11
1 Zazamum ka,
mede gà ana i de a ya,
kamala iye ana i zezem a dukw ana Yesuw Kiristi a ge a ya mbaŋa.
Mege metsehe agəra madànà feɗere a gər
2 I zlibe a à kurum,
aɗaba ana kurum ihər ki dzelwim a aka bazlam gà tserdze kəla pat,
dite kurum ihər ki zezemwim a ka,
dukw ana i ɗif a kurum a dər mbaŋa ya.
3 Ama a sèsiŋ ka,
ki sirwim a mbaŋa,
Yesuw Kiristi ka,
ika gər gà asləka gà mburma tserdze.
Asləka ibam,
ika gər məkəs.
Dite Mbulum ka,
ŋgat ika gər Yesuw Kiristi mbaŋa.
4 Aɗaba taŋa,
na wura a heme a a Mbulum ika miɗ mburma,
kige tsa à me a ter a à bazlam Mbulum ka,
ma zla felère i gər a,
tsəka,
à ndeɗe a hwarwa aka Yesuw Kiristi ana ŋgat Əbay ika gər ŋgar a.
5 Ama i təv gà məkəs ka,
pam.
Na bəla a heme a a Mbulum,
kige tsa à me a à bazlam Mbulum a mburma,
à kèhe a gər tsa,
à pèt a dər kwàndàlàz kataya ka,
taŋa ka,
a ndaɗa hwarwa aka zal ŋgar mbaŋa.
A ne à ba ŋgar kamala məkəs ana muva ŋa i gwala kurum ka,
kùndemmè à zèz a ikaba ambəz a ya.
6 Na bəla məkəs ana a ge a kataya,
à dèn a feɗere a gər tsəna,
dite aàla na à zèz a gər tsiye?
Ama na bəla aka sàs ika ambəz ŋgar a,
kige tsa aka zàz ka,
ki sirekwe a dər,
a ge taŋa ka,
dukw hwarwa.
Aɗaba taŋa,
say mà dàn feɗere a gər.
7 Ama na asləka mburma a heme a a Mbulum ka,
ma zla felère i gər a.
Aɗaba Mbulum a ge ŋgat ka,
kamala mendzikiɗe ba ŋgar a.
Taŋa a ɗif a ka,
à ndzəɗa Mbulum ana a za gà dukw tserdze ya.
Ama məkəs ka,
mà dàn feɗere a gər,
aɗaba ŋgat a ɗif a ka,
à mezlibe zal ŋgar ɗekɗek pəra.
8 *Aɗaba kurum kà sərum,
Mbulum a zla ka,
slu ba məkəs,
na dite a ge dər ba asləka mburma ya tsa.
Ama a zla ka,
slu ba asləka mburma ivaɗ,
na dite a ge dər ba məkəs a.
9 Kamala taŋa ya tekeɗe,
Mbulum a ge asləka mburma ka,
aɗaba məkəs tsa,
a ge məkəs ka,
aɗaba asləka mburma ivaɗ.
10 Aɗaba taŋa,
say gà məkəs tə dànaya feɗere a gər,
na dite tì zlibe a dər à gà zal tar,
dite agəra gà gawla Mbulum mbaŋa ya.
11 Ama ku mege kataya tekeɗe,
ika miɗ Yesuw BATSAH kwa ŋa ka,
məkəs a ndze a à gər ŋgar tsa,
say i ahər asləka mburma dukw ŋgar.
Dite asləka mburma tekeɗe,
a ndze a ka,
à gər ŋgar ɓav tsa,
say nda məkəs mbaŋa.
12 Aɗaba Mbulum a zla slu ba asləka mburma,
na dite a ge dər məkəs a.
Ama kəla ka,
gà məkəs na ta we a gà asləka mburma kinehe ya.
Ama gà tar ata sula məma ya ka,
Mbulum ana a ge duwa tserdze ya,
na a ge tar a.
13 Dzalum nda gà gər kurum dzekwiŋ:
na bəla məkəs a dehe a a ga Mbulum,
a heme a a Mbulum ka,
ze madànà feɗere a gər ana,
taŋa ana,
lele ya?
