Pul a waya tə sər, ŋgat ka, mala meslire Mbulum
6
1 Kamala taŋa ya,
mìi ge akaba a megemir ka,
i təv ilik ŋa nda Mbulum.
Agəra taŋa,
mìi ge a kurum a kamkam:
Ŋgwal Mbulum ana a ge a kurum a ka,
ma ne taf masakəŋa tsa.
2 *Mbulum a gwa ka:
«I təv ana məpaslà ahər gà aka sle,
i ge a ŋgwal ŋa a mburma ya ka,
i tsereke a meheme kurum ana ki hemwimiŋ a ya.
Dite pat ana a sèsiŋ i mbele à ter a ya tekeɗe ka,
i zlèk a kurum.»
Gà damər gà,
və̀ɗəna ka,
pat ana Mbulum a sasar mege a kwa ŋgwal a,
aka ndze aɗəm kuɗa.
Dite kinehe asa na a sasar məmbə̀là à kwa ya.
3 A sàs a mə̀r na mìi ge a dukw ana a vile a mendìfè sik a mburma ya te tsidze.
Aɗaba mì waya na ta wele a aà mege megemir mə̀r a ya tsa.
4 Seyiŋ tsa,
i huɗ dukw ana mìi ge a tserdze ya ka,
a sàs a mə̀r na mìi pèt a dər a mburma parakka,
mə̀r ka,
gà ɓəzla megemir Mbulum a ivaɗ.
Ku mege gà mesewere are a riŋ hinne,
ta ge a mə̀r a matawak,
nda gà kuɗa duwa ŋgiɗ pampam ta geye a mə̀r a tekeɗe,
mìi gis a gəzləŋ kataya pəra.
5 Aɗaba gà mburma ta gazlawa mə̀r hinne.
Pat ŋgiɗ asa ka,
ta gasa mə̀r,
tə dza mə̀r a daŋgay.
Ti lèvekeye aà mə̀r ahəm hinne,
nda mewìsè bazlam.
Mì gewa megemir ka,
nda bàlaarì.
A gà pat ŋgiɗ asa ka,
mì ndzewa are tsa,
dite mì vàkawa wurwas nda may,
mì məndzərawa dukw mezime asa tsa mbaŋa.
6 I huɗ mendze mə̀r ana mìi ndze a ya,
a sər ba ka,
mə̀r gà ɓəzla megemir Mbulum.
Mər mì pat ka,
à tsəɗaŋŋa.
Mìi ge a ka,
dukw ana ndzer a.
Mì bàsawa gəzləŋ,
mì gewa gər a mburma lele.
Mezite Mesife Mbulum a vəlawa a mə̀r ndzəɗa aà megemir.
Mì wayawa gà asiŋ gà mburma ŋgiɗ tserdze nda gəzləŋ ilik.
7 Mì ɗifewa à bazlam ndzer ŋana a mburma,
Mbulum na a vəlawa a mə̀r ndzəɗa ŋgar a.
Nda gà dukw ata tserdze ya,
na gà mburma tə sər ka,
mə̀r gà ɓəzla megemir Mbulum a.
Mede mə̀r ana ika miɗ Mbulum nda ndzer ŋa ya,
a ne ka,
dukw ahər mə̀r ana mìi ge a guvəl aà gà ɓəzla mene are mə̀r a.
Ama dukw ahər ata ka,
a ne dukw ana mìi geye a dər ikaba ya nda təv tar a mbaŋa.
8 I huɗ mendze mə̀r a ka,
gà asiŋ gà misle ŋgiɗ tì zèmbeɗe à mə̀riŋa.
Gà biy ŋgiɗ ka,
ti ndeveye a mə̀r a pìslìɗìɗe.
Gà asiŋ ŋa tì zlibe à mə̀riŋa.
Ama gà biy ŋgiɗ ti tsik a dukw ana ŋgwala tsiye aka gər mə̀r.
Ta fir aà mə̀r a ka,
kamala ana mə̀r ka,
gà ɓəzla pàrsa ya.
Ama tsaatsa,
mə̀r mìi tsik a ka,
dukw ana ndzer ŋa ya ivaɗ.
9 Ta gwaɗawa ka,
tə sər mə̀r tsa,
mə̀r ka,
gà ɓəzla falày taf masakəŋa.
