2 Kurintiya 1

MASULA

wakita ana Pul a wetseha

a gà mburma Mbulum ana

i KURINTIYA ya

Mege wusa

1 Na a wetse a kurumaha wakita aaha ka, iye, Pul ana Mbulum a zla iye, a ne à iye mala meslire Yesuw Kiristi ya. Mì wetse ka, mə̀r nda Timute, damər kwa ana ika vatwa Mbulum a. Mì wetseha ka, a kurum gà mburma Mbulum ana i Kurintiya ya, dite nda gà asiŋ gà ɓəzla magəsa Mbulum ŋgiɗ ana ta gəs nda gəzləŋ, ika ahəɗ Akaya ya tserdze. 2 Gà Mbulum Tsir kwa nda Yesuw Kiristi BATSAH kwa ŋa, ta ge a kurum ŋgwal nda məvəla a kurum matasla yam a gəzləŋ zayya lele.

Mbulum à mèhe a à arəv a gà na tì sèwèr a are ya

3 Gekwa kəkaaha a Mbulum ana ŋgat Tsir Yesuw Kiristi BATSAH kwa ŋa ya. Ŋgat ka, a ge a ŋgwal a mburma, kamala tsir gà ɓəza ana a ge a dukw ŋgwal ŋa, a ge a gər a gà ɓəza ŋgar a. A mèkwehe a à arəv də̀ɗə̀ffa, a vile a kwe a ndzəɗa kəla pat. 4 Ku mege ndeɗime, i təv ana mìi sèwèr a are hinne ya ka, ŋgat a vəlawa a mə̀r ndzəɗa, na dite mə̀r tekeɗe, mìi dehe a, mìi mèhe a à arəv a gà na tar riŋ ihər tì sèwèr a are ya mbaŋa ya. Mìi zlèk a tar ka, kamala ana Mbulum a zlak mə̀r a mbaŋa. 5 Kamala taŋa ya, Yesuw Kiristi aka sèwèr are ka, hinne, dite kinehe mə̀r tekeɗe, mə̀r ihər mìi sèwèr a are ka, hinne mbaŋa. Ama mezleke ana Mbulum à zlèk a mə̀r a tekeɗe, hinne mbaŋa asa, aɗaba ana mə̀r mandza ŋa i təv ilik ŋa nda gà Kiristi ata ya. 6 Taŋa mə̀r riŋ ihər mìi sèwèr a are ka, aɗaba kurum, dite Mbulum à me a kurumehe a à arəv nda ahər mə̀r, aà kə ŋgatum ndzəɗa ika vatwa ŋgar asa. Taŋa Mbulum a mà a mə̀raha à arəv ka, aɗaba kurum mbaŋa asa, na dite ki ŋgetwime a ndzəɗa ɓəŋɓəŋ nda təv megìse mbaŋa ya. Kamala taŋa ya, ki slwim a aà məbasa gəzləŋ i təv mesewere are ana ki sèwèrwim a ya, kamala mə̀r a mbaŋa. 7 Mì sər ndzer, ki ta ŋgetwime a ndzəɗa ika vatwa Mbulum ɓəŋɓəŋ lele. Aɗaba mì sər ka, Mbulum à me a kurumehe a à arəv kamala ana a mà a mə̀r dərraha ya mbaŋa, agəra ana kàa gawum ba nda gà mə̀r i təv mesewere are ana mìi sèwèr a ya.

8 Gà damər mə̀r, a sàs a mə̀r ka, mìi ɗif a kurum a à mesewere are ana mì sèwèr ika ahəɗ Asiya ya. Mesewere are ata ka, a beha, a za ndzəɗa mə̀r fit kweleŋ fetite. Mì gwa ka, mesife mə̀r aka ndəv, mìi mete a dər pəra. 9 I fata ya ka, mì dzala, mì gwa, naha ka, mə̀r ka, i ɗa məməta kamala gà na seriye a gasa tar, ta bets a tar a. Ama Mbulum a ge dər kataya, dite mì gəs ka, ndzəɗa ba mə̀r asa tsa. A waya mì gəs ka, ndzəɗa ŋgar ilik, na a ge a mə̀r a ŋgulum a. Aɗaba ŋgat na a mbəlawa à mburma i məməta ya ya. 10 Dite ŋgat asa mbaŋa na bizlir bizlir a beye à mə̀r i biye ɗa məməta ata mìi mete a zləmana ya. Mì sər ka, a ta beye a à mə̀r i təv gà mesewere are ŋgiɗ a kataya mbaŋa. Mì tike madzala gà gər mə̀r aka ŋgat ka, aɗaba mì sər, ku mege aka miɗ mba tekeɗe ka, a ta mbele a à mə̀r. 11 Meheme kurum ana kurum ihər ki hemwim a a Mbulum aɗaba mə̀r a tekeɗe, a riŋ à zlèk a mə̀r mbaŋa. Kaɗəŋ, gà mburma hinne na tar riŋ ihər ta heme a a Mbulum aɗaba mə̀r a. I dəba ŋa ya, na Mbulum tekeɗe, aka gəs meheme tar ata ta hemer a ya ka, gà mburma hinne ti ta ger a kəkaaha mbaŋa, agəra ŋgwal ŋgar ana a ge a mə̀r a.

