Mawàyà mburma na a za gà duwa tserdze ya
13
1 Taŋa na bəla wura aka ŋgat ndzəɗa aà mifefile ndaka ahəm gà kwite ŋgiɗ tserdze,
ku mege ndaka ahəm gà gawla Mbulum ana i gər ŋa ya tekeɗe,
ama na a waya mburma tsəka,
taŋa ka,
aka ne kamala mèdìyè ana ti leke a ka,
ɗùh ɗùh ɗùh a ge a zləm a mburma taf masakəŋa ya,
kige tsa kamala ndzemde ana ŋgwaz ŋgwaz ta gìzl a ka,
a tsahən tsiye.
2 Na mege wura aka ŋgat ndzəɗa aà məma à bazlam Mbulum a mburma lele,
nda gà bəla aka sər vatwa ŋgar,
nda gà dukw ana makàhà ŋa i təv ŋgar a fit,
kige tsa aka gəs bazlam Mbulum maràhà ŋa i gəzləŋ tsìsl,
na dite a sle aà megweɗe a a kwite aaha:
«Hitse i faha ya,»
dite a de a kaɗəŋ tekeɗe ya ka,
ama na a waya gà asiŋ gà misle ŋgiɗ tsəka,
taŋa ka,
a ne kamala dukw ana taf masakəŋa ya hiywe mba.
3 Ku mege wura ma dzaya aba gà limana ŋgar a fit a gà ɓəzla matawak a,
kige tsa mə vəl ba ŋgar aɗaba bazlam Mbulum,
ta wànà iɗəm ŋgat a tekeɗe,
na a waya gà asiŋ gà mburma ŋgiɗ tsəka,
taŋa ka,
a ger a ŋgulum tsidze.
4 Aɗaba taŋa,
wur ana a waya mburma ya ka,
ədəts à gis a gəzləŋ,
a ge a dukw ana ŋgwal ŋa ya,
a misle ŋgiɗ.
A ge a are aka dukw mburma tsa,
a ge a zlapa tsa.
Ŋgakŋgakəkka à sìŋgìr a à ba ŋgar ɓav tsa asa mbaŋa.
5 Mala mawàyà mburma ka,
a ge a dukw ana a ndeɗe a dər akaba hwarwa nda təv gà misle ŋgiɗ a tsa.
Dite a ge a dukw ana a ge a ŋgulum ka,
a ba ŋgar ɗekɗek a ɓav tsa asa.
Duwa à tsìɓer a nda təv mburma tsa.
Na bəla wura aka ge aà ŋgat bakal a ka,
a tike a matsəɓatsəɓ ŋa a gəzləŋ ŋgar tsa asa.
6 Wur ana a waya mburma ya ka,
a ŋgeye a ba a bakal ana gà mburma ta ge a ya tsidze.
Ama a ŋgeye a ba ka,
a dukw ana ta ge a ŋgwal ŋa ya ivaɗ.
7 Taŋa wur ana a waya mburma ya ka,
à gis a gəzləŋ i təv mesewere are ya tserdze.
A simehe a a dukw ana mburma ta ger a ŋgwal ŋa tsiye fit mbaŋa.
Ku ndeɗime,
a de a aka miɗ aka miɗ nda magəsa Mbulum nda gəzləŋ ŋgar.
A tike a madzala gà gər ŋgar ka,
kəla pat a təv Mbulum,
na dite dukw tserdze a de a i təv ŋgar lele ya.
8 Mawàyà mburma ka,
à ndìv a tsa,
a ndze a aà biybiy.
Ama gà bazlam Mbulum ana ta màwa dər a mburma ya ka,
tì ndìv a mba.
Dite ku mege tàa ŋgat ndzəɗa aà metsìkè gà ahəm ana tar tə sər tsiye tekeɗe,
a ti ndìv a mba asa.
Masəra gà dukw ana mburma tə səraya nda təv Mbulum a tekeɗe ibam,
à ti ndìv a mbaŋa asa.
9 Aɗaba kàa sərakwa gà dukw ana ndzer ŋa ya ka,
kweleŋ zukw tsa.
Bazlam Mbulum ana kà mawukwa dər a mburma ya tekeɗe,
kàa sərakwa fit ɓav tsa mbaŋa.
10 Ama i təv ana Mbulum a ti ɗifekwe a à gà dukw ana ndzer ŋa ya ka,
gà dukw ana ta ge a ŋgulum kinehe tə̀ma ya ka,
tì ndìv a kuɗa.
11 Ar ka,
kamala kəla ndirkiz a.
Aka ana kər kəla ŋa ya ka,
ka fàfəlawa kamala kəla ndirkiz ana à fèfil a ya.
Madzala gà gər yak tekeɗe,
kamala taŋa ya asa mbaŋa.
Aləka i təv ana kə̀ gəl ba,
kì ge gawla ya ka,
ki miyek a à dukw gà ɓəza ndirkiz a kuɗa.
12 Ama kinehe ka,
are kwa a de a aba ya zukw tsa,
ki ŋgetekewe a a gà duwa ka,
zìyye kamala kwataramà ana ki fir a iɗəm a ka,
kùlàhtàhha are a slala iɗəm a tsiye tə̀ma.
Aləka a ndze a a tə̀vəməŋa mba ka,
ki hitsekwe a aka miɗ Mbulum dzìrìk,
ki ŋgetekewer a ndzùzlzlwa lele kuɗa.
Kinehe ka,
kà sərakwa ŋgat fit kweleŋ zukw tsa.
Ama a pat ana aka ndzera ya ka,
ki sirekwe a ŋgat lele kuɗa,
kamala ana ŋgat a sər kwa kinehe ya mbaŋa.
13 Aɗaba taŋa,
kinehe ka,
gà duwa a riŋ makər na tì ndìv a tsiye.
Kamala megweɗe ya:
magəsa Mbulum ana kə̀ gə̀sakwa nda gəzləŋ kwa ya,
nda metìkè madzala gà gər kwa ana ki tikikwe a nda təv ŋgar a,
na dite dukw tserdze a de a lele ya,
nda mawàyà mburma.
Ama kəla ka,
mawàyà mburma na a za gà dukw ata tserdze ya.