Efesiya 1

Wakita ana Pul a wetseha

a gà mburma Mbulum ana

i EFESIYA ya

Wusa ana a ge a taraha ya

1 Iye Pul, wele ana Mbulum a zla kamala mala meslire Yesuw Kiristi ya. I wetseha wakita aaha ka, a kurum gà mburma Mbulum ana i Efesiya ya. I wetseha ka, a kurum ana kàa gəsum Yesuw Kiristi nda gəzləŋ lele, dite ka, kurum riŋ mandza ŋa i təv ilik ŋa nda gà ŋgat asa ya. 2 Gà Mbulum Tsir kwa nda Yesuw Kiristi BATSAH kwa ŋa ta ge a kurum ŋgwal ŋa, ta vəl a kurum matasla yam a gəzləŋ zayya lele.

Ŋgwal ana Mbulum a ge a gà mburma ŋgar a

3 Zàmbaɗakwa à Mbulum Tsir Yesuw Kiristi BATSAH kwa ŋa, aɗaba aka pisakwara ahəm a nda gà ŋgwal gà dukw ana tserdze ti ndze a aà biybiy i gər ŋa ya. A vəl a kwa gà dukw ata ka, a kwa ana mandza ŋa i təv ilik ŋa nda gà Yesuw Kiristi ya. 4 Aɗaba taŋa, Mbulum aka mbər mipìlè kwa ana mandza ŋa i təv ilik ŋa nda gà Yesuw Kiristi ya daga piŋŋe, aka ana aka ge gər ahəɗ zukw tsiye. A pala kwa ka, aà mene gà mburma ŋgar, dite bakal ma ge riŋ i təv kwa ana ika miɗ ŋgar a tsa. 5 Aɗaba Mbulum a waya kwa. Aka tsik daga piŋŋe, a gwa, i ti ne a à tar gà ɓəza gà nda ahər Yesuw Kiristi. Aɗaba taŋa na a ne bazlam ŋgar ana a dar a gər a. 6 Ama kinehe ka, zàmbaɗakwa à Mbulum, agəra ŋgwal ŋgar ana a za duwa tserdze, a ge a kwa ya. Ŋgwal ŋgar ata a ge a kwa biy taf a ka, aɗaba ana kwa riŋ mandza ŋa i təv ilik ŋa nda gà Kəla ŋgar mandərkwasla ŋa ana a waya ŋgat hinne ya.

7 A mburuɗara kwa i ahər Əbay sitene ya. Nda məməta Kəla ŋgar ata, a pəl a kwa dər à bakal, dite na kə ŋgatakwa mezìwè gà gər kwa kuɗa ya. Kərga taŋa ya, aka ɗif a kwa dər ka, meme na ŋgat a riŋ ihər a ge a kwe a ŋgwal ŋa hinne ya. 8 Aka ràhaba kwa nda ŋgwal ŋgar ata hinne. Aka ɗif a kwa à metsehe ŋgar. A ɗif a kwa dər ka, dite ka sərakwa dukw ana a sasar a. 9 Aka ɗif a kwa à dukw ana daga piŋŋe, a sasar mege nda ahər Yesuw Kiristi ya. Aɗaba piŋŋe ka, makàhà ŋa. Ama kinehe ka, aka pàt aba. 10 Dukw ata Mbulum a ti ndìv a dər ka, a pat məpaslà ahər ŋgar ana a tsik a. A gewe akaba a gà dukw ana i gər ŋa ya nda gà dukw ana ɗa ika gər ahəɗ a tserdze a təv ilik ŋa. A dze a ahər a Yesuw Kiristi, dite a ne a Əbay ŋa.

11 Mbulum a ge a duwa tserdze ka, kamala ana a sasar mege ya. Aka pala kwa daga piŋŋe kamala ana a tsik a. Kàa ŋgatakwa dukw ana Mbulum a dzala piŋŋe, a gwa, i ta vile a a gà mburma gà ya. Kə̀ ŋgatakwa ka, aɗaba ana kwa riŋ mandza ŋa i təv ilik na nda gà BATSAH kwa ŋa ya, 12 dite ka, gà mburma tserdze tə̀ zlə̀b à ŋgat ana BATSAH kwa ŋa ya aɗaba mə̀r, mə̀r gà malahalah gà mburma ana mì tike madzala gər mə̀r fit a təv Yesuw Kiristi ya.

