Gà ɓəzla mazazama Yesuw ana malahalah ŋa ya
5
1 A pat duwa,
Yesuw a riŋ mandza ŋa aà guva duluv Genezaret,
dite gà mburma hinne ta mbàha aba a təv ŋgar aà matsaraka bazlam Mbulum.
Ti yahaba gər,
ta ŋgiɗits a ŋgat.
2 Ama Yesuw a pə̀r ikaba ya ka,
a ŋgat a gà slə̀làh yam a riŋ aà gìgìze i fata sula.
Gà ɓəzla magàsà kilif tàa tarəra iɗəm a,
tar riŋ ta bere a aà gà ndzàràwà tar a.
3 Yesuw a daha,
a tsəl a biy ŋgiɗ ilik,
a biy Simun.
A ndza aɗəm,
a gwaɗa a Simun:
«Kamkam,
sìrìk à slə̀làh yam yak aaha aà guva gìgìze ya zaakwa te.»
Wele aka a sìrìk dər aka magər yam zaakwa.
Dite Yesuw a daha,
a ndza aɗəm.
I dəba ŋa ya,
a dzara ba aà metsìkè guma ŋgar a gà mburma iɗəm i fata ya.
4 Aləka a ndəv à mifefile ŋgar ata lele ka,
a gwaɗa a Simun:
«Sìrìk à slə̀làh yam yak aaha aka magər yam a təv ana biye iɗəm a asa.
Dite kà pə̀lum aɗəm à gà ndzàràwà kurum nda gà ɓəzla meslire yak,
kə gasumara iɗəm kilif a.»
5 Simun a gwaɗar aaka:
«Əbay gà,
maa ya ba ndaavəɗ ka,
hinne,
ama maa gəs kilif ŋa ilik tsidze.
Ama ka,
na kàa gweɗiŋ,
pəl dər aɗəm ka,
i niw a tsa,
i pìl a dər aɗəm.»
6 Ta pəl aɗəm à ndzàràwà ata,
a da a huɗ yam.
Zàkwayiya ka,
aha ŋana ta gwa,
mìi ŋgil a dərra iɗəm a tsiye ka,
ndzàràwà ata a ɗe ndìrìtsìtse,
kilif maràhà ŋa iɗəm ìdìp.
7 Ta geha wiyèw a gà masla tar ana i slə̀làh yam ŋgiɗ a,
dite ka,
tə dara,
tə̀ zlak ahərra iɗəm tar a te.
Gà mburma ata tə daha,
tə zlak ahər tar aà mə̀ŋgəlà dərra iɗəm a.
Tə raha dər a gà slə̀làh yam tar ata fèɗìɗe fèɗìɗe.
A zehe ka,
hinne tsidze,
na slə̀làh yam tar ata à pìts à ter a a huɗ yam a,
aɗaba mibe kilif ata a rah aɗəm hinne ya.
8 Simun Piyer a ŋgat a kilif ata kataya tsara ka,
a daha,
a kal aba aka sik a Yesuw nda gà mandza gurmits a biye.
A gwaɗa a Yesuw:
«Sìrìk i təv ga ya,
Batsah ga ŋa.
Iye ka,
mala bakal kweleŋ.»
9 Aɗaba kilif ata ta gasara i yam a hinne ya ka,
a ge magəɗa a gà Simun nda gà ɓəzla meslire ŋgar ata tserdze ya.
10 A dzadzar à gà masla ŋgar gà Zakup nda Yuhana,
gà ɓəza Zebede aaha a zal a tar aàba ya mbaŋa.
I dəba ŋa ya,
Yesuw a gwaɗa a Simun:
«Magəɗa ma gik tsa.
Daga aà kinehe ya,
ki ne a mala mayahara gà mburma i luvuŋ a,
kamala kilif aaha kurum riŋ ki geswimere a i yam a,
dite ka,
gà mburma ata ibam,
tə dara a təv dzaydzay ŋa ya.»
11 I dəba ŋa ya,
gà mburma ata ti sìrìkera à slə̀làh yam tar aka gìgìze ya.
Ta məsak à gà tsir tar nda gà ɓəzla meslire tar nda gà dukw tar ata tserdze ya a fata,
tə zazam Yesuw tsara.
Yesuw a mbəl à mala vèdègwè duwa
12 A pat duwa,
Yesuw a ndze a batsah kwite duwa ka,
tàa lə̀ma nda mala vèdègwè duwa.
Ama wele ata a ŋgat a Yesuw tsara ka,
a kal aba aka miɗ ŋgar,
a hamar.
A gwaɗar:
«Əbay,
na mege kà waya ka,
ki sle a aà mimbile à iye te.»
13 I dəba ŋa ya,
Yesuw a tsaraka bazlam ŋgar ata ka,
a zla ahər ŋgar,
a ləm dər ahər.
A gwaɗar:
«Haya,
a sèsiŋ na ki mbil a ya.