Tsikwim kwaŋ.
14 Aɗaba ku mege i ŋga ka,
mburma tə sər,
na asləka mburma aka miyak à ambəz ŋgar,
ma ge zubul ŋa ka,
dukw hwarwa ivaɗ na i təv wele ata ya.
15 Ama na bəla məkəs ŋa aka miyak aaka à ambəz ŋgar ka,
taŋa ka,
ŋgwal ŋa ndzer.
Aɗaba Mbulum a vəlar ambəz zubul ŋa kataya burrùɓ ka,
na dite a kàhar dər gər a.
16 Na bəla wura a sasar mimbètsè ahəm aka gər bazlam ata ka,
ma sər dər,
mə̀r mì zazamawa ka,
mege dukw ata i ga Mbulum,
dite na gà asiŋ gà mburma Mbulum tekeɗe,
ti zezem a vatwa ata mbaŋa ya.
Mazəma ɗaf biy matəkəra à məməta Yesuw
17 Yaw,
taŋa bazlam ŋgiɗ a riŋ pam na a sèsiŋ i ɗif a kurum a dər a asa mbaŋa.
Ama na aka gər bazlam ata ka,
i zlibe a kurum a asa tsa.
Aɗaba i təv ana kà yahawum ba gər aà mazàmbàɗà à Mbulum a ka,
ki gewim ka,
dukw ana a ge a ŋgulum tsiye.
Ki niswim a à ba ivaɗ.
18 Aɗaba i tsaraka malahalah ŋa ka,
ta gweɗiŋ:
I təv ana kà yahawum ba gər aà mazàmbàɗà à Mbulum a ka,
ki ndzekwim a ba iba ya təv pampam,
na ika magər kurum gà mburma Mbulum a.
Ama i dzala,
i gwa,
bazlam ata a ge a ka,
ndzer kaɗəŋ,
pàrsa iɗəm tsa.
19 Ama kəla ka,
ŋgwal ŋa ki ndzekwim a ba iba ya təv pampam seyiŋ dukw ŋgar,
na dite ti sir a dər gà na ti zezem a Yesuw Kiristi nda gəzləŋ ilik a ya.
20 Aɗaba i tsaraka,
i təv ana kà yahawum ba gər a ka,
aà mazəma ɗaf matəkəra dər aà məməta Yesuw BATSAH kwa ŋa tsa,
kàa dzalum gà gər aka taŋa tsidze.
21 Aɗaba ku mege weke a dzele a ka,
aka mazəma dukw mezime ŋgar ana a dzəm ahər a ɗekɗek pəra.
Kamala taŋa ya,
gà asiŋ gà misle ŋgiɗ tàa kwaya dər,
gà biy ŋgiɗ ibam,
tàa ŋgat aà mezime tsa,
may a riŋ a wir aà teriŋa.
22 Na ki gwim a kataya ana,
dite aàla na a sàs a kurum mazəmaya aba gà dukw mezime ŋa,
nda gà masàyà gà duwa i gà ma kurum a tsiye?
Wànà a sàs a kurum ana,
mene à gà mburma Mbulum kamala za ya kəla ya?
Tsəna,
a sàs a kurum ana,
mandàɗà hwarwa aka gà mburma Mbulum ana gà matawak ŋa ya ya?
Wànà i tsik a kurum a dze ana,
dukùla asa ya?
Kà dzalum dze ana,
i zlibe a à kurum a ya.
Awaŋ,
i zlibe a à kurum tsidze.
23 Taŋa bazlam ana i dzeŋge a kurum a ka,
Yesuw Kiristi BATSAH kwa ŋa na a ɗifiŋ dər a.
I tsik a kurum ka,
dukw ana a ge ɗa ba ya.
A ge ba ka,
a pat duwa ndaavəɗ,
dite ti ta ge a ɗaf aà Yesuw BATSAH kwa ŋa a gà ɓəzla mene are ŋgar a ka,
24 a zla ɗaf,
a ge dərraha kəkaaha a Mbulum,
dite a sasa ikaba ya,
a gwaɗa a gà ɓəzla mazazama ŋgat:
«Zəmum.
