1 Kurintiya 8

Slu ana tə tàwàl dər fəla ya

1 Kà wizwim aà iye, aɗaba slu dukw ana ta kəɗ, tə tàwàl dər fəla ya. Kurum kù gwaɗum, kwa tserdze ka, kà sərakwara iɗəm dukw ndzer ŋana ya. Haya kaɗəŋ, pàrsa iɗəm tsa. Ama masəra dukw ata kamala taŋa ya ka, a vile a masə̀ŋgə̀rà aba a gà misle ŋgiɗ. Dukw ana à zlèk a mburma ivaɗ a ka, say masəra ba ana ki sirekwe a ba ika magər kwa ilik ilik tserdze ya. 2 Na wura ŋgakŋgakəkka à sìŋgìr a à ba ŋgar, a gweɗe a, waytsa i sər duwa hinne, taŋa ka, ma sər dər, ŋgat ka, aka sər duwa kamala ana a da ndaka biy Mbulum a zukw tsa. 3 Ama wur ana à sìŋgìr a à ba ŋgar tsa, a waya Mbulum ivaɗ a ka, ŋgat na Mbulum a gweɗe ahər a parakka, wele aaha ka, biy ga ya.

4 Aɗaba slu ana ta kəɗ, tə tàwàl dər duwa ya dze ana, wànà ki pèpìɗekwe a ya? Ama dukw ana iye i zlaŋa ya ka, araha: Kwa kà sərakwa dər dukw ana gà mburma gər ahəɗ ta ger a gər hirek hirek, ti ne dər mbulum tar a ka, mesife iɗəm tsa. Dite kà sərakwa mbaŋa, Mbulum ka, ilik, tsəka, biy ŋgiɗ a riŋ asa tsa. 5 Ama ka, gà duwa ŋgiɗ a riŋ hinne i gər ŋa i mbulum, nda gà ika gər ahəɗ seyiŋ, na ga mburma ti zembeɗeye à ter a kamala ana gà mbulum tar a. Gà dukw ata ka, hinne, a ɗeme a ba tsa, na ta kwere a mburma ya. 6 Ama ku mege kataya tekeɗe, i təv kwa ka, Mbulum ka, ilik pəra. Ŋgat na Tsir kwa ya. Gà dukw ana ika gər ahəɗ tserdze ya, tə dara ka, i ahər ŋgar a. A ge kwa mbaŋa, na dite kinehe kwa gà biy ŋgar a. Kamala taŋa ya, BATSAH kwa ŋa tekeɗe, ilik pəra mbaŋa, kamala megweɗe ya ka, Yesuw Kiristi. Mbulum a geye gà dukw tserdze ka, nda ahər ŋgar. Ki ŋgetekewe a mesife awiya ŋa ka, i təv ŋgar a mbaŋa asa.

7 Mər ka, mì sər, na gà dukw ata gà mburma ata tì zèmbeɗe a dər a ka, mesife iɗəm tsiye. Ama gà misle ŋgiɗ pam ika magər kwa ka, tə sər tsa. Tar ka, na bəla tàa papəɗ slu ana tə tàwàl dər duwa ya ka, ti dzele a i gər tar, ta gweɗe a, mì zèmbeɗe a taŋa ka, à dukw ata ndzer. Aɗaba tar, tə zàmbaɗawa dər ka, kamala taŋa ya, tàa sər vatwa Mbulum fit zukw tsa. Aɗaba taŋa, na tàa papəɗ ka, a vile a ter a madzala gà gər hinne, ta gweɗe a, maa nəs ika miɗ Mbulum a. 8 Ama kà sərakwa, dukw mezime ka, a sle a aà melèmbeɗe à kwa ika miɗ Mbulum tsa. Na kàa zəmakwa tekeɗe, à zlèk a kwa tsa. Na bəla kàa zəmakwa tsa ibam ka, a tsik a duwa tsa asa mbaŋa.

9 Kurum ka, ki ziwim a gər kurum aà mazəma gà duwa ya tserdze kamala ana a sàs a kurum a dukw kurum. Ama kəla ka, gwim metsehe lele, tsəka, gà na tàa sime ika vatwa Mbulum zukw tsiye ka, ti ta ge a bakal aɗaba kurum. 10 Samatum kwaŋ, na bəla kər wele ana kà səraba dukw aaha ka, a lèh a duwa tsiye, kər mandza ŋa i ga ana tì zèmbeɗe a iɗəm à dukw ata ti ne dər mbulum tar a, kər riŋ ihər ki pèpìɗ a slu ana ta vəl a dukw ata ya, dite wur ana aka sime ika vatwa Mbulum zukw tsiye, aka ŋgatak aaka ana, meme? Kà dzala ana, à pèpìɗ a mbaŋa tsiye? 11 Kamala taŋa ya, dukw ana ki ge a ka, aɗaba ana kər kà səraba, dukw aaha ka, à lèh a duwa tsiye ka, a dzeye a à wele ana aka sime ika vatwa Mbulum tsiye. Ama sər dər ka, ge metsehe aɗaba damər yak ana Yesuw Kiristi a mət aɗaba ŋgat a. 12 Na kàa ge duwa zləməŋa pəra kataya ka, ki ge bakal a damər yak, aɗaba ana ŋgat ka, ndzəɗa ŋgar a riŋ zukw tsa, dite a ge a dukw ana a dzala i gər ŋgar, a gwa, i ge dukw aaha ŋgwala tsiye. Ama a damər yak ɗekɗek tsa na kì ge bakal ata ya. Ama sər dər, kì ge bakal ata ka, aka gər Yesuw Kiristi mbaŋa. 13 Aɗaba taŋa, na damər gà a ge a bakal, aɗaba iye, agəra ana i pèpìɗ a slu ata ya ka, ŋgulum i pèpìɗ a tsidze. Aɗaba i waya tsa na damər gà a dzeye a ika vatwa Mbulum a ya.