Ndzəɗa ana Mezite Mesife Mbulum a vile a mburma ya
12
1 Gà damər gà,
kinehe ka,
a sèsiŋ i fèfil a kurum a aka gər gà ndzəɗa Mezite Mesife Mbulum ana a dzaya a mburma,
aà megeye dər gà dukw pampam a kuɗa.
I waya ka,
ki sirwim a taŋa lele.
2 Kurum kà sərum,
akahər ana kàa gəsum Yesuw Kiristi nda gəzləŋ kurum zukw tsiye ka,
kà zàmbaɗawum à gà fəla ana pampam tə sər bazlam tsa,
kà nwim dər kamala mbulum a ya.
Dukw ata ka,
ədəts a gəs kurum,
a fàr aka kurum ndzəɗa hinne kamala ana gəzləŋ ŋgar a waya ya.
3 Aɗaba taŋa,
i waya ka,
kurum ana kàa gəsum Yesuw Kiristi a gəzləŋ kurum kinehe ya,
na ki sirwim a ikaba à dukw aaha ya lele ya.
Na Mezite Mesife Mbulum i ba wura ka,
wele ata a sle aà megweɗe a aà Yesuw Kiristi:
«Wisìh Yàa vəlak mezelme» ka,
a sle a tsa.
Kamala taŋa ya mbaŋa,
wura a sle aà megweɗe a:
«Yesuw a ne BATSAH kwa ŋa» ka,
a sle a tsa,
na Mezite Mesife Mbulum i ba ŋgar tsiye.
4 *Gà dukw ana Mezite Mesife Mbulum à dzèye a a mburma,
dite na ta ŋget a ndzəɗa aà megeye dər gà duwa ya ka,
pampam hinne.
Ama Mezite Mesife Mbulum ata ka,
ilik pəra.
5 Kamala taŋa ya,
gà megemir a riŋ pampam na Yesuw BATSAH kwa ŋa à dzèye a a mburma ka,
dite ta ge a ya.
Ama Yesuw Batsah kwa ŋana,
a gwa,
gwim a ka,
ŋgat ŋa ilik pəra mbaŋa.
6 Taŋa Mbulum a dzaya gà ndzəɗa a mburma ka,
pampam,
na dite ta ge a dər megemir ŋgar a.
Ama ŋgat ana a dzaya a tar ndzəɗa aà megeye gà megemir ata ya ka,
ilik mbaŋa asa.
7 Ama Mezite Mesife Mbulum a riŋ a ge a megemir ka,
i gà gəzləŋ kurum ilik ilik tserdze,
na dite,
kurum tekeɗe,
ki zlìkwim a dər gà asiŋ gà misle ŋgiɗ nda ndzəɗa ana a dzaya a kurum a ya.
8 Kamala taŋa ya,
misle ŋgiɗ ka,
Mezite Mesife Mbulum a vəlar ndzəɗa aà metsìkè ŋgwal metsehe lele.
Ama Mezite Mesife ata ilik pəra.
A biy ŋgiɗ ka,
a viler a ndzəɗa aà masəra vatwa Mbulum lele,
aà dite a ɗif a dər a mburma parakka ya.
9 Biy ŋgiɗ asa ka,
Mezite Mesife Mbulum ata a vəlar ndzəɗa aà mege slagama nda təv magəsa Mbulum.
A sər ka,
a sle a aà mege dukw ana mawura ba ŋa ya tserdze.
A misle ŋgiɗ asa ka,
a vəlar ndzəɗa i ŋgar ka,
aà məmbala à gà ɓəzla dukw məməta.
Taŋa ka,
Mezite Mesife Mbulum ŋa ata hiywe ilik ɗekɗek pəra.
10 A vəl a misle ŋgiɗ ka,
ndzəɗa ana biy megeye dər gà dukw mene aà mburma ya.
A biy ŋgiɗ ka,
a vəlar ndzəɗa aà məma à guma ana Mbulum a tsikar a,
a mburma terwihhwe lele.
Gà biy ŋgiɗ ibam,
ta ŋgat ndzəɗa i tar ka,
aà masəra ikaba à dukw ana a dara i təv Mezite Mesife Mbulum a,
nda biy Əbay sitene ya.
