Ga Ɓəzla Meslire 6

Ta pala gà mburma təsəla aà mazlàkà gà ɓəzla

meslire Mbulum

1 Akahər ata ka, gà ɓəzla magəsa Yesuw nda gəzləŋ tar riŋ ti sìkèh a gà Yahuda ana ta fèfil a ndaka ahəm girek a ka, ta mbetsebe a ahəm hinne nda matsəɓatsəɓ nda gà Yahuda ana i ma ika dizl a. Ta gwaɗawa ka: Gà madakwa gà məkəs mə̀r ta ŋgatawa dukw mezime ana tə dzayawa a tar a lele tə tsa. 2 I dəba ŋa ya, gà ɓəzla meslire Mbulum ana kurwa gəra sula ya, ti yaha gər a gà asiŋ gà ɓəzla mazazama Yesuw ŋgiɗ tserdze. Ta gwaɗa a tar: «Mìi mìts a aà metsìkè bazlam Mbulum a, dite mìi dzèye a iba dukw mezime a mburma ya ka, a tsahən tsa. 3 Aɗaba taŋa, gà damər gà, palum mburma təsəla ika magər kurum a, gà ɓəzla metsehe ana tàa rah nda Mezite Mesife Mbulum lele, wirwir i ba tar tsiye. Ka vəlakwa a tar megemir ŋa a ahər tar, ta ge. 4 Dite i dəba ŋa ya, mìi sle a aà meŋgete vatwa kəla pat, aà mahàmà Mbulum nda metsìkè bazlam ŋgar kuɗa.»

5 Ama bazlam tar ata a da a gər a gà mburma tserdze. Tə daha, ta pala gà mburma ata. Malahalah ŋa ka, tə zla Etiyen, wele ana a gəs Mbulum lele, maràhà ŋa nda Mezite Mesife ŋgar a. Dite tə ndzək gà Filip nda gà Purukwar, nda gà Nikanur, nda gà Timun, nda gà Parminas, dite nda gà Nikwalas gà slele ana i kwite Antakiya, akahər ata a zazam matawala dukw gà Yahuda ya. 6 Aləka i dəba ŋa ya asa, tə ndzəkaha tar a təv gà ɓəzla meslire Mbulum ata. Tə daha ka, gà mburma ata tə dzaya aka tar ahər. Ta hama aà Mbulum agəra tar.

7 Bazlam Mbulum a ɗe zləm hinne. Gà ɓəzla mazazama Yesuw tə səkah hinne i Yeruzalem, dite gà ɓəzla mandəva kuɗa a Mbulum hinne ta gəs Yesuw nda gəzləŋ tar mbaŋa.

Magəsa Etiyen ana ta gəs a

8 Ama Mbulum a pise ahəm a Etiyen, a vəlar ndzəɗa, dite a gewa gà dukw mene à mburma hinne nda gà dukw ŋgiɗ pampam ika magər gà mburma. 9 Ama ka, gà asiŋ ŋa ta gəs bazlam ŋgar tsa. Tar ka, gà na i ga Mbulum ana tə zalar «ga Mbulum gà ɓele ana tàa pəl à tar a. » Ta gaw ba nda gà Yahuda ana tə dara i Kirene ya əŋgal, dite gà na tə dara i Aleksandiriya ya əŋgal asa, dite nda gà asiŋ gà Yahuda ana tə dara i Kilikiya ya, nda gà na ika ahəɗ Asiya ya mbaŋa. Tə dza ba aà mimbètsèba ahəm nda gà Etiyen. 10 Ama Etiyen a be tar nda bazlam, aɗaba Mezite Mesife Mbulum na a vəlar metsehe aà mifefile kataya ya.

11 I dəba ŋa ya, ta vəl gwarwa a gà mburma, dite gà mburma ata ta gwa ka: «Maa tsaraka bazlam aà Etiyen a, aka tsik dukw ana ŋgwal ŋa tsiye, aà gà Musa nda Mbulum.» 12 Tə dza ahər gà asiŋ gà mburma ŋgiɗ nda gà bàba ŋa ana ta kwere a gà Yahuda ya, dite nda gà ɓəzla medzeŋge məpala ahəm Musa asa mbaŋa. Gà mburma ata tə daha, ta gəs Etiyen, dite tə da à ŋgat aka miɗ mayahaba gər mburma. 13 Tə ndzəkaha gà ɓəzla masasa à ŋgat pàrsa ata mbaŋa. Gà mburma ata ta gwa: «Wele aaha ka, a tsikewa dukw ana ŋgwal ŋa tsiye, aà batsah ga Mbulum kwa aaha, dite aà məpala ahəm Musa asa. 14 Mì tsaraka à ŋgat a ka, Yesuw gà Nazaret aaha a ta mbezle a à batsah ga Mbulum aaha, dite a ta mbìɗ a à matawala dukw ana Musa a gwa, zazamum a.»

15 Gà mburma ana mandza ŋa i bəɗ i təv mayahaba gər tar ata ti yahawa ba aɗəm gər tserdze ya ka, ta màha à are aka Etiyen ba bà ba ba. Ta fə̀r ahər ka, yemere ŋgar twiy twiy twiy à div a kamala gawla Mbulum a.