MALAHALAH
wakita ana Pul a wetseha
a gà mburma Mbulum ana
i KURINTIYA ya
1
1 Na a wetse a kurumaha wakita aaha ka,
iye Pul,
iye ana i sàs a Mbulum,
a zla iye,
a ne à iye mala meslire Yesuw Kiristi ya.
Mì wetse ka,
mə̀r nda Sastanas,
damər kwa ana ika vatwa Mbulum a.
2 Mì wetseha ka,
a kurum gà mburma Mbulum ana i Kurintiya ya.
Mbulum na a pala kurum,
aà mandza i təv ilik ŋa nda gà Yesuw Kiristi ya.
A zal a kurum,
na dite kà nwim gà mburma ŋgar a.
Mì geha wusa mbaŋa ka,
a gà na ta heme a a Yesuw Kiristi BATSAH kwa ŋa ya tserdze,
ku mege ika ahəɗ awara tekeɗe ya.
Aɗaba ŋgat ka,
Batsah tar ŋa,
dite Batsah mə̀r ŋa asa mbaŋa.
3 Gà Mbulum Tsir kwa nda Yesuw Kiristi BATSAH kwa ŋa ta ge a kurum ŋgwal ŋa,
ta vəl a kurum matasla yam a gəzləŋ zayya lele.
Ŋgwal dukw ana gà mburma Mbulum ana i Kurintiya
ta ŋgat i təv Yesuw Kiristi ya
4 Iye ihər i ge a kəkaaha a Mbulum kəla pat,
agəra ana aka ge a kurum ŋgwal ŋa nda ahər Yesuw Kiristi ya.
5 Kurum mandza ŋa i təv ilik ŋa nda gà Yesuw Kiristi ka,
Mbulum aka pise a kurum ahəm,
kàa ŋgatum gà ŋgwal gà dukw ana pampam tserdze ya,
nda təv megìse kurum.
Ki ndzwim a ka,
barbarərra ika vatwa ŋgar.
Aɗaba taŋa na kà sərum ikaba à gà dukw ana ndzer ŋa ya lele,
dite ka,
kà sərum meɗìfè à bazlam Mbulum a mburma asa mbaŋa.
6 Kamala taŋa ya,
aɗaba akahər ana mì ɗif a kurum à bazlam Yesuw Kiristi ya ka,
kàa gəsum nda gəzləŋ kurum ədəts lele.
7 Aɗaba taŋa,
dukw ana Mbulum a dze a a gà mburma ŋgar a tserdze ka,
kàa ŋgatum,
kuɗa duwa a ge a kurum a tsidze.
Dite kurum riŋ ihər ki vevwim a ka,
pat ana Yesuw Kiristi à mère a nda ndzəɗa ŋgar ana tì zlibe a dər a ka,
nda gà maŋgayaba.
8 Ŋgat na à zlèk a kurum,
dite ka,
ki ndzwim a ɓəŋɓəŋ lele ika vatwa ŋgar,
haa a pat mandəvandəv ŋana,
dite pat seriye Yesuw Kiristi BATSAH kwa ŋana a ge a ya,
aka ndzera ka,
wura a sle a aà məma a kurum à bakal tsiye.
9 Mbulum nda ahər ŋgar ŋa,
na a zal a kurum,
dite na ki ndzwim a i təv ilik ŋa nda gà Yesuw Kiristi Kəla ŋgar hiywe ya.
Ŋgat na a ne BATSAH kwa ŋa ya.
Ama Mbulum ka,
dukw ana aka mbər metsike ya ka,
a ge a ndzer kaɗəŋ,
pàrsa iɗəm tsa.
Gà mburma Mbulum ana i Kurintiya ya, tə ndzək ba ikaba ya
təv pampam
10 Gà damər gà,
iye ihər i ge a kurum a kamkam nda zləm Yesuw Kiristi BATSAH kwa ŋa:
Bazlam kurum ma ge ka,
ilik pəra,
tsəka,
wùràpə̀ppa ka ndzakum ba ikaba ya təv pampam tsa.
11 Gà gəzləŋ kurum nda madzala gà gər kurum tekeɗe,
ma ge ka,
ilik mbaŋa.
Gà damər gà,
i tsik taŋa ka,
aɗaba gà mburma ana i bəra dəm Kilewe ya,
ta màhara ba ya,
tə dara,
ta gweɗiŋ ka,
maàga a riŋ hinne na ika magər kurum a,
kà sərum aàba ahəm tsa.
12 Ama kà sərum dukw ana i waya i tsik a kurum a ya.
Aɗaba ku weke ika magər kurum a,
tar riŋ ti tsik a duwa ŋgiɗ pampam,
agəra ana gà misle ŋgiɗ ika magər kurum a ka,
tar riŋ ihər ta gweɗe a:
«Mər ka,
gà ɓəzla mazazama Pul.»