Ama tsaatsa,
gà asiŋ gà misle ŋgiɗ tserdze tə sər mə̀r lele dukw ŋgar.
Ta fə̀rawa aà mə̀r ka,
kamala ana mə̀r ka,
gà məməta ŋa ya.
Ama ka,
mə̀r riŋ nda mesife lele dukw ŋgar mbaŋa.
Ti sèwèrewa a mə̀r are hinne,
ama tàa bats mə̀r zukw tsa seyiŋ.
10 Ku mege ta vile a mə̀r a matsəɓatsəɓ a gəzləŋ hinne tekeɗe ka,
mìi de a aka miɗ aka miɗ nda maŋgayaba lele hiywe.
Mər ka,
mì ne kamala gà ɓəzla matawak a,
ama mə̀r ihər mìi ge a Əbay à gà mburma hinne ika vatwa Mbulum seyiŋ ivaɗ.
Mi ne kamala ana duwa mə̀r a riŋ tsidze ya.
Ama nda ndzer kəla ka,
dukw tserdze a riŋ aà mə̀r dukw ŋgar.
11 A kurum gà mburma ana i Kurintiya ya.
Mì fàfəl a kurum ka,
parakka,
maa həmbər aà kurum duwa ilik tsidze.
12 Dite maa niw mawàyà ba nda gà kurum ilik tsidze asa.
Ama kurum na kà wayum mə̀r tsiye ivaɗ.
13 I fèfil a kurum a ka,
kamala ana kurum gà ɓəza gà ya.
Ka həmbərum aà mə̀r duwa tsa.
Patum à dukw ana i gəzləŋ kurum a.
Wayum mə̀r kamala ana mə̀r tekeɗe,
mìi weye a kurum a mbaŋa.
Gà dzaydzay nda luvuŋ ti ndze a i təv ilik ŋa tsa
14 Kə gawum ba a təv ilik ŋa nda gà na tàa gəs Yesuw nda gəzləŋ tar tsiye tsa.
Ka ta gwim akaba megemir i təv ilik ŋa nda gà tar tsidze.
Aɗaba meme na gà dukw ana ŋgwal ŋa ya,
ndəna ŋgwala tsiye ka,
ti sle aà mendze akaba a i təv ilik ŋa ya?
Wànà gà təv dzaydzay ŋa ti sle aà megewe a ba nda təv luvuŋ a?
15 Kà sərakwa,
gà *Kiristi nda Əbay sitene ka,
ti sle a aà mandza akaba ahəm tsidze.
Aɗaba taŋa,
wele ana aka gəs Yesuw nda gəzləŋ a,
nda wele ana aka gəs tsiye ka,
ti sle a aà mandza akaba madzala gà gər tar a təv ilik ŋa ɓav tsa mbaŋa.
16 *Wànà kà dzalum dze ana,
dukw ana gà mburma ti ne dər mbulum nda ahər tar ŋa ya ana,
a sle a aà mendze i ga Mbulum batsah ŋana ya?
Awaŋ,
a ge a ba tsidze.
Yaw,
sərum dər ka,
kwa na kà nekwa ga Mbulum batsah ŋa ata ŋgat a riŋ nda mesife ya.
Aɗaba Mbulum a gwa ka:
«I ti ndze a ika magər gà mburma gà,
i ta ŋget a təv mendze gà i fata.
Iye i ti ne a Mbulum tar,
dite tar tekeɗe,
ti ti ne a gà mburma gà mbaŋa.»
17 *Aɗaba taŋa,
Mbulum a tsik a gà mburma ŋgar asa mbaŋa,
a gwaɗa a tar:
«Dumara ika magər gà mburma ana
tàa gəs iye tsiye.
Miyakum à tar ŋgwìɗik.
Kà lə̀mum aà dukw ana aruwaŋ ihər a tsidze.
Na kàa gwim dər kataya ka,
i gis a kurum lele.
18 *I ti ne a Tsir kurum,
dite kurum tekeɗe,
ki ti nwim a gà ɓəza gà mbaŋa,
ku mege
gà asləka ŋa,
ku mege gà dəm ŋa tekeɗe ya.
Na a tsik taŋa ka,
Mbulum ana
a kwere a duwa tserdze ya.»