1 Kurintiya 15

Məmbə̀lara Yesuw Kiristi i məməta ya

1 Gà damər gà, kinehe ka, a sèsiŋ bazlam ŋgwal ŋa ana i ɗif a kurum dər akahər ata ya, mə̀ mà a kurumara a gər a asa. Aɗaba kàa gəsum nda gəzləŋ, dite megìse kurum ata tekeɗe, ɓəŋɓəŋ lele. 2 Ŋgwal bazlam ata ka, biy na Mbulum a mbil a dər à kurum a, na bəla kurum ihər ki dwim a dər aka miɗ aka miɗ nda magəsa ŋa nda gəzləŋ ilik, kamala ana i tsik a kurum a ya. Na kataya tsəka, megìse kurum ata a ne a taf masakəŋa.

3 Sərum dər ka, Yàa ɗif a kurum à dukw ana Yesuw Kiristi a ɗifiŋ dər a mbaŋa. Dukw ana i tsik a kurum malahalah ŋa ya ka, araha: Yesuw Kiristi aka mət aɗaba bakal kwa, kamala ana ta wetse i wakita Mbulum piŋŋe, ta gwa, a ta ge a ba ya. 4 A mət ka, ti le ŋgat a biye. Ama i huɗ mehinne makər a ka, a mbəlara i məməta ya, kamala ana mewetse ŋa a riŋ i wakita Mbulum, ta gwa, a ta ge a ba ya. 5 I dəba ŋa ya ka, a pàt aba a Piyer, dite a pàt aba a gà kurwa gəra sula ŋa aaha kuɗa. 6 Dite ka, a pàt aba a gà asiŋ gà damər kwa ŋgiɗ ana ika vatwa Mbulum, ku mege tə za dərməka ə̀zləm a asa. Gà tar ata tserdze ya, ta ŋgatar a təv ilik ŋa. Aà gər mendze tar ata ya ka, gà asiŋ ŋa ika magər tar a ka, tàa mata. Ama bagwal ŋa ka, tar riŋ aà bəra mba hiywe haa kinehe. 7 I dəba ŋa ya asa ka, a pat aba a Zakup, dite a gà asiŋ gà ɓəzla meslire Mbulum tserdze kuɗa.

8 Aka mandəvandəv ŋana ka, a dara, a pètiŋ aba a iye mbaŋa. Ama iye ka, nìheɓiɓiɓɓè kamala kəla ana ta wa ka, kiye ŋa aka ndze aɗəm tsiye, na ika miɗ Mbulum a. 9 Iye ka, kəla ŋa na ika magər gà ɓəzla meslire Mbulum tserdze ya. I pə̀r aàba ka, i sle duwa tsa na ti zeliŋ a mala meslire Mbulum a. Aɗaba Yàa sèwèr are a gà mburma Yesuw akahər ata ka, hinne. 10 Ama ka, Mbulum aka giŋ ŋgwal ŋa, na dite ka, i ne mala meslire ŋgar kamala ana kurum ihər ki ŋgetwimiŋ a kinehe ya. Taŋa mege ŋgwal ŋgar ata a giŋ a ka, aka ne taf masakəŋa tsa. Seyiŋ tsa, Yàa ge megemir ka, hinne, a za biy gà ɓəzla meslire Mbulum ana tserdze ya ivaɗ. Ama ka, iye tsa na a ge megemir ata ya kəla. Mbulum nda ŋgwal ŋgar ata a giŋ a, na a ge megemir ata nda təv ga ya. 11 Ama ku mege iye na a tsik a bazlam ŋgwal ŋa ata a mburma ya, nda gà bəla gà mburma ata tekeɗe ka, a tsik a duwa tsa. Aɗaba mə̀r tserdze ka, bazlam ŋgwal ŋa ata ilik, na mìi ɗif a dər a mburma ya, kamala ana iye ihər i tsik a kurum a kinehe, dite kə̀ gəsum nda gəzləŋ kurum lele ya mbaŋa.