Kinehe ka,
mbəl i dukw məməta yak a.»
I fata ya ka,
mbəlak ba wele ata a ndala ihər a suwut tsara.
14 *Ama Yesuw a gwaɗar asa:
«Hey,
ka ti tsik a wura tsidze.
Ama kəla ka,
da,
ka ta pàt à ba yak a mala mandəva kuɗa a Mbulum,
dite mà samata kər,
ma sər dər ka,
meme na kà ndza kinehe kuɗa ya.
I dəba ŋa ya,
ka vəl dukw masakəŋana a Mbulum,
kamala ana Musa a tsik a.
Dite gà mburma ta ŋgeteke a,
ti sir a dər ka,
kàa mbəl kaɗəŋ a.»
15 Tsaatsa ivaɗ,
wele ata a mbəɗ ba,
a neye ŋgat.
Meɗè zləm Yesuw a ɗe zləm i fata hinne.
Gà mburma hinne ti yahawa ba gər aà matsaraka dukw ana a tsik a ya,
ta waya,
dite mə mbala à tar i dukw məməta tar a.
16 Ama Yesuw ka,
a hitse i fata ya tsara,
a daba a təv ana mburma a riŋ iɗəm tsiye.
A daha,
a hama a Mbulum i fata.
Yesuw a mbəl mala magàha a bəɗ duwa
17 A pat duwa,
Yesuw a riŋ ihər a tsik a guma ŋgar a gà mburma.
Gà *Farisa nda gà ɓəzla medzeŋge məpala ahəm Mbulum a riŋ mandza ŋa i ga i təv ŋgar bise.
Ama gà mburma ata ka,
tə dayara ka,
i Yeruzalem a nda gà i gà asiŋ gà kwite ŋgiɗ ana ika ahəɗ Yuda ya,
nda gà ika ahəɗ Galile ya mbaŋa.
Ama ka,
ndzəɗa Əbay Mbulum a riŋ nda Yesuw,
a zlàkawa ŋgat aà məmbala à gà ɓəzla dukw məməta.
18 I təv ana a riŋ a tsik a guma ŋgar ata ya ka,
gà misle ŋgiɗ pam tə daraha à mala magàha a bəɗ duwa,
meŋgè ŋa aà slə̀làh.
Gà mburma ata tə da dərraha ya ka,
ta waya metìkè wele ata aka miɗ Yesuw,
aà mipèter dər riŋ i ga ata.
19 Ama tə sər dər vatwa a təv ŋgar a ga tsa,
aɗaba gà mburma a riŋ hinne i ga i təv ŋgar i fata ndaka biye hərmaga ŋa dze.
Tə daha,
ti yaha dər vatwa,
tə tsəl dər aka ga ata ŋgat iɗəm a.
Ŋgər tə təm gər ga,
ser aka Yesuw.
Tə zla mala magàha a bəɗ ata,
ta gasa i liɓir a.
Ti ndzer dərraha nda slə̀làh ŋa dze.
20 I dəba ŋa ya,
Yesuw a samata gəzləŋ gà mburma ata ka,
ta gəs ŋgat lele.
A gwaɗa a mala magàha a bəɗ aaha:
«Masla gà,
Yàa pə̀lak à bakal yak.»
21 Aləka i dəba ŋa ya asa,
gà ɓəzla medzeŋge məpala ahəm Mbulum ata nda gà Farisa ya,
tə dza ba aà madzala ŋa nda gà gər.
Ta gwa:
«Wele aaha dze ana,
weke,
na ŋgat ka,
a tsik a duwa aà Mbulum kataya,
a ndeveyer a ya?
Weke na a sle aà məpəla à bakal a mburma ya,
na Mbulum ilik tsiye?»
22 Yesuw a səraha aka dukw ana tə dzala i gər tar a tsara.
A gwaɗa a tar:
«Aàmala na kà dzalum gà gər kataya ya?
23 Magwàɗà a mala magàha a bəɗ:
“Yàa pə̀lak à bakal yak” nda bazlam masakəŋa ka,
a wur ba tsa,
kige tsa:
“Hitse,
ka zla slə̀làh yak,
dite ka da” ka,
taŋa ka,
a wur ba.
24 Ama a sèsiŋ ka,
sərum dər,
iye,
*wur ana a dara i təv Mbulum a,
iye riŋ nda gà ndzəɗa aà məpəla à bakal a mburma ika gər ahəɗ.»
I dəba ana Yesuw a tsik a tar kataya ya tsara ka,
a gwaɗa a mala magàha a bəɗ ata:
«Iye i gwaɗak,
hitse,
ka zla slə̀làh yak,
ka daba a ma.»
25 Wele ata a hitse tsara,
ika miɗ mburma i fata,
a zla slə̀làh ŋgar ata tə zla dərraha ŋgat a.
A daba a ma nda gà mazàmbàɗà a Mbulum hinne.
26 A mà dər a gà mburma ata tserdze ya dà/?asasa,
a ge aà tar kamala dukw mene aà mburma ya.
