Mege megemir Mbulum Pul ana a ge biy taf a
9
1 Fə̀rum aà mede gà ana i de a ya.
Iye ana,
i ziwe a gər gà tsiye?
Iye mala meslire Mbulum asa tsiye?
Dite Yàa ŋgat a Yesuw BATSAH kwa ŋa nda are gà mbaŋa tsiye?
Kurum tserdze kà nwim gà mburma Mbulum ka,
aɗaba iye,
agəra ana i ge megemir a Yesuw BATSAH kwa ŋa ya.
2 Ku mege gà misle ŋgiɗ ta gəs iye kamala ana iye mala meslire Mbulum tsiye tekeɗe,
i təv kurum ka,
kà sərum,
iye ka,
mala meslire ŋgar ndzer.
Kə̀ gəsum Yesuw Kiristi nda gəzləŋ ka,
aɗaba ana i ɗif a kurum à bazlam ŋgwal ŋa ya.
Aɗaba taŋa,
na a sər ba ka,
iye mala meslire ŋgar ndzer kaɗəŋ a.
3 Na gà mburma ti yehe a bakal i təv ga ya ka,
araha na dukw ana i tsik a ter aaka a ya:
4 Duwa a riŋ a peliŋ a ahəm a,
na i ŋget a dukw mezime nda dukw mese,
aɗaba megemir gà ana i gewa ya?
5 Kurum kù gwaɗum ana,
duwa a riŋ a peliŋ a ahəm a,
na i zle a daala,
dite mìi sìweye akaba a i təv ilik ŋa məma,
kamala gà Piyer ana nda gà asiŋ gà ɓəzla meslire Mbulum,
nda gà damər Yesuw ta gewa ya ya?
6 Kurum kà dzalum ana,
say mə̀r nda Barnabas ɗekɗek,
na mì gewa megemir,
dite mì gala dər ba mə̀r nda ahər mə̀r ŋa ya ya?
7 Wànà wele ana ŋgat sliwdze ya,
a ge a megemir guvəl ana,
aà taf pəra ya?
Awaŋ.
Dite weke na,
bəla aka fət guvah,
aləka duwa aka nah ka,
a zim a tsiye?
A riŋ tsa.
Weke na,
à kiv a gà duwa ka,
a ɗwits a awah ŋa,
dite a se a tsiye?
A riŋ tsa asa.
8 Dukw aaha i tsik a kurum ka,
taŋa a dara ka,
i madzala gà gər mburma ya ɗekɗek tsa.
Tàa wetse i wakita məpala ahəm Mbulum ka,
kamala taŋa ya mbaŋa.
9 *Musa a wetse ka,
a gwa:
«Na sla a riŋ a gek a megemir ka,
ka ta tiker *tikwirek aka bazlam tsa.»
Kà dzalum,
Mbulum a tsik taŋa dze ana,
agəra gà sla ya?
10 A tsik taŋa ana,
aɗaba kwa ivaɗ tsiye?
A tsik ka,
aɗaba kwa ndzer dukw ŋgar.
Gà mala meslìgè daw nda mala masasa ŋa ka,
gà ŋgwal ŋa ndzer,
na ti tike a madzala gà gər tar tserdze aka dukw ana ti ta ŋget a iɗəm dukw maya ba tar a,
aka miɗ a mba ya.
11 Mì ɗif a kurum à vatwa Mbulum ka,
kamala ana ti slige duwa a guvah a.
Dite kà dzalum dze ana,
na bəla mìi ŋget a dukw ana ika gər ahəɗ a,
i ahər kurum ana,
ŋgwala tsiye?
12 Na gà asiŋ gà misle ŋgiɗ ta wiz a dukw ana ti ndze a dər a,
i təv kurum ana,
mə̀r mìi sle a mewize mbaŋa,
a zè a dər biy tar ata tsiye?
Ama maa wiz aà kurum duwa ilik tsidze.
Mì bàs gəzləŋ i mesewere are ana a le aà mə̀r tserdze ya pəra mbaŋa,
na dite ka,
mìi hìndìk a a vatwa a bazlam ŋgwal ŋa ata aka gər Yesuw Kiristi,
mburma tì dzer a zləm a tsiye.
13 *Kurum kà sərum,
gà na ta gewa megemir i ga Mbulum batsah ŋana ya ka,
ta ŋgatawa dukw ana ti ndze a dər a,
i huɗ dukw ana gà mburma tə dzawa a fata ya.
Gà na ta batsawa duwa a Mbulum a tekeɗe,
ta ŋgatawa iɗəm biy tar a mbaŋa,
ta pèpìɗiŋa.
14 *I təv gà na ti tsik a bazlam ŋgwal ŋana a mburma ya mbaŋa ka,
kamala taŋa ya.
Yesuw Kiristi BATSAH kwa ŋa a gwa ka:
Say gà mburma tì dze a duwa a gà na ti tsik a bazlam gà ya.
15 Ama ku mege kataya tekeɗe,
iye ka,
Yàa wiz aà kurum duwa ilik tsidze.
Ku mege kinehe,
Yàa gwaɗa a kurum ka,
slirwimiŋara duwa ya ka,
Yàa tsik ɓav tsa.
Ŋgulum na i mət à may a ivaɗ,
na ndəna i wiz aà kurum a duwa ya.
Aɗaba wura ilik ma tə nəs à dukw maŋgayaba gà ana a ŋgeyiŋ dər ba i gəzləŋ a tsa.
