Filipiya 1

Wakita ana Pul a wetseha

a gà mburma Mbulum ana

i FILIPIYA ya

1 Na a wetse wakita aaha ka, iye Pul, mə̀r nda Timute ana mə̀r gà ɓəzla meslire Yesuw Kiristi ya. Mì wetseha ka, a kurum gà mburma Mbulum ana i Filipiya, kurum riŋ mandza ŋa i təv ilik ŋa nda gà Yesuw Kiristi ya. Mì wetseha ka, a gà bàba ŋa ana ika magər kurum a, dite a gà ɓəzla mazlàkà kurum gà mburma Mbulum tserdze mbaŋa. 2 Gà Mbulum Tsir kwa nda Yesuw Kiristi Batsah kwa ŋana ta pise a kurum ahəm, ta vəl a kurum matasla yam a gəzləŋ zayya lele.

Pul a hama a Mbulum aɗaba gà ɓəzla magəsa Yesuw ana

i Filipiya ya

3 Ku mege ndeɗime tekeɗe, na kàa mwimiŋera a gər a ka, i hamawa a Mbulum aɗaba kurum. I gewar kəkaaha kəla pat. 4 Meheme ata i hamawa aɗaba kurum a ka, nda gà maŋgayaba hinne. 5 I gewar kəkaaha ka, aɗaba kàa gewakwa ba, kà zlàkawum iye aà megemir metsìkè bazlam ŋgwal ŋana, aà gər pat ana malahalah ŋa, kà nwim gà mburma Mbulum a, haa kinehe ya. 6 I sər ndzer, Mbulum ana a dza ba aà megemir ŋgwal ŋa ata i gəzləŋ kurum a ka, a miyek a dər ŋgwìɗik kataya tsa. A ndìv a dər ka, haa a pat ana Yesuw Kiristi à mère a ya. 7 Ŋgwal ŋa lele na iye ihər i dzele a kamala taŋa ya, dite i ndze a ka, ndzəɗakkà na agəra kurum a. Aɗaba kà dwimiŋ gər lele. Aɗaba kurum nda gà iye tserdze ka, Mbulum aka ge a kwa ŋgwal ŋa, na dite ki zlèkwim a iye ana gədzə̀zlzla mandza ŋa i daŋgay a, dite i təv ana i tsikewa ŋgwal bazlam ana biy Yesuw Kiristi ika miɗ seriye, i ɗif a à ndzer ŋana ya mbaŋa. 8 Mbulum ka, a sər meme na i waya kurum hinne ya. Meweye ata i waya kurum a, a dara ka, i təv Yesuw Kiristi ya.

9 I hamawa a Mbulum aɗaba kurum ka, dite mawàyà ba ana ki weywim a ba ika magər kurum ilik ilik tserdze ya, mà səkah aaka aka miɗ aka miɗ. Kamala taŋa ya ka, ki sirwim a ndzer ŋa lele, dite ki slwim a aà masəra ikaba à gà dukw ana naha ka, a da ndaka vatwa Mbulum, kige tsa, naha ka, a da dər tsiye. 10 Kamala taŋa ya, ki pelwim a ikaba gà dukw ana ŋgwal ŋa ti de a ndaka vatwa Mbulum a, dite a pat ana Yesuw Kiristi à mère a, a ge a seriye ya ka, ki ndzwim a tsəɗaŋŋa lele, bakal i təv kurum tsa. 11 Ki nwim a gà ɓəzla mege dukw ana ŋgwal ŋa ya. Ki gwim a kəla pat, dite mede kurum à pèt aba a ka, ŋgwal ŋa lele, nda ndzəɗa Yesuw Kiristi. Gà na tàa samata kataya ya ka, tì zèmbeɗe a à Mbulum, tì zlibe a à ŋgat lele.

Yesuw na a za dukw tserdze ya

12 A kurum gà damər gà, a sèsiŋ ka, sərum dər aà labara ana a le aà iye i faha ya. Megìse aaha ta gəs iye ya, a zlak ka, ŋgwal bazlam aaha biy Yesuw Kiristi ya ivaɗ, na dite ka, a de a aka miɗ aka miɗ, a ɗe a zləm a. 13 Gà sliwdze ana ta kesle a ga Əbay a, nda gà asiŋ gà mburma ana ɗa i faha tserdze ya, tə sər kinehe, iye riŋ i daŋgay gədzə̀zlzla ka, agəra ana i ge a meslire Yesuw Kiristi ya. 14 Aɗaba megìse aaha ta gəs iye a daŋgay a tekeɗe ka, a vəl ndzəɗa a gà damər kwa ana i liwiŋ gà mburma Mbulum a bagwal ŋa ɓəŋɓəŋ lele, a səkah a tar à megìse ana ta gəs BATSAH kwa ŋa ya. Magəɗa a ge a ter a asa tsa, ti tsik a bazlam Mbulum a mburma ka, parakka, tə səkah dər ivaɗ.

15 Ama kəla ka, gà asiŋ ŋa ika magər tar ti tsik a bazlam Yesuw Kiristi ŋgwìriŋŋà, ta ge a are ka, aka iye. Kige tsa a sàs a tar ka, mayaha aà iye ahəm. Ama gà asiŋ gà biy ŋgiɗ ti tsik a bazlam Mbulum ka, nda gəzləŋ ilik. 16 Ta ge dər kataya ka, aɗaba ana ta waya iye, tə sər, Mbulum a slər iye a faha ka, dite i tsik a ŋgwal bazlam ana biy Yesuw Kiristi ya, a mburma, i ɗif a ter a à ndzer ŋana ya. 17 Gà asiŋ ŋa ata ka, ti tsik a bazlam Yesuw Kiristi mbaŋa kaɗəŋ. Ama kəla ka, ta waya masəkaha à ba tar ɗekɗek. Ti tsik a ka, nda gəzləŋ ilik ndzer kaɗəŋ tsa. A sàs a tar ka, mesìkèhiŋ à mesewere are gà ana ɗa i daŋgay i faha ya.

