Galatiya 4

1 A sèsiŋ i ɗif a kurum a dər ka, nda mendzikiɗe ba duwa: Ar ka, kamala kəla ana a ti zim a dukw tsir ŋgar ika miɗ mba ya. Aka na ŋgat kəla ndirkiz mba ya ka, tsìfekkwe kamala ɓele ya, ku mege ŋgat ŋa na a ti zim a gà dukw ata tserdze ya mba tekeɗe ya. 2 Aka ana ŋgat kəla ndirkiz mba ya ka, gà mburma tsir ŋgar ata ta ger a metsehe lele, ta ger a gər mbaŋa, haa a pat ndzəɗa məpaslà ahər tsir ŋgar ana aka ndze aɗəm a. 3 I təv kwa kinehe tekeɗe ka, kataya mbaŋa. Akahər ana kà nekwa kamala gà ɓəza mba ya ka, kwa mandza ŋa kamala gà ɓele ya, na i ahər gà sitene ana ta kwere a gər ahəɗ a ya. 4 Ama i təv ana məpaslà ahər Mbulum a ndze aɗəm a ka, a slərra Kəla ŋgar a. Məkəs duwa na a wa ŋgat a. A zazam məpaslà ahər gà Yahuda mbaŋa, 5 Na dite a bere a à tar i ahər məpala ahəm ata a kwere a tar a ya. A sàs a Mbulum ka, ki nekwe a gà ɓəza ŋgar nda ahər Kəla ŋgar ata.

6 Dukw ana ki sirekwe a dər ndzer kaɗəŋ, kàa nekwa gà ɓəza ŋgar a ka, araha: Mbulum a slərra Mezite Mesife Kəla ŋgar a gəzləŋ kwa ya. Mezite Mesife ata ka, a riŋ a zel a a Mbulum «Aba,» kamala megweɗe ya ka: «Dede ga.» 7 Kamala taŋa ya, kurum ka, gà ɓele sitene asa tsa, kurum ka, gà ɓəza Mbulum Tsir kwa ivaɗ. Ama na kurum gà ɓəza ŋgar ka, taŋa ka, ki ŋgetwime a gà dukw ana tserdze a ta vile a a gà ɓəza ŋgar a mbaŋa.

Pul a dzala gà gər hinne agəra gà mburma Mbulum ana

i Galatiya ya

8 Aka ana kà sərum Mbulum tsiye ka, kurum kà nwim gà ɓele gà dukw ana pampam a, tsəka, biy Mbulum ndzer ŋana tsa. 9 Ama kinehe ka, kà sərum Mbulum kuɗa. Ŋgulum i gweɗe a ka, Mbulum aka sər kurum ivaɗ. Assàh, dite meme na ki mbiɗwim a gər a dukw sitene ana taf masakəŋa, ndzəɗa iɗəm tsiye asa ya? Aàmala na a sàs a kurum mene gà ɓele tar asa dze ya? 10 Aɗaba na kurum ihər ki gwim a metsehe a gà pat ŋa nda gà kiye ŋa, nda gà bəla ahər tə̀vəməŋa ana ti ndzeye aɗəm a pampam a, kige tsa mive ŋa ana aka ndze aɗəm ka, ki girivwim a ya. 11 I dzala gà gər ka, hinne, na aɗaba gà dukw ata kurum ihər ki gwim a ya. Bəla megemir gà ana i ge ika magər kurum a ka, a ne a taf masakəŋa.

12 Gà damər gà, i ge a kurum a kamkam: Gwim ka, kamala iye ana i gewa ya. Iye tekeɗe, kamala kurum a mbaŋa, kwa ka, ilik. Kàa gwimiŋ dukw ana ŋgwal ŋa tsiye ɓav tsa. Ama kinehe ana, meme? 13 Kurum kà sərum, malahalah ŋa ka, iye ŋgwala tsa, na i dza ba a təv kurum a, dite ka, na i ɗif a kurum à bazlam ŋgwal ŋana ya. 14 Dukw məməta gà ata ka, aka vəl a kurum mesewere are. Ama ku mege kataya tekeɗe, kàa fə̀rum aà iye kamala za ya ɓav tsa. Dite kwets kàa dalawum aba iye ya ɓav tsa asa mbaŋa. Seyiŋ tsa ivaɗ, kàa gəsum iye lele, kamala ana iye ka, gawla Mbulum a kaɗəŋ, dite gəsum iye asa ka, kamala ana iye Yesuw Kiristi nda gər ŋgar a. 15 Akahər ata ka, kə̀ ŋgayawum ba ka, hinne. I sər ndzer, na mege a ge a ba ka, ana ka, kàa ndzahumara gà are kurum i gər a, ùndzuɗ ùndzuɗ kàa dzwìmiŋ. Dite meme na ki ŋgeywim a ba kinehe asa tsiye? 16 Kà fə̀rum aà iye kinehe ana, kamala ana i ne mala mene are kurum, agəra ana i tsik a kurum ndzer ŋa ya ivaɗ a?