Gà misle ŋgiɗ pam ta gwa:
«Mər ka,
gà ɓəzla mazazama Apalus.»
Dite gà biy ŋgiɗ ibam,
ta gweɗe a:
«Mər ka,
gà ɓəzla mazazama Piyer.»
Dite gà biy ŋgiɗ asa ibam,
ta gweɗe a i tar ka:
«Mər ka,
gà ɓəzla mazazama Yesuw Kiristi kuɗa.»
13 Ama kurum kù gwaɗum,
Kiristi dze ana,
à ses a ba ikaba ya təv pampam a?
Kurum kà dzalum dze ana,
tə ndwandway aà dizl magə̀làwà ŋana,
iye Pul na aɗaba kurum a ya?
Kige tsa,
ti tsilwiɓ à kurum a yam ana,
nda zləm gà Pul a?
Awaŋ,
kataya tsidze.
14 I ge kəkaaha a Mbulum,
aɗaba ana Yàa tsilwiɓ à wura a yam ilik ika magər kurum a tsiye,
say à gà Kirispus nda Gayus.
15 Kamala taŋa ya,
wura ilik a sle a aà megweɗe a ka,
iye na a tsilwiɓ à kurum a yam nda zləm gà ya tsa.
16 E/?eh,
aka mìtsiŋ gər.
Yàa tsilwiɓ à gà Sitefanas nda gà mburma ana i ga i ma ŋgar a mbaŋa.
Ama na bəla Yàa tsilwiɓ à gà misle ŋgiɗ a yam asa ka,
i sər tsa,
aka mìtsiŋ gər.
17 Ama Kiristi a slər iye ka,
aà metsìlwìɓè à mburma a yam ɓav tsa.
A slər iye ka,
aà metsìkè bazlam ŋgwal ŋana a mburma seyiŋ ivaɗ.
I təv ana i tsikewa a tar a ka,
nda metsehe mburma tsa.
Tsəka,
ana ka,
məməta ŋgar ana a mət aà dizl magə̀làwà ŋa ya ka,
a ne a dukw taf masakəŋa.
Yesuw a ɗif à metsehe Mbulum a mburma
18 Aɗaba gà mburma ana tar ti dzeye a ya ka,
tar ta fə̀r aà bazlam ata aka gər məməta *Kiristi ana a mət aà dizl magə̀làwà ŋa ya ka,
kamala ana dukw falày taf masakəŋa ya.
Ama kwa ana Mbulum a mbil à kwe a ya ka,
kà sərakwa dər,
taŋa na ndzəɗa Mbulum a.
19 *Ar ka,
kamala ana mewetse ŋa a riŋ i wakita Mbulum a,
a gwa ka:
«I ti dzeye a à gà mburma ana ta gweɗe a:
Waytsa mə̀r ka,
gà ɓəzla metsehe ya.
I ti niw a madzala gà gər
gà mburma ana ta gweɗe a:
Mər ka,
gà ɓəzla masəra duwa ya.»
20 Dite na kataya ana,
taŋa gà mburma ana tàa ŋgat metsehe gər ahəɗ aaha kinehe ya ana,
wànà tə sər duwa ya?
Awaŋ,
tə sər tsa.
Kamala taŋa ya,
gà mburma ana ti dzeŋge məpala ahəm gà Yahuda hinne ya tekeɗe,
tə sər duwa tsa mbaŋa.
Dite gà mburma ana ta mbetsewaba ahəm ika magər tar a tekeɗe,
tə sər duwa ɓav tsa asa mbaŋa.
Aɗaba Mbulum a ɗif dər parakka,
na à metsehe biy gər ahəɗ aaha ka,
a ne dukw falày taf masakəŋa ya.
21 Kaɗəŋ ndzer,
gà mburma gər ahəɗ ka,
Mbulum aka ɗif a tar à metsehe ŋgar ibam.
Ama ka,
tə sər ŋgat ŋa tsa.
Aɗaba taŋa,
Mbulum a waya məmbə̀là à mburma nda bazlam ana mə̀r ihər mìi ɗif a dər a mburma ya.
Gà mburma gər ahəɗ ka,
tar ta gwa:
Bazlam ata aka gər məməta Kiristi ana a mət aà dizl magə̀làwà ŋa ya ka,
dukw falày taf masakəŋa.
Ama Mbulum ŋgat ka,
a sasar məmbə̀là à gà mburma ana ta gəs nda gəzləŋ tar a.
22 Gà Yahuda ka,
a sàs a tar ta ŋget a a dukw mene aà mburma,
dite na ti sir a dər ka,
bazlam ata ana ndzer kaɗəŋ a ya.
