Gà tsir ti ɗe à metsehe a gà ɓəza
6
1 Kurum gà ɓəza,
gəsum ahəm aà gà tsir kurum.
Aɗaba taŋa ka,
megemir kurum ana kurum riŋ mandza ŋa i təv ilik ŋa nda Yesuw Kiristi BATSAH kwa ŋa ya.
2-3 *Məpala ahəm Mbulum a gwa ka:
«Zlə̀b à gà tsir yak nda mama yak.
Na kàa ge kataya ka,
dite i vilek a mandza aà bəra hinne nda maŋgayaba kəla pat.»
Taŋa ka,
malahalah məpala ahəm Mbulum ana a gwa,
i ta vile a kurum a duwa i sida ya ya.
4 A kurum gà tsir gà ɓəza tekeɗe,
ka ti tsikwim aà metsehe a gà ɓəza kurum nda magala biy ana à tsìɓ a ter ya tsa.
Ŋgwal ŋa tsikwim a tar ahər ka,
nda zèyezèye,
dite ta ŋget a metsehe kamala biy ana BATSAH kwa ŋa a ɗif a kurum dər a ivaɗ.
Mendze gà ɓele nda gà ɓəzla ga tar
5 Kurum gà ɓele,
gəsum ahəm aà gà ɓəzla ga kurum nda magəɗa,
nda mazlə̀bà à tar lele.
Ki gwim megemir nda gəzləŋ ilik.
Na kàa gwim kataya ka,
kə̀ gəsum ahəm aà Yesuw Kiristi mbaŋa.
6 Ka ta gwim a tar megemir ka,
ika are ŋa ya,
aɗaba mazlə̀bà à kurum ɗekɗek tsa.
Say gwim ivaɗ ka,
mege megemir ana ndzer ŋa,
a da a gər a Mbulum,
dite nda gəzləŋ kurum ilik asa ya,
aɗaba ana kurum gà ɓele Kiristi ya.
7 Gwim megemir kurum ka,
nda gəzləŋ lele,
kamala ana ki gwim a ka,
a BATSAH kwa ŋa ya,
tsəka,
kamala ana a gà mburma ya ɗekɗek tsa.
8 Ku ki gwim gà ɓele,
ku ki gwim gà ɓele tsa tekeɗe ka,
na kàa gwim megemir ŋa ka,
sərum dər ndzer,
Yesuw Kiristi BATSAH kwa ŋa a ta pìl a kurum aɗəmiŋa.
9 Ama kurum gà ɓəzla ga gà ɓele tekeɗe,
gwim ŋgwal ŋa a gà ɓele kurum kalkal lele mbaŋa.
Ka tə dzadzarum akaba à tar tsa,
sərum dər,
kurum nda gà tar tserdze ka,
BATSAH kwa ŋa ka,
wele ana i gər ŋa ya ilik.
Ŋgat ka,
a wala ikaba mburma ya pampam tə tsa.
Gà dukw ahər ana Mbulum a dza a ahər a gà mburma ŋgar a
10 Ama dukw ana a zeha kinehe ka:
Say mə̀rum aba aà magəsa BATSAH kwa ŋana ndzəɗa ŋgar a za duwa tserdze ya.
11 Dùwaywim ba nda gà dukw ahər ana tserdze Mbulum a dza a kurum a,
ka hitswim dər asləka asləka,
lele aka miɗ Əbay sitene ana a waya a beze a kurum a za nda wirwir ŋgar zləmana ya,
na dite ki ŋgetwime ndzəɗa,
ki ŋgirzlwim a ya.
12 Ama guvəl ana ki gekwe a ya ka,
nda gà mburma məfàrà ŋa tsa.
Ki gekwe a ka,
nda gà dukw ana ika magər gà mbulum nda gər ahəɗ,
a ŋgeterebe a tsa,
ndzəɗa tar riŋ hinne ya.
Kamala megweɗe ya,
nda gà sitene,
nda gà Əbay tar ana tserdze tar ihər ta kwere a gər ahəɗ aaha manəsa ŋa ya.
