2 Kurintiya 8

1 Gà damər gà, a sàs a mə̀r ka, mìi ɗif a kurum a à dukw ana gà ɓəzla magəsa Yesuw ana ika ahəɗ Makaduniya ta ge ya. Ta ge dukw ata ka, agəra ŋgwal Mbulum ana a ge megemir nda gà tar a. 2 Ti dzikewa à megìse tar ana ta gəs a, nda mesewere are hinne. Ama ku mege kataya tekeɗe, maŋgayaba tar riŋ hinne ivaɗ. Tar gà matawak ŋa hinne seyiŋ, ama ka, tàa dzaya siŋgwe hinne aà megemir Mbulum mbaŋa. 3 Iye ihər i tsik a kurum ŋa: Tàa dzaya siŋgwe hinne, kamala ana ndzəɗa tar a sle ya. Awaŋ, kataya tsa. Ŋgulum i gweɗe a ka, tə dza ka, a za ndzəɗa tar kweleŋ fetite. Mandza siŋgwe ata tə dza ya ka, nda meweye tar, tsəka, wura na a tsik a tar a tsa asa mbaŋa. 4 Ta ge a mə̀r kamkam hinne, ta gwaɗa a mə̀r: «Vəlum a mə̀r vatwa aà metìkè aɗəm ahər mə̀r te,» na tì zlèk a dər gà mburma Mbulum ana ika ahəɗ Yuda ya. 5 Dukw ana ta ge ya ka, a za dukw ana mì dzala, mì gwa, ti ta ge a zləmana ya. Ta ge dukw ata ka, kamala ana a sàs a Mbulum a. Kamala taŋa ya, ta vəl ba tar a BATSAH kwa ŋa dzekwiŋ, dite na ta ge dukw ana mì tsik a tar a mbaŋa ya.

6 I təv kurum ka, Titus aka lah medeha, aka dza ba aà mayaha gər a siŋgwe i təv kurum a akahər ata. Aɗaba taŋa na mì wiz ŋgat asa ka, mə̀ mbəɗaha gər a təv kurum, dite mà ndəv à megemir dukw taf kurum ata kà vəlum a, ika magər kurum a ya. 7 Kurum ka, gà Əbay ŋa, na ika vatwa Mbulum a, kà zùm dər gà misle ŋgiɗ kweleŋ. Megìse kurum ana kə̀ gəsum *Kiristi nda gəzləŋ a ka, ɓəŋɓəŋ lele. Kurum ihər ki tsikwim a bazlam ŋgwal ŋana a mburma parakka. Kurum ka, kà sərum dukw ana ndzer a, kà vəlum ba kurum a megemir Mbulum ka, nda gəzləŋ ilik. Meweye kurum ana kà wayum mə̀r a tekeɗe, hinne asa mbaŋa. Aɗaba taŋa, gwim megemir ŋgwal ŋa ata ka, nda gəzləŋ ilik mbaŋa, mà za biy gà misle ŋgiɗ.

8 Dukw ana i tsik a kurum i faha ya ka, i fàr aka kurum ndzəɗa na aà məvəla siŋgwe ata ya tsa. Ama i fàfəl aka gər gà misle ŋgiɗ ka, dite mà zlak kurum mbaŋa. Aɗaba a sèsiŋ ka, i vile a kurum a vatwa, dite ku weke ma sər dər ka, kà wayum gà asiŋ gà misle ŋgiɗ nda ndzer kaɗəŋ a. 9 Kurum kà sərum ŋgwal ana Yesuw Kiristi BATSAH kwa ŋa a ge a kurum a. Ŋgat ka, Əbay ŋa hinne. Ama ku mege kataya tekeɗe, a ne à ba ŋgar mala matawak aɗaba kurum ivaɗ. A ge aba matawak kataya ka, dite na kurum ki nwim a gà Əbay ŋa i gəzləŋ kurum a.

10 I tsik a kurum a ka, dukw ana i dzala aka gər bazlam siŋgwe ata ya ɗekɗek, tsəka, məpala ahəm iɗəm tsa. Aɗaba də̀z ka, malahalah ŋa kurum na kà wayum mayaha gər a siŋgwe ata ya dukw ŋgar. Dite kurum na a lah medzibe aà megemir ŋa ya asa mbaŋa. I samata ka, lele na mandəva à megemir ŋa ya kuɗa. 11 Kinehe ka, gwim nda gəzləŋ ilik kamala ana kà lah medzwim ahər ba ya mbaŋa. Ndə̀vum à megemir ŋa lele. Dzum ka, kamala ana ndzəɗa kurum a sle ya. 12 Aɗaba na ki vilwim a duwa a Mbulum nda maŋgayaba kamala ana kàa ŋgatum a ka, à gis a lele. Ama na bəla kàa ŋgatum duwa tsəka, Mbulum a gweɗe a: «Vilwimiŋ dukw» ka, a gweɗe a tsa.