Gà Girek i tar ka,
ta waya ti sir a Mbulum nda metsehe tar.
23 Ama mə̀r,
mìi ɗif a ka,
à bazlam ana aka gər Kiristi ata tə ndwandway aà dizl magə̀làwà ŋa ya.
Mìi gweɗe a:
Ŋgat na mala məmbə̀là à mburma ya.
Bazlam ata ka,
à tìrfìɗ a gəzləŋ a gà Yahuda tərfə̀ɗ tərfə̀ɗ,
a tsahən aà tar tsidze.
Dite gà asiŋ gà mburma ana tar gà Yahuda tsiye ka,
tar ta fir ahər a kamala ana dukw falày taf masakəŋa ya.
24 Ama gà mburma ana Mbulum a pala tar,
a ne à tar gà biy ŋgar a ka,
ku mege tar gà Yahuda,
ku gà Yahuda tsa tekeɗe ka,
ta fir ahər a kamala ana dukw falày masakəŋa ya tə tsa.
Aɗaba tar tə sər,
Yesuw Kiristi ka,
ndzəɗa Mbulum,
dite ŋgat a ɗif ibam,
à metsehe Mbulum a mburma asa mbaŋa.
25 Na bəla gà mburma ta gweɗe a:
Mbulum ka,
metsehe ŋgar a riŋ tsa,
ama tsaatsa tə sər dukw ana ta gwa ahər,
dukw falày taf masakəŋa ya ka,
dukw ata à zè a dər metsehe tar fit kweleŋ.
Na bəla ti dzele a ka,
ta gweɗe a:
Mbulum ka,
ndzəɗa ŋgar a riŋ tsa,
dite megemir ŋgar ana ta gweɗe ahər a,
ndzəɗa ŋa tsiye ka,
tsaatsa,
à zè a ndzəɗa tar fit asa mbaŋa.
Wura ilik a sle a aà masə̀ŋgə̀rà à ba ŋgar ika miɗ Mbulum tsa
26 Gà damər gà,
samatum kwaŋ,
kurum ana Mbulum a zal a kurum a,
kurum ana,
gà dukùla?
Gà ɓəzla masəra duwa ika magər kurum ka,
ndaw tsa,
na i təv are gà mburma gər ahəɗ a.
Ika magər kurum ka,
gà ŋgwal gà mburma ana i təv limana ya,
kige tsa gà bàba ŋa ana ta kwere a mburma ya tekeɗe,
tar ndaw ɓav tsa asa mbaŋa.
27 Ama Mbulum a pala ka,
gà na gà mburma gər ahəɗ ti tsik a aà tar,
ta gwa,
tar ka,
gà ɓəzla falày,
tə sər duwa tsiye,
na dite ti ne gà biy ŋgar a.
A pala tar ka,
a sasar à nikiɗ a à gà na ta gwa ka,
ndzihndzih mì sər duwa ya.
A pala ka,
gà na gà mburma gər ahəɗ ti tsik a aà tar,
ta gweɗe a,
ndzəɗa tar a riŋ tsiye,
na dite a ndeɗe a hwarwa aka gà na ta gwa,
dzəŋdzəŋ mə̀r gà ɓəzla ndzəɗa ya.
28 A pala ka,
gà mburma ana taf masakəŋa,
ta fir aà ter a kamala za ya,
dite meɗè zləm tar a riŋ tsiye asa mbaŋa.
A ge dər kataya ka,
aɗaba a waya manəsa iɗəm à dukw gà mburma ana meɗè zləm tar a riŋ hinne,
ta ge a dər ndzəɗa ya.
29 Mbulum a pala mburma kamala taŋa ya ka,
na dite wura ilik a sle a aà mege zlapa ika miɗ ŋgar asa tsiye.
30 Ama kurum kinehe ka,
Mbulum a zal a kurum,
na dite a gaw akaba à kurum a təv ilik ŋa nda gà Yesuw Kiristi ya.
Aɗaba Kiristi na a ne metsehe kwa ana a dara i təv Mbulum a ya.
Nda təv Yesuw Kiristi mbaŋa asa na Mbulum a ne à kwa gà ŋgwal ŋa ika miɗ ŋgar a.
Dite nda ahər ŋgar asa mbaŋa na a pəl a kwa à bakal,
dite kà nekwa gà mburma ŋgar a.
31 *Kamala taŋa ya,
ar ka,
kamala ana mewetse ŋa a riŋ i wakita Mbulum a.
Ta gwa ka:
«Na wura aka waya masə̀ŋgə̀rà à ba ŋgar ka,
mà sə̀ŋgə̀r aba agəra dukw ana Mbulum a ge ya.»