Ti yehe a gər a siŋgwe aà mazlàkà dər gà mburma
Mbulum ana i Yeruzalem a
16
1 Kinehe ka,
a sèsiŋ i fèfil a kurum a aka gər bazlam siŋgwe ana ki yehwimer a gər,
aà mazlàkà dər gà mburma Mbulum ana i Yeruzalem a.
Ama ki gwim a dər ka,
kamala ana i tsik a gà mayahaba gər gà mburma Mbulum ana ika ahəɗ Galatiya ya mbaŋa.
2 Kəla ladà,
ku mege weke,
tsə̀nə̀hum akaba siŋgwe zaakwa zaakwa kamala dukw ana kàa ŋgatum,
Mbulum aka vəl a kurum a.
Ki gwim a dər kataya,
na dite ələk aka təv ana Yàa ndzeha a təv kurum ka,
siŋgwe ata aka sle,
kàa mbər mayahumar gər a.
3 Yàa daha ka,
i wetse a wakita,
i vile a ahər a gà na kà palum tar aà megemir ŋa ya,
dite ka,
i slir a dər tar a Yeruzalem.
4 Na bəla Yàa samata,
a ge a ba ka,
mìi de akaba a nda gà tar tserdze a təv ilik ŋa.
Dukw ana a sàs a Pul a ge a ya
5 A sèsiŋ ka,
i de a aka ahəɗ Makaduniya,
dite na i dehe a a təv kurum a.
Aɗaba i waya ka,
i lìm a aka gà mayahaba gər gà mburma Mbulum ana i fata ya tserdze.
6 Aləka na Yàa ndzeha a təv kurum ka,
i ti ndze a riŋ ika magər kurum zaakwa dukw ŋgar.
Kamala taŋa ya,
na mege a ge a ba ka,
i ndze a riŋ i təv kurum,
haa a təv ana mə̀tasl aka dza ahər ba,
dite aka ndəv iɗəm a ya.
Aləka i təv ana i mèhe a ba ya asa ka,
ki zlèkwim a iye nda təv mesìweye gà ana i de a ku mege a ŋga ya.
7 Na Yàa daha aà məfə̀rà aka kurum ata ka,
a sèsiŋ tsa na i ndze a i təv kurum rà/?raats zaakwa pəra ka,
i de a aà kurum a tsara ya.
Na BATSAH kwa ŋa aka waya ka,
ki ti ndzekwe a zàkwayiya lele dukw ŋgar i təv ilik ŋa.
8 Ama kinehe kəla ka,
a sèsiŋ,
i ndze a ɗa i kwite Efesiya mba,
haa a pat *megirive Pantakwasta.
9 Aɗaba Yàa ŋgat vatwa aà megemir Mbulum parakka lele,
a de a aka miɗ aka miɗ.
Dite asa ka,
agəra ana gà ɓəzla mene are gà ɗa hinne i faha,
ti nisiŋ a à mege megemir a.
10 Na Timute aka ndzeha a təv kurum ka,
gəsum ŋgat lele,
na dite a ge a magəɗa tsiye.
Aɗaba ŋgat ka,
a gewa mege megemir BATSAH kwa ŋa kamala ana iye i gewa ya mbaŋa.
11 Aɗaba taŋa,
wura ilik ma ta fə̀r ahər ka,
kamala za ya tsa.
Zlakum ŋgat nda təv mesìweye ŋgar ata a dere a ya,
na dite a de a dər aka miɗ aka miɗ nda zayya lele,
tsìm a ndzere a a təv ga ya tekeɗe,
lele asa mbaŋa ya.
Aɗaba mə̀r tserdze nda gà asiŋ gà mburma Mbulum ana ɗa i faha ya ka,
mə̀r ihər mìi veve a ɗa ŋgat.
12 Ama damər kwa Apalus ka,
Yàa tsiker sik diŋ,
i gwaɗar ka,
tə daha a təv kurum nda gà asiŋ gà mburma Mbulum,
dite ta ge a kurum wusa te.
Ama ka,
a niw medeha kinehe tə̀ma.
Aka miɗ zaakwa ka,
bəla a ŋget a vatwa,
a dehiŋa.
Mandəvandəv bazlam nda mege wusa
13 Ndzum ka,
nda metsehe lele.
Dite megìse kurum ana kə̀ gəsum ŋgwal bazlam ata nda gəzləŋ ilik a ka,
ka dum dər aka miɗ aka miɗ.
Arəv ma da aà kurum a tsa,
gəzləŋ kurum ma ndza ka,
ɓəŋɓəŋ lele.
14 Dukw ana ki gwim a tserdze ya ka,
gwim nda mawàyà ba ana ki weywim a dər gà asiŋ gà misle ŋgiɗ a.
15 Gà damər ga,
kurum kà sərum gà Sitefanas nda gà mburma ana i ma ŋgar a tserdze.
Dite kà sərum mbaŋa ka,
tar na tə lah aà magəsa Yesuw Kiristi ika ahəɗ Akaya a riŋ i faka ya.
Tar ka,
ta vəl ba tar aà megemir Mbulum,
na dite tì zlèk a gà mburma Mbulum lele ya.
I ge a kurum kamkam:
16 Gəsum ahəm aà gà medzibe gà mburma ata.
Hənum à gər a bəɗ a gà asiŋ gà na a ta ge a megemir Mbulum ika magər gà mburma Mbulum a lele,
a təv ilik ŋa nda gà tar ata tserdze ya mbaŋa.
17 Iye ihər i ŋgeye a ba ka,
hinne,
agəra ana gà Sitefanas nda Fartunatus,
nda gà Akayus,
tə dara a təv ga ya ya.
Tə dara ka,
avukw kurum ana ki dwimera,
ki zlèkwim a iye zləmana ya.
18 Tàa mìŋaha à arəv,
kamala ana ta mà a kurumaha à arəv a mbaŋa.
Medzìbe gà mburma ata ka,
zlə̀bum à tar lele.
19 Taŋa gà mayahaba gər gà mburma Mbulum ana pampam ɗa ika ahəɗ Asiya i faha ya,
ta ge a kurumaha wusa hinne.
Gà Akila nda daala ŋgar Piriskila nda gà asiŋ gà mburma Mbulum ana ti yahawabaha gər a təv tar a,
ta ge a kurumaha wusa tserdze mbaŋa,
nda zləm Yesuw Kiristi BATSAH kwa ŋa.
20 Gà asiŋ gà mburma Mbulum ana ɗa i faha ya tserdze,
ta ge a kurumaha wusa mbaŋa.
Geywim a ba wusa ika magər kurum ilik ilik tserdze nda gəzləŋ ilik.
21 Taŋa kinehe,
iye ihər i wetse a kurumehe a nda ahər gà ŋa kuɗa.
Iye Pul,
i ge a kurumaha wusa mbaŋa.
22 Na wura a waya BATSAH kwa ŋa nda gəzləŋ ilik tsəka,
Mbulum mə vəlar mezelme.
Gər a gwa,
Marana ta, kamala megweɗe ya ka: «Batsah mə̀r ŋa, dara te.»23 Yesuw BATSAH kwa ŋa ma ge a kurum ŋgwal ŋa aka miɗ aka miɗ.
24 I waya kurum tserdze ka,
agəra ana kwa mandza ŋa i təv ilik ŋa nda gà Yesuw Kiristi ya.