13 Ka tə dzalum ka, i zle a mesewere are ika gà misle ŋgiɗ a, i tike a aka gər kurum, dite ka, tar tə ndza barbarərra, dite kurum ka, kà sawarum are ya tsa. Awaŋ, a sèsiŋ ka, ki ndzwim a kalkal, tsəka, maturək duwa ma ge a kurum ba a gər tsa. 14 Kinehe ka, kurum kàa ŋgatum duwa hinne, a za biy tar. Aɗaba taŋa, ŋgulum ka, vəlum a gà na tàa ŋgat duwa tsiye mbaŋa te. Na bəla pat ŋgiɗ duwa aka sle aà kurum hinne, dite tar tàa ŋgat duwa hinne ka, ti ti zlèk aɗəm a kurum mbaŋa. Kamala taŋa ya, na ki dzèywim a ba a gà dukw kurum, ku mege weke a ŋget a kalkal a. 15 Ar ka, kamala ana mewetse ŋa a riŋ i wakita Mbulum a, a gwa ka:

«Wur ana aka ŋgat dukw mezime hinne ya,

aləka i təv ana a zəm a ka,

aka zeha ihər a ɓav tsa.

Dite wur ana a ŋgat zaakwa pəra ya tekeɗe,

a zəm ka, a sle i ŋgar ide mbaŋa.»

Gà Titus nda gà ɓəzla mazlàkà ŋgat

16 Titus ka, a vəl ba ŋgar aà mazlàkà kurum, kamala mə̀r ana a sàs a mə̀r mazlàkà kurum a mbaŋa. Mər ihər mìi ge a kəkaaha a Mbulum, agəra ana a làmbaɗa gəzləŋ ŋgar kamala taŋa ya. 17 Ŋgat ka, aka gəs kamkam mə̀r ana mì ger a. Ama ka, taŋa ɗekɗek tsa. Ŋgat nda gər ŋgar na a dzala, a gwa, i dehe a a təv kurum a dukw ŋgar. Aɗaba a sasar ka, à zlèk a kurum ndzer. 18 Mìi slirehe a tar ka, nda misle ŋgiɗ ilik asa. Wele ata ka, gà mayahaba gər gà mburma Mbulum ana ɗa i faha ya tserdze, tə zləbawa à ŋgat, aɗaba ana a tsikewa bazlam ŋgwal ŋa aka gər *Kiristi ya ka, lele ya. 19 Ama mìi slirehe a ŋgat ka, agəra taŋa ɗekɗek ɓav tsa. Aɗaba gà mayahaba gər gà mburma Mbulum ana ɗa i faha ya, na tə zla ŋgat a. A sàs a tar ka, mà laka mə̀r i təv ana mìi de a à siŋgwe ata aka ahəɗ Yuda ya. Kamala taŋa ya na ŋgwal megemir ata a ti sìkèh a à mezlibe ana ti ti zlibe a dər à BATSAH kwa ŋa, dite a ti ɗif a dər a mburma mbaŋa, ti sir a dər ka, a sàs a mə̀r mazlàkà mburma nda ndzer, wirwir iɗəm tsiye.

20 Siŋgwe ata ka, hinne, dite mìi kesle a à gər mə̀r ka, biytsa, gà mburma ti ti wele a aà mə̀r a, ta gweɗe a, waytsa gà mburma aaha ka, ti zimiŋa. Ama ka, mì waya kataya tsa. 21 Aɗaba a sàs a mə̀r mege dukw ana ŋgwal ŋa ya, ika miɗ mburma mbaŋa, tsəka, ika miɗ BATSAH kwa ŋa ɗekɗek tsa.

22 Mìi slirehe a misle ŋgiɗ pam asa, ti dehe a nda gà mburma ata sula ya. Wele ata ka, maa dzik à ŋgat sik diŋ, dite mì samata ka, a waya mazlàkà kurum nda ndzer dukw ŋgar. Kinehe tekeɗe, a sasar à zlèk a kurum, à zè a taŋa asa mbaŋa, aɗaba ana a tsaraka meɗè zləm mede kurum ana ika vatwa Mbulum ŋgwal ŋa lele ya. 23 Titus ka, mì gewa akaba megemir Mbulum nda ŋgat. Mì vəlawa a ba ahər ŋa, aà mazlàkà dər kurum. Ama gà mburma ata sula ti de akabaha a nda gà Titus a ka, gà mayahaba gər gà mburma Mbulum na tə sləraha tar a təv kurum a. Na gà mburma tàa ŋgat a megemir tar ana ta ge a ya ka, ti ti zlibe a à Kiristi. 24 Wayum gà mburma ata nda gəzləŋ ilik, dite gà mayahaba gər gà mburma Mbulum ata tə sləraha tar a təv kurum a, ti tsereke taŋa ka, ti sir a dər, dukw ana mì tsik aà tar ŋgwal ŋa nda təv kurum a ka, ndzer kaɗəŋ, pàrsa iɗəm tsa.