18 Ama taŋa ka, a wur aà iye tsa. Ku mege ti tsik a nda gəzləŋ ilik tsa, kige tsa bəla ti tsik a nda ndzer tekeɗe ya, ti ɗif a ka, à bazlam Yesuw Kiristi. Iye ka, i ŋgeye a ba agəra taŋa. Kaɗəŋ i ŋgeye a ba aka miɗ aka miɗ kamala taŋa ya. 19 Aɗaba i sər, mendze gà ana i faha ya ka, duwa tserdze a ge a ba lele na i təv ga ya. Mbulum a mbil a à iye i mesewere are ya, aɗaba ana kurum riŋ ihər ki hemwimer a aɗaba iye ya, dite ka, Mezite Mesife Yesuw Kiristi à zlèk a iye mbaŋa. 20 Dukw ana i waya hinne, i tike aaka madzala gà gər gà ya ka, i ta ge a dukw ana dite ka, tuɗum tuɗum a ndeɗe a aka iye hwarwa ya ilik tsidze. Ama ka, gəzləŋ ga ma ndza ɓəŋɓəŋ lele. A sèsiŋ ka, mege kinehe, kige tsa bəla ndeɗime tekeɗe ka, gà mburma tə̀ zləbawa à Yesuw Kiristi aɗaba iye. Na iye riŋ mandza ŋa nda are ya, ku mege Yàa mət tekeɗe ka, tə̀ zlə̀b à ŋgat pəra kamala taŋa ya. 21 Aɗaba kinehe iye riŋ mandza ŋa nda are ka, Kiristi a ne mesife gà, a za dər gà duwa tserdze. I təv ana Yàa mət tekeɗe ka, a giŋ a ŋgulum asa, i ŋget a nuba. 22 Ama kə̀la ka, na iye riŋ mandza ŋa nda are mba ka, i ge a megemir ana à zlèk a mburma ya. Kamala taŋa ya, a giŋ gərəŋ gərəŋ na i liwiŋ gà bazlam ata sula ya. I zle a iɗəm ana, awara ya ka, i sər tsa. 23 Kə̀zət gà dukw ata sula ya, ta ŋgil a aba à iye. Ama a sèsiŋ kə̀la asa mbaŋa ka, ŋgulum na i mite a ya, dite mìi ndze a i təv ilik ŋa nda Yesuw Kiristi ya. Aɗaba taŋa ka, ŋgwal ŋa hinne, a za dər mendze ana i ndze a ɗa ika gər ahəɗ kinehe ya. 24 I zleŋe a mbaŋa, na mendze gà ana i ndze a nda are kinehe ya, a ge a ŋgulum hinne asa na aɗaba kurum a. 25 I samata, ŋgwal ŋa ka, taŋa. Aɗaba taŋa na dukw ana i sər ndzer, i ndze a aà bəra mba ya. Ki ti ndzekwe a i təv ilik ŋa nda gà kurum tserdze, na dite i zlèk a kurum ika vatwa Mbulum, ki sìkèhwim a aka miɗ aka miɗ i təv megìse kurum a, dite ki ta ŋgeywim a ba mbaŋa asa ya. 26 kamala taŋa ya, na tàa pəl à iye i daŋgay a ka, i ti ndzehe a a təv kurum, aà məfə̀rà aka kurum a fata asa. Dite ka, ki ŋgeywim a ba, ki zèmbeɗwim a à Yesuw Kiristi hinne aɗaba iye.

Mesewere are aɗaba Yesuw Kiristi

27 Ama duwa ilik ma ta məts a kurum gər tsa kəla. Mede kurum ma ge ka, ŋgwal ŋa, kamala bazlam ŋgwal ŋa ana Yesuw Kiristi a ɗif dər a. A sèsiŋ ka, ku mege Yàa ŋgat vatwa aà madaha a təv kurum, kige tsa bəla Yàa ŋgat tsa tekeɗe ka, i tserekere a mendze kurum ana ki ndzwim a ndìɓèkke, kurum masəra ba ŋa ŋgwal ŋa lele, metsehe kurum ilik a. Dite kurum riŋ ihər ki mirwim a aba aà megemir bazlam ŋgwal ŋa ata kə̀ gə̀sakwa nda gəzləŋ ilik kamala gà ɓəzla guvəl a asa mbaŋa. 28 Ka ta gwim magəɗa aɗaba gà ɓəzla mene are kurum kwizikw tsidze. Na kàa gwim magəɗa tsəka, tar ti sir a dər, tàa dzeye ika miɗ Mbulum a. Ama kurum ka, kà sərum dər, Mbulum a ta mbil a à kurum ŋa. Mbulum na a ti ɗif a ter a à dukw ata ya. 29 Mbulum a vəl a kurum vatwa ka, dite kə̀ gəsum Yesuw Kiristi nda gəzləŋ. Ama ka, taŋa ɗekɗek tsa. A vəl a kurum vatwa ka, aà mesewere are, aɗaba ŋgat mbaŋa. 30 Kurum ka, kàa ŋgatum a məmə̀rà aba gà ana ika vatwa Mbulum akahər ata ya. Ama kinehe tekeɗe ka, kurum riŋ ihər ki tserekwimiŋa, meme na i ge a guvəl ata hiywe mba ya. Dite kurum tekeɗe, kàa patsum aɗəm, kurum riŋ ihər wìskikiɗkiɗ ki gwim a guvəl ata mbaŋa.