7
1 A kurum gà masla gà ana i waya kurum hinne ya.
Mbulum aka tsik a kwa i sida ya,
a gwa,
a ta vile a kwe a gà dukw ata tserdze ya.
Aɗaba taŋa,
say barakwa dukw ana ŋgwala tsiye,
aà ba kwa ya,
dite ma ne tsəɗaŋŋa na i təv are Mbulum a.
Kà barakwara dukw ana ŋgwala tsa i gəzləŋ kwa ya asa mbaŋa.
Mede kwa ana ki tèkwe a ika vatwa Mbulum a,
ma ge ka,
kamala ana ŋgat a waya ya.
Ka hənakwar à gər a bəɗ tiɓìzl lele.
Pul a waya ka, tə sər ba lele
2 Gəsum mə̀r nda gəzləŋ kurum lele.
Aɗaba mə̀r tekeɗe,
maa ge dukw ana ŋgwala tsiye,
a wura ika magər kurum a ilik tsidze.
Asa ka,
wura aka dzeye ika vatwa Mbulum a agəra mə̀r tsa,
dite maa zla duwa aà wura ya nda wirwir a ɓav tsa asa mbaŋa.
3 Ka ta gwaɗum,
i tsik taŋa ka,
biy na i mà a kurum à bakal a ɓav tsa.
Ar ka,
kamala ana i lah metsike a kurum ndeɗiŋa ya.
Mì waya kurum hinne,
duwa ilik ma ta mà ba à kwa tsa.
Ku mege kàa matakwa,
kwa i təv ilik ŋa,
ku mege kwa riŋ nda mesife tekeɗe,
kwa i təv ilik ŋa hiywe mbaŋa.
4 I sər,
kurum ka,
gà ɓəzla megìse ndzer dukw ŋgar.
Aɗaba taŋa,
iye ihər i ndze a barbarərra,
aɗaba kurum ivaɗ.
I huɗ mesewere are mə̀r ana mìi sèwèr a ya tekeɗe,
i ye a ba tsa,
i ŋgeye a ba ivaɗ.
Maŋgayaba gà ata a rèhiŋ a gəzləŋ ka,
tsìsl lele.
Gà matsəɓatsəɓ nda maŋgayaba
5 *Maa sèwèr are ka,
hinne kaɗəŋ.
Ku mege i təv ana mì ndze aka ahəɗ Makaduniya ya tekeɗe,
maa ŋgat vatwa aà mesifikaba tsidze.
Dukw ana mawùràba ŋa ya,
a lewa aà mə̀r ku mege i ŋga,
ndaka vatwa ŋgiɗ pampam hinne.
Gà mburma ti newa a mə̀r are hinne,
ta gewa aà mə̀r maàga.
Mì dzalawa gà gər i gəzləŋ mə̀r hinne agəra gà ɓəzla mazazama Mbulum mbaŋa.
6 Ama na bəla gà mburma ta gweɗe a,
dukw ata mìi sle a asa tsəka,
Mbulum na a me a terehe a à arəv a.
A mà a mə̀raha à arəv ka,
nda mede Titus ana a dara ya.
7 Ama mede ŋgar ana a dara ya ɗekɗek tsa.
A mà a mə̀raha à arəv ka,
nda bazlam ana a tsik a mə̀r a mbaŋa.
A tsik a mə̀r ka,
meme na kà mùmaraha à arəv a.
A gwaɗa a mə̀r asa ka,
a sàs a kurum aà meŋgetiŋ asa zləmana ŋa,
nda gà na kurum riŋ ihər ki dzelwim a gà gər aka dukw kurum ana ki gwim ŋgwala tsiye ya.
Dite a sàs a kurum hinne na ki wiywimiŋ a ba,
ki geywim a ika iye ya nda təv gà ɓəzla mene are gà ana ti niŋ a ya.
I təv ana i tsaraka taŋa ya ka,
i səkah à maŋgayaba hinne asa kuɗa.
8 I sər wakita gà ana i wetse a kurumaha akahər ata ya ka,
aka vəl a kurum matsəɓatsəɓ a gəzləŋ hinne dukw ŋgar.
Ama Yàa dzala aɗəm duwa hinne ɓav tsa.
Malahalah ŋa ka,
i dzala,
i gwa,
assàh,
i wetse kataya ana,
meme kuɗa ya.
Aɗaba i samata,
wakita ata i wetse a kurumaha ya ka,
aka vəl a kurum matsəɓatsəɓ a gəzləŋ zaakwa dukw ŋgar.