Naha ka,
slu ba gà ana i ta vile a aɗaba kurum a.
Gwim dər kamala taŋa ya aka miɗ aka miɗ,
kà tə̀kərawum dər aà iye.»
25 *I dəba mazəma ɗaf ata ya ka,
a zla kup meɗwìtsè mawà dukw makwàsà ŋa ata iɗəm asa mbaŋa,
dite a vəl a tar,
a gwaɗa a tar:
«Kinehe ka,
sum dukw aaha.
Naha ka,
mendzikiɗe ba masəra ba Mbulum awiya ŋana ti sir a ba nda gà mburma ya,
agəra məmbəz gà ana i ti dzeye a dər aɗaba kurum a.
Ku mege ndeɗime,
ki swim a kamala ana i ge dər kinehe ya,
kà tə̀kərawum dər aà iye.»
26 Bazlam Yesuw BATSAH kwa ŋa ata a ɗif dər a ka,
ku mege ndeɗime,
i təv ana ki zimwim a ɗaf kamala taŋa ya,
nda masà dukw ata i kivit a ka,
ki tsikwim a a mburma parakka,
na Yesuw BATSAH kwa ŋa a mət agəra məmbə̀là dər à kwa ya.
Ki ɗifwim a ter a dər ka,
daga aà kinehe ya,
haa a pat ana a ta mère a ya.
27 Aɗaba taŋa,
na wura a zim a ɗaf Yesuw BATSAH kwa ŋa,
kige tsa a se a dukw mese ŋgar ana i kivit a,
ndaka vatwa ana à zlibe a dər à ŋgat a tsəka,
seriye Mbulum à gis a ŋgat,
agəra ana a ne bakal aà gà ba Yesuw Batsah kwa nda məmbəz ŋgar a.
28 Aɗaba taŋa,
say ku weke ma dzala dzekwiŋ.
Na bəla bakal duwa a ŋgiɗits a ŋgat tsəka,
ma zəm,
dite ma sa mbaŋa.
29 Na wura a zim a ɗaf Yesuw BATSAH kwa ŋa,
dite a se a dukw mese ŋgar,
na bəla a dzele a dər gà gər aka ba Yesuw Kiristi tsəka,
a da à ba ŋgar aka miɗ seriye Mbulum nda ahər ŋgar ŋa.
30 Aɗaba taŋa na gà asiŋ gà mburma hinne ika magər kurum,
tar ka,
i dukw məməta,
gà biy ŋgiɗ ndzəɗa aà tar tsa,
dite gà asiŋ ŋa ibam,
tàa mata ya.
31 Na mege kàa dzalakwa aaka dzekwiŋ ka,
ana ka,
Mbulum a gese a kwa aka miɗ seriye ŋgar kamala taŋa ya asa tsa.
32 Ama na Mbulum a ɗifekwe a à metsehe kamala taŋa ya ka,
a sasar mibekwa à ɗaf ivaɗ,
na dite ka,
a ta gew akaba a kwa aka miɗ seriye ŋgar nda gà ɓəzla bakal,
ki dzeyekwe a tsiye ya.
33 Kamala taŋa ya,
gà damər gà,
i təv ana ki yehwimebe a gər aà mazəma ɗaf BATSAH kwa ŋa ya ka,
say ki vevwim a gà misle ŋgiɗ tserdze dzekwiŋ,
dite ki zimwim a kuɗa ya.
34 Na wura a riŋ may a wir a ahər a ka,
say ma zəmara aba ɗaf ŋgar i ma ya dzekwiŋ,
na dite mayahaba gər kurum ana ki yehwimebe a ya ka,
Mbulum a ta gis a dər kurum a seriye ŋgar asa tsiye ya.
Ama gà asiŋ gà bazlam ŋgiɗ ana kà wizwim a,
i ti ɗif a kurum a dər ka,
say i təv ana Yàa ndzeha a təv kurum a dzekwiŋ.