Ruma 1

Wakita ana Pul a wetseha

a gà mburma Mbulum ana

i RUMA ya

Pul a geha wusa a gà mburma Mbulum ana i Ruma ya

1 Na a wetse wakita aaha ka, iye Pul, mala megemir Yesuw Kiristi. I wetseha ka, a kurum gà mburma Mbulum ana i Ruma ya. Mbulum a zeliŋ, a ne à iye mala meslire ŋgar, na dite i ɗif a à ŋgwal bazlam ŋgar aaha a mburma ya. 2 Bazlam ŋgwal ŋa ata ka, Mbulum a tsik i sida ya piŋŋe, a gwa, i ti slir a kurumehiŋa. A tsik ahər ka, a gà ɓəzla məma à guma ŋgar, na dite ta wetse a wakita ŋgar a. 3 Bazlam ŋgwal ŋa ata ka, aka gər Yesuw Kiristi, Kəla ŋgar ana ŋgat BATSAH kwa ŋa ya. Kà sərakwa, ta wa ŋgat ka, i gwala Dawda ana ŋgat Əbay akahər ata ya. 4 Ama i təv ana Mbulum a mbəlara à ŋgat i məməta ya, a ɗif dər ka, Kəla ŋgar ana a vəlar ndzəɗa aka gər gà duwa tserdze ya. 5 Mbulum a zla iye ka, aɗaba Kəla ŋgar ata, dite a ne à iye mala meslire ŋgar a. Kamala taŋa ya, a giŋ ŋgwal ŋa, na dite ka, i ɗif a à bazlam ŋgar a mburma, ku mege i ŋga, ika gər ahəɗ tserdze ya. A sasar ka, ta gəs ŋgat nda gəzləŋ, dite ta gəs ahər ahəm, tə̀ zlə̀b à Yesuw Kiristi. 6 Kurum gà mburma Mbulum ana i Ruma ya, kurum tekeɗe ka, ika magər gà mburma ata mbaŋa. Aɗaba Mbulum a zal a kurum ka, na dite ki nwim a gà mburma Yesuw Kiristi ya mbaŋa.

7 Kamala taŋa ya, na i ge a kurumaha wusa tserdze, a kurum gà mburma ana Mbulum a waya kurum i Ruma ya. A zal a kurum ka, dite ka nwim gà mburma ŋgar. Gà Mbulum Tsir kwa nda Yesuw Kiristi BATSAH kwa ŋa, ta pise a kurum ahəm, ta vəl a kurum matasla yam a gəzləŋ zayya lele.

Pul a waya a de a a məpə̀rà aka gà mburma Mbulum ana

i Ruma ya

8 Malahalah ŋa, i ge a kəkaaha a Tsir gà Mbulum, aɗaba kurum tserdze. I ger kəkaaha ka, agəra Yesuw Kiristi. Aɗaba ku mege i ŋga, ika gər ahəɗ tserdze ka, tàa tsaraka megìse kurum ana kə̀ gəsum ŋgat nda gəzləŋ a. 9 Ku mege ndeɗime, i hamawa a Mbulum ka, aɗaba kurum. Ama Mbulum ana i ger a meslire nda gəzləŋ ilik, i ɗif a à ŋgwal bazlam ata aka gər Kəla ŋgar a ka, a sər, dukw ana i tsik a ya ka, ndzer kaɗəŋ, pàrsa iɗəm tsa. 10 Iye ihər i hemer a kəla pat ka, dite mi viliŋ vatwa aà madaha a təv kurum, i fir a aka kurum a te, na mege ŋgat a waya ya. 11 Aɗaba a sèsiŋ ka, hinne na i ŋget a kurum a te, dite ka, Mbulum a pise a kurum a ahəm nda ahər Mezite Mesife ŋgar a. Kamala taŋa ya, na Yàa daha a təv kurum ka, a sèsiŋ ki ŋgetwime a ndzəɗa a gəzləŋ kurum ɓəŋɓəŋ lele. 12 Kige tsa, ŋgulum i gweɗe a ka, kwa tserdze mayakwabaha à arəv, na dite ka, megìse kurum ana kə̀ gəsum Yesuw Kiristi nda gəzləŋ kurum a ka, à mìŋgehe a à arəv a. Kamala taŋa ya, megìse gà ana i gəs Yesuw Kiristi nda gəzləŋ a tekeɗe ka, à mèye a kurumaha a arəv mbaŋa.

