Bazlam aka gər ndzəɗa Mezite Mesife Mbulum ana
a vile a a mburma ya
14
1 Mərum aba hinne,
na dite ki ŋgetwime a mawàyà ba ana ki weywim a dər mburma ya.
Yahum ka,
ndzəɗa ana Mezite Mesife Mbulum à dzèye a a mburma aà megeye dər gà dukw pampam a asa mbaŋa,
na dite ki ŋgetwime a ya.
Ama yahum ndeyndey ŋana ka,
ndzəɗa məma à bazlam Mbulum ana a ɗif a kurum dər,
ki mwime a dər a mburma ya.
2 Na wura à fèfil a ndaka ahəm ana ŋgat aka sər tsiye ka,
mifefile ŋgar ata ka,
say Mbulum ilik na a tsereker a ya,
tsəka,
mburma tsa.
A tsik a taŋa ka,
dukw ana makàhà ŋa ya,
nda ndzəɗa Mezite Mesife Mbulum.
3 Ama wele ana à me a à bazlam Mbulum a mburma ndaka ahəm kwite ŋgar,
a gà asiŋ ŋgar a,
dukw ana a tsik a ya ka,
à zlèk a tar,
à me a terehe a arəv,
na dite ta ŋget a ndzəɗa ɓəŋɓəŋ lele ya.
4 Wur ana à fèfil a ndaka ahəm ata ŋgat aka sər tsiye ka,
a ge a ŋgulum a ba ŋgar ɗekɗek pəra.
Ama wele ana à me a à bazlam Mbulum a mburma ndaka ahəm kwite ŋgar a ka,
taŋa ka,
à zlèk a gà mayahaba gər gà mburma Mbulum ana i kwite ata ya tserdze.
5 A sèsiŋ ka,
kurum tserdze ki fèfilwim a ndaka gà ahəm ata kurum ka sərum tsiye.
Ama a sèsiŋ ndeyndey ŋana ka,
kurum tserdze ki mwime a à bazlam Mbulum a mburma ndaka ahəm kwite kurum ivaɗ.
Taŋa ka,
ŋgwal ŋa.
A za dər na ki fèfilwim a ndaka ahəm ata ka sərum tsiye.
Aɗaba wur ana à fèfil a kamala taŋa ya ka,
say misle ŋgiɗ mə̀ mà dər ndaka ahəm kwite kurum,
na dite bazlam ŋgar ata a vile a ndzəɗa a megìse gà mayahaba gər gà mburma Mbulum tserdze ya.
6 Gà damər gà,
na bəla i dehe a a təv kurum ka,
i fèfil a kurum a ndaka ahəm ana kà sərum tsiye dze ana,
dite dukùla na a ge a kurum a iɗəm ŋgulum a?
Na bəla i dehe a ka,
say i ɗif a kurum a à dukw ana makàhà ŋa biy Mbulum a ivaɗ,
kige tsa i ɗif a kurum a à metsehe,
nda gà bəla i me a kurum a ka,
à bazlam Mbulum,
kige tsa i dzeŋge a kurum a duwa asa mbaŋa.
Na Yàa ge dər kataya ka,
taŋa na à zlèk a kurum nda ndzer a.
7 Dzalum gà gər aka gà dukw ana mburma tə tarawa dər à dimis a kwaŋ,
kamala gà vagam nda gandzavəl a.
Ama na bəla mala məvata ŋa,
kige tsa mala medzè ŋa a ter a dər ka,
dèrevek dèrevek ndaka vatwa ŋa tsəna,
meme na mburma ti sir a biye ɗa ŋa,
tì dzer aakaha a ya?
8 Nda təv məvata tsìtsèkw tekeɗe,
ar ka,
kamala taŋa ya mbaŋa.
Na bəla gà mburma ana i gà kwite ŋgiɗ a,
ta ge a guvəl aà gà biy ŋgiɗ,
ama na mala məvata tsìtsèkw aka tsəl aɗəm lele tsəna,
weke na à hèdzèl a ba aà mada a guvəl ŋa ya?
A riŋ tsa.
9 Yawwa,
i təv kurum tekeɗe,
ar ka,
kamala taŋa ya mbaŋa.
Na ki fèfilwim a a mburma ka,
daɗəkɗəkka wura a sər dukw ana ki tsikwim a ya tsəna,
meme na ti tsereke a dukw ana ki tsikwim a ter a ya?