Gà misle ŋgiɗ asa ka,
ta ŋgat ndzəɗa i tar ka,
aà metsìkè gà ahəm ana tar tekeɗe,
tə sər tsiye.
Gà biy ŋgiɗ asa ibam,
ta ŋgat ndzəɗa i tar ka,
aà məma à gà ahəm ata a mburma parakka lele.
11 Ama taŋa ka,
Mezite Mesife Mbulum ŋa ata ilik na a dzèye a gà dukw ata tserdze a mburma ya.
Kamala taŋa ya,
pàk pàk à dzèye a gà ndzəɗa ata a mburma pampam,
ku mege weke ka,
kamala ana ŋgat a waya ya.
Ba mburma ka, ilik, ama gà dzerisl ba ŋana ka,
pampam hinne
12 Taŋa kà sərakwa,
ba mburma ka,
ilik.
Ama gà dzerisl ba ŋana iɗəm a ka,
pampam.
Ku mege gà dzerisl ba ŋa tar riŋ pampam hinne tekeɗe,
ba ŋa ka,
ilik pəra.
Kamala taŋa ya,
i təv mayahaba gər gà mburma Yesuw Kiristi ka,
kataya mbaŋa.
13 Aɗaba aka ana ti tsilwiɓ à kwa a yam a ka,
kwa tserdze kà nekwa kamala ba ilik a,
nda ndzəɗa Mezite Mesife Mbulum ata ilik ŋa ya.
Aɗaba ku mege gà Yahuda,
ku mege gà na tar gà Yahuda tsiye,
nda gà ku mege gà ɓele,
nda gà na ti ziwe a gər tar a tekeɗe,
Mbulum a vəl a kwa akaba Mezite Mesife ŋgar ka,
ilik pəra.
14 Kurum kà sərum,
ba mburma ka,
dzerisl ba ŋa iɗəm ka,
ilik pəra tsa.
Tar iɗəm ka,
pampam diŋ.
15 Na bəla sik a gweɗe a:
«Iye ka,
pam aà ba mburma ya,
i ndze ahər tə tsa,
aɗaba iye ka,
ahər tə tsa.»
Ama ku mege a tsik a kataya tekeɗe ana,
dzerisl ba mburma ata hiywe dukw ŋgar tsiye?
16 Kige tsa bəla zləm a gweɗe a:
«Iye ka,
pam aà ba mburma ya,
agəra ana iye ka,
are tsiye.»
Tsaatsa,
taŋa dze ana,
ŋgat dzerisl ba mburma mbaŋa tsiye.
17 Na bəla ba mburma fit ka,
ndutsndutsùtstswa are ɗekɗek ana,
dite meme na ti tsereke a duwa ya?
Kige tsa na bəla ba mburma fit ka,
habawbaw zləm ɗekɗek dze ana,
dite meme na duwa a ze ahər a asa ya?
18 Ama ka,
Mbulum aka ge ba mburma kamala taŋa ya tsa.
Seyiŋ tsa,
a làmbaɗaya gà dzerisl ba ana i ba mburma ya tserdze ka,
ndaka vatwa ŋa,
kamala ana a tsahən ahər a ivaɗ.
19 Na mege Mbulum a ge mburma ka,
sùɗùkw ilik,
dukw ŋgiɗ ihər asa tsidze ana,
taŋa ana,
ba asa ya?
20 Ama ar ka,
kamala taŋa ya tsa.
Gà dzerisl ba a riŋ iɗəm pampam hinne.
Ama ba ka,
ilik pəra.
21 Aɗaba taŋa,
are a sle aà megweɗe a a ahər:
Iye i waya kər tsəka,
a sle a tsa.
Kige tsa gər a gweɗe a a sik:
Ki giŋ ŋgulum tsəka,
a sle a ɓav tsa.
22 Seyiŋ tsa,
kamala gà sùwal ba ana ki fir a ahər a,
a ndze a ka,
masakəŋa,
à lìm a aà duwa tsiye ka,
tsaatsa,
ŋgat na a ge a ŋgulum a ivaɗ.
23 Gà təv ana aà kwa tì zlibe a dər tsiye ka,
ki gekwe a metsehe aà medìweye gà təv ata ivaɗ.