13 Gà damər ga, sərum dər ka, sik diŋ na i yahawa vatwa aà madaha a təv kurum a. Ama ka, haa kinehe Yàa ŋgataha vatwa zukw tsa. A sèsiŋ, i dehe a ka, aà mazlàkà kurum, kamala ana i zlàkawa gà asiŋ gà mburma ana ika gà ahəɗ ŋgiɗ a mbaŋa, na dite gà asiŋ ŋa ta mbìɗ a à gəzləŋ tar a təv Mbulum, tì sìkèhehe a a təv kurum aka miɗ aka miɗ a. 14 Aɗaba a viliŋ megemir ata ka, say i ɗif a à bazlam ŋgwal ŋana a gà mburma tserdze, ku mege gà awara tekeɗe ya. I ɗif a dər ka, a gà na zirìm zirìm, zìrìwe a ge a ter a ya, nda gà na tə duwayawa ba tar, zìrìwe a ge a ter a tsiye, dite nda gà na tə sər duwa hinne ya, nda gà na tə sər duwa tsidze ya asa mbaŋa. 15 Aɗaba taŋa na a sèsiŋ aà medeha a təv kurum ka, aà meɗife à bazlam ŋgwal ŋa ata a kurum gà mburma ana i Ruma ya mbaŋa.

Ŋgwal bazlam ana ndzəɗa ŋa ya

16 Iye ihər i ɗif a à bazlam ŋgwal ŋa ata ka, parakka, hwarwa a giŋ a tsa. Aɗaba bazlam ŋgwal ŋa ata ka, ndzəɗa Mbulum iɗəm, a sle a aà məmbə̀là à gà na ta gəs Yesuw Kiristi nda gəzləŋ tar tserdze ya. Malahalah ŋa ka, a mbil a à gà Yahuda, dite i dəba ŋa ya, a mbil a à gà mburma ana tar gà Yahuda tsiye mbaŋa. 17 Nda təv bazlam ŋgwal ŋa ata ka, Mbulum a riŋ ihər a ɗif a dər a gà mburma tserdze ka, meme na ti sle a aà mene gà ŋgwal ŋa ika miɗ ŋgar a. Ama na a ne a kataya ka, say gà na ta gəs Yesuw Kiristi nda gəzləŋ tar ɗekɗek pəra, daga aà malahalah ŋana ya, haa a tsikw a mandəvandəv ŋana ya, tsəka, vatwa ŋgiɗ ka, a riŋ tsa. Ar ka, kamala ana mewetse ŋa a riŋ i wakita Mbulum ka, ta gwa: «Wur ana aka gəs Mbulum nda gəzləŋ ŋgar a ka, Mbulum a ne a à ŋgat ŋgwal ŋa ika miɗ ŋgar, a viler a mesife.»

Bakal mburma tserdze

18 Kà sərakwa, Mbulum ana ŋgat mandza ŋa i gər ŋa ya ka, aka ɗif a kwa dər aba ya, a riŋ a ge a matsəɓatsəɓ hinne, agəra gà mburma ana tserdze tì dzer a gurmits a bəɗ tsiye, tar ihər ta fir a aà dukw ana ŋgat a waya ya ka, kamala za ya. Ama ka, a ta ge a ter a seriye. Aɗaba dukw bakal tar ana ta gewa ya ka, ta hə̀ndə̀k dər a vatwa a mburma, aà dite tə sər dukw ana ndzer ŋa ya asa tsa. 19 Seriye à gis a tar ka, aɗaba vatwa masəra Mbulum ana ti sir a zləmana ya ka, ndərzayya məpàtà ŋa aà are tar. Aɗaba Mbulum nda gər ŋgar na a ɗif a tar dər a. Ama ka, ti zezem a tsa. 20 Wura aka sle aà meŋgete a Mbulum ilik tsidze. Ama daga aà gər ana a ge gər ahəɗ a, haa kinehe ka, gà dukw ana a ge tserdze ya, ti ɗif dər a gà mburma parakka, meme na ŋgat a ndza ya. Aɗaba ndzəɗa ŋgar ana a ndze a aà biybiy a ka, aka pàt aba ndzer. Ti sir a dər mbaŋa, ŋgat ilik na Mbulum a. Aɗaba taŋa na ti sle a aà megweɗe a ka, maa sər tsəka, ti sle a tsiye. 21 Ku mege tə sər Mbulum a riŋ tekeɗe ka, tì zlibe a à ŋgat kamala ana ŋgat Mbulum a tsa, dite ta ger a kəkaaha ɓav tsa asa mbaŋa. Kamala taŋa ya, madzala gà gər tar ana ti dzele a ya ka, taf masakəŋa. Ti ndze a ka, i lùvùŋ tìtìktìkka. Dite dukw ana ŋgwal ŋa ya ka, tə sər ɓav tsa asa. 22 Tar ta gweɗe a ka, waytsa mə̀r ka, gà ɓəzla metsehe. Tsaatsa tə sər duwa tsa ivaɗ. Tar ka, gà ɓəzla mibe a dala. 23 Tar ka, ta miyak à mazàmbàɗà à Mbulum ana mezlibe ŋgar a riŋ hinne, dite ŋgat asa ka, a ndze a aà biybiy a. Tə zàmbaɗawa ka, a gà dukw ana ta geye nda ahər tar, ti ne dər kamala gà Mbulum tar a ivaɗ. Gà dukw ata ka, gà asiŋ ŋa ti ndzikiɗ ba gà mburma ana tar ka, ta mite a ya. Dite gà biy ŋgiɗ ti ndzikiɗ ba gà ɗiyeŋ, gà biy ŋgiɗ ibam, tar ka, kamala dukw dala ana ti de a nda sik faɗ a. Dite gà biy ŋgiɗ asa mbaŋa ka, ti ndzikiɗ ba gà dukw ana ti de a nda huɗ a.

