2
1 Aɗaba taŋa,
i dehe a a təv kurum asa tsəka,
agəra ana i dzala ka,
i ta vile a kurum a matsəɓatsəɓ a gəzləŋ asa ya.
2 Aɗaba na matsəɓatsəɓ i gəzləŋ kurum ka,
iye tekeɗe,
matsəɓatsəɓ i gəzləŋ ga mbaŋa.
Dite ana,
weke na a ta mìŋgehe a arəv asa kuɗa ya?
Wura a riŋ tsa.
3 Aɗaba taŋa na i wetse a kurumaha wakita ŋgiɗ ata ya.
Taŋa ka,
avukw ana i dehe a a təv kurum zləmana ya.
Na mege i daha a təv kurum akahər ata ka,
ki vilwimiŋ a matsəɓatsəɓ a gəzləŋ ivaɗ.
Ama ana ka,
say kurum ivaɗ na ki vilwimiŋ a maŋgayaba a gəzləŋ zləmana ya.
Ama i sər ndzer,
na iye riŋ nda gà maŋgayaba ka,
kurum tserdze tekeɗe,
ki ndzwim a nda maŋgayaba mbaŋa.
4 I təv ana i wetse a kurumaha wakita ata ya ka,
nda madzala gà gər ŋa hinne,
aɗaba gəzləŋ a wir aà iye a tusswa hinne,
haa i tuwa ka,
tuwa yemere tsakw tsakw hinne mbaŋa asa.
I waya tsa na i vile a kurum a matsəɓatsəɓ a gəzləŋ a.
Ama i wetse a kurumaha ka,
dite ka sərum dər ka,
i waya kurum hinne ivaɗ.
Məpəla à bakal a wele ana a ge dukw ana ŋgwala tsiye
5 Na wura ika magər kurum aka vəl matsəɓatsəɓ a gəzləŋ a mburma ka,
a iye ɗekɗek tsa na a vəl matsəɓatsəɓ ata ya.
Ama a vəl ka,
a kurum tserdze,
kige tsa ŋgulum i gweɗe a,
a vəl matsəɓatsəɓ ata ka,
a gà asiŋ ŋa ika magər kurum a ivaɗ,
tsəka,
a sèsiŋ i niw a dukw ana ndzer a ɓav tsa.
6 Aɗaba kurum bagwal ŋa,
dukw ana ki gwim a wele ata,
kà tàtə̀kumar a ka,
ide kuɗa na taŋa ya.
7 Ama kinehe ka,
say pə̀lumar à bakal ŋgar,
kà mùmaraha à arəv.
Aɗaba na kàa gwimer kataya tsəka,
à mite a à arəv ndeyndey,
a miyek a à madzala gà gər ika vatwa Mbulum a fit kweleŋ.
8 Aɗaba taŋa,
iye ihər i ge a kurum a kamkam:
Pə̀lumar à bakal ŋgar,
na dite a sir a dər ka,
kà wayum ŋgat nda ndzer a.
9 I wetse a kurumaha wakita ata,
i waya ka,
i dzik dər à kurum,
aà mesèmete ka,
wànà kurum ihər ki gwim a dukw ana i tsikewa a kurum a ya,
tsəna,
ki gwim a tsiye ya.
Araha,
kàa tàtə̀kum a wele ata ka,
hinne.
Ama kinehe ka,
say pə̀lumar à bakal ŋgar kuɗa pəra na a zeha ya.
10 Na kàa pə̀lum à bakal a wele ata ka,
iye tekeɗe,
i piler a dər mbaŋa.
Na bəla aka giŋ duwa biy na i piler a dər a ka,
taŋa ka,
Yàa pə̀lar dər nda ndzer dukw ŋgar.
I pə̀lar dər ka,
aɗaba kurum,
ika miɗ *Kiristi.
11 I ge dər kataya ka,
aɗaba a sèsiŋ tsa na Əbay sitene a sewle aà kwe a ya.
Aɗaba kwa ka,
kàa mbər mesirekwa wirwir ŋgar ana a gewa ya lele,
makàhà ŋa tsa.
Dukw ana Pul a dzala zləmana i Turuwas a
12 *I mah ba ka,
i da a Turuwas aà metsìkè bazlam ŋgwal ŋa ana aka gər Yesuw Kiristi ya,
a mburma.
I ndzeha a fata ka,
BATSAH kwa ŋa aka lèmbeɗiŋ aba təv a,
a viliŋ vatwa aà metsìkè ŋa parakka lele.
13 I gwa zləmana ka,
i lehe aà Titus,
damər kwa i fata.
Ama ka,
aka daha tsa.
I fata ya ka,
iye riŋ nda gà madzala gà gər hinne.
Aɗaba taŋa na ŋgwìɗik i miyak à gà mburma Mbulum ana i Turuwas a,
i mah ba i fata ya tsara,
i da aka ahəɗ Makaduniya.
Kà mbàyakwa aà duwa tserdze ka, aɗaba Yesuw Kiristi
14 Gekwa kəkaaha a Mbulum,
aɗaba ana a dza mə̀r a ahər a Yesuw Kiristi,
dite ŋgat a ne Batsah mə̀r ŋa,
a de à mə̀r a aka miɗ kəla pat.
Kamala taŋa ya,
a sàs a Mbulum ka,
a ɗif a dər a mburma tserdze,
dite ka,
ku weke ma sər dər,
Kiristi na a mba aà duwa tserdze ya.
A slər mə̀r,
aà metsìkè bazlam ata aka gər Kiristi ya,
dite ka,
aà gà mburma tə sər ŋgat.
Bazlam ata mìi tsik a ya ka,
ar kamala wirdè ana a ze hwaŋŋa ya.
A zehe a ka,
aà gà mburma tserdze,
ku mege a ŋga.
15 Kaɗəŋ,
maa ne ka,
kamala wirdè ana a ze hwaŋŋa,
a tsahən aà Mbulum a,
aɗaba ana mə̀r ihər mìi tsik a bazlam Kiristi a mburma ya.
Mìi tsik a ka,
a gà na Mbulum riŋ ihər a mbele a à ter a ya,
nda gà na ti dzeye a ya mbaŋa.
16 A gà na Mbulum a mbele a à ter a ya ka,
wirdè ata a ze aà ter a hwaŋŋa lele,
ta gis a bazlam mə̀r,
dite ta ŋget a dər mesife ana à ndìv a tsa aà biybiy a.
Ama gà na ti dzeye a ya ka,
wirdè ata a zehe aà ter a ka,
sìwìkìkìkke biy mimete dər mbaŋa.
Dite kinehe ana,
weke na a sle a aà megemir ata ya?
17 Ama mə̀r ka,
mìi sle a aà mege ŋa,
agəra ana Mbulum a slər ahər mə̀r a,
tsəka,
mìi sle a ɓav tsa.
Aɗaba gà mburma hinne,
na ti tsikewa bazlam Mbulum a mburma ka,
ta fə̀r ahər kamala dukw metsèkèle ya.
A sàs a tar aà maŋgata dər nuba.
Ama mə̀r ka,
mì gewa dər kamala taŋa ya tsa.
Mì tsikewa bazlam ŋgar a mburma ka,
nda gəzləŋ ilik ika miɗ ŋgar,
agəra ana mə̀r ka,
gà ɓəzla meslire Kiristi ya.