Masəra ba awiya ŋa ana gà Mbulum tə sər ba
nda mburma ya
3
1 Aka biy kurum ana,
mìi zlibe a aba nda ahər mə̀r ŋa kamala ana kù gwaɗum a asa ya?
Tsəna,
mì wetsera gà wakita i təv mburma ya,
dite mì da dərraha a təv kurum,
mì pat a kurum dər,
na dite ki sirwim a dər ka,
mə̀r gà ɓəzla meslire Mbulum gà ndzer ŋana ya ya?
Awaŋ,
ku mege a təv kurum tekeɗe,
maa wiz medzibe wakita ata,
dite mìi de a dər a təv gà misle ŋgiɗ aà məpàtà a tar dər ka,
maa wiz ɓav tsa.
Gà misle ŋgiɗ ka,
ta gewa dər kamala taŋa ya seyiŋ.
Ama mə̀r ka,
mì gewa dər kataya tə tsa.
2 Kurum na kà nwim wakita mə̀r,
mewetse ŋa a riŋ i gəzləŋ mə̀r a.
Ku mege weke a sle a aà medzeŋge,
a tsereke a lele.
3 Ku weke a sir a dər ka,
*Kiristi na a wetse wakita ata nda ahər mə̀r,
na dite mì da dərraha a təv kurum a.
A wetse ka,
nda yam dukw mewetse duwa tsa.
Ama a wetse ka,
nda Mezite Mesife Mbulum ana ŋgat a riŋ nda mesife ya.
Dite dukw ata mewetse ŋa asa ka,
ika beliŋ kur tsa,
ama ar ka,
i gəzləŋ mburma ivaɗ.
4 Mì tsik taŋa ka,
aɗaba Yesuw Kiristi ana a ɗif a mə̀r dər ndzer,
Mbulum na a ge a megemir ata nda ahər mə̀r a.
5 Mì sər,
ndzəɗa mə̀r ana mìi ge a dər megemir ata ya,
a dara ka,
i təv Mbulum a,
tsəka,
mìi gweɗe a,
mìi ge a megemir ata nda ahər mə̀r ka,
mìi tsik a tsa,
aɗaba ana mì sle tsiye.
6 Ŋgat na a vəl a mə̀r ndzəɗa ata,
na dite mì ne gà ɓəzla meslire ŋgar,
mìi tsik a bazlam masəra ba ŋgar ata awiya ŋa,
tə sər ba nda gà mburma ya.
Masəra ba ŋgar awiya ŋa ata ka,
ar ka,
kamala məpala ahəm ana ta wetse akahər ata piŋŋe ya tsa.
Ama ki zezemekwe a ka,
Mezite Mesife Mbulum ivaɗ.
Aɗaba məpala ahəm ana ta wetse akahər ata piŋŋe ya ka,
a dzeye a à mburma a məməta ana ika miɗ Mbulum a.
Ama Mezite Mesife Mbulum ka,
a vile a ter a mesife ana à ndìv a tsa aà biybiy a.
7 *Akahər ata,
Mbulum a wetse məpala ahəm ŋgar ka,
aka beliŋ kur.
I fata ya ka,
gà mburma ta ŋgat a ndzəɗa Mbulum ana tì zlibe a dər,
a za duwa tserdze ya.
Dite yemere Musa a dəv dzaydzay agəra ndzəɗa Mbulum ata mbaŋa.
Ku mege dzaydzay ata a ndze a hinne tsa tekeɗe ka,
gà mburma Isərayel ti sle məfàrà aà yemere Musa tsa,
aɗaba ana a dəv hinne,
à wìwizl a are twiy twiy twiy kamala pat a.
Ama na mege megemir məpala ahəm ata a zlere a məməta aka mburma ya ya,
a riŋ nda gà ndzəɗa kamala taŋa ya ka,
8 taŋa ka,
megemir Mezite Mesife Mbulum ana a vile a mesife a mburma ya,
a ge a megemir,
à zè a taŋa kweleŋ fetite.
