Mendze gà mburma ana i təv dzaydzay ŋa ya
5
1 Kurum ka,
gà ɓəza ana Mbulum a waya ya.
Aɗaba taŋa,
kurum tekeɗe,
zlum ba kamala ŋgat a.
2 Wayum mburma kəla pat i təv dukw ana tserdze ki gwim a ya,
kamala *Kiristi ana a waya kwa,
dite ka,
a mət agəra kwa asa ya.
A vəl mesife ŋgar biy taf kamala dukw ana ta kəɗ a Mbulum,
a dar a gər a.
3 Kurum ka,
gà mburma Mbulum na kinehe ya.
Aɗaba taŋa,
kurum ka,
ki gwim mezelme nda təv muva,
nda mege dukw hwarwa ana pampam a,
nda mege are asa tsa.
Ka ta fàfəlawum aà dukw ata tsidze.
4 A da dər tsa na ki ɗivwim a zləm a gà tsapà,
nda gà rawraw bazlam ana biy metsike tsiye.
Ama say gwim kəkaaha ka,
a Mbulum ivaɗ,
aɗaba ŋgwal ŋgar ana a ge ya.
5 Sərum dər ka,
gà mburma ana ta ge a muva nda mezelme ana pampam biy metsike tsiye ka,
ta ŋget a təv mendze i təv mekwere gà Mbulum nda Kiristi tsa.
Gà mburma ana ta ge a are ya tekeɗe ka,
ti ta ŋget a ɓav tsa.
Aɗaba ta ŋgaya ba a mege kataya ka,
hinne,
a za dər Mbulum.
Na ta ge a kataya ka,
kamala ana ti zezem a fəla gà tsir tar a.
6 Aɗaba gà dukw ata ka,
ŋgwal ŋa tsa fit,
Mbulum a ge a arəv aà gà mburma ana ta gəs bazlam ŋgar tsiye.
Aɗaba taŋa,
