Dukw ana a ge ba piŋŋe, ta be a kwa dər à ɗaf a
10
1 *A kurum gà damər gà,
a sèsiŋ ka,
dzalum gà gər aka dukw ana a ge ɗa ba nda təv gà bàba gà tsir kwa ana akahər ata piŋŋe,
tə zazam Musa ya.
Mbulum a ndza a tar aka miɗ nda hulɓukw ŋgaŋŋa kamala akwa ya.
A ɗif a tar à vatwa,
a tar ata tserdze.
Dite tə tsalara i duluv ana tə zalar duluv nduzzwa ŋa ya.
2 Tar ata tserdze ya ka,
kamala na Mbulum a tsilwiɓ à tar a hulɓukw ata,
dite a duluv ata asa mbaŋa ya.
Kamala taŋa ya,
ti ne gà ɓəzla mazazama Musa.
3 *Gà tar ata tserdze ya ka,
tə zəmawa dukw mezime ana Mbulum a dzaya a tarəra i gər ŋa ya mbaŋa.
4 *Dite tə saya yam ana Mbulum a tə̀f a tar,
a ŋgəzara i kuvəl a asa mbaŋa.
Kuvəl ata ka,
Yesuw Kiristi ana tə dəɗ akabara,
a lakara tar a dze ya.
5 Mbulum ka,
a zlàkawa gà mburma ata tserdze kaɗəŋ,
pàrsa iɗəm tsa.
Ama gà asiŋ ŋa i liwiŋ tar hinne na ta gewa dukw ana a tsahən aà Mbulum tsiye ivaɗ.
Aɗaba taŋa na ta matawa i dala i kusak a.
6 Gà dukw ata ka,
ta be a kwa à ɗaf.
Mbulum a sasar aà meɗife a kwa dər ka,
kwa tekeɗe,
ka zazamakwa meeweke dukw ana ŋgwala tsiye kamala i gà mburma ata tə zazamawa ya tsidze.
7 *Aɗaba gà asiŋ ŋa ana i liwiŋ tar a ka,
tə dzawa gurmits a bəɗ a gà dukw ana ta geyewa nda ahər tar,
ti ne dər mbulum tar a.
Kamala na mewetse ŋa i wakita Mbulum ka,
ta gwa:
«Tə daha,
tə ndza ahər a bəɗ,
tə zəmaya gà dukw mezime,
nda masàyà duwa.
Dite ta hitseye aà mbulum,
tə dza ba aà megirive hinne kuɗa.»
Ama ka,
ka tə dzum gurmits a bəɗ a gà dukw ana mburma ti neye dər kamala mbulum a tsa.
8 *Gà asiŋ ŋa i liwiŋ tar asa ka,
ta geye mezelme,
ta hənayaha aà gà məkəs pampam.
Agəra mezelme tar ata ta gewa ya ka,
mburma dəbuw dzik səla gəra makər ta mata fit pat ŋa ilik.
Kwa kinehe ka,
ka ta geyekwa mezelme ata kamala ana gà mburma ata ta geye ya tsidze.
9 *Gà asiŋ gà misle ŋgiɗ asa ka,
ti dzik à Mbulum BATSAH kwa ŋa.
Aɗaba taŋa na gà mesiwiɗ tə dayara hinne,
ti dzeye à gà mburma ata,
dite ta mataya dər a.
Ama kwa kinehe ka,
ka ti dzikikwa à Mbulum kamala tar a asa tsa.
10 *Gà asiŋ ŋa ika magər tar asa ka,
tə sayawa ahəm nda təv Mbulum ka,
hinne.
Aɗaba taŋa na gawla Mbulum ana a batsawa mburma ya,
a dara a təv tar a,
a batsaya gà taŋa fit a.
Ama kurum ka,
ka tə sayum ahəm aà Mbulum kamala tar a tsidze.
11 Mbulum a geye gà dukw ata tserdze ya ka,
aà mibe à ɗaf a mburma,
dite na ta ge metsehe ya.
Ta wetse a wakita ka,
aà mibe a kwa dər à ɗaf,
a kwa ana kinehe kàa ndzekwa a təv mandəvandəv gər ahəɗ ana à ndìv a ya mbaŋa.
