Galatiya 2

Meme na gà ɓəzla meslire Mbulum ta gəs Pul

ika magər tar lele ya

1 Mive kurwa gəra faɗ a da iɗəm a ka, mə̀r nda Barnabas mì mbəɗ gər a Yeruzalem asa. Mì tike dər Titus aà mendzwil mbaŋa. 2 I mbəɗ gər a fata ka, aɗaba Mbulum a gweɗiŋ, ge kataya. I ndzeha a fata ka, mì yahaba gər nda gà bàba ŋa ana ika magər gà mburma Mbulum a, kətsah a zlawak zaakwa. I ɗif a tar à bazlam ŋgwal ŋa na i tsikewa a gà na tə sər Mbulum tsiye ya. Aɗaba i waya megemir gà ana i gewa piŋŋe ya, tsikw aà na i da dər a təv tar tekeɗe ka, ma ne taf masakəŋa tsa. 3 Taŋa Titus ana mì da akaba məma ya ka, ŋgat kəla gà Girek, masasa ŋa tsa. Ama ka, gà bàba ŋa ata tàa fə̀r aaka ndzəɗa, aà mene kamala na ŋgat gà Yahuda ya tsa. 4 Ama gà mburma ana ta ge a duwa ka, nda pàrsa ya, tə dawaha aka magər tar, ta gwa, say mà sàs ba. Tə daha aka magər tar ka, sereh sèrèh sereh sereh nda wirwir, aà masamata vatwa kwa ana ki ziwekwe a dər gər kwa ya, aɗaba ana kwa mandza ŋa i təv ilik ŋa nda gà Yesuw Kiristi ya. A sàs a tar ka, na ki nekwe a gà ɓele məpala ahəm gà Yahuda asa ya. 5 Ama ka, maa gəs ahəm tar ku kwizikw tsidze. Aɗaba a sàs a mə̀r ka, bazlam ŋgwal ŋana ma da aka miɗ hiywe nda ndzer, pàrsa iɗəm tsiye, na dite ki tserekwim a mbaŋa ya.

6 I təv ana i ɗifewa a tar à bazlam ŋgwal ŋa ata i tsikewa ya ka, gà na ta fə̀rawa aà tar kamala gà bàba ŋa ika magər gà mburma Mbulum a ka, tàa tsikiŋ aaka bazlam ŋgiɗ awiya ŋa tsidze. Ama ku mege tar gà bàba ŋa, mege tar gà ɓəzla dəba tekeɗe ana, əla gà te ya. Aɗaba gà mburma tserdze ika miɗ Mbulum ka, ilik, tsəka, pampam tsa. 7 Seyiŋ tsa, tə sər dər ivaɗ ka, Mbulum a viliŋ bazlam ŋgwal ŋana a ahər, a gweɗiŋ ka, daha, ti tsik a gà na tar gà Yahuda tsiye, kamala ana akahər ata a tsik a Piyer, a gwaɗar ka, daha, ti tsik a gà Yahuda ya mbaŋa. 8 Tə sər Mbulum na a vəl ndzəɗa a Piyer, a slər ŋgat a təv gà Yahuda, dite ŋgat ŋa hiywe mbaŋa na a viliŋ ndzəɗa, a slər iye a təv gà na tar gà Yahuda tsiye ya. 9 Gà Zakup nda Piyer, nda gà Yuhana ana ta fə̀rawa aà tar kamala gà bàba ŋa ika magər tar a ka, tar tə sər, Mbulum na a viliŋ megemir ata a ahər nda ndzer a. Aɗaba taŋa na ta vəl a mə̀r ahər nda Barnabas ədəts lele, kamala megweɗe ya ka: Mege megemir mə̀r ka, ilik na mi ŋgeyer ba ya. Mər nda gà tar na mì dza akaba bazlam, mì gwa, mìi de a, mìi ta ge a megemir ika magər gà na gà Yahuda tsiye ya. Ama tar ka, tə da a təv gà Yahuda. 10 Ta wiz aà mə̀r duwa ilik pəra. Ta gwaɗa a mə̀r ka: «Zlakum gà ɓəzla matawak ana ika magər gà mburma Mbulum i Yeruzalem a.» Taŋa ka, dukw ana i vəl ba gà aà mege megemir ŋa ya mbaŋa.

