Zlàkayakwa ba aà mazla mibe dukw ana a be hinne ya
6
1 Gà damər gà,
na kàa fə̀rum misle ŋgiɗ a riŋ a ge a bakal ka,
taŋa kurum ana kàa ŋgatum Mezite Mesife Mbulum a ka,
zlakum ŋgat,
dite mə̀ màra aka vatwa ŋgwal ŋana ya.
Ama kə̀la ka,
gwim nda mawàyà ba lele.
Dite ku weke mege metsehe a gər ŋgar mbaŋa,
na dite à dìɗ a a bakal ŋgar ata tsiye.
2 Zlàkayum ba nda təv dukw ana mibe ŋa ika magər kurum a ilik ilik tserdze.
Na kàa gwim kamala taŋa ya ka,
taŋa ka,
kàa gəsum ahəm aà məpala ahəm *Kiristi kaɗəŋ.
3 Na wura aka fə̀r aà ba ŋgar kamala ana ŋgat batsah ŋa ya,
ama tsaatsa ka,
mburma taf masakəŋa,
a sle a aà duwa tsa,
taŋa ka,
a riŋ a bene a ba ŋgar ivaɗ.
4 Say ku weke ma zlaŋa mede ŋgar ana a de a ya.
Mà samata ka,
wànà ŋgwal ŋa ya,
tsəna,
ŋgwal ŋa tsiye ya?
Na bəla aka samata ŋgwal ŋa ka,
a ŋgeye a ba hinne,
agəra megemir ŋgar ana a ge a nda ahər ŋgar a,
tsəka,
a da dər tsa na a ge aàba a zlapa ka,
nda megemir misle ŋgiɗ a.
5 Aɗaba ku mege weke,
a ti tsik a megemir ŋgar ana a gewa ya ka,
ika miɗ Mbulum mba.
6 Wele ana a dza zləm aà medzeŋge bazlam Mbulum a ka,
tə̀ dza ba dukw ana a ŋgat a nda wele ana a ɗifer à bazlam Mbulum ata ya.
7 Ka banum ba kurum tsa,
aɗaba wura a riŋ ilik a we a ahəm nda Mbulum tsidze.
Aɗaba dukw ana mburma a slige a ya ka,
say dukw ata mbaŋa na a mère a à ba ŋgar,
ti ta pele a i bəɗ a.
8 Na bəla wura a ge a ka,
dukw ana a tsahən aà ba ŋgar a ɗekɗek ka,
nuba ŋgar ana a ta ŋget a iɗəm a ka,
məməta pəra.
Ama na bəla a ge a megemir nda təv Mezite Mesife Mbulum ivaɗ ka,
taŋa ka,
a ŋget a nuba mesife ana à ndìv a tsa aà biybiy a,
i ahər Mezite Mesife ata ya.
9 Aɗaba taŋa,
tàkwa aka miɗ aka miɗ nda mege dukw ana ŋgwal ŋa ya,
ka ti yàkwa ba tsidze.
Aɗaba na kàa yàkwa ba tsəka,
aləka a təv məpaslà ahər Mbulum ana a tsik a ka,
ki ta ŋgetekewe a dukw ana ŋgwal ŋa ya lele,
kamala wele ana a pele a dukw ŋgar i bəɗ a ka,
sik sik sik ŋgwal ŋa ya.
10 Aɗaba taŋa,
daga aà kinehe ya,
na vatwa a riŋ ka,
gekwa ŋgwal a gà mburma tserdze.
Ndeyndey ŋana ka,
a gà na ta gəs Yesuw Kiristi nda gəzləŋ a mbaŋa.
Mandəvandəv bazlam nda mege wusa
11 Kinehe ka,
fə̀rum aà gà batsah alfebet ana gurasləsləsla,
iye ihər i wetse a kurumehe a nda ahər gà ŋa ya kuɗa.
12 Na a gwaɗa a kurum,
say ki seswim a ba kurum a ka,
gà na ta waya,
dite tə da a gər a gà mburma tserdze ya.
Ta ge a dər kataya ka,
na dite gà Yahuda ti sèwèr a ter a are asa tsiye.
Aɗaba na bəla ti ndiɗik a gər aà metsìkè bazlam məməta *Kiristi ana a sèwèr are,
a mət aà dizl magə̀làwà ŋa ya ka,
ana ka,
ta miyek a à tar tsa.
13 Ama gà mburma ata ta waya masasa ba hinne ya tekeɗe,
tar ŋa ka,
ti tike gər a məpala ahəm gà Yahuda terwihhwe ɓav tsa.
Ama a sàs a tar ki seswim a ba kurum ka,
na dite ti sìŋgìr a à ba tar aɗaba kurum a.
14 Iye ka,
i ge a zlapa ti tsidze,
say i ge a ka,
nda məməta Yesuw Kiristi BATSAH kwa ŋana a mət aà dizl magə̀làwà ŋa ata ya ɗekɗek pəra.
Aɗaba məməta ŋgar ata ka,
dukw gər ahəɗ a ne taf masakəŋa na aà are gà ya.
Ar ka,
kamala ana tə ndwandway gà dukw ata aà dizl magə̀làwà ŋa ya mbaŋa.
Iye tekeɗe ka,
i ne kamala wur ana,
a mət ahər a fata ka,
dite a miyak à dukw gər ahəɗ a mbaŋa.
15 Aɗaba na wura masasa ŋa,
kige tsa bəla masasa ŋa tsəka,
a tsik a duwa tsa.
Na ge a ŋgulum ka,
say na ki nekwe a gà mburma ana tàa ŋgat mesife awiya ŋa i təv Mbulum a ya.
16 Gà mburma ana ti zezem a vatwa awiya ŋa ata ya ka,
tar na ti ne gà mburma Mbulum gà Isərayel gà ndzer ŋana ya.
Ti ndzer are tsehe,
mə vəl a tar matasla yam a gəzləŋ zayya lele.
17 Daga aà kinehe ya ka,
wura ma ta wisiŋ à gər asa tsa.
Aɗaba Yàa ne mburma Yesuw na i təv mesewere are ya.
Girɗe megìzle ana aà iye ya,
na a ɗif dər a.
18 Gà damər gà,
i heme a a Yesuw Kiristi BATSAH kwa ŋa,
dite ma ge a kurum ŋgwal ŋa.
*Amin.