5
1 Kà sərakwa,
i təv ana mekiriwe ga kwa aaha leyèh aka mbazla ya ka,
Mbulum a ta vile a kwe aɗəm a ga ŋgiɗ pam,
i gər ŋa i mbulum.
I tsik taŋa ka,
aka gər ba kwa aaha kinehe ya.
I təv ana aka mət a ka,
a ta vile a kwe aɗəm a ba ana i gər ŋa i mbulum a.
Ŋgat à gər ŋgar na a ge ga ata a ndze a aà biybiy a ya.
2 Kinehe kwa mandza ŋa ɗa ika gər ahəɗ ka,
kwa ihər ki ŋgìrìzèkwe akabiŋa,
aɗaba kà wayakwa hinne,
na Mbulum a ta vile a kwe a ba awiya ŋa ata i gər ŋa i mbulum a ya.
3 Na kàa ŋgatakwa ka,
ki ti ndzekwe a nda ba awiya ŋa ata aà biybiy kuɗa,
tsəka,
ki ti ndzekwe a sàgùrɗùmma kamala wele ana petek ikaba tsiye asa tsidze.
4 I təv ana kwa mandza ŋa nda gà ba kwa aaha hiywe mba ya ka,
kwa ihər tə̀pasəssà ki bèsekwe a ba hinne.
I fata ya ka,
a sàs a kwa aà megweɗe a Mbulum,
zla aà mə̀r ba aaha ya ka,
a sàs a kwa ɓav tsa.
Ama ka,
a sàsakwa a vile a kwe a ba awiya ŋana,
a ta mite a tsa,
a ndze a aà biybiy a,
na dite ka,
ba awiya ŋa ata à mbìɗ aɗəm a ba avukw miviye ŋa aaha à mite a ya.
5 Mbulum nda gər ŋgar na a ge megemir i gəzləŋ kwa ya,
aà kə ŋgatakwa ba awiya ŋa ata.
A vəl a kwa Mezite Mesife ŋgar,
dite ki sirekwe a dər ka,
a ta vile a kwe a ba awiya ŋa ata mbaŋa ya.
6 Aɗaba taŋa na ku mege ndeɗime,
ki ndzekwe a ɓəŋɓəŋ lele ya.
Taŋa kà sərakwa ndzer,
akahər ana kwa nda gà ba kwa aaha ya ka,
kwa diriŋ aà BATSAH kwa ŋa ya.
7 Kamala megweɗe ya,
kàa ŋgatakwar zukw tsa.
Ama kà sərakwa ki ta ŋgetekewe a a gà dukw ata ndzer ka,
aɗaba ana kə̀ gə̀sakwa ŋgat nda gəzləŋ a.
8 Ama kaɗəŋ,
ki ndzekwe a ɓəŋɓəŋ lele dukw ŋgar.
A sàsakwa ka,
ki miyekikwe a à ba aaha,
na dite ki ti ndzekwe a i təv ilik ŋa nda gà BATSAH kwa ŋa ya.
9 Aɗaba taŋa,
ku mege kwa mandza ŋa ɗa diriŋ aà ŋgat a,
ku mege kwa mandza ŋa bise nda gà ŋgat tekeɗe,
a sàsakwa ka,
mege dukw ana ŋgat a waya ya ɗekɗek hiywe.
10 Aɗaba kwa tserdze ka,
bàlaarì,
ki ta hitsekwe a aka miɗ Yesuw Kiristi,
na dite à ses a kwe a ikaba seriye kwa ya ya.
Ku weke a ŋget a duwa kalkal kamala megemir ŋgar ana a gewa ɗa ika gər ahəɗ a mbaŋa.
Na bəla kàa gekwa dukw ana ŋgwal ŋa ya ka,
a ta vile a kwe a dukw maya ba kwa.
Ama na bəla kàa gekwa dukw ana ŋgwal ŋa tsiye ka,
a ti sèwèr a kwe a are.
Mala mazazama Yesuw Kiristi ka, aka ne awiya mburma
11 Na Batsah mə̀r ŋa a ta ge a mə̀r a seriye kamala taŋa ya ka,
mìi ger a magəɗa.
Aɗaba taŋa mbaŋa,
na mə̀r ihər mìi yehe a vatwa aà mandzàkàra mburma aka miɗ ŋgar a,
dite na ti sir a dər ka,
mə̀r gà ndzer ŋa ya.
Mbulum ka,
a sər mə̀r ka,
lele.
Ama i dzala ka,
kurum tekeɗe,
ki sirwim a iye i gəzləŋ kurum mbaŋa.