24 Aɗaba taŋa, agəra ana gà mburma ata ta ge kataya ya ka, Mbulum a miyak à tar, dite ti zezem a gà dukw meeweke ba tar ana gəzləŋ tar a waya ya ɗekɗek, nda gà megeye gà dukw ana ika magər tar a ndeɗe aka ter a hwarwa hinne ya asa mbaŋa. 25 Ta miyak à dukw ana ndzer ŋa biy Mbulum a, dite tə zazam pàrsa avukw ŋa. Tar ka, ta miyak à mazàmbàɗà à Mbulum ana a geye gà dukw tserdze ya. Tə zàmbaɗawa ka, à gà dukw ata a geye tserdze ya ivaɗ. Tə dzawar gurmits a bəɗ. Ana ka, say tə zàmbaɗawa ka, à ŋgat ŋa, aà biybiy. *Amin.

26 Agəra gà dukw ana gà mburma ata ta gewa kamala taŋa ya ka, Mbulum a miyak à tar, na dite ta geye gà dukw meeweke ba tar ata a ndeɗe aka ter a hwarwa, à kiv a ter a hinne ya. Gà məkəs tar ŋa, ta miyak à mandza nda gà asləka, ta hənawa nda gà məkəs ŋgiɗ, ta geye a gà dukw ana a tsahən aà Mbulum tsidze ya. 27 Gà asləka tekeɗe, pam tsa, ta miyak à mahə̀nà nda gà məkəs tar mbaŋa. Meeweke mahə̀nà nda gà asləka a kə̀vawa a tar ka, hinne. Kamala taŋa ya, ta gewa ka, dukw ana a ndeɗe aka ter a hwarwa ya, nda gà asləka ŋgiɗ. Ama tar ka, tàa bana akaba ahər, aɗaba bakal tar ana ta gewa ya, i huɗ madzala gà gər tar ata a dzeye ya.

28 Aɗaba gà mburma ata ti niw mazazama Mbulum, a sàs a tar masəra ŋgat tsiye ka, Mbulum a miyak à tar, na dite ti dzele a ka, metsehe tar ana taf masakəŋa, a da ndaka vatwa ŋa tsiye ya. Ta gewa ka, dukw ana a tsahən biy mege tsidze ya. 29 Tar ka, gà maràhà ŋa nda gà dukw ana ta ge a ŋgwal ŋa tsiye, ti sìkèh a à bakal tar pampam hinne. Ta ge a are aka dukw mburma, ti yehe a ahəm ka, pìrèh pìrèh, nda mene are a mburma, nda məbatsa mburma. Ta gebe a maàga, dite ta bene a mburma, nda megeyeba swalwa hinne. Ta wele a aà mburma ya ka, hinne mbaŋa asa, 30 nda metsìkè aà tar dukw ana ŋgwala tsiye. Tar ka, gà ɓəzla mene are a Mbulum. Ta bewa mburma, nda mege zlapa. Tə sə̀ŋgə̀rawa aba tar ka, hinne. Madzala gà gər tar ata ŋgwala tsiye ka, a we a bakal ŋgiɗ pampam hiywe pəra. Ta gəsawa ahəm aà gà tsir tar tsidze. 31 Tə zazamawa ka, madzala gà gər tar ata ŋgwala tsiye ɗekɗek pəra. Dite dukw ana tàa tsik i sida ya, tàa gwa, mìi ge a ya ka, ta ge a tsa. Tə sər mawàyà mburma tsa, dite gà misle ŋgiɗ ti ndzewa a tar are tsehe tsa asa mbaŋa. 32 Tsaatsa tar ka, tə sər məpala ahəm Mbulum ana a gwa: gà ana ta gewa gà medzibe gà dukw ata ŋgwala tsiye ka, say ta ge a ter a ka, seriye məməta pəra na a ze a taraha ya. Ama ku mege kataya tekeɗe, ta ge a dər akaba gà dukw ata pəra. Taŋa ɗekɗek tsa. Ndeyndey ŋa ka, na tàa ŋgat a gà misle ŋgiɗ aà mege dukw ata ŋgwala tsiye ka, ti zèmbeɗe à ter a hinne. Ta gweɗe a ter a, kəkaaha, gwim ka, kamala taŋa ya hiywe pəra.