13 Kurum tekeɗe ibam ka, i təv ana kàa tsarakum bazlam ŋgwal ŋana ndzer, kà sərum ka, ki ta mbilwim a dər a ka, kə̀ gəsum Yesuw Kiristi nda gəzləŋ kurum mbaŋa. Kərga taŋa ya, Mbulum aka ge aà kurum lambà nda Mezite Mesife ŋgar ana a gwa ka, i ta vile a kurum a ya, aɗaba ana kurum mandza ŋa i təv ilik ŋa nda gà Yesuw Kiristi ata ya. 14 A vəl a kwa Mezite Mesife ŋgar ata tə̀ma ka, dite ka sərakwa dər ndzer, a ta vile a kwe a gà asiŋ gà dukw ŋgar ŋgiɗ ana a riŋ ŋgwal ŋa ika miɗ mba ya. Mbulum aka tsik a kwa duwa i sida ya nda ndzer a, a gwa, ki ŋgetekewe a gà dukw ata ka, i təv ana aka mbala à kwa fit a. Kinehe ka, zlə̀bakwa à ŋgat. Ŋgat na BATSAH kwa ŋa ya.

Meheme Pul ana a hama a Mbulum a

15 Iye riŋ i ge a kəkaaha a Mbulum aɗaba kurum, agəra gà dukw ata tserdze ya. Yàa tsaraka meme na kurum riŋ ki dwim a à magəsa Yesuw BATSAH kwa ŋa aka miɗ aka miɗ a. Yàa tsaraka mbaŋa asa, meme na kà wayum gà mburma Mbulum a. 16 Aɗaba taŋa, iye ihər i ge a kəkaaha a Mbulum kəla pat agəra kurum, dite i təv meheme ata i heme a ya ka, iye riŋ bise nda kurum. 17 I heme a ka, a Mbulum Tsir kwa Batsah ŋa ana tì zlibe a à ŋgat hinne, Yesuw Kiristi BATSAH kwa ŋa a ger a megemir a. I hemer a ka, dite ma ɗif a kurum à metsehe ŋgar. I dəba ŋa ya, mə̀ pàt a kurum aba, dite kà səkahum à masəra ŋgat lele. 18 I hemer a asa ka, dite mà hə̀ndə̀k a kurum are lele, kə ŋgatum a dukw ana a zal a kurum dər a mbaŋa. I hemer a asa mbaŋa ka, dite ka sərum dər, meme na dukw ata a ta vile a kurum a ka, ŋgwal ŋa hinne, a za gà dukw tserdze ya. A ta vile a dukw ata ka, a kurum nda gà misle ŋgiɗ ana gà mburma ŋgar a. 19 Iye ihər i wiz ahər a mbaŋa ka, dite ka sərum dər, meme na ndzəɗa ŋgar ka, hinne, a za dər ndzəɗa gà dukw ŋgiɗ tserdze ya, dite meme na à zlèk a dər kwa ana kàa gə̀sakwa ŋgat nda gəzləŋ a ya. 20 Aɗaba ndzəɗa ata ka, ilik nda biy ana a zlak dər Yesuw Kiristi i təv ana a mbəlara à ŋgat i məməta ya, dite na a gwaɗar ka, ndza a təv mendze ŋgwal ŋana ika tseke ahər mezime gà i gər ŋa ya. 21 I dəba ŋa ya, Yesuw a ndza a fata ka, a kwere a gà gawla Mbulum nda gà Əbay tar, dite nda gà dukw ana tserdze ndzəɗa tar a riŋ hinne i gər ŋa ya. Maɗə̀và zləm ŋgar ka, a za dər biy gà mburma ana ika gər ahəɗ ana kinehe ya, nda biy ana a dere a ika miɗ a tserdze. 22 Mbulum a dza gà dukw tserdze aà huɗ sik ŋgar. A zla ŋgat, a tike ŋgat a Əbay gà dukw ata tserdze ya, a gwaɗar: «Kər kinehe ka, kàa ne Əbay gà mburma gà kuɗa.» 23 Gà mburma ŋgar ata ka, ti ne kamala ba Yesuw a. Ŋgwal dukw ŋgar ana tserdze ya ka, a riŋ i təv gà mburma ŋgar kamala ŋgwal dukw Mbulum ana fit dze ya ka, a riŋ i ahər ŋgar mbaŋa.