Aɗaba ki fèfilwim a taŋa ka,
kamala ana i magər himbiɗ huwwa taf masakəŋa ya.
10 Kamala taŋa ya,
gà ahəm gà kwite ŋgiɗ tar riŋ pampam hinne ika gər ahəɗ,
ku mege gà slàla awara ta fèfil a ba a ndaka ahəm kwite tar lele.
11 Ama na bəla iye i tsereke a ahəm tar ata tsəka,
a giŋ a ŋgulum tsa.
Taŋa ka,
wele ata à fèfiliŋ a ndaka ahəm ŋgar ata ya,
a ne à iye ka,
kamala ana iye slele ya,
dite iye asa tekeɗe,
i ne ika miɗ ŋgar ka,
kamala slele ya asa mbaŋa.
12 Ama araha,
ika magər kurum tekeɗe,
ki gewim dər kamala taŋa ya mbaŋa.
Lele,
na kurum riŋ ihər ki yehwim a ka,
gà ndzəɗa ana Mezite Mesife Mbulum à dzèye a a mburma ya,
nda gəzləŋ ilik,
na dite ki ŋgetwime a ya.
Taŋa ka,
a tsahən aà kurum hinne seyiŋ.
Ama kəla ka,
yahum ndeyndey ŋana ka,
medzibe ndzəɗa ana ki zlèkwim a dər gà asiŋ gà misle ŋgiɗ a,
na dite ka,
ta ŋget a ndzəɗa nda təv megìse tar ana ta gəs Mbulum nda gəzləŋ ɓəŋɓəŋ lele ya ya.
13 Aɗaba taŋa,
na wura aka ŋgat ndzəɗa aà mifefile ndaka ahəm ana ŋgat aka sər tsiye ka,
say ma hama a Mbulum,
na dite Mezite Mesife Mbulum a viler a ndzəɗa aà məmaya dər a mburma ndaka ahəm kwite ŋgar asa mbaŋa ya.
14 Na bəla iye ihər i heme a a Mbulum ndaka ahəm ata iye Yàa sər tsiye ka,
taŋa iye riŋ i hemer a nda ndzəɗa Mezite Mesife Mbulum kaɗəŋ,
madzala gà gər gà kə̀la ka,
a riŋ iɗəm tsa.
15 Ama na kataya ana,
i ge a dze ana,
meme?
I waya kinehe ka,
i hemer a nda ndzəɗa Mezite Mesife Mbulum ata,
dite biy ŋgiɗ i hemer a nda madzala gà gər gà asa mbaŋa.
Nda gà na i təv malàhà dimis a tekeɗe,
i ge a dər kamala taŋa ya mbaŋa ya.
I lèh a nda ndzəɗa Mezite Mesife Mbulum ata,
dite biy ŋgiɗ,
i lèh a nda madzala gà gər asa mbaŋa.
16 Ama na bəla ki ge a kəkaaha a Mbulum ndaka ahəm ana kər kàa sər tsa,
dite ka,
gà mburma ata ti tsereke a ya tsəna,
ta gweɗe aaka a «*Amin» dze ana,
meme?
Aɗaba tar ka,
tàa tsaraka dukw ana kà tsik a tsa,
17 ku mege meheme yak ata ki heme a ka,
ndzer,
a tsahən aà gəzləŋ yak a tekeɗe,
a ge a ŋgulum a misle ŋgiɗ tsidze.
18 Taŋa iye ihər i ge a kəkaaha a Mbulum,
aɗaba ana i fèfil a ndaka ahəm ana iye Yàa sər tsiye ka,
i za dər kurum fit kweleŋ.
19 Ama ku mege kataya tekeɗe,
i təv ana mə̀r mayahaba gər ŋa nda gà asiŋ gà mburma Mbulum a ka,
a sèsiŋ na i tsik a ter a guma Mbulum nda metsìkè a tar gà bazlam ŋgiɗ pampam hinne ya tsa,
say biye ə̀zləm pəra.
Ŋgulum ka,
ti tsereke a lele,
na ndəna i we a bazlam vìrìɗìɗɗe masakəŋa ndaka ahəm ana ti tsereke a tsiye ya.