17 Gà mburma ata ti tsik a bazlam ŋgwal ŋa nda pàrsa ya ka, a sàs a tar na ŋgərəɗ ti dèn a aàba kurum a. Ama metsehe tar ka, a de a kalkal tsa. A sàs a tar ka, ki miyekwim a à iye ivaɗ, na dite ka, ki zezemwim a tar a. 18 Ŋgwal ŋa lele seyiŋ na magəsa ahəm aà gà misle ŋgiɗ a. Ama say ki giswim a ahəm kə̀la ka, aà gà na ti zezem a vatwa ana ŋgwal ŋa ya. Ki giswim a hiywe, tsəka, i təv ana iye riŋ mandza ŋa i təv kurum a ɗekɗek pəra tsa. 19 Gà ɓəza gà, iye ihər i sèwèr a are aɗaba kurum, kamala məkəs ana a we a kəla ka, tə̀pasəssà a wir ahər a ya. A riŋ a wir aà iye a ka, kamala taŋa ya, haa a təv ana kàa zlum ba Kiristi nda ndzer a. 20 I waya ka, madaha a təv kurum zləmana, na aà metsike a kurum gà dukw ata, na dite ki tikwim aaka a gà gər lele ya. Aɗaba a wisiŋ a gər ka, hinne, i sər dukw ana i tsik a kurum a ya tsa.

Bazlam aka gər gà Sara nda Agar

21 A kurum gà mburma ana a sàs a kurum mandza gurmits a bəɗ a məpala ahəm Musa ya. Iye ihər i tsèm a aà kurum ŋa: Kàa tsarakum dukw ana məpala ahəm ata a tsik a dze ana, wànà kà sərum tsiye? 22 Aɗaba ta wetse i wakita məpala ahəm Musa ata ka, ta gwa: Abəraham ka, gà ɓəza ŋgar sula. I ŋgiɗ ka, ɓele na a wa ya, zləm məkəs ŋa Agar. Ama naha ka, biy məkəs ndzer ŋana, na a wa ŋgat a. Zləm ŋgar ka, Sara. 23 Kəla ɓele ata ka, ta wa nda mezìwè gər tar dukw tar. Ama biy məkəs ŋgiɗ aaha ka, a wa kataya tsa. A wa ka, aɗaba Mbulum na a tsik a Abəraham i sida ya, a gwaɗar, a ta ge a ba kataya ya. 24 Gà dukw ata ta geye ba kataya ka, a sasar à meɗife kwa dər ka, à dukw ŋgiɗ asa. Ki sirekwe a dər ka, i gà məkəs ata sula ya, tar ka, gà mendzikiɗe ba ŋa. Mendzikiɗe ba ata tekeɗe, biy masəra ba ana pampam, Mbulum a sər ba nda gà mburma ya. Agar, ɓele məkəs ŋa ata ka, ŋgat mendzikiɗe ba masəra ba ana Mbulum a sər ba nda Musa aà sik kwite duwa tə zalar Sinay a. Gà ɓəza ŋgar ka, ta waya tar gà ɓele. 25 Agar ka, kamala kwite Sinay ata ika ahəɗ Arabiya ya. Kamala taŋa ya tekeɗe, ar ka, kalkal nda kwite Yeruzalem ana kinehe ya mbaŋa. Aɗaba gà mburma ana ti tike madzala gà gər tar a fata tserdze ya ka, tar gà ɓele məpala ahəm Musa. 26 Ama kwite Mbulum ndzer ŋana ka, taŋa Yeruzalem ana i mbulum i gər ŋa ya. Ŋgat ka, ɓele tə tsa. Aɗaba ŋgat na a ne kamala mama kwa ya. 27 Ar ka, kamala ana mewetse ŋa i wakita Mbulum, ti tsik ahər a, ta gwa ka:

«Kər ana ìdil ŋa, kàa wa kəla ilik tsiye ka,

ŋgaya ba nda gà Mewideye huwwa hinne,

ku mege kər ana kàa ŋgat a mesewere are

mawà kəla duwa ilik tsa tekeɗe ya.

Aɗaba məkəs ana zal ŋgar a miyak dər a ka,

a ŋget a gà ɓəza hinne, à zè a dər

məkəs ana ti ndze a nda zal ŋgar lele ya.»

28 Gà damər ga, kurum ka, kà nwim gà ɓele Mbulum gà ndzer ŋana, aɗaba ana Mbulum a tsik i sida ya, a gwa, a ta ge a ba kamala taŋa ya ya. Ar ka, kamala ana Mbulum a tsik a Abəraham i sida ya mbaŋa, a gwaɗar akahər ata, ki ta ŋget a Izak a. 29 Ama akahər ata ka, kəla ana ta wa ŋgat kamala ana ta wuwa gà asiŋ gà ɓəza tserdze ya ka, a sèwèrewa are a biy ŋgiɗ aaha ta wa nda ndzəɗa Mezite Mesife Mbulum a. Kinehe tekeɗe, ar ka, kamala taŋa ya hiywe mba. 30 Ama ta wetse ana dukùla na i wakita Mbulum a? Ta gwa ka: «Dalawa məkəs aaha ɓele ŋa ya nda kəla ŋgar məma, aɗaba a ge a ba tsa na kəla aaha ka, a zim a dukw tsir ŋgar a. Say kəla məkəs ndzer ŋana na a ti zim a ya.» 31 Kamala taŋa ya, gà damər gà, kwa kinehe ka, kàa nekwa kamala gà ɓəza ɓele ya tə tsa. Kwa ka, gà ɓəza məkəs ana ndzer ŋa ya.