Galatiya 3

Gà məpala ahəm nda magəsa Yesuw Kiristi nda gəzləŋ

1 Kurum gà mburma ana ika ahəɗ Galatiya ya, metsehe kurum a riŋ tsa. Meme na ta bana kurum dze ya? Aɗaba Yàa ɗif a kurum dər parakka lele, meme na Yesuw Kiristi a mət aà dizl magə̀làwà ŋa aɗaba kwa ya. 2 I tsèm aà kurum a ka, duwa ilik pəra. Wànà Mezite Mesife ana Mbulum a vəl a kurum ana, agəra ana kà zazamum məpala ahəm gà Yahuda ya ya? Awaŋ, Mbulum a vəl a kurum Mezite Mesife ŋgar ka, agəra ana kàa dzum zləm a bazlam ŋgwal ŋana, dite kə̀ gəsum Yesuw Kiristi nda gəzləŋ kurum a. Wànà kataya tsiye? 3 Dite aàla na metsehe kurum a riŋ tsiye? Aɗaba akahər ata piŋŋe ka, kàa dzum ba aà mede kurum nda ndzəɗa Mezite Mesife Mbulum lele. Dite araha kinehe ka, a sàs a kurum mandəva dər nda ndzəɗa ba kurum dze ana, meme? 4 Mbulum aka pise a kurum ahəm nda təv gà dukw ŋgiɗ pampam, dite gà dukw ŋgiɗ ibam, tàa ge a kurum ba a gər hinne asa mbaŋa. Wànà kà dzalum dze ana, gà dukw ata ta geye ba ana, taf masakəŋa ya? Awaŋ, aɗaba i sər ndzer, gà dukw ata ta geye ba ya ka, a ne a taf masakəŋa tsa. 5 Aɗaba Mbulum a riŋ ihər a vile a kurum Mezite Mesife ŋgar, dite a riŋ ihər a ge a gà dukw mene aà mburma ŋgiɗ pampam ika magər kurum mbaŋa asa. A ge taŋa dze ana, wànà agəra ana kà zazamum məpala ahəm gà Yahuda ya ya? Awaŋ, a ge taŋa ka, agəra ana kàa dzum zləm a bazlam ŋgwal ŋana, dite kàa gəsum Yesuw Kiristi nda gəzləŋ kurum a.

6 Ka dzalum gà gər te tsiye? Meme na wakita Mbulum a fàfəl aka ger Abəraham a. A gwa ka: «Abəraham a gəs dukw ana Mbulum a tsiker a. Aɗaba taŋa na a ne à ŋgat ŋgwal ŋa ika miɗ ŋgar a.» 7 Kamala taŋa ya, kinehe ka, kà sərum ndzer, na a ne gà ɓəza Abəraham nda ndzer ŋa ka, gà na ta gəs Mbulum nda gəzləŋ tar a. 8 Akahər ata piŋŋe, ta wetse dukw ana a ta ge a ba aka miɗ mba ya, a wakita Mbulum ka, ta gwa: «A pat ŋgiɗ ka, gà mburma ana tə sər Mbulum tsiye, ta gis a ŋgat nda gəzləŋ tar, dite Mbulum tekeɗe, à gis a tar lele, a ne à ter a gà ŋgwal ŋa ika miɗ ŋgar.» Kamala taŋa ya, Abəraham a tsaraka bazlam ŋgwal ŋa ata ka, daga piŋŋe, i təv ana dukuməŋa aka ndze aɗəm zukw tsiye. Mbulum a gwaɗar ka: «I ta pise a ahəm a gà mburma ana ika gər ahəɗ tserdze ya, aɗaba kər.» 9 Dite i dəba bazlam ata ya ka, Abəraham a gəs Mbulum nda gəzləŋ ŋgar, a piser ahəm. Ama gà asiŋ gà misle ŋgiɗ ana tàa gəs ŋgat nda gəzləŋ tar kamala Abəraham a tekeɗe, Mbulum a pise a ter a ahəm mbaŋa.