20 Gà damər gà,
ka tə dzalum duwa kamala gà ɓəza ndirkiz a tsa.
Dzalum gà gər ka,
kamala ana kurum gà bàba gà mburma ya.
Ama nda təv mege bakal ka,
nwim kamala gà ɓəza kəla ndirkiz ana kwizikw tə sər ikaba à dukw bakal a tsiye.
21 *A riŋ mewetse ŋa i wakita Mbulum ka,
a gwa:
«I ti slirre a gà mburma ana
ta fèfil a ndaka gà ahəm kwite ŋgiɗ a,
a təv gà mburma aaha,
ti ti tsik a ter a bazlam gà ndaka ahəm ata.
Ama ka,
i sər,
ku mege kataya tekeɗe,
gà mburma tì dziŋ aaka a zləm ɓav tsa.»
22 Aɗaba taŋa,
mifefile ata ndaka ahəm ana ti tsereke a tsiye,
a be a à ɗaf ka,
a gà na tàa gəs Yesuw Kiristi nda gəzləŋ tar tsiye,
na ti sir a dər,
tar ka,
ika magər mayahaba gər kurum tsiye.
Tsəka,
agəra gà na tàa mbər megìse Yesuw Kiristi nda gəzləŋ a tsa.
Ama i təv məma à bazlam Mbulum ka,
pam.
A ge a ŋgulum a gà na tàa gəs Yesuw Kiristi nda gəzləŋ tar a ivaɗ,
na dite ti sir a dər ka,
Mbulum na a vəl a mə̀r ndzəɗa ya,
tsəka,
agəra gà na tàa gəs tsiye tsa.
23 Tsarakum kwaŋ,
na bəla i təv ana kurum gà mburma Mbulum kàa yahum ba gər a ka,
kurum tserdze,
ku mege weke,
à dze a ba aà mifefile ndaka ahəm ana ŋgat aka sər tsiye,
dite gà mburma ana tàa gəs Yesuw Kiristi nda gəzləŋ tar zukw tsa,
nda gà na tar i bəra ya,
tàa dara aka magər kurum ana,
ta gweɗe a,
kurum gà məba a dala tsiye?
24 Ama na ki mwime a à bazlam Mbulum a mburma tserdze ndaka gà ahəm kwite kurum ka,
i dəba ŋa ya,
gà mburma ana tàa gəs Yesuw nda gəzləŋ tar zukw tsiye,
nda gà na tə sər dukuməŋa zukw tsiye,
ti dere a aka magər kurum a ka,
taŋa dukw ana ki tsikwim a ter a ya,
ti sir a dər ka,
maa ge bakal ndzer kuɗa.
Aɗaba dukw ana tə tsaraka ya ka,
a vile a ter a madzala gà gər hinne.
25 Kamala taŋa ya,
gà dukw ana gà makàhà ŋa i gà gəzləŋ tar tə dzalawa ya ka,
à pètere a a bəra ya ndərzayya kuɗa.
Ti ti dze a gurmits a bəɗ ika miɗ Mbulum,
dite tì zèmbeɗe a dər,
ta gweɗe a parakka:
«Mbulum ka,
a riŋ ika magər kurum ndzer.»
Yahum ba gər ndaka vatwa ŋa lele
26 Aɗaba taŋa,
gà damər gà,
na kataya dze ana,
ki gekwe a ana,
meme?
Ama i təv ana ki yehwimebe a gər a ka,
misle ŋgiɗ à lèh a i ŋgar dimis,
misle ŋgiɗ a dzeŋge a bazlam Mbulum a mburma,
dite misle ŋgiɗ ibam,
a me a à dukw ana Mbulum a tsiker a,
a mburma.
Biy ŋgiɗ ka,
à fèfil a i ŋgar ndaka ahəm ana ŋgat aka sər tsiye,
dite naha ka,
à me a dərra iɗəm a parakka.
Ama dukw ana ki gwim a tserdze ya kəla ka,
say biy ana gà mburma Mbulum ta ŋget a ndzəɗa ɓəŋɓəŋ,
ti de a dər aka miɗ aka miɗ lele ya.
27 Na bəla wura a riŋ à fèfil a ndaka ahəm ana ŋgat aka sər tsiye ka,
say misle ŋgiɗ a me a dər,
kige tsa,
tar sula,
bəla makər,
tsəka,
ma za taŋa tsa.
