Yesuw a mbəlara i məməta ya
16
1 Aləka pat mesifikaba gà Yahuda a da iɗəm a ka,
gà Mariya ana a dara i Magədala ya,
nda gà Salume,
nda gà Mariya məmər Zakup,
tə səkəm wirdè ana a ze hwaŋŋa lele ya,
ta waya mibehe aà məməta Yesuw.
2 Ndidwe ŋana,
a pat ladà i mèkwède,
aka pat ana birìzze à mbizere a ya ka,
gà daala ata tə da aka dive Yesuw.
3 I təv ana ti de a mba ya ka,
tə dzala,
ta gwa:
«Weke na a ti tèpèslekwere a beliŋ aà dive ŋa ya kuɗa ya?»
4 Ama ti ndzeha a fata,
ta fə̀raha ka,
batsah beliŋ ata mahə̀ndə̀kà ŋa ara ihər a.
A riŋ dzèŋŋe aà guva ŋa.
5 Tə daha,
ta patsaha aɗəm ka,
tàa leha aà wele duwa gà ɓəza,
ar taŋa a ge a gawla ya.
A riŋ iɗəm tùŋŋa,
mandza ŋa ika tseke ahər mezime,
nda gà andiw tàs herrè ŋa.
Ta ŋgat a wele ata tsara ka,
arəv a da aà tar a.
6 Ama wele ata a gwaɗa a tar:
«Ki gwim magəɗa,
arəv ma da aà kurum a tsa.
Ki yehwim a Yesuw ana a dara i Nazaret,
tə ndwandway ŋgat aà dizl magə̀làwà ŋa ya tsə̀nà?
Ama ka,
ar ɗa i faha tsa.
Mbulum aka mbəl à ŋgat i məməta ya.
Fə̀rum aà təv ana ti tike aɗəm a kwaŋ bə̀là.
7 Dum kinehe,
ta gwaɗum a gà ɓəzla mazazama ŋgat,
a gà Piyer ka,
aka mbəlara i məməta ya.
A lèh a kurum a aka miɗ a aka ahəɗ Galile.
Ki ta ŋgetwimer a ka,
a fata,
kamala ana a tsik a kurum a.»
8 Tə tsaraka bazlam wele ata kataya tsara ka,
tə tə̀zara i dive ata ya.
Tə dza ba aà medzedzere hinne,
arəv a da aà tar a.
Ta gəs metsike aba bazlam wele ata a wura ya tsa,
aɗaba ta gwa:
«Duwa aka ne aà mə̀r.»
Ta ge magəɗa.
Yesuw a lah məpàtà à ba ŋgar a Mariya ana a dara
i Magədala ya
9 Yesuw a mbəlara i məməta ya ka,
i mèkwède hedwe,
a pat ladà.
A lah məpàtà à ba ŋgar ka,
a Mariya ana a dara i Magədala ya,
daala ana a dalawa ihər gà sitene təsəla ya.
10 Daala ata a da a təv gà na tə ndzawa nda gà Yesuw tserdze ya.
A daha ka,
tar riŋ ti tiwiŋa,
aɗaba gər a tsahən aka tar tsa.
A tsik a tar dukw ana a ge ba nda ŋgat a.
11 Ama tə tsaraka bazlam ŋgar ata,
a gwaɗa a tar ka:
«Yàa ŋgat a Yesuw,
aka mbəlara i məməta ya» tekeɗe ka,
ta gəs bazlam ŋgar ata a gəzləŋ tar tsidze.
Ta gwaɗar:
«Pàrsa.»
Yesuw a pàt à ba ŋgar a gà ɓəzla mazazama ŋgat sula
12 I dəba ŋa ya,
gà ɓəzla mazazama ŋgat sula ti de a a dala.
Yesuw a mbəɗ ba ŋgiɗ,
dite a pàt aba.
A dara a təv tar aka vatwa ya.
13 Gà mburma ata sula ya,
ta mbəɗara gər a ma ya.
Tə dara,
ti tsik dukw ata a ge ba nda tar ika vatwa ya,
a gà asiŋ gà mburma.
Ama gà mburma ata ta gəs ɓav tsa asa,
ta gwaɗa a tar:
«Pàrsa mbaŋa.»
Yesuw a pàt à ba ŋgar a gà ɓəzla mazazama ŋgat
kurwa gəra ilik kuɗa
14 Aləka i dəba ŋa ya,
i təv ana gà ɓəzla mazazama ŋgat kurwa gəra ilik ŋa aaha tar riŋ ti zim a ɗaf a ka,
Yesuw a pàt a tar aba asa kuɗa.
A pala a tar ahəm,
agəra ana tàa gəs ŋgat nda gəzləŋ lele tsiye.
Aɗaba ana tàa gəs bazlam gà mburma ata ta gwaɗa a tar ka:
«Maa ŋgatar,
aka mbəlara i məməta ya» ka,
ta gəs tsiye.
15 I dəba ŋa ya,
a gwaɗa a tar:
«Kinehe ka,
dum,
ku mege a ŋga,
ka tsikwim bazlam ŋgwal ŋa aaha a gà mburma ana tserdze ika gər ahəɗ a.
16 Wur ana aka gəs iye nda gəzləŋ,
tàa tsilwiɓ dər a yam a ka,
a mbiliŋa.
Ama wur ana aka gəs iye tsiye ka,
sida ika gər ŋgar.
17 Gà na tàa gəs iye ya ka,
i vile a ter a ndzəɗa,
aà mege dukw mene aà mburma,
nda madalawa gà sitene aà mburma ya nda zləm gà.
Ta fèfil a gà bazlam gà kwite ŋgiɗ pampam.
18 Ku mege tàa gəs mesiwiɗ a ahər,
ku mege tàa sa mawur tekeɗe ka,
à lèh a ter a duwa tsidze.
Tàa tike ahər aka gà ɓəzla dukw məməta ka,
ta mbil a tsara.
Tàa ge gà dukw ata ka,
gà mburma ti sir a dər ka,
iye na a slər ahər tar a.»
Mbulum a zla Yesuw a təv ŋgar
19 Əbay Yesuw a fàfəl a tar aba ya kamala taŋa ya tsara ka,
Mbulum a zla ŋgat.
A da à ŋgat a ma.
Yesuw a daha,
a ndzaba aka tseke ahər mezime Mbulum.
20 Gà ɓəzla mazazama ŋgat ibam,
tə da a metsìkè bazlam ŋgwal ŋa aaha ndeɗiŋa ya,
ku mege a ŋga.
Əbay Yesuw a gewa megemir nda gà tar kuɗa.
A zlàkawa tar i dukw mene aà mburma ata ta ge a ya.
Aɗaba gà na tə tsaraka ya tekeɗe,
ta gəs bazlam tar ata ndzer kaɗəŋ.