13 Aɗaba taŋa,
gəsum gà dukw ahər ana tserdze Mbulum a dza a kurum a ɓəŋɓəŋ lele,
na dite ki ŋgetwime a ndzəɗa,
ki ŋgirzlwim a ika miɗ gà ɓəzla mene are kurum ata ya.
A pat ana ta beze a kurum a za ya ka,
ta mbè aà kurum a tsa,
haa a pat mandəva dər ŋa.
14 Ama kinehe ka,
hadzalum ba kurum ɓəŋɓəŋ lele,
dànaywim ba nda ndzer kurum kamala kànda ana madànà ŋa ika dəmkul a,
dite ma ge a kurum də̀ɗə̀ffa.
Mede ana ndaka vatwa ŋa ya,
ma ne ka,
*andiw sayaw kurum ana ki geywim a dər ikaba ya.
15 Hadzalum ba aà metsìkè bazlam ŋgwal ŋa ana a vile a matasla yam a gəzləŋ mburma zayya lele ya.
Taŋa ka,
kamala tsapà ana duwa a ndzek a tsa ika sik a.
16 Gəsum Mbulum nda gəzləŋ kurum kəla pat kamala slakwa ana i ahər ika miɗ guvəl a,
dite gà simir Əbay sitene ti ndze a kurum a asa tsa.
Ku mege akwa ihər tekeɗe ka,
slakwa ata a mbete a dər ivaɗ.
17 Gəsum mimbile kurum ana Mbulum a mbil a kurum a,
kamala *tazak daw ana i gər a.
Dite gəsum bazlam ŋgar ɓəŋɓəŋ kamala masalama ana Mezite Mesife ŋgar a vəl a kurum a.
18 Hamum a Mbulum nda gəzləŋ ilik kəla pat,
dite gwimer kamkam nda ndzəɗa Mezite Mesife ŋgar.
Ka ti ywim ba tsa,
ndzum nda metsehe,
hamum a Mbulum kəla pat agəra gà asiŋ gà mburma ŋgar ŋgiɗ.
19 Hamumar agəra iye mbaŋa,
dite ma ɗifiŋ à dukw ana i tsik a ya.
Hamumar ka,
magəɗa ma giŋ aà meɗìfè à bazlam ŋgwal ŋa ata a pàt dər parakka ya tsa.
20 Ku mege iye i daŋgay kinehe tekeɗe ka,
iye mala meslire Yesuw hiywe pəra,
aɗaba bazlam ŋgwal ŋa ata.
Hamum a Mbulum,
dite ka,
i ge magəɗa aà məfàfə̀là parakka tsa mbaŋa,
kamala ana a sasar a ya.
Mandəvandəv mifefile
21 A sèsiŋ ka,
sərum dər,
meme na mendze gà ya,
nda mege megemir ana i ge a fit a mbaŋa asa.
Taŋa Tikikus,
damər kwa ana a riŋ a ge megemir BATSAH kwa ŋa lele ya,
dite i waya hinne ya,
a ta me a kurum a dər.
22 Aɗaba taŋa,
i slir a kurumehe a ŋgat ka,
dite ka sərum dər,
meme na mendze mə̀r a.
I slir a kurumehe a ka,
mə vəl a kurum ndzəɗa a gəzləŋ mbaŋa.
23 Taŋa gà Mbulum Tsir kwa nda Yesuw Kiristi BATSAH kwa ŋa tə dza a kurum matasla yam a gəzləŋ zayya lele,
a kurum ana riŋ nda gà damər tserdze ya.
A sèsiŋ ka,
gà Mbulum nda Yesuw Kiristi ta vəl a kurum mawàyà ba aka magər kurum ilik ilik tserdze mbaŋa,
dite kà səkahum à magəsa tar nda gəzləŋ kurum fit dze.
24 Taŋa Mbulum mi pise ahəm a gà mburma ana tserdze ta waya Yesuw Kiristi BATSAH kwa ŋa kəla pat aà biybiy a.