Ku weke a waya à fèfil a ndaka gà ahəm ata ŋgat aka fàfəl dər ilik tsiye ka,
say gà mburma a riŋ ta mèye a dər aka mimbe aka mimbe dzekwiŋ.
28 Ama na bəla wura a riŋ à me a dər tsəka,
tə ndzaba tìytìy,
ta fàfəl ika miɗ mburma tsa.
Ŋgulum ka,
mə fàfəl a Mbulum i gəzləŋ ŋgar,
a tserekeriŋa.
29 Ama gà mburma ana tàa ŋgat ndzəɗa aà məma à bazlam Mbulum a mburma ya tekeɗe,
say bəla sula,
kige tsa makər na ta fèfil a ya,
na dite gà asiŋ ŋa aaha ti tsereke a lele,
tì dze aaka a zləm,
ti sir a dər ka,
wànà bazlam tar ata ti tsik ana,
a da ndaka vatwa ŋa ndzer kaɗəŋ a ya?
30 Na wura a riŋ à me à bazlam Mbulum a mburma,
i dəba ŋa ya ka,
Mbulum aka ɗif à duwa a misle ŋgiɗ ika magər kurum a ka,
a ger həɗəmma,
a waya meɗìfè dər a mburma i təv ana wele malahalah ŋa aaha à fèfil a mba ya ka,
ŋgat ata à fèfil a ya,
ma ndza tìytìy,
mə vəl vatwa a wele ŋgiɗ aaha,
mə̀ fàfəl.
31 Vatwa ka,
a riŋ dukw ŋgar,
na i wur ana aka ŋgat ndzəɗa aà məma à bazlam Mbulum a mburma ya.
Ama ki fèfilwim a kəla ka,
ilik ilik aka mimbe aka mimbe tsəka,
ŋgùrà ŋgùrà tsa.
Kamala taŋa ya,
ku weke ika magər kurum,
a sinike a ba aà duwa,
ta mèrehe a à arəv.
32 Wur ana aka ŋgat ndzəɗa aà məma à bazlam Mbulum a ka,
ndzəɗa ŋgar a riŋ aà magəsa gəzləŋ mbaŋa.
A ndze a tìytìy tə̀ma,
dukw ŋgar.
33 Aɗaba dukw ana a de a ndaka vatwa ŋa tsiye ka,
a tsahən aà Mbulum tsidze.
A sasar ka,
na ki ndzekwe a zayya lele ika magər kwa ya ivaɗ.
Ama gà məkəs ana ika magər kurum a ka,
ta ge kamala gà asiŋ gà məkəs ŋgiɗ ana ta gewa ika magər gà mayahaba gər gà mburma Mbulum a mbaŋa.
34 I təv ana ki yehwimebe a gər a ka,
tə ndzaba ɗikɗik,
aɗaba vatwa a riŋ tsa na ta fèfil a ya.
Say ta həna à gər a bəɗ kamala ana məpala ahəm Mbulum a tsik a mbaŋa asa.
35 Na bəla duwa a riŋ tàa tsaraka i ga Mbulum tsa,
dite a sàs a tar mewize ka,
ta wiz ika magər mburma i fata tsa.
Ta gəs gəzləŋ haa a təv ana tàa ndze a ma ya dzekwiŋ,
dite ta wiz aà gà zal tar kuɗa.
Aɗaba taŋa ka,
dukw hwarwa na gà məkəs ta fèfil a ika magər gà mayahaba gər gà mburma Mbulum a.
36 A kurum gà mburma Mbulum ana i faka ya,
kà dzalum dze ana,
bazlam Mbulum a dza ahər ba ana,
i təv kurum a ya?
kige tsa a dara ana,
a təv kurum a ɗekɗek a?
37 Na bəla wura a gweɗe a,
iye ka,
Yàa ŋgat ndzəɗa Mezite Mesife Mbulum,
kige tsa,
iye mala məma à bazlam Mbulum a mburma ka,
ma sər dər,
dukw ana i wetse a kurum i faha ya ka,
dukw ana BATSAH kwa ŋa a tsik a.
38 Ama na bəla a sasar magəsa dukw ana i wetse ya tsəka,
Mbulum tekeɗe,
a ger a hayaffà aà magəsa ŋgat ɓav tsa mbaŋa te.