Galatiya 5

Kà nwim gà ɓele məpala ahəm gà Yahuda asa tsa

1 *Kiristi ka, aka be à kwa i məpala ahəm gà Yahuda ya, na dite araha kinehe ki ziwekwe a gər kwa ya. Aɗaba taŋa, mə̀rum aba aà mendze kamala taŋa ya. Wura ilik ma ti ne à kurum gà ɓele asa tsidze.

2 Iye Pul, iye ihər i gweɗe a kurum ŋa: Na a sàs a kurum, tə sàs ba kurum ka, taŋa dukw ana Kiristi a ge aɗaba kurum a, a ge a kurum a ŋgulum asa tsidze. 3 Iye ihər i gweɗe a kurum a asa: Ku mege weke na aka sàs ba ka, say a zezem a gà məpala ahəm fit dze, ilik a ze a dərraha tsa. 4 A kurum gà mburma ana kù gwaɗum ka, Mbulum a ne à mə̀r a gà ŋgwal ŋa ika miɗ ŋgar, agəra ana mìi zezem a məpala ahəm gà Yahuda ya ka, taŋa kurum nda gà Kiristi ka, zàmtàkàlla kàa zùm aba, kurum mandza ŋa i təv ilik ŋa asa tsa. Kàa mbəɗum dəba a ŋgwal dukw ana Mbulum a ge a kurum a. 5 Ama mə̀r ka, mì tike madzala gà gər mə̀r a təv Mbulum. Ŋgat na a ne à mə̀r a gà ŋgwal ŋa ika miɗ ŋgar a, agəra megìse ana mì gəs Kiristi nda gəzləŋ a. Taŋa na kinehe mə̀r ihər mìi veve a pat ana mìi be a aà seriye ya, nda ndzəɗa Mezite Mesife ŋgar a. 6 Na wura a riŋ aka gaw ba nda Kiristi ka, bəla ŋgat masasa ŋa, kige tsa bəla masasa ŋa tsa tekeɗe ka, a ge a ŋgulum tsa. Dukw ana a ge ŋgulum a ka, say megìse kwa ana kə̀ gə̀sakwa ŋgat nda gəzləŋ a. Dite megìse ata na a vile a kwe a ndzəɗa aà mawàyà gà mburma tserdze ya mbaŋa.

7 Malahalah ŋa ka, kurum ihər ki dwim a aka miɗ aka miɗ nda mege gà dukw ana ŋgwal ŋa ya dze ana, weke na a pala a kurum ahəm aà mazazama gà dukw ata ndzer ŋa ya ya? 8 Wele ana a bana kurum, a sasar ki gwim a kataya ya ka, taŋa ka, a dara i təv Mbulum ana a zal a kurum a tsa. 9 Dukw ana gà mburma ti tsikewa ya ka, mə̀ məts a kurum gər tsa. Ta gwa: «Giɗe ana a kwasawa à duwa ya, ku mege tə ndà aaka kwizikw tekeɗe ka, a kwese a dər hinne.» 10 I sər ndzer, kà wayum bazlam gà, ki dzelwim a metsehe ŋgiɗ pam tsa, aɗaba ana kwa mandza ŋa nda gà Yesuw Kiristi BATSAH kwa ŋa ya. Ama wele ana a riŋ a wise a kurum a à gər a ka, ku mege weke tekeɗe, seriye Mbulum ika gər ŋgar.

11 Gà damər gà, iye ka, na mege i ɗif a à bazlam Mbulum hiywe, nda metsìkè a mburma, sasayum ba, na dite Mbulum a ne à kurum a gà ŋgwal ŋa ika miɗ ŋgar a ka, ana ka, gà Yahuda ti sèwèriŋ a are tsidze, dite bazlam mandwàndwàyà Kiristi ana tə ndwandway aà dizl magə̀làwà ŋa ya tekeɗe ka, a tsìɓ a ter a tsa asa mbaŋa. Ama ka, i tsikewa kataya tsa. 12 Gà mburma ata tə dzala ka, aka gər masàsàyà ba tar ɗekɗek, dite ta wise a kurum a dər à gər a ka, ŋgulum tə sasaya ba tar məndəɗ məndəɗ fit fayawaŋwaŋ.

13 Gà damər gà, Mbulum a zal a kurum ka, dite ki ndzwim a nda mezìwè gà gər kurum, kàa beywim à məpala ahəm Musa ya. Na ki ziwim a gər kurum kamala taŋa ya ka, ka ta gwaɗum, mìi gewe a dukw ana ba mə̀r a waya pəra ɓav tsa. Seyiŋ tsa, wayum ba ika magər kurum ilik ilik tserdze, dite ki geywim ba meslire ika magər kurum tserdze asa mbaŋa. 14 Aɗaba dukw ana batsah ŋa i huɗ gà məpala ahəm tserdze ya ka, araha: «Waya mburma tserdze, ku mege weke, kamala ana kà waya ba yak a mbaŋa.» 15 Ama na bəla ki geywim be a swalwa kamala gà dukw dala ana gà ŋgwala tsa, hə̀ràsə̀sa ta ŋgeleye a ba tar ŋa, kige tsa ta pepeɗe a ba ya ka, gwim metsehe lele, tsəka, ki ti dzeywimiŋa.

