Galatiya 1

Wakita ana Pul a wetseha

a gà mburma Mbulum ana

i GALATIYA ya

1 Na wetse wakita aaha ka, iye Pul, mala meslire Yesuw Kiristi. Meslire ata i ge a ya ka, mburma na a slər ahər iye ya tsa. Dite kwets ti tike aɗəm iye metike ɓav tsa asa. Ama ka, Yesuw Kiristi na a slər ahər iye ya kəla, tar nda Mbulum Tsir kwa ana a mbəlara à ŋgat i məməta ya ya. 2 Mər ka, nda gà asiŋ gà damər kwa ana tar ɗa i təv ga ya tserdze, na mì ge a kurumaha wusa, a kurum gà mayahaba gər gà mburma Mbulum ana ika ahəɗ Galatiya ya. 3 I heme a a gà Mbulum Tsir kwa nda Yesuw Kiristi BATSAH kwa ŋa, dite ta ge a kurum ŋgwal ŋa, ta vəl a kurum matasla yam a gəzləŋ zayya lele. 4 Yesuw Kiristi a mət ka, aɗaba kwa, na dite Mbulum a pəl a kwa dər à bakal gər ahəɗ aaha ŋgwala tsiye, dite mà fàr aka kwa ndzəɗa asa tsa. A ge dər kataya ka, kamala ana Mbulum Tsir kwa a waya ya. 5 Zàmbaɗakwa à Mbulum ka, aà biybiy. *Amin.

Bazlam ŋgwal ŋa ana biy Yesuw Kiristi ya ka, ilik pəra

6 Dukw ana kurum ihər ki gwim a ya ka, a giŋ hə̀ɓakə̀kka, kamala dukw mene aà mburma ya. Araha, Mbulum a zal a kurum ka, dite ka nwim gà mburma ŋgar, nda ŋgwal ŋgar ana a ge a kurum a. Ama kurum ka, ka miyakum à ŋgat bise tsara ana, meme? Kurum kà zazamum ka, bazlam ŋgiɗ ana kù gwaɗum, ŋgwal ŋa, tsaatsa ka, ŋgwala tsiye ivaɗ. 7 Bazlam ŋgwal ŋana ar ka, kamala ana i ɗif a kurum dər a, tsəka, biy ŋgiɗ a riŋ na a dara i təv Mbulum a ka, a riŋ tsa. I tsik a kurum kataya ka, aɗaba ana i samata ka, gà misle ŋgiɗ a riŋ na wis wis ta wise a kurum a à gər a. A sàs a tar ka, manəsa à bazlam ŋgwal ŋa ana biy Yesuw Kiristi ya, ta waya ka, ti tsik a pam. 8 Ama na bəla wura a riŋ a ɗif a kurum a à bazlam ŋgwal ŋa biy ŋgiɗ pampam aba ndəna mə̀r mì tsik a kurum a ka, Mbulum mə vəlar mezelme. Ku mege mə̀r, nda gà bəla gawla Mbulum ana a dara i gər ŋa ya tekeɗe ka, pampam tsa, mà gəs ŋgat i seriye ya mbaŋa. 9 Maa mbər metsike a kurum daga piŋŋe, dite kinehe tekeɗe, i me a aka metsìkè a kurum asa. I gwaɗa a kurum ka: Na wura a ɗif a kurum a à bazlam ŋgwal ŋa biy ŋgiɗ pampam aba nda biy ana kà lah metserekwim a ka, Mbulum mə vəlar mezelme.

10 Kurum kà dzalum, i tsik taŋa dze ana, na dite gà mburma tə̀ zlə̀b à iye ya? Awaŋ, kataya tsa. A sèsiŋ ka, na Mbulum à zlibe a à iye ya. Kurum kù gwaɗum, dukw ata i ge a kataya ana, na dite i da a gər a mburma ya ya? Awaŋ, i ge a ka, meslire Yesuw Kiristi na iye ya. Aɗaba na mege i waya matsahəna aà mburma hiywe mba ka, ana ka, i ge a meslire ŋgar tsa.