Pul a ɗif à metsehe a Piyer i kwite Antakiya

11 Aləka i dəba ŋa ya ka, Piyer a daha a kwite Antakiya ka, i palar ahəm ika miɗ mburma tserdze, aɗaba ana a ge bakal a. 12 I təv ana a ndzeha tsara ya ka, mì zəm akaba ɗaf, mə̀r tserdze nda gà asiŋ gà mburma ana ti ne gà damər mə̀r, tar gà Yahuda tsiye. Aləka i dəba ŋa ya ka, Zakup a sləraha mburma a təv mə̀r. Ti ndzeha tsara ka, tsukwaɗ Piyer a hitse i təv mə̀r a. A gəs mazəma akaba ɗaf nda gà mə̀r asa tsa. A ge magəɗa a ga mburma Zakup ata ta waya masasa ba ya. 13 Gà asiŋ gà Yahuda ana i fata ya, metsehe tar a mbəɗ aba, ta ge kamala ana Piyer a ge ya mbaŋa. Ku mege Barnabas tekeɗe, a ge aà ter a are, a waya ti zim akaba a ɗaf nda gà tar ana gà Yahuda tsiye, tsa mbaŋa. A dza ba aà mimbehe a tar are kamala tar a mbaŋa. 14 Ama i samata, tə zazam vatwa bazlam ŋgwal ŋana ndzer a tsəka, i tsik a Piyer ika miɗ gà mburma Mbulum ata tserdze ya: «Kər ka, gà Yahuda. Ama ku mege kataya tekeɗe, kà ndzawa ɗa ka, kamala gà na tar gà Yahuda tsiye, haa kinehe. Kàa zazam məpala ahəm gà Yahuda tsəna, meme na ki gweɗe a a gà na tar gà Yahuda tsiye ka, mede tar ma ge kamala i gà Yahuda ya kinehe asa ya?

Ki mbilekwe a ka, agəra megìse kwa ana kə̀ gə̀sakwa

Yesuw Kiristi ya ɗekɗek

15 Aɗaba kwa ka, ta wa kwa i gwala gà Yahuda, tsəka, kwa gà mburma ŋgiɗ ana tə sər məpala ahəm Mbulum tsiye tsa. 16 Ama ku mege kataya tekeɗe, kà sərakwa ndzer, wura ilik ŋgwal ŋa ika miɗ Mbulum tsidze, say wele ana aka gəs Yesuw Kiristi nda gəzləŋ a. Tsəka, wele ana a tike madzala gà gər ŋgar aka məpala ahəm gà Yahuda ya ka, a ne a ŋgwal ŋa tsa. Kwa tekeɗe ka, kàa gə̀sakwa Yesuw Kiristi nda gəzləŋ, na dite Mbulum a samata taŋa ka, à gis a kwa kamala kwa gà ŋgwal ŋa ika miɗ ŋgar a. A ge kataya ka, agəra ana ka zazamakwa məpala ahəm gà Yahuda ya tsa. Aɗaba ta wetse i wakita Mbulum akahər ata ka, ta gwa: “Wura a ne a ŋgwal ŋa ika miɗ Mbulum agəra ana a zezem a məpala ahəm ata ya tsa.”»

17 Aɗaba taŋa, ku mege mə̀r gà Yahuda tekeɗe, mì ne ŋgwal ŋa ika miɗ Mbulum ka, aɗaba ana mì gəs Yesuw Kiristi nda gəzləŋ mə̀r a. Na mə̀r kataya ka, maa ne gà ɓəzla bakal ika miɗ məpala ahəm Mbulum kamala gà asiŋ gà mburma ŋgiɗ ana tserdze ya mbaŋa, aɗaba ana maa dza gurmits a bəɗ a məpala ahəm Mbulum ata asa tsiye. Taŋa dze ana, kamala megweɗe ya: Kiristi na a gəs mə̀r a bakal a ya? Awaŋ, kataya tsidze. 18 Ar ka, kamala naha ya ivaɗ: Na bəla wura a riŋ a miyek a à mazazama məpala ahəm gà Yahuda agəra ana a ger a ŋgulum tsiye, dite i dəba ŋa ya, à mbìɗ aaka a gər asa, à fir ahər a kamala dukw ana ŋgwal ŋa lele ya asa ka, a ge taŋa ka, dukw ana ŋgwal ŋa tsiye ika miɗ Mbulum. 19 Ama məpala ahəm gà Yahuda ka, aka mbər medzeye à iye. I ne kamala ana iye məməta ŋa ya na nda təv məpala ahəm ata ya, aɗaba a giŋ a ŋgulum ika miɗ Mbulum asa tsa. Ama kinehe ka, Yàa ŋgat mesife ika miɗ Mbulum a. Akahər ata piŋŋe, i təv ana tə ndwandway Kiristi aà dizl magə̀làwà ŋa ya ka, mì mata akaba a təv ilik ŋa nda ŋgat. 20 Iye ka, mesife ana i ndze a dər kinehe ya ka, biy gà asa tsa. Ama ka, Kiristi na a ndze a nda mesife ŋgar i gəzləŋ gà ya. Mendze ana i ndze a ɗa ika gər ahəɗ kinehe ya ka, say nda magàsà Kəla Mbulum ata nda gəzləŋ. Ŋgat na a waya iye, dite a dzeye à mesife ŋgar aɗaba iye ya. 21 Iye ka, i niw a ŋgwal Mbulum ana a ge a kwa ya tsidze. Na mege mburma a ne a ŋgwal ŋa ika miɗ Mbulum agəra ana a gewa dukw ana məpala ahəm a wiz ahər a ka, ana ka, kamala megweɗe ya: Kiristi a mət ka, taf masakəŋa, a ge a ŋgulum tsa. Ama kinehe ka, kataya tsa.