9 Na megemir məpala ahəm ata a gese a mburma i seriye Mbulum a,
a riŋ nda gà ndzəɗa seyiŋ ana,
sakwàn nda biy masəra ba awiya ŋa ana Mbulum a ne à ter a gà ŋgwal ŋa ika miɗ ŋgar,
a ɗif a à ndzəɗa ŋgar ana,
à zè a taŋa ivaɗ tsiye?
10 Ndzəɗa Mbulum ana tə zlə̀b dər akahər ata piŋŋe,
a pàt a kwa dər a ka,
ta gaya akaba nda ndzəɗa ŋgar ana tì zlibe a dər awiya ŋa kinehe ya tsa,
a za dər taŋa fetite kweleŋ.
11 Kaɗəŋ,
na masəra ba miviye ŋa ata aka ndza hinne tsiye,
aka ɗifekwa à ndzəɗa Mbulum ata seyiŋ ana,
sakwàn nda masəra ba awiya ŋa aaha a ndze a aà biybiy a ya,
à zè a taŋa tsiye.
12 Aɗaba taŋa,
mìi tsik a bazlam aka gər dukw ata ka,
parakka,
mìi himbir a duwa asa tsa.
Aɗaba mì sər,
dukw ata ka,
ndzer,
pàrsa iɗəm tsa.
13 *Mìi ge a dər kamala Musa ana akahər ata a kaha dzaydzay Mbulum ata à div a ika yemere ŋgar nda petek a tsa.
A ge dər kataya ka,
a waya tsa na gà mburma Isərayel ta ŋgeter a,
à ndìv a ihər a ya.
Mər ka,
mìi ge a dər kamala taŋa ya tə tsa.
Mìi tsik a ka,
parakka lele.
14 Ama gà mburma Isərayel ana akahər ata ya ka,
ndakazləmzləm tàa tsaraka bazlam ata tsidze,
haa kinehe hiywe mba.
Aɗaba i təv ana ti dzeŋge a bazlam wakita biy masəra ba miviye ŋa ata ya ka,
ti ne kamala gà ɓəzla mandakazləm a,
tə sər tsa.
Are tar makàhà ŋa zimirmir nda petek kamala biy Musa ana akahər ata ya.
Say wur ana aka gəs Yesuw Kiristi ya,
na petek ata wurat,
a de a ika are ŋgar a ya.
15 Ku mege kinehe tekeɗe,
i təv ana tar riŋ ihər ti dzeŋge a wakita məpala ahəm Musa ya ka,
metsehe tar mahə̀ndə̀kà ŋa titstsè pəra,
kamala ana petek ata a riŋ à kèhe a are tar a.
16 *Ama dukw ana a ge ba nda Musa akahər ata ya ka,
a ge a ba nda gà tar mbaŋa.
Ar ka,
kamala ana mewetse ŋa a riŋ i wakita Mbulum,
ta gwa:
«Na wura aka mbəɗ aba a təv BATSAH kwa ŋa ka,
petek ata a ge a ikəka tsa,
tàa zla ikəka ya.»
17 Ama wele ana tə zalar BATSAH kwa ŋa i faha ya ka,
tar magàwà ba ŋa nda Mezite Mesife Mbulum.
I təv ana Mezite Mesife Mbulum iɗəm a ka,
gà mburma ti ziwe a gər tar i fata kuɗa.
Tar ti ne a kamala gà ɓele ya asa tsa.
18 Taŋa,
kwa ana tserdze kàa gə̀sakwa ŋgat a ka,
kwa i luvuŋ ika miɗ Mbulum kamala ana petek ata a riŋ à kèhe a are kwa ya asa tsa.
Kwa ihər ki ŋgetekewe a ndzəɗa BATSAH kwa ŋana ti zlibe a dər,
a za duwa tserdze ya.
Dite kwa asa tekeɗe,
ki ti ndzìkìɗekwe a ba kamala ŋgat a.
Kamala taŋa ya,
ki ŋgetekewe a ndzəɗa nda mezlibe ŋgar mbaŋa,
à sìkèh a aka miɗ aka miɗ.
BATSAH kwa ŋa na a ge a taŋa ya.
Tar nda Mezite Mesife Mbulum ka,
i təv ilik ŋa.