Pul a mà aà mada a Kurintiya ya

12 Dukw ana mìi ge a dər zlapa ya ka, araha: I gəzləŋ mə̀r ka, mì sər, mede mə̀r ana mì dawa ika vatwa Mbulum a ka, nda gəzləŋ ilik ŋa, nda ndzer, kamala ana Mbulum a waya ya. Mede mə̀r ata ŋgwal ŋa ndeyndey ka, ika magər kurum. Ndzəɗa mə̀r ana mì ndza dər kataya ya, a dara ka, i madzala gà gər gà mburma gər ahəɗ a tsa. Ama a dara ka, i təv Mbulum ana a ge a mə̀r ŋgwal ŋa ya. 13 Aɗaba dukw ana mì wetse a kurumaha tserdze ya ka, a tsereke ba lele, duwa a riŋ iɗəm na makàhà ŋa ya tsa. Mì dzala ka, mì gwa, aka miɗ mba ka, ki tserekwim a parakka lele kuɗa. 14 Kamala taŋa ya, kinehe ka, kàa dzum ba aà matsaraka ŋa zaakwa zaakwa dukw ŋgar. Ama ka, kà sərum dər, a pat ana Yesuw BATSAH kwa ŋa à mère a ya ka, ki ti sìŋgìrwim a à mə̀r a hinne, kamala ana mìi ta ge a zlapa nda kurum a mbaŋa.

15-16 Agər ana i sər gà dukw ata ti ti ne a ndzer a ka, i gwa, i dehe a a təv kurum dzekwiŋ, na mege a ge a ba ya ya, dite ka, i waya i sìrìk a riŋ aba aka ahəɗ Makaduniya zləmana. Aləka i təv ana Yàa màhara ba i fata ya ka, i ta mbìɗehe a gər a təv kurum asa. Ama kəla ka, ki ti zlèkwim a iye, na i təv ana i dze a ba aà mada aka ahəɗ Yuda ya. I dzala ka, i de a kurumehe a à mipise ahəm Mbulum masula ŋa zləmana, aà mà zlak kurum ika vatwa Mbulum a. Ama araha kinehe ka, Yàa ndzeha a təv kurum asa tsa. 17 I təv ana i ɗifewa kurum à dukw ana i ta ge a ya ana, Yàa tsik a kurum nda arah sula ya? Awaŋ, aɗaba i təv ana i dzalawa dukw ana i gwa, i ta ge a ya ka, Yàa dzala gà gər kamala biy gà mburma gər ahəɗ a tsa. Wànà kà dzalum dze ana, i gweɗe a «haya», i dəba ŋa ya ka, i gweɗe a «awaŋ» asa ya? A ge a ba tsa na taŋa ya. 18 Mbulum na mala sida gà ya. Dukw ana maa tsik a kurum a ka, ndzer kaɗəŋ, pàrsa iɗəm tsa. Taŋa dukw ana mì tsikewa a kurum a ka, maa gwa «haya», kige tsa «awaŋ» nda bazlam sula tsa. 19 Aɗaba Yesuw Kiristi Kəla Mbulum, wele ana mə̀r nda Silas, nda gà Timute mì ɗif a kurum à ŋgat ika magər kurum a ka, ŋgat a gweɗe a aà duwa «haya», dite i dəba ŋa ya, a gweɗe a «awaŋ» aka gər bazlam ŋa ilik ka, a gweɗe a tsidze. A tsik a ka, dukw ana ndzer a hiywe. 20 Ŋgat a ɗif a kwa à dukw ana a sàs a Mbulum a ta vile a kwe a nda ndzer a kaɗəŋ. Aɗaba taŋa, ki slekwe aà megweɗe aaka a «*amin» nda zləm ŋgar, aà mazàmbàɗà dər à Mbulum. 21 Biy ŋgiɗ asa ka, Mbulum nda gər ŋgar na a vəl a mə̀r ndzəɗa ɓəŋɓəŋ ika vatwa Yesuw Kiristi, dite a vile a kurum a ndzəɗa ata mbaŋa ya. Ŋgat na a pala kwa aà megemir ŋgar a. 22 A dzaya a kwa Mezite Mesife ŋgar a gəzləŋ kwa, dite kà sərakwa dər ka, kàa nekwa gà ɓəza ŋgar a. Nda ahər Mezite Mesife ŋgar ata mbaŋa, na ki sirekwe a dər ka, ki ta ŋgetekewe a a gà asiŋ gà dukw ŋgiɗ ana a gwa, a ta vile a kwe a ya.

23 Ama Mbulum ka, mala sida gà. Ma lekiŋ, na kige i sàs pàrsa ya. Taŋa Yàa daha a təv kurum a Kurintiya zukw tsəka, aɗaba i waya tsa na i vile a kurum a matsəɓatsəɓ a gəzləŋ kurum a. 24 Ama mə̀r ka, maa ne gà Əbay aà makwàrà kurum nda təv megìse kurum ana kə̀ gəsum a ɓav tsa. Aɗaba mì sər ka, kàa gəsum Yesuw Kiristi nda gəzləŋ kurum ɓəŋɓəŋ lele. Mì waya ka, ki gekwe a megemir nda gà kurum seyiŋ ivaɗ, na dite maŋgayaba kurum à sìkèh a ya.