Mimbile ana gà mburma ti ta mbilere a i məməta ya ya

12 Ŋgwal bazlam ata mì ɗifewa dər a ka, araha: Mbulum a mbəlara à *Kiristi i məməta ya. Na kataya ana, dite meme na gà asiŋ gà misle ŋgiɗ ika magər kurum ta gweɗe a ka, mburma a mbilere a i məməta ya asa tsiye? 13 I gwaɗa a tar ka, na mege ta mbilere a i məməta ya tsəka, taŋa ka, Kiristi tekeɗe, aka mbəlara iɗəm a tsa mbaŋa. 14 Ama na mege ŋgat aka mbəlara iɗəm a tsəka, taŋa ka, kamala megweɗe ya ka, bazlam Mbulum ana mì ɗifewa dər a mburma ya ka, a ne dukw taf masakəŋa. Dite kurum tekeɗe, megìse kurum ana kə̀ gəsum bazlam mə̀r a ka, a ne biy taf masakəŋa mbaŋa. 15 Na mege kataya ka, taŋa mì sasa pàrsa aà Mbulum, aɗaba ana maa mbər metsike a mburma parakka, Mbulum aka mbəlara à Kiristi i məməta ya ya, tsaatsa, pàrsa ya. Ama na Mbulum a mbilere a à mburma i məməta ya tsəka, taŋa ka, aka mbəlara à Kiristi iɗəm ɓav tsa mbaŋa. 16 Kamala taŋa ya, wura a mbilere a i məməta ya tsəka, taŋa Kiristi tekeɗe, aka mbəlara iɗəm a tsa mbaŋa. 17 Ama na Kiristi aka mbəlara i məməta ya tsəka, taŋa megìse kurum ana kà gəsum ŋgat a tekeɗe, a ne taf masakəŋa, Mbulum aka pəl a kurum à bakal kurum tsa haa kinehe mba. 18 Taŋa ka, kamala megweɗe ya: Gà na ta gəs Kiristi ya, tàa mata ka, tàa dzeye kweleŋ mbaŋa. 19 Na bəla kà tikikwa madzala gà gər kwa aka Kiristi ka, dite mà zlak kwa, ma gekwa ŋgulum a mendze kwa ana kinehe ɗa ika gər ahəɗ pəra, taŋa ka, mburma ti tiwe a kwa, à zè a dər biy gà misle ŋgiɗ tserdze.

20 Ama ka, kataya tsa. Kiristi aka mbəlara i məməta ya ndzer kaɗəŋ. Ŋgat na a lah mimbilera i məməta ya ya. Aɗaba taŋa, gà asiŋ gà mburma ana tserdze ta mata ya tekeɗe, ti ta mbilere a i məməta ya mbaŋa. 21 Aɗaba gà mburma ta mete a ɗa ika gər ahəɗ ka, agəra mburma ilik na a zlara məməta ya ya. Kamala taŋa ya tekeɗe, misle ŋgiɗ ilik na a hə̀ndə̀k i vatwa ya, na dite mburma ti ta mbilere a i məməta ya ya mbaŋa. 22 Aɗaba taŋa, mburma tserdze ta mete a ka, agəra ana tar gà ɓəza Adama ya. Ta mete a kamala ŋgat a mbaŋa. Ama na tàa gəs Kiristi nda gəzləŋ tar ka, ti ta mbilere a i məməta ya kamala ŋgat a mbaŋa asa.