Tə dza ba aà mazàmbàɗà a Mbulum nda magəɗa hinne i gəzləŋ tar.
Ta gwa:
«Yweh,
yweh,
maa ŋgat a gà dukw mene aà mburma mbakum.»
Yesuw a zal a Levi
27 Aləka i dəba ŋa ya,
Yesuw a dara i ga ata ya,
a daba.
I təv ana a riŋ a de a ya ka,
a ŋgat a mala duwan duwa,
zləm ŋgar Levi,
a riŋ mandza ŋa i ga duwa i təv megemir ŋgar.
Yesuw a daha,
a gwaɗar:
«Dara,
zezem iye.»
28 Ama Levi a tsaraka kataya tsara ka,
a hitsera i fata ya,
a miyak à gà dukw ŋgar nda gà megemir ŋgar ata tserdze,
a zazam ŋgat.
29 Aləka i dəba ŋa ya,
Levi a de dukw mezime hinne i ma ŋgar.
A ndzəkara aka miɗ Yesuw a.
A zal dər a gà ɓəzla duwan ŋgiɗ,
nda gà masla ŋgar tserdze hinne.
Tə zəm akaba.
30 Ama gà *Farisa nda gà ɓəzla medzeŋge məpala ahəm Mbulum ana gà mburma tar a,
tə dza ba aà masàyà ahəm,
ta gwaɗa a gà ɓəzla mazazama Yesuw ana i fata ya:
«Aàmala na kà zəmum akaba ɗaf nda masàyà duwa nda gà ɓəzla duwan aka dze ya,
dite nda gà mburma aka meɗè zləm tar ŋgwala tsiye ya?»
31 Ama Yesuw a gwaɗa a tar aaka:
«Wura a de a a dàkwtar tsa,
na ba ŋgar a riŋ lele ya.
Say na a riŋ nda gà dukw məməta ya dzekwiŋ.
32 I dara ka,
aà mazàlà a gà na ta gweɗe a,
waytsa mə̀r gà ŋgwal ŋa ika miɗ Mbulum a tsa.
Say a gà ɓəzla bakal ivaɗ,
dite ka,
ta mbəɗ à gəzləŋ tar a təv Mbulum mbaŋa.»
Mege ndəra i təv Yesuw
33 Aləka gà mburma ata ta gwaɗa a Yesuw:
«Gà ɓəzla mazazama Yuhana ta gewa ndəra,
dite ka,
ta hamawa a Mbulum asa.
Gà mburma mə̀r gà *Farisa tekeɗe ibam,
ta gewa kataya mbaŋa dze ana,
aàla na gà ɓəzla mazazama kər ka,
tə zəmawa ɗaf nda masàyà duwa tserdze ya?»
34 Ama Yesuw a fàfəl a tar aaka,
a live dər à ba ŋgar nda mazla daala ya.
A gwaɗa a taraha:
«Kà dzalum dze ana,
ti sle mifère ndzəɗa aka gà mburma ana zal daala a zal a tar à dukw mezime ya ya,
dite ka,
tə zəm ɗaf ata asa tsiye ya?
Bəla na tar riŋ i təv ŋgar ibam a?
Taŋa ka,
a sle a ba tsa.
35 Ama pat ŋgiɗ a riŋ a ndzere a mba,
na ti zle a aà tar zal daala aaha ya.
Na pat ŋa aka ndzera ka,
taŋa ka,
ti sle a aà mege ndəra kuɗa.»
36 I dəba ŋa ya,
Yesuw a tsik a tar bazlam minew ŋgiɗ pam asa.
A live dər aba nda guma ŋgar ana awiya ŋa ya.
A gwaɗa a tar:
«Wur a a sle a aà mesèsera awiya petek a,
dite a dep a a miviye petek tsa.
Aɗaba taŋa ka,
awiya ŋa aaha aka nəs mbaŋa.
Miviye ŋa aaha ibam,
a ge a ŋgulum asa tsa,
ndzəɗa ŋgar aka mbər mendìve.
37 Kamala taŋa ya asa mbaŋa,
wura a sle aà medzè a guzum himmè ŋa,
a duwa kwiye ana miviye ŋa ya tsa.
Aɗaba dukw ata ka,
a kwese a mba.
Duwa kwiye ata miviye ŋa ya ka,
à zlìrite a asa tsa,
ə̀nduh à ndìzliŋa.
Bəla na aka ndə̀zl ka,
dukw aaha à dzìŋa,
dite duwa kwiye ata ibam,
aka dzeye.
38 Ama ka,
kataya tsa.
Say mandza guzum himmè ŋana ka,
a duwa kwiye ana awiya ŋa ya mbaŋa.
39 Ama wura a sle a aà masà guzum himmè ŋana asa tsa,
na aka mbər mese makwàsà ŋana ya.
A gweɗe a ka,
say makwàsà ŋana,
na ŋgwal ŋa ya.»