10 Ama gà na ta gweɗe a ka, waytsa mìi ne a gà ŋgwal ŋa ika miɗ Mbulum, aɗaba ana mìi ge a dukw ana məpala ahəm a tsik a mə̀r a ka, mezelme Mbulum ika gər tar. Aɗaba ta wetse i wakita Mbulum ka, ta gwa: «Na wura a zazamawa gà məpala ahəm ana ta wetse i wakita pampam tserdze ya tsəka, mezelme Mbulum ika gər ŋgar.» 11 Ama ka, kà sərakwa, wur ana a ne a ŋgwal ŋa ika miɗ Mbulum, agəra ana a zazam məpala ahəm gà Yahuda ya ilik tsidze. Aɗaba ta wetse i wakita Mbulum mbaŋa ka, ta gwa: «Wele ana aka gəs Mbulum nda gəzləŋ a, na a ne a ŋgwal ŋa ika miɗ ŋgar, dite a ndze a nda mesife ana ndzer a.» 12 Ama na wura a waya a zezem a məpala ahəm gà Yahuda ka, taŋa bazlam magəsa Mbulum nda gəzləŋ iɗəm tsidze. Ar ka, pampam. Seyiŋ tsa, ar ka, kamala ana ta wetse i wakita Mbulum ka, ta gwa: «Na a ndze a nda mesife ata ivaɗ ka, wele ana a zezem a məpala ahəm gà Yahuda terwihhwe lele, duwa ilik à mìts a iɗəm a tsidze ya.»

13 Kamala taŋa ya, Mbulum a vəl a kwa mezelme ka, agəra na kà zazamakwa məpala ahəm ŋgar kweleŋ tsiye. Ama Kiristi a dara ka, a zla təv mendze kwa, na dite ka, Mbulum a vəlar mezelme ya. A ge dər kataya ka, a mbəlara à kwa i mezelme Mbulum ana a ta vile a kwe a zləmana ya. Ar ka, kamala ana ta wetse i wakita Mbulum a, ta gwa ka: «Wele ana tàa dàn ŋgat aà dizl a ka, mezelme Mbulum na ika gər ŋgar a.» 14 Yesuw Kiristi a ge gà dukw ata kataya ka, agəra mipise ahəm ana Mbulum a tsik a Abəraham i sida ya, a gwaɗar, i ta vilek a ya ka, gà na tar gà Yahuda tsiye, ta ŋget a aɗaba Yesuw Kiristi ata mbaŋa. A ge mege dukw ŋgar ata asa mbaŋa ka, na dite ki ŋgetekewe a Mezite Mesife Mbulum ana a tsik i sida ya, a gwa, i ta vile a kwe a ya ka, agəra ana kə̀ gə̀sakwa ŋgat nda gəzləŋ kwa ya.

Dukw ana Mbulum a tsik i sida ya, a gwa,

i ta vile a a Abəraham a

15 Gà damər gà, i ɗif a kurum a dər ka, nda mendzikiɗe ba dukw ana a ge a ɗa ba ika gər ahəɗ kinehe ya. Na bəla gà mburma sula tàa dza akaba ahəm dukw ana ti tsik a, tàa wetse aba ya fit, dite tàa ge ahər lambà ahər tar dze ana, taŋa ana, wura a riŋ a sle a aà medzeye à bazlam tar ata ya ya? Kige tsa, wura a sle a aà mesikehe dər aaka ya? Awaŋ, a riŋ tsa. 16 Yawwa, i təv Mbulum tekeɗe, kamala taŋa ya mbaŋa. Akahər ata piŋŋe ka, Mbulum a tsik dukw ata i sida ya, a gà Abəraham, a gwa, i ta vile a teriŋa. Ama kəla ka, wakita Mbulum a gwa, a ta vile a a gà Abəraham ka, kamala tar ata hinne ya ka, aka tsik ɓav tsa. Ti tsik bazlam ata nda ndzer ka, aka gər mburma ilik ika magər gà ɓəza ŋgar a pəra. Kamala megweɗe ya: Aka gər *Kiristi. 17 Dukw ana a sèsiŋ aà megweɗe ya ka, araha: Mbulum a ɗif à masəra ba ŋgar ana tə sər ba nda Abəraham a ka, nda təv dukw ana aka mbər metiker i sida ya, a gwa, i viler a ya. Aləka i dəba mive dərməka faɗ nda dzik makər a ka, Mbulum a ɗif à məpala ahəm a gà Yahuda. Kamala taŋa ya, məpala ahəm ata ka, a sle a aà mimbètè à masəra ba ana Mbulum aka mbər meɗife dər a Abəraham a tsa. Aka miyak à dukw ana a tsiker i sida ya, a gwa, a ta viler a ya tsidze. 18 Na mege Mbulum a vile a duwa a mburma ka, agəra ana ti zezem a məpala ahəm gà Yahuda ya ka, ana ka, kamala megweɗe ya: A ta vile a ter a ka, agəra ana a tsik a tar i sida ya tsa. Ama tsaatsa, Mbulum a ge ŋgwal a Abəraham ka, aɗaba ana a tsiker i sida ya, a gwa, a ta ge a dər kataya ya.

