Kwa ka, ndzəɗa kwa a riŋ tsa, Mbulum na mala ndzəɗa ya
4
1 Mbulum a ge a mə̀r ŋgwal ŋa hinne.
A vəl a mə̀r mege megemir aaha a ahər,
na dite mìi tsik a bazlam ŋgwal ŋana a mburma ya.
Aɗaba taŋa na mìi zle a ihər madzala gà gər mə̀r a tsidze ya.
2 Maa niw gà dukw ana mburma ta ge a nda wirwir kìtsèh kìtsèh,
a ndeɗe aka mə̀r a hwarwa ya tserdze.
Mər ka,
mìi kèhe a dukw ana mìi ge a ya tsa.
Dite mìi bene a mburma,
kige tsa mìi mbìɗ a à bazlam Mbulum tsa asa mbaŋa.
Ama mìi ɗif a ka,
à ndzer ŋana parakka ivaɗ.
Mì waya ka,
ku weke mà sər dər,
bazlam ana mìi tsik a ya ka,
ika miɗ Mbulum ndzer,
pàrsa iɗəm tsa.
3 Gà asiŋ gà misle ŋgiɗ ka,
tì dze a zləm a bazlam ŋgwal ŋa aaha mə̀r ihər mìi ɗif a dər a mburma ya tsa.
A ne i təv tar ka,
kamala ana are tar makàhà ŋa nda petek a.
Ama ku mege kataya tekeɗe ka,
sərum dər,
a ne makàhà ŋa ka,
i təv gà na ti dzeye a ya ɗekɗek pəra,
na ti tsereke a tsiye.
4 Tə tsaraka bazlam ŋgwal ŋa ata tsəka,
aɗaba ana Əbay sitene,
mala makwàrà gər ahəɗ aaha,
aka ge à tar guluf i huɗ metsehe tar,
dite ta gəs tsiye.
Aɗaba a waya tsa na ta ŋget a a dzaydzay ana à div a i təv tar a ya.
Dzaydzay ata a dara ka,
i huɗ ŋgwal bazlam ata aka gər ndzəɗa Yesuw Kiristi ana tì zlibe a dər a.
Aɗaba Mbulum nda gər ŋgar a pàt à ba ka,
nda təv Kiristi.
5 I təv ana mìi tsik a bazlam ŋgwal ŋa ata ya ka,
mìi tsik a aka gər ba mə̀r ŋa tsa.
Mìi tsik a ka,
aka gər Yesuw Kiristi.
Mì gwaɗawa a tar ka,
ŋgat na Batsah ŋa ika gər gà mburma tserdze ya.
Mər mì ne ka,
gà ɓəzla meslire kurum pəra,
aɗaba Yesuw.
6 *I təv ana Mbulum a ge gər ahəɗ akahər ata ya ka,
a gwa:
«Dzaydzay mà dəv i luvuŋ.»
Ama Mbulum ŋa ka,
taŋa ilik hiywe na a vəl dzaydzay ŋgar ata à div a i gəzləŋ mə̀r a mbaŋa.
A ge dər kataya ka,
aà məpàtà à ndzəɗa ŋgar ana tì zlibe a dər,
à div a ika miɗ Kiristi ya.
Aɗaba taŋa na mə̀r ihər mìi tsik a bazlam ŋgwal ŋa ata a mburma ya.
7 Mər ka,
ndzəɗa mə̀r a riŋ tsa.
Mì ne ka,
kamala mesigire dwaɗwa ana mbùrùf a keɗe a bise ya.
Ama kəla ka,
Mbulum aka tike ŋgwal dukw ata a gəzləŋ mə̀r.
Aɗaba a sasar gà mburma tə sər dər ndzer,
ndzəɗa ana a za duwa tserdze biy megemir Mbulum a,
a dara ka,
i təv ŋgar a,
tsəka,
a dara i təv mə̀r a tsa.
8 Gà mesewere are ŋgiɗ pampam ta ŋgiɗits a mə̀r hinne,
ama ka,
tàa ndəv à gà mesife mə̀r kweleŋ tsa.
