1 Kurintiya 2

Pul a tsik bazlam Mbulum i Kurintiya

1 Gà damər gà, akahər ata i təv ana i dara a təv kurum a, aà meɗìfè a kurum à dukw Mbulum ana makàhà ŋa, dite a pàt a kwa dər ndərzayya ya ka, Yàa tsik a kurum bazlam ana a geye a kurum a gà ndə̀kə̀zlə̀zlə̀mma, kà tsarakum tsiye tsa, dite Yàa zle à duwa nda metsehe mburma ɓav tsa asa mbaŋa. 2 Ələk i dara a təv kurum a ka, i dzala, i gwa: Yàa daha aka magər kurum ka, i tsik a kurum a bazlam Yesuw Kiristi ɗekɗek, tsəka, i dzele a duwa ŋgiɗ tsa. I ɗif a kurum a dər ndeyndey ka, à məməta ŋgar ana a mət aà dizl magə̀làwà ŋa ya. 3 Aka təv ana iye riŋ ika magər kurum a ka, ndzəɗa aà iye lele tsa. I gewa magəɗa hinne, i dzedzeriŋa. 4 I màwa a kurum à bazlam Mbulum, i ɗifewa a kurum dər. Dukw ana i tsikewa a kurum a ka, a dara i metsehe mburma ya tsa. Yàa bana kurum nda bazlam ilik tsidze. Ama Mezite Mesife Mbulum na a ɗif a kurum à bazlam gà ata nda ndzəɗa ŋgar ndzer kaɗəŋ a. 5 Aɗaba taŋa, megìse kurum ana kə̀ gəsum Yesuw Kiristi nda gəzləŋ kurum a ka, agəra ana kə̀ ŋgatum ndzəɗa Mbulum a, tsəka, agəra ana kà dzum zləm a metsehe mburma ya tsa.

Masəra metsehe Mbulum

6 Gà na tàa sime ika vatwa Mbulum a ka, i ɗif a ter a à dukw ana metsehe iɗəm a mbaŋa kaɗəŋ. Ama taŋa ka, metsehe gà mburma gər ahəɗ nda biy gà Əbay ana ta kwere a tar a iɗəm tsa kəla. Aɗaba ndzəɗa ata ka, à ndìv a aà tar a. 7 Seyiŋ tsa, aɗaba metsehe ana i zla a kurumara ya ka, biy Mbulum ivaɗ. Ama taŋa ka, dukw ana makàhà ŋa, Mbulum aka ɗif dər a mburma akahər ata tsiye. I təv ana aka dza ba aà mege gər ahəɗ zukw tsiye ka, a səraba pat ana a ti ɗif a kwe a à dukw ata ya, na dite ka, ki ti ndzekwe a nda gà ŋgat i təv ndzəɗa ŋgar ana tì zlibe a dər a ya. 8 Wura ilik ika magər gà mburma ana ta kwere a gər ahəɗ a ka, aka sər aà metsehe ata tsidze. Na mege tàa sər zləmana ka, ana ka, ti ndwendwey a BATSAH kwa ŋa, wele ana mezlibe ŋgar a za duwa tserdze ya, aà dizl magə̀làwà ŋa tsa. 9 Dukw ata Mbulum a ge ya ka, kamala ana mewetse ŋa a riŋ i wakita ŋgar a kaɗəŋ. A gwa ka:

«Dukw ana are mburma aka ŋgatar ilik tsiye,

ndəna zləm tar aka tsaraka ilik tsiye mbaŋa,

ku mege tàa zlaŋa aaka gà gər tsa tekeɗe,

taŋa ka, dukw ana Mbulum a yaha

agəra gà na ta waya ŋgat a.»

10 Ama kwa kinehe ka, Mbulum aka ɗif a kwa à dukw ata a yaha aɗaba kwa ya, nda ndzəɗa Mezite Mesife ŋgar. Aɗaba Mezite Mesife ata ka, a sər duwa tserdze. Ku mege dukw ana Mbulum a dzala i gəzləŋ ŋgar a tekeɗe, a sər mbaŋa. 11 Weke na a sər dukw misle ŋgiɗ ana a dzele a i gər ŋgar a? Awaŋ, wura a sər tsa. Say i huɗ madzala gà gər ŋgar ilik na a səraba ya. I təv Mbulum tekeɗe, kamala taŋa ya mbaŋa. Say Mezite Mesife ŋgar ŋa ilik na a sər dukw ana ŋgat a dzele a ya, tsəka, misle ŋgiɗ a sir a tsa. 12 Ama madzala gà gər ana kinehe ki dzelekwe a ya, a dara ka, i gər mburma ya tsa. A dara ka, i huɗ Mezite Mesife Mbulum ana a slərra a təv kwa ya, dite na kà sərakwa gà dukw ana a vəl a kwa biy taf a ahər tserdze ya ya. 13 I təv ana mì fàfəlawa aka gà dukw ata Mbulum a ɗif dər a mburma ya ka, mì tsikewa gà bazlam ana gà mburma ti ɗif a mə̀r dər nda metsehe tar a tsa. Ama mì tsikewa ka, dukw ana Mezite Mesife Mbulum a ɗif a mə̀r dər a. Kamala taŋa ya, mìi ɗif a ka, à dukw ana ndzer, a dara i təv Mbulum a ya, a gà na tàa ŋgat Mezìtè Mesife Mbulum ata a gəzləŋ tar a.

14 Wele ana aka ŋgat Mezìtè Mesife Mbulum ata a gəzləŋ ŋgar tsa, a zezem a madzala gà gər ŋgar pəra ya ka, à gis a dukw ana Mezite Mesife Mbulum ata a vile a a mburma ya ɓav tsa asa mbaŋa. A sir a tsa, à fir ahər a ka, kamala dukw falày taf masakəŋa ya. Aɗaba na Mezite Mesife Mbulum a riŋ à zlèk a ŋgat tsəka, a sle aà metsereke a tsidze. 15 Ama wur ana Mezite Mesife Mbulum a riŋ i gəzləŋ ŋgar a ka, a sir a ikaba à gà duwa ya tserdze, wànà naha ana, ŋgwal ŋa ya, tsəna, ŋgwal ŋa tsiye ya? Ama ŋgat ka, mburma ti sle a aà mesirereha ikaba à dukw ana a dzele a i gər ŋgar a tsa. 16 Ar ka, kamala ana mewetse ŋa a riŋ i wakita Mbulum, a gwa ka:

«Weke na a sir a dukw ana

Mbulum a dzele a i gər ŋgar a ya?

Dite weke na a ne mala meɗìfer à duwa ya?»

Ama kwa ana Mezite Mesife Mbulum i gəzləŋ kwa ya ka, kà dzalawukwa gà gər kalkal kamala ana Yesuw Kiristi a dzele a ya mbaŋa.