12 Aɗaba taŋa,
wele ana a gweɗe a,
waytsa iye mehìtsè ŋa ika vatwa Mbulum dzèŋŋe ya ka,
say ma ge metsehe,
tsəka,
a ti dìɗ a ika vatwa Mbulum a.
13 Dukw ana Əbay sitene a dzik a dər à kurum a ka,
a riŋ a dzik a à mburma tserdze dukw ŋgar.
Ama Mbulum ana ŋgat mala ndzer a ka,
à zlèk a kurum kamala ana a tsik a.
Na bəla Əbay sitene a sasar a dzik a à kurum nda dukw ana a za ndzəɗa kurum a ka,
Mbulum a viler a vatwa tsidze.
Seyiŋ tsa,
medzike ana ti dzik a à kurum,
a le aà kurum a ya ka,
Mbulum a vile a kurum a ndzəɗa,
dite na ki mirwim a aba ya.
A zlèk a kurum,
na dite ka,
Əbay sitene a bene a kurum asa tsiye.
Zazamum ka, vatwa ilik, tsəka, sula tsa
14 Gà masla gà ana i waya kurum hinne ya.
Aɗaba taŋa,
iye ihər i tsik a kurum ŋa:
Mbəɗum dəba a mandza gurmits a bəɗ a gà dukw ata mburma ti ne dər mbulum tar a tserdze.
15 I tsik a kurum taŋa ka,
a kurum ana gà ɓəzla metsehe ya.
Dzalum gà gər aka dukw ana i tsik a kurum a ya,
wànà ndzer a,
tsəna,
ndzer tsiye ya?
16 Dzalum gà gər ka,
aka masà meɗwìtsè mawà dukw makwàsà ŋa ana kà sawukwa,
kà tə̀kərawukwa dər aà məməta Yesuw,
dite ki gewakwa dərraha kəkaaha a Mbulum a.
Taŋa ana,
magàwà ba ana kə̀ gawakwa ba a təv ilik ŋa nda gà Yesuw Kiristi agəra məmbəz ŋgar ana a dza dər a tsiye?
Dite i təv ɗaf ana kà sasawakwaba ya ana,
taŋa ana,
magàwà akaba nda gà slu ba ŋgar tsiye?
17 Taŋa tapa ɗaf ata ka,
ilik pəra.
Kwa tserdze ka,
hinne.
Ama ki zimekwe a ka,
taŋa ilik pəra.
Aɗaba taŋa,
ku mege kwa hinne tekeɗe ka,
kwa tserdze kàa nekwa ba ilik.
18 *Fə̀rum aà mendze gà Isərayel ana ti ndze a haa kinehe ya kwaŋ.
Ta batsawa duwa,
dite ta vile a a Mbulum.
Gà na ta papəɗawa slu ŋa ya ka,
tar mandza ŋa i təv ilik ŋa nda Mbulum ana ta vəlawar dukw ata ya.
19 Kamala taŋa ya,
a sèsiŋ aà megweɗe ana,
là?
Wànà a sèsiŋ i gweɗe a,
dukw ana mburma ti ne dər mbulum tar a ka,
dukw ana ndzer ŋa ya,
tsəna,
slu ata ta viler a ya ana,
ndzəɗa iɗəm a?
Awaŋ,
kataya tsidze.
20 Ama ka,
sərum dər,
dukw ana gà mburma ata tə sər Mbulum tsiye,
ta batsayawa ka,
a gà sitene,
tsəka,
a Mbulum tsa.
Iye ka,
a sèsiŋ na ki ndzwim a i təv ilik ŋa nda gà sitene ya tsa.
21 Meme na ki slwim a aà mazla kup Yesuw Kiristi BATSAH kwa ŋa,
ki swim a iɗəm meɗwìtsè mawà dukw ata makwàsà ŋa ya,
dite i dəba ŋa ya asa ka,
wudəgə̀r ki mbiɗwim a à ba,
ki zlwim a kup gà sitene asa mbaŋa ya?
A ge a ba tsa na taŋa ya.
Kamala taŋa ya tekeɗe,
ki slwim a aà mazəma ɗaf Yesuw Kiristi BATSAH kwa ŋa,
dite i dəba ŋa ya,
kətsəkàl ki mbiɗwim a dər aba,
ki zimwim a dukw mezime gà sitene asa ana,
ki slwim a ya?