9 Ama kinehe ka,
iye riŋ ihər i ŋgeye a ba.
Ama ka,
agəra ana i vəl a kurum matsəɓatsəɓ a gəzləŋ a tsa.
Iye ihər i ŋgeye a ba ka,
agəra ana kà dzalum gà gər aka dukw ata ki gwim ŋgwala tsiye,
dite i dəba ŋa ya,
kà mbəɗum à gà madzala gà gər kurum kuɗa ya.
Aɗaba madzala gà gər kurum ata kà dzalum a ka,
kamala ana Mbulum a waya ya.
Agəra taŋa,
maa ge a kurum dukw ana ŋgwala tsiye nda wakita ata tsidze.
10 Na bəla wura a riŋ a ge a matsəɓatsəɓ kamala ana a sàs a Mbulum a,
i fata ya ka,
à mbìɗer a à madzala gà gər ŋgwal ŋana ivaɗ.
Kamala taŋa ya ka,
Mbulum a mbil a à ŋgat.
Medzìbe matsəɓatsəɓ ata ka,
wura a dzele a dər akaba gà gər tsidze.
Ama na bəla wura a ge a matsəɓatsəɓ kamala ana gər ahəɗ a waya ya ka,
taŋa na a de a à ŋgat a məməta ana ika miɗ Mbulum a ya.
11 Kaɗəŋ,
kì gwim matsəɓatsəɓ kurum ata ka,
kamala ana Mbulum a waya ya.
Ama kinehe ka,
samatum kuɗa kwaŋ,
na kà mbəɗum dər à madzala gà gər kurum a.
A sàs a kurum meɗife dər parakka,
na kà wayum mege dukw bakal asa tsiye.
Ki gwim matsəɓatsəɓ i gəzləŋ kurum,
nda magwàɗà ika magər kurum ka,
aàla dze ya,
na dukw ata a ge ba ya?
Aɗaba taŋa,
ki gwim magəɗa hinne agəra dukw ata a ge ba ika magər kurum a.
Iye riŋ ihər i kiv a kurum a ka,
hinne,
aɗaba ana a sàs a kurum ki ŋgetwimiŋ a asa ya.
A sàs a kurum ka,
mege dukw ana Mbulum a waya ya,
na kà tàtə̀kum a wele ata a ge bakal a ya.
Taŋa dukw ata tserdze ya,
a dara ka,
i təv Mbulum a.
Kamala taŋa ya,
kà patum dər parakka,
aɗaba ana gər kurum aà mege dukw ata asa tsidze ya.
12 Aɗaba taŋa,
wakita ata i wetse a kurumaha ya ka,
i wetse aɗaba wele ana a ge bakal ata ya,
kige tsa,
agəra wele ana ta ge ihər bakal a ya ɓav tsa asa.
Ama i wetse ka,
dite mə vəl a kurum vatwa ika miɗ Mbulum parakka,
ku weke ma sər dər ka,
kà wayum mə̀r ndzer nda gəzləŋ ilik.
13 Aɗaba taŋa na kinehe arəv a mà a mə̀raha ya.
Arəv aka mà a mə̀raha lele kaɗəŋ.
Ama ka,
taŋa ɗekɗek tsa.
Mì ŋgaya ba ndeyndey ka,
aɗaba Titus ana maŋgayaba i gəzləŋ ŋgar hinne ya.
A ŋgaya ba ka,
agəra ana kurum tserdze kà mùmaraha à arəv a.
14 Aka ana i sləraha ŋgat a təv kurum a ka,
Yàa zlə̀b à kurum ika miɗ ŋgar.
Ama kinehe,
mezlibe gà ata i zlə̀b à kurum a ka,
a ne aka iye hwarwa taf masakəŋa tsa.
Aɗaba gà dukw ana mì tsikewa a kurum tserdze ya ka,
ndzer,
pàrsa iɗəm tsa.
Kamala taŋa ya,
mezlibe mə̀r ana mì zlə̀b à kurum ika miɗ Titus a tekeɗe,
ar ka,
ndzer mbaŋa.
15 Aka ana a daha a təv kurum a ka,
kàa gəsum ŋgat lele,
nda magəɗa ŋa,
nda gà medzedzere i ba kurum hinne.
Kurum tserdze na a gəs ahər ahəm a.
Ama kinehe,
a samata dukw ana ki gwimer ŋgwal ŋa ya ka,
a səkah à mawàyà kurum hinne asa ivaɗ.
16 I ŋgaya ba hinne ka,
aɗaba i sər,
kurum ka,
gà ɓəzla ndzer kaɗəŋ.