Pul a ɗif dər, meme na a ne mala meslire Yesuw Kiristi ya

11 Gà damər gà, a sèsiŋ ka, sərum dər bazlam ŋgwal ŋa ana i ɗifewa a kurum dər a ka, a dara ka, i madzala gà gər mburma ya tsa. 12 I tsaraka ka, i təv mburma ya tsa asa, dite kwets wura a sinikiŋ dər tsa asa mbaŋa. Ama Yesuw Kiristi à gər ŋgar na a ɗifiŋ dər a.

13 Kurum ka, kàa tsarakum mede gà ana akahər ata ya, dite meme na i zazamawa fəla gà Yahuda nda ndzer ŋa ya. Akahər ata i sèwèrewa are a gà mburma Yesuw ka, hinne. I yahawa vatwa aà medzeye à tar fit. 14 I huɗ madzala gà gər gà ata ya ka, i za dər gà asiŋ gà màndàla gà hinne, na nda mazazama fəla gà Yahuda ya. I vəl ba gà fit a məpala ahəm gà tsir mə̀r, i ge ka, terwihhwe lele.

15 Ama ka, Mbulum a zla iye ya. A zla iye ka, daga piŋŋe, akahər ana tàa wa iye zukw tsiye. Kamala taŋa ya, a giŋ ŋgwal ŋa hinne, a zeliŋ, na dite i ger a meslire ya. Ama aka təv ana a tsahən ahər, i de a a kwite Damas a ka, 16 a pètiŋ à Kəla ŋgar, na dite i tsik a bazlam ŋgwal ŋana aka gər ŋgar, a gà mburma ana tə sər Mbulum tsiye tserdze ya. Akahər ata ka, maa fàfəl nda wura, aà mewize ihər bazlam a tsa asa. 17 Yàa da a Yeruzalem, aà mede a bəra gà na ti lèhiŋ aà mene gà ɓəzla meslire Yesuw Kiristi ya ɓav tsa asa mbaŋa. Ama ka, i mah ba tə̀lùwur ndaka tseke ŋgiɗ tsara ivaɗ. I da aka ahəɗ Arabiya. Zàkwayiya ka, i màhara ba i fata ya asa, i mbəɗara gər a Damas a. 18 Aləka, mive makər a da iɗəm a ka, dite i da a Yeruzalem kuɗa. I da ka, aà malə̀mà akaba nda gà Piyer. Mì ndza akaba ka, kwaskwa sula pəra. 19 Yàa ŋgat a mala meslire Kiristi ŋgiɗ asa tsidze. Say i ŋgat ka, a Zakup, damər Yesuw Kiristi BATSAH kwa ŋa.

20 Mbulum a sər dukw ana i tsik i fata ya ka, ndzer, i ses a pàrsa tsidze.

21 I dəba ŋa ya ka, i da a mesìweye ndaka ahəɗ gà Siriya nda Kilikiya. 22 Akahər ata ka, gà mburma Yesuw Kiristi ana tar riŋ ika ahəɗ Yuda ya, tə sər iye zukw tsa. 23 Ama kəla ka, tə tsarakawa dukw ana gà misle ŋgiɗ ti tsik aà iye ya ka, ta gwa: «Wele ana a sèwèrewa a kwa are piŋŋe ya ka, aka mbəɗ à madzala gà gər ŋgar. Kinehe a riŋ a tsik a ka, bazlam ŋgwal ŋana a mburma kuɗa, ku mege piŋŋe a yahawa vatwa aà medzeye à gà mburma ana ta gəs Yesuw nda gəzləŋ a tekeɗe ya.» 24 Tə tsaraka kataya ka, tə zàmbaɗa à Mbulum aɗaba iye, agəra dukw ana a mbəɗ à iye ya.