16 Metsìkè bazlam Mbulum ana i tsik a kurum a ya ka,
aka viliŋ vatwa aà mege dər zlapa tsa,
aɗaba megemir ata ka,
i Mbulum na taŋa ya.
Ŋgat na a gweɗiŋ,
tsik a tar a.
Aɗaba bəla na Yàa tsik a tar tsəka,
ndelèɓ ndelèɓ mesewere are ika gər gà.
17 Na mege i zla megemir ata nda meweye gà ka,
ana ka,
ŋgulum ta viliŋ a dukw maya ba gà zaakwa.
Ama i zla ka,
nda meweye gà tsa.
Iye ihər i ge a ka,
ka ta gwaɗum nda mezìwè gà gər gà tsa,
aɗaba Mbulum na a viliŋ a ahər a.
18 Dukùla na a ne dukw maya ba gà ata ya?
Na a ne ka,
bazlam ŋgwal ŋa ana i tsik a a mburma ka,
biy taf,
Yàa wiz duwa tsiye.
Vatwa a riŋ te ibam,
na ta viliŋ a duwa agəra bazlam ŋgwal ŋa ata i tsik a ter a ya.
Ama ka,
Yàa gəs tsa.
19 Ku mege iye ɓele wura tsa tekeɗe,
ama i həna à gər a bəɗ aà mene ɓele mburma tserdze ivaɗ,
na dite i zlèk a mburma,
ti dere a hinne,
ta gis a Yesuw Kiristi nda gəzləŋ tar a.
20 Na bəla iye riŋ ika magər gà Yahuda ya ka,
i ndze a kamala tar a mbaŋa,
na dite i zlèk a tar aà magəsa Yesuw Kiristi ana ta gəs nda gəzləŋ tar a.
Məpala ahəm Musa ka,
a kwere a iye asa tsa seyiŋ,
ama i təv ana iye riŋ i liwiŋ gà na ti zezem a məpala ahəm ata ya ka,
i ge a kamala tar a mbaŋa,
dite na kìtseŋ kìtseŋ i gese a ter a ahər a təv Yesuw Kiristi ya.
21 I təv ana iye riŋ ika magər gà mburma ana tə sər məpala ahəm Musa ata tsiye ka,
i gewa kamala tar a mbaŋa,
na dite ka,
i gese a ter a ahər aka miɗ Mbulum mbaŋa ya.
Yàa gwa ka,
i gis a ahəm aà məpala ahəm Mbulum tsəka,
Yàa tsik tsa,
aɗaba i zezem a ka,
məpala ahəm Yesuw Kiristi ndzer dukw ŋgar.
22 Ama na iye riŋ ika magər gà mburma ana tàa sime ika vatwa Mbulum zukw tsiye ka,
i newa à ba gà kamala tar a mbaŋa,
na dite i yehere a tar a təv Mbulum a.
Ku mege gà dukùla tekeɗe ka,
na Yàa ndze a təv tar ka,
i ndze a kamala tar a mbaŋa.
I gewa dər kataya ka,
aà dite gà asiŋ ŋana i liwiŋ tar a,
ta mbala,
na mege a ge a ba ya.
23 Dukw ata i ge a tserdze ya ka,
na dite bazlam ŋgwal ŋana ma da aka miɗ aka miɗ a.
A sèsiŋ ka,
i ŋget a dər mipise ahəm Mbulum ana a pisiŋ a ya,
mə̀r nda gà asiŋ gà mburma ana ta gəs bazlam ata tserdze mbaŋa ya.
24 Kurum kà sərum,
gà mburma hinne na tì dzer a ba aà mivele sah lele ya.
Ama ələk ti ndze a a təv ana tì tìz aɗəm a ya ka,
mburma ilik pəra na à lèh a,
à zè a dər gà biy ŋgiɗ aaha ya.
Ŋgat ka,
a ŋget a dukw maya ba ŋgar.
Aɗaba taŋa,
iye ihər i tsik a kurum ŋa:
Mərum aba,
kamala gà ɓəzla metìze ata ya,
dite na ki ŋgetwime a dukw maya ba kurum a.
25 Wur ana a sasar a vel a sah lele ya ka,
a tike a ndzəɗa aka ba ŋgar,
kilɓesl kilɓesl à tètìɗ a à mile ŋgar dzekwiŋ,
na dite à zè a dər gà biy ŋgiɗ aaha,
a ŋget a dukw maya ba ŋgar a.
Dukw maya ba ŋgar ata kəla ka,
kwiɗèy à ndìviŋa,
a ndze a hinne tsa.
Ama kwa kinehe ka,
tàtə̀ɗakwa à mile ika vatwa Mbulum,
na dite ki ŋgetekewe a dukw maya ba ana a ndze a aà biybiy a.
26 Aɗaba taŋa,
iye ihər i vel a ka,
kamala wele ana a vel a sah lele ya.
Dite iye tekeɗe ibam,
i mir a à ba ika vatwa Mbulum kataya mbaŋa kamala wele ana duzl a ge a madugwazlà ahər a mburma ka,
a me a a bəɗ taf masakəŋa tsiye.
27 I gìzl a ba gà nda ahər gà ŋa,
dite na à gis aà iye a ahəm a.
Aɗaba a sèsiŋ ka,
iye na i zal a bəɗ aà mege dukw ata ya,
dite ka,
i ndze a iɗəm a bəɗ a ka,
a ge a ba tsa.
Kamala taŋa ya,
a pat seriye Mbulum ka,
ma ta mà à iye a dəba tsa,
na iye ana i ɗif à bazlam ŋgar a mburma ya.