Mì sər dukw ana mìi ge a ya asa tsa,
a wise a mə̀r a gər hinne,
ama mìi gis a gəzləŋ hiywe.
9 Gà ɓəzla mene are mə̀r hinne tar riŋ ta ge a mə̀r a matawak,
ama Mbulum aka miyak à mə̀r tsa.
Tar riŋ ihər ta peze a mə̀r a bəɗ,
ama maa hitse aà mbulum hiywe,
maa mata ɓav tsa.
10 Ti yehe a vatwa aà məbatsa mə̀r kəla pàt,
kamala ana ta kəɗ Yesuw Kiristi ya mbaŋa.
Ama mìi ndze a nda mesife,
na dite mburma ti sir a dər ka,
Yesuw ŋgat a riŋ nda mesife hiywe ya.
11 I huɗ mandza aà bəra mə̀r ana mìi ndze a ya,
mə̀r ka,
i ɗa məməta agəra ana mìi zezem a Yesuw a.
Ama ba mə̀r aaha ndzəɗa iɗəm tsa,
tsèfek tsèfek à mite a mba ya ka,
aka mət zukw tsa.
Kamala taŋa ya,
mburma ti sir a mesife Yesuw ka,
nda təv mə̀r.
12 Kamala megweɗe ya,
mə̀r ka,
i ɗa məməta hiywe.
Ama kurum ka,
mesife awiya ŋana a riŋ a ge a megemir i təv kurum.
13 *A riŋ mewetse ŋa i wakita Mbulum ka,
a gwa:
«I tsik bazlam Mbulum a mburma ka,
agəra ana i gəs ŋgat nda gəzləŋ a.»
Ama mə̀r ka,
maa gəs Mbulum nda gəzləŋ mə̀r ɓəŋɓəŋ lele,
kamala wele ata a wetse ya mbaŋa.
Aɗaba taŋa na mə̀r tekeɗe,
mìi ɗif a à bazlam ŋgar a mburma ya.
14 Mər ka,
mì sər,
Mbulum ana a mbəlara à Yesuw BATSAH kwa ŋa i məməta ya ka,
a ta mbil à mə̀r a kamala ana a mbəl à Yesuw a mbaŋa.
A ti dzik akaba a kwa aka miɗ ŋgar nda gà kurum tserdze.
15 Mbulum a vəl a mə̀r megemir ata ka,
aɗaba kurum,
dite a ta mbele a à gà mburma hinne,
aɗaba ŋgwal ŋgar ana a ge a ter a ya.
Kamala taŋa ya,
gà na tar riŋ ta ger a kəkaaha,
tì zèmbeɗe a à ŋgat a ka,
tì sìkèh a aka miɗ aka miɗ lele mbaŋa.
Vavakwa dukw ana wura aka ŋgatar ilik zukw tsiye
16 Aɗaba taŋa na ki zlèkwe a ihər madzala gà gər kwa tsidze ya.
Aɗaba ku mege ndzəɗa ba kwa mà nikiɗ tekeɗe ka,
Mbulum a vile a kwe a ndzəɗa awiya ŋa a gəzləŋ,
aà mazazama vatwa ŋgar kəla pat.
17 Gà mesewere are ana kwa ihər ki sèwèrekwe a kinehe ya ka,
ti ndze a tsa,
tì ndìv a mba.
Ki ta ŋgetekewe a dər ka,
mezlibe ana batsah ŋa ya.
Mezlibe ata ka,
a ti zè a dukw tserdze,
dite a ndze a ka,
aà biybiy.
Agəra taŋa na ki fìrekwe a aà gà mesewere are ata ka,
kamala ana mawura ba ŋa tsiye ya.
18 Aɗaba kàa tikekwa madzala gà gər kwa aka dukw ana a ŋgeter a ba tsiye,
tsəka,
aka dukw ana mburma a ŋgeter a nda are ya tsa.
Aɗaba gà dukw ana mburma ta ŋgeter a nda are ya ka,
ti ndze a aà biybiy tsa.
Ama ka,
gà dukw ana mburma ta ŋgeter a nda are tsiye ivaɗ,
na a ndze a aà biybiy a.