Mezite Mesife Mbulum nda dukw ana mburma a dzele a

i gəzləŋ ŋgar a

16 Dukw ana a sèsiŋ i gweɗe a kurum a ya ka, araha: Vəlum vatwa a Mezite Mesife Mbulum, dite ka, ma ɗif a kurum à vatwa. Kamala taŋa ya, ka tə zazamum mege dukw ana ba kurum a waya ya asa tsa. 17 Dukw ana meeweke ba mburma a waya mege ya ka, tar pampam nda dukw ana Mezite Mesife Mbulum a waya ki gekwe a ya. Mezite Mesife Mbulum ibam ka, a sasar dukw ana meeweke ba mburma a waya a ge a ya tsa mbaŋa. Gà dukw ata sula ya ka, tar riŋ ndzìzlzle ti nebe a are, ta geye aàba a guvəl. Aɗaba taŋa na ka slwim aà mege dukw ana a sàs a kurum ki gwim a zləmana nda ndzer ŋa ya tsiye. 18 Ama na bəla Mezite Mesife Mbulum na a lèh a kurum a aka miɗ a ka, taŋa ka, məpala ahəm Musa à fə̀r aka kurum a ndzəɗa asa tsa.

19 Kà sərakwa tserdze, na dukw ana meeweke ba kurum a waya a ge a ya. Gà dukuməŋa ka: Mege mezelme nda təv muva, nda mege dukw hwarwa ana pampam a, nda mayaha gà məkəs ana tsilikw tsilikw a. 20 Dite nda mazàmbàɗà à dukw ana ta ge nda ahər tar, ti ne dər Mbulum tar a. Nda gà dukw gà mèdè ana ta ge a pampam a. Nda mene a ba are, nda maàga, dite nda mege are aka mburma, nda mege matsəɓatsəɓ ana tərfə̀ɗ tərfə̀ɗ nda təv gà misle ŋgiɗ a, nda gà ti dzele a ka, ba tar ɗekɗek, ti ndzek a iba mburma ya təv pampam, nda gà mandza akaba ahəm ana a riŋ i təv tar tsidze ya. 21 Izittè ta ge a are aka dukw mburma, ta kweye a à guzum, ta gìrìv a dər hinne, zlarndaɗndaɗ ti zimeye ka, gà dukw ana ŋgwal ŋa ya, dite nda megeye gà medzibe gà duwa ŋgiɗ pampam asa kamala taŋa ya. Dukw ana i tsik a kurum piŋŋe ya ka, kinehe i me a aka metsìkè a kurum asa, i gwaɗa a kurum: Medzìbe gà mburma ana ta gewa gà dukw ata kamala taŋa ya ka, ti ta ŋget a təv mendze i *mekwere Mbulum ana a ta kwere a ya kwizikw tsidze.

22 Ama megemir Mezite Mesife Mbulum ka, pam. Ar ka, kamala dizl ɗaf ana a we a dukw ŋgwal ŋa ya. Gà dukw ata ka, mawàyà ba ana gà mburma ta weye a ba ya. Maŋgayaba, nda matasla yam ana i gəzləŋ tar a. Ta gis a gəzləŋ i təv gà dukw ŋgiɗ a pampam. Ta gis a mburma lele, ta ge a ter a ka, dukw ana ŋgwal ŋa ya. Tar ka, gà mburma ana gà ndzer ŋa ya. 23 Tar gà ɓəzla mahə̀nà à gər a bəɗ, ta kwere a ba tar lele. Gà na ta ge a kamala taŋa ya ka, seriye Mbulum à gis a tar tsidze. 24 Aɗaba gà mburma ana tar gà biy *Kiristi ya ka, ti niw gà dukw ana ŋgwal ŋa tsa, meeweke ba tar a waya ya. Ar ka, kamala ana tə ndwandway gà dukw ata aà dizl magə̀làwà ŋa ya. 25 Mezite Mesife Mbulum na a vəl a kwa mesife ya. Aɗaba taŋa, say ŋgat na a kwere a kwa ya. 26 Kà sə̀ŋgə̀rakwa à ba kwa tsa, dite ka tikekwa akaba matsəɓatsəɓ tsa, ki gekwa akaba are tsa asa mbaŋa.