesuw nda gà Mewideye:
«Kər ka,
Kəla Mbulum.»
Ama Yesuw a tirɓe akaba tar hinne.
A gwaɗa a tar:
«Kà fàfəlum tsa.»
Aɗaba ana tar ka,
tə sər ŋgat,
ŋgat ka,
*Kiristi,
mala məmbala à mburma ana Mbulum a gwa,
i slir a kurumehe a ya.
Yesuw a tsikewa bazlam Mbulum ika ahəɗ Yuda
42 Aləka mbulum a dəv mbètiyyè ka,
Yesuw a mah ba i kə̀sà ata ya tsara,
a daba a təv ana mburma riŋ iɗəm tsiye.
Gà mburma ata tə ta medeha aləka ka,
a riŋ i fata tsa,
aka da a tseke ŋgiɗ.
Tə dza ba aà mayaha ŋgat.
I dəba ŋa ya,
ti le aà ŋgat aləka ka,
tə dza ba aà magəsa ŋgat,
dite ka,
ma da aà tar a asa tsa.
43 Ama Yesuw a gwaɗa a tar:
«Say i ti tsik a bazlam ŋgwal ŋana biy mekwere Əbay Mbulum a gà asiŋ gà mburma ana i gà kwite ŋgiɗ a mbaŋa.
Aɗaba taŋa na Mbulum a slərra iye ya.»
44 A da aà tar i fata ya.
A da aka ahəɗ Yuda.
A daha,
a tsikewa bazlam Mbulum a mburma i gà ga mahàmà a Mbulum ana i fata ya.