A ge a ba tsa.
22 Tsəna,
a sàsakwa ana,
na BATSAH kwa ŋa ma ge arəv nda təv kwa ya ya?
Kurum kà dzalum dze ana,
kà zum ŋgat nda ndzəɗa ivaɗ a?
Gwim dukw ana à zlèk a gà damər kurum a
23 Gà misle ŋgiɗ ika magər kurum a,
tar ihər ta gweɗe a ka,
waytsa vatwa a riŋ aà megeye dukw pampam tserdze.
Haya kaɗəŋ,
ti sle a aà mege ŋa.
Ama gà dukw ŋgiɗ a riŋ iɗəm ka,
ta ge a ŋgulum tsa,
tì zlèk a mburma aà maŋgata ndzəɗa ika vatwa Mbulum tsidze.
24 Ka tə dzalum ka,
aka dukw ana a ge a ŋgulum a ba kurum a ɗekɗek tsa.
Dzalum ka,
aka dukw ana à zlèk a gà misle ŋgiɗ a mbaŋa.
25 Slu ana kàa lwim ahər i kwaskwa ya ka,
papəɗum pəra,
bakal iɗəm tsa.
Ka dzalum duwa,
ka wizwim aà tar ka,
kə̀ kəɗum slu aaha ana,
aà matawala duwa ya ka,
ka wizwim tsa.
26 *I tsik kamala taŋa ya ka,
aɗaba mewetse ŋa a riŋ i wakita Mbulum ka,
ta gwa:
«Gər ahəɗ tserdze nda gà dukw ana iɗəm a ka,
biy Əbay Mbulum.»
27 Kamala taŋa ya mbaŋa,
na bəla wur ana aka gəs Yesuw Kiristi nda gəzləŋ ŋgar tsiye,
aka kəɗ duwa,
aka zalak dər a ma ŋgar aà mazəma ɗaf ŋa,
dite bəla gər yak a waya mede ka,
aləka kàa ndzeha ka,
zəm dukw ana tàa vəlak a pəra,
ka dzala duwa tsa.
Ka wiz aà ŋgat ka,
wànà kə̀ kəɗ dukw aaha ana,
aà matawala duwa ya ka,
ka ta wiz ahər tsa.
28 Ama na bəla aka gwaɗak,
dukw aaha ka,
tə tàwàl dər duwa ka,
kà papəɗ asa tsa,
aɗaba ana aka tsikik a,
dite agəra dukw ana ti dzele a ya mbaŋa.
29 I tsik taŋa ka,
aɗaba dukw ana a ta viler a madzala gà gər a,
tsəka,
aɗaba madzala gà gər yak tsa.
Biytsa misle ŋgiɗ ika magər kurum a,
a gweɗe a:
Iye ka,
i sle a aà mazəma dukw mezime tserdze,
mewisle iɗəm tsa.
Assàh,
aàla na i ge a kamala ana misle ŋgiɗ a dzele a ya,
tsəka,
kamala ana i dzala nda gər gà ya ya?
30 Na Yàa ge kəkaaha a Mbulum,
aɗaba dukw mezime gà dze ana,
aàmala na misle ŋgiɗ a viliŋ a bakal asa ya?
31 Dukw ana i tsiker a ya ka,
araha:
Na ki zimwim a dukw mezime,
kige tsa ki swim a dukw mese,
nda gà bəla ki gwim a dukw pampam,
ku mege awara tekeɗe,
gwim ka,
dukw ana,
dite ki zlìbwim a dər à Mbulum a.
32 Ki gwim a ka,
dukw ana a vile a mendìfè sik a gà misle ŋgiɗ tsiye,
ku mege gà Yahuda,
ku mege gà Yahuda tsa,
dite ku mege gà mayahaba gər gà mburma Mbulum tekeɗe ya.
33 Gwim ka,
kamala ana iye i gewa ya mbaŋa.
Dukw ana i ge a ya fit ka,
a sèsiŋ na i tsahən dər aà gà mburma ya tserdze.
I dzele a ka,
dukw ana a giŋ a ŋgulum a iye ya ɗekɗek tsa.
I dzele a aka dukw ana a ge a ŋgulum a gà asiŋ gà mburma ŋgiɗ a mbaŋa,
na dite Mbulum a mbele à ter a ya.