Nda gà təv ana biy mekèhe aà are mburma ya tekeɗe,
ki kèhekwe a taŋa ndeyndey ivaɗ asa.
24 Gà təv ana tar riŋ aà ba kwa,
tə tsahən aà kwa lele,
biy mekèhe tsiye ka,
gurmumuɗa a ndze a kataya pəra.
Aɗaba makàhà gà təv ata ka,
a ge a ŋgulum tsa.
Mbulum a ge ba mburma ka,
dzeŋ a təv ilik ŋa ilik,
na dite ki zlìbekwe a ndeyndey ŋana ka,
à gà təv ana kà yàkwa a dala nda are ivaɗ a,
kamala ana a ge a ŋgulum tsiye.
25 Aɗaba a ge dər kataya ka,
a waya tsa na ba kwa a ndze a tsakàlàk təv pampam a.
Ama a sasar ka,
gà dzerisl ba ata ti zlèkeye a ba ilik ilik tserdze.
26 Na dzerisl ba ŋgiɗ ilik a riŋ a wir a ka,
gà təv ŋgiɗ aaha tserdze ya,
ta wireye a mbaŋa.
Na bəla tì zlibe a à təv ŋgiɗ ka,
gà asiŋ ŋa aaha tserdze ya tekeɗe,
ta ŋgeye a ba mbaŋa.
Ku mege weke,
ika magər kurum ka,
aka ne dzerisl ba ŋgar.
27 Taŋa kurum tserdze ka,
kà nwim kamala ba Yesuw Kiristi ya mbaŋa.
Ku mege weke ika magər kurum ka,
aka ne dzerisl ba ŋgar.
28 Kamala taŋa ya,
na Mbulum a dzaya a tar a ba gà dzerisl pampam,
na dite ku mege awara,
ta geye a gà megemir ŋa ya.
Malahalah ŋa ka,
a ndzək gà asiŋ gà misle ŋgiɗ,
a ne à tar gà ɓəzla meslire ŋgar.
I dəba ŋa ya,
a ndzək gà biy ŋgiɗ ka,
gà na ta me a à guma ŋgar a.
I dəba tar a asa ka,
a ndzək gà misle ŋgiɗ pam,
a ne à tar gà ɓəzla medzèŋgèyè bazlam ŋgar a mburma.
Dite a ndzək gà biy ŋgiɗ asa,
tar ka,
ta ŋgat ndzəɗa i tar,
aà megeye gà dukw mene aà mburma.
Gà biy ŋgiɗ ibam,
ti sle i tar ka,
aà məmbala à gà mburma i dukw məməta tar a.
Gà biy ŋgiɗ asa,
tar ta ŋgat ndzəɗa i tar,
aà mazlàkàyà mburma.
Gà biy ŋgiɗ,
tar ka,
ta ŋgat ndzəɗa aà mandza ika miɗ mburma i təv mandza akaba ahəm.
Dite gà naha i tar,
ta ŋgat ndzəɗa ka,
aà metsikeye gà ahəm ana tar tekeɗe,
tə sər tsiye kuɗa*.
29 Taŋa kurum kà dzalum dze ana,
meme?
Wànà Mbulum a ndzək gà mburma ata tserdze ya,
a ne à tar gà ɓəzla meslire ŋgar a?
Tsəna,
ku weke à me a à bazlam ŋgar,
a dzeŋge a a mburma ya,
kige tsa a ge a dukw mene aà mburma ya?
30 Tsəna,
gà tar ata tserdze ya,
ti sle aà məmbala à mburma i dukw məməta ya ya?
Kige tsa mburma tserdze ta fèfil a ndaka gà ahəm ana tar tekeɗe tə sər tsiye ya?
Nda gà bəla ta me a à gà ahəm ata parakka a mburma nda ndzer a?
Awaŋ,
kataya tsa.
31 Ama iye ihər i tsik a kurum ŋa:
Yahum iɗəm gà ŋgwal gà dukw ana Mbulum a dzèye a a mburma ya nda gəzləŋ ilik,
na dite ki ŋgetwime a ya.
Kamala taŋa ya,
kinehe ka,
i ɗif a kurum a à vatwa ana ŋgwal ŋa,
a za dər gà biy ŋgiɗ aaha tserdze ya,
na dite ki zezemwim a taŋa ya.