23 Ama dukuməŋa a ge a ba ndaka vatwa ŋa, tsəka, a ndeb aaka a tsa. Taŋa Kiristi ka, ŋgat na a lah aà məmbə̀lara i məməta ya ya. A pat ana à mère a ya ka, Mbulum a ta mbele a à gà na ti ne gà mburma ŋgar a mbaŋa kuɗa. 24 I dəba ŋa ya ka, sùndàl Kiristi a ti dze a iɗəm à gà ɓəzla mene are Mbulum ana tserdze ya, ku mege gà Əbay nda gà na ndzəɗa tar a riŋ hinne tekeɗe ya fit. Aka dzeye iɗəm à tar a ka, dite gər ahəɗ à ndìv a kuɗa. Ŋgat tekeɗe, à me a à mekwere Əbay ŋgar ahər a Mbulum Tsir ŋgar, a kwere a kuɗa. 25 Aɗaba say Kiristi a kwere a tə̀ma, haa a pat ana Mbulum à dzer a gà ɓəzla mene are ŋgar tserdze aà huɗ sik ŋgar a dzekwiŋ. 26 Mandəvandəv mala mene are Mbulum ata a dzeye a dər a ka, məməta ana ta mete a ya. 27 Aɗaba mewetse ŋa a riŋ i wakita Mbulum ka, a gwa: «Mbulum aka dza gà dukw tserdze aà huɗ sik Kəla ŋgar.» A tsik ba kamala taŋa ya ka, Mbulum nda ba ŋgar ŋa dze tsa na Kiristi a kwere a ya. Aɗaba ŋgat ŋa ivaɗ na à dze a gà dukw tserdze aà huɗ sik Kəla ŋgar ata ya. 28 I təv ana Kəla Mbulum a ta kwere a gà dukw ata tserdze ya ka, dite tiɓìzl a hinne a à gər a bəɗ a Mbulum Tsir ŋgar ana a vəlar ndzəɗa ata tserdze ya. Kamala taŋa ya, Mbulum ka, a ti ne a Əbay ika gər gà mburma nda gà dukw ana tserdze ya kuɗa.

29 Ama ka, dzalum gà gər aka bazlam ŋgiɗ aaha asa dzekwiŋ. Aàla na gà asiŋ gà misle ŋgiɗ a riŋ ika magər kurum ka, a sàs a tar ti tsilwiɓ a aba a yam avukw wele ana aka mbər mimìte, tàa tsilwiɓ dər a yam tsiye ya? Na gà mburma ta mbilere a i məməta ya nda ndzer tsəna, metsìlwìɓè tar ata ti tsilwiɓ aba a yam avukw gà məməta ya ana, dukùla na a ge a ter a iɗəm ŋgulum dze ya? 30 Kamala taŋa ya, ku mege mə̀r tekeɗe, na mì sər gà mburma ta mbilere a i məməta ya tsəna, dite aàmala na mì zla akaba mesewere are kəla pat a? 31 Sərum dər ndzer, gà damər ga, kəla pat tserdze iye ka, i ɗa məməta. I tsik a kurum taŋa ka, aɗaba ana i ŋgaya ba agəra kurum a. I ŋgaya ba ka, agəra ana kurum nda gà mə̀r tserdze magàwà ba ŋa nda gà Yesuw Kiristi BATSAH kwa ŋa ya. 32 Gà asiŋ gà mburma ana ɗa i kwite Efesiya ya, tàa sèwèriŋ are ka, hinne. Ar ka, kamala ana i ge guvəl aà gà dukw dala ana gà ŋgwal ŋa tsiye. Na bəla i dzele a ka, kamala ana gà mburma gər ahəɗ ti dzele a ya ana, dite guvəl ata i ge a ya ana, a giŋ a ŋgulum la? Na mege Mbulum a ta mbilere a à mburma i məməta ya tsəka, ana ka, ŋgulum zazamakwa bazlam minew ata, a gwa ka: «Gekwa məburnun, zəmakwa aba dukw mezime ya, kà sakwa guzum, aɗaba pat ŋgiɗ ka, sìkwèɗ duwa kwa a ta ge a riŋ asa tsa, ki metekwe a fit.»

33 Aɗaba taŋa, ka banum ba kurum tsa. Sərum dər ka, na ki ndzwim a i təv ilik ŋa nda gà na ta ge a bakal a ka, kurum tekeɗe, ki dìɗwim a a bakal bise, kamala tar a mbaŋa. Ti nis a à mede kurum ana ŋgwal ŋa ya. 34 Agəra taŋa, kinehe ka, pìɗekeywim i mekweye ya, ki gwim bakal asa tsa. Aɗaba i samata, gà asiŋ gà misle ŋgiɗ ika magər kurum a ka, tàa sər Mbulum zukw tsa. I tsik a kurum taŋa ka, dite gurɓəts hwarwa ma ge a kurum.