12 A sàs a mə̀r na mìi ge a zlapa à ba mə̀r ika miɗ kurum a ɓav tsa.
A sàs a mə̀r ka,
mìi ɗif a kurum a à vatwa ana ki ta ŋgeywim a dər ba aɗaba mə̀r a ivaɗ.
Taŋa ka,
bəla gà misle ŋgiɗ ta wele a aà mə̀r a ka,
ki sirwim a mifefile a tar aakiŋa.
Tar tə sə̀ŋgə̀rawa aba i tar ka,
nda dukw ana ta ŋgeter a tsara ya,
tsəka,
ta fir a aà dəba tar dzekwiŋ tsa.
Dite na bəla gəzləŋ tar manəsa ŋa tekeɗe ka,
i tar duwa tsa.
13 Wànà kà dzalum dze ana,
mə̀r gà mibe dala ŋa kamala ana gà asiŋ gà misle ŋgiɗ ti tsik a ya?
Ta fə̀r aà mə̀r ka,
kamala ana mə̀r gà mibeyè a dala ŋa ya ka,
aɗaba ana mì vəl ba mə̀r a ahər a Mbulum nda gəzləŋ ilik a.
Ama na bəla mə̀r gà ɓəzla metsehe na aà are kurum a ivaɗ ka,
i fata ya ki sirwim a dər,
a sàs a mə̀r mazlàkà kurum.
14 Mege megemir ana mìi ge a tserdze ya ka,
agəra ana mì sər,
Kiristi a waya kwa hinne ya.
Ŋgat a mət ka,
aɗaba mburma tserdze.
Kamala taŋa ya,
kà sərakwa ndzer,
tar ata tserdze ya ka,
tàa mata akaba nda gà ŋgat,
na i təv are Mbulum a.
15 Ŋgat a mət agəra mburma tserdze,
na dite gà na tar riŋ nda mesife mba ya ka,
ta ge dukw ana ba tar a waya ya asa tsiye,
ama ka,
ti yaha vatwa aà mege dukw ana a tsahən ahər a ivaɗ.
Ta ge kataya ka,
agəra ana a mət,
dite Mbulum a mbəlara à ŋgat i məməta ya ka,
aɗaba tar a mbaŋa.
16 Aɗaba taŋa,
mə̀r kinehe ka,
mìi fir a aà gà dukw ana mburma ta ge a i metìkè ba tar ana nda bəra pampam asa ya tsa.
Akahər ata piŋŋe ka,
maa ge kataya kaɗəŋ,
maa fə̀r aà Kiristi kamala taŋa ya.
Ama kinehe ka,
pam,
tsəka,
mìi ge a dər kamala taŋa ya asa tsa.
17 Aɗaba wur ana mandza ŋa i təv ilik ŋa nda Kiristi ya ka,
aka ne mburma awiya ŋa.
Mendze ŋgar ana piŋŋe ya ka,
a riŋ asa tsa.
Aka mbəɗ aba awiya ŋa.
*Kiristi na a sər ba à kwa nda gà Mbulum a
18 Mbulum na a geye gà dukw ata tserdze ya.
A slərra Kiristi ya,
dite na a sər ba à kwa nda gà ŋgat a.
Kinehe ka,
a vəl a mə̀r megemir metsìkè bazlam ata a mburma.
A sasar ka,
kà sərakwa ba nda gà ŋgat.
19 Ndzer ŋana Mbulum a slərra Kiristi ya ka,
aà mà sər ba à tar tserdze nda gà ŋgat.
A ɗeme a bakal tar asa tsa.
I fata ya ka,
a slər mə̀r aà metsìkè bazlam masəra ba ŋgar ata a sər ba à mburma nda ŋgat a,
a gà mburma.
20 Aɗaba taŋa,
mə̀r ka,
maa ne gà ɓəzla meslire Kiristi.
Ar ka,
kamala ana Mbulum nda gər ŋgar a zel a a mburma nda bazlam mə̀r a.
Mìi ge a kurum a kamkam,
aɗaba Kiristi:
Vəlumar vatwa,
ma sər ba à kurum nda Mbulum.
21 Kiristi ka,
aka ge bakal duwa ilik tsidze.
Ama ka,
Mbulum a zla bakal kwa tserdze,
a tike aka gər ŋgar.
A ge dər kataya ka,
aɗaba kwa,
dite i təv ana kwa mandza ŋa i təv ilik ŋa nda gà Kiristi ya ka,
a ne a à kwa gà ŋgwal ŋa ika miɗ ŋgar.