19 Na kataya ana, dite aàmala na Mbulum a ɗif à məpala ahəm ŋgar a gà Yahuda asa ya? A ɗif dər ka, na dite kà sərakwa aà dukw bakal ana ika miɗ kwa ya. A ge megemir ka, zaakwa tə̀ma, haa a təv ana kəla Abəraham ata, wele ana Mbulum a tsiker aba dukw ata i sida ya, aka dara ya kuɗa. I dəba ŋa ya, ndzəɗa məpala ahəm ata ka, aka ndəv. Aɗaba gà gawla Mbulum na tə da dərra i təv Mbulum, ti ɗif dər a wur ana a riŋ mandza ŋa ika magər gà Mbulum nda gà mburma ya mbaŋa. 20 Wele ana mandza ŋa ika magər kamala taŋa ya ka, hiywe taŋa ka, ŋgat mala məmaya ahəm. Ama i təv ana Mbulum a tsik dukw ata i sida ya, a Abəraham a, a gwa, i ta vile a ya ka, a tsik taŋa ka, à gər ŋgar, tsəka, mala mendze ata ika magər ŋa ya ka, a riŋ a ge a ŋgulum tsa.

Məpala ahəm Musa ka, a ge a megemir hiywe tsa

21 Taŋa kamala megweɗe ya: Məpala ahəm dze ana, a sasar dukw ana Mbulum a tsik i sida ya tsiye? Awaŋ, kamala taŋa ya tsidze. Aɗaba na mege məpala ahəm a sle a aà məvəla mesife a mburma ka, ana ka, a sle a aà mene à tar gà ŋgwal ŋa ika miɗ ŋgar ndaka vatwa məpala ahəm ata mbaŋa. 22 Seyiŋ tsa, ar ka, kamala ana ta wetse i wakita Mbulum a, ta gwa ka, bakal na a kwere a gà mburma ana ika gər ahəɗ tserdze ya ivaɗ. A ge kataya ka, na dite dukw ana Mbulum a tsik i sida ya, a gwa, a ta vile a a mburma ya ka, nda ahər Yesuw Kiristi. Dukw ata a vile a ter a ya ka, agəra megìse tar ana ta gəs ŋgat nda gəzləŋ a.

23 Akahər ata piŋŋe ka, vatwa a riŋ, na dite gà mburma ta gis a Kiristi nda gəzləŋ a ka, a riŋ zukw tsa. Kwa ka, kamala wele ana gidziwwè mandza ŋa i daŋgay a, na kwa i ahər məpala ahəm gà Yahuda ya, haa təv ana Mbulum a vəl a kwa vatwa aà magəsa Yesuw Kiristi nda gəzləŋ kuɗa ya. 24 Kamala taŋa ya, məpala ahəm gà Yahuda ata ka, a ɗif a kwa à ŋgwal metsehe lele, haa a pat ana Kiristi a dara ya. Aɗaba a ge dər kataya ka, na dite Kiristi aka dara ka, Mbulum a ne à kwa a gà ŋgwal ŋa ika miɗ ŋgar, agəra ana kə̀ gə̀sakwa ŋgat nda gəzləŋ a ya. 25 Ama kinehe ka, vatwa a riŋ, na ki gìsekwe a Kiristi nda gəzləŋ kwa ya kuɗa. Aɗaba kwa i ahər məpala ahəm gà Yahuda ata, à tètìk a kwe a ya asa tsa.

26 Kamala taŋa ya, kurum tserdze ka, kàa nwim gà ɓəza Mbulum, aɗaba ana kàa gəsum Yesuw Kiristi nda gəzləŋ, dite kurum a riŋ mandza ŋa i təv ilik ŋa nda ŋgat a. 27 Ti tsilwiɓ à kurum a yam. Kamala taŋa ya ka, zlə̀lhaɗ kàa gawum ba nda gà Yesuw Kiristi, kàa zlum ba ŋgar. 28 Na bəla kər gà Yahuda, kige tsa bəla kər gà Yahuda tsəka, à lèh a duwa asa tsa. Kige tsa na bəla kər ka, ɓele, nda gà bəla kər ihər ki ziwe a gər yak tekeɗe ka, pampam tsa. Nda gà bəla kər asləka ŋa, kige tsa asa, kər məkəs ŋa ka, pampam tsa mbaŋa. Kamala taŋa ya, kurum tserdze kà nwim ka, ba ilik, aɗaba ana kàa gawum ba nda gà Yesuw Kiristi ya. 29 Ama na kurum gà mburma Kiristi ka, kamala megweɗe ya: Kurum ka, gà ɓəza Abəraham mbaŋa. Na kataya ka, ki ta ŋgetwime a dukw ana Mbulum a tsik i sida ya, a gwa, i ta vile a a gà Abəraham nda gà ɓəza ŋgar a tserdze mbaŋa.