Ba ana Mbulum a ta mbil a dərra i məməta ya ya

35 Taŋa biytsa misle ŋgiɗ a gweɗe a ka: «Gà mburma ti ta mbilere a i məməta ya dze ana, meme? Dite i təv ana, Mbulum aka mbəlara à tar ana, ba tar a ti ndze a dze ana, meme asa ya?» 36 Na wura a tsik a kataya ka, ndə̀fakkà wele ata ka, metsehe ŋgar a riŋ tsa. Aɗaba taŋa, ar ka, kamala hwife ana ki slige a ya. Say ti tike a a biye dzekwiŋ, na dite a slil a ya. 37 Hwife ana ti slige a ya ka, ku mege wur daw, mege wur dukùla tekeɗe ka, taŋa wur ŋa ɗekɗek tə̀ma tsəka, slàmbah ŋa zukw tsa. 38 I dəba ŋa ya, Mbulum na a ge a ya, na dite a slil a ka, a ɗe a kuɗa ya. A ge a ba kamala ana ŋgat a sasar a. Taŋa Mbulum na a vəl medzibe ba ata nda gà wur gà duwa pampam kataya ya.

39 Ba gà asiŋ gà dukw ŋgiɗ ana mesife iɗəm a tekeɗe, Mbulum a ge ba tar pampam mbaŋa. Ba mburma ka, pam nda biy gà dukw ata. Dite ba gà ɗiyeŋ tekeɗe, pam nda biy kilif asa mbaŋa.

40 Ama gà medzibe gà dukw ata a riŋ pampam a ka, ika gər ahəɗ ɗekɗek tsa. Aɗaba gà dukw ana tar riŋ madzàvàyà ŋa aà gəza mbulum a tekeɗe, tar ka, pampam mbaŋa. Metsehine tar tekeɗe, ar ka, kamala biy gà dukw ana ɗa ika gər ahəɗ a ɓav tsa. 41 Ama gà dukw ana aà gəza mbulum a pampam mbaŋa. Aɗaba pat ka, medìve ŋgar pam nda biy kiye. Dite kiye tekeɗe, medìve ŋgar pam nda gà mawusawus asa. Dite ika magər gà mawusawus ibam, tì div a ka, pampam asa mbaŋa.

42 I təv ana Mbulum a ta mbilere a à mburma i məməta ya tekeɗe, a ta ge a ka, kamala taŋa ya mbaŋa. Ba mburma aka mət ka, a ndzikiɗ ba wur daw ana tàa slige ya. Tàa le a biye ka, gùdzuɓ a ndze a tsa, a gwinekiŋa. Ama ba ana Mbulum a mbil a dər a ka, a gwineke a asa tsa, a ndze a ka, aà biybiy. 43 Məməta ana ti le a a biye ka, gwilwìmber gwilwìmber ndzəɗa iɗəm tsa, a tsahən tsa. Aləka aka ta mimbile ka, ndzəɗa ŋa, à tsehin a lele ndzer kuɗa. 44 Aɗaba tə zlawa mburma a biye ka, slu ba gər ahəɗ ɗekɗek pəra. Aləka i təv ana a ta mbil a ya ka, a ŋget a ba awiya ŋa ana Mezite Mesife Mbulum a viler a ya. Kamala ba kwa ana kinehe ya ka, ki ta ŋgetekewe a ba ana Mezite Mesife Mbulum a vile a kwe a ya aka miɗ tekeɗe, kataya mbaŋa. 45 Aɗaba a riŋ mewetse ŋa i wakita Mbulum ka, a gwa: «Adama malahalah ŋa na Mbulum a vəlar mesife ya.» Wele ana a ndə̀vara aba i dəba Adama ya ka, *Kiristi. Tar ka, ilik nda Mezite Mesife Mbulum ana a vile a mesife awiya ŋa a mburma ya. 46 Ama kə̀ ŋgatawukwa malahalah ŋa ka, ba ana biy Mezite Mesife Mbulum ata ya zukw tsa. Kə̀ ŋgatawukwa ka, ba ana biy gər ahəɗ masakəŋa ya dzekwiŋ, dite i dəba ŋa ya, ki ŋgetekewe a ba awiya ŋa ana Mezite Mesife Mbulum a vile a kwe a ya kuɗa. 47 Malahalah mburma ka, Adama, ŋgat a ne mburma gər ahəɗ pəra. Mbulum a ge ŋgat ka, nda ahəɗ. Ama wele ata a mbe aka Adama ka, ŋgat a dara i mbulum i gər ŋa ya. 48 Gà mburma gər ahəɗ ti ndzikiɗ ba ka, kamala Adama ata Mbulum a ge ŋgat nda ahəɗ a. Dite gà mburma ana ti ti ndze a i təv Mbulum i gər ŋa ya tekeɗe, ti ndzikiɗ ba ka, misle ŋgiɗ aaha a dara i mbulum i gər ŋa ya mbaŋa. 49 Ama kinehe ka, kà ndzìkìɗekwe ba wele ata Mbulum a ge ŋgat nda ahəɗ a tə̀ma. Aka miɗ mba ka, ki ti ndzìkìɗekwe a ba wele ata a dara i mbulum i gər ŋa ya kuɗa.

Məmbə̀ɗà ba ŋgiɗ i təv ana Yesuw Kiristi à mère a ya

50 Gà damər ga, iye ihər i tsik a kurum a nda ndzer: Wura a sle aà mede a a *mekwere Mbulum nda gà slu ba ŋgar nda mesife kataya tsa. Aɗaba dukw ana à mite a ya ka, ti sle a aà mendze akaba a nda dukw ana a ndze a aà biybiy a tsa.

51 Tsarakum kwaŋ, i ɗif a kurum a à dukw ana makàhà ŋa ya: Ba kwa tserdze ka, a ta mete a fit tsa, ama ba kwa ata tserdze ya ka, sùwùɗ ki ta mbìɗekwe a ba ŋgiɗ. 52 Aka mandəvandəv gər ahəɗ ka, ta vèt a mezleliŋ. Tàa vàt ka, ki ta mbìɗekwe a ba ŋgiɗ sùrat kataya tsara, kamala ana wura a ge a mbitsèkw a. Na bəla tàa vàt mezleliŋ ata ka, gà na tàa mbər mimete ya, ti ta mbilere a i məməta ya. Ti ta ŋget a ka, ba ana à mite a asa tsiye. Ama kwa ana kinehe kwa riŋ nda mesife hiywe mba ya ka, ki ta ŋgetekewe a ba ana awiya ŋa ya asa mbaŋa. 53 Aɗaba ba kwa ana kinehe à mìtiŋa, dite a gwineke a ya ka, say a ti ne a ba ana à mite a asa tsa, a ndze a aà biybiy a. 54 I təv ana ba kwa à mbìɗ a ba ŋgiɗ kamala taŋa ya ka, taŋa dukw ana mewetse ŋa a riŋ i wakita Mbulum a, a ge a ba kuɗa. Ta gwa ka:

«Məməta a riŋ asa tsa,

Mbulum aka dzeye dər fit kweleŋ.

55 Taŋa a kər məməta, ndzəɗa yak ŋa ana,

i ŋga kuɗa ya?

Dite simir yak ana,

kà mbalawuwa dər mburma ya ana,

ar i ŋga na kinehe ya?

Aɗaba taŋa, ama kinehe kər ka,

ki sle a aà mege dukw ana ŋgwal ŋa tsiye

a mburma asa tsa.»

56 Yaw, taŋa məməta a ŋgat ndzəɗa aà mege dukw ana ŋgwal ŋa tsiye a mburma ka, agəra ana ta gewa bakal a. Dite i huɗ mege dukw ata ya tekeɗe, kà sərakwa, naha ana bakal a ka, agəra məpala ahəm Mbulum. 57 Ama ka, gekwa kəkaaha a Mbulum, aɗaba ana a vile a kwe a ndzəɗa aà məmbà dər aà gà bakal nda məməta fit, nda ahər Yesuw Kiristi BATSAH kwa ŋa ya.

58 Aɗaba taŋa, gà damər gà ana i waya kurum hinne ya. Ndzum ka, nda ndzəɗa ɓəŋɓəŋ lele, ka ti yum ba tsidze. Gwim megemir Yesuw BATSAH kwa ŋa ka, nda gəzləŋ ilik aka miɗ aka miɗ. Kurum kà sərum, megemir ana ki gwim a aɗaba ŋgat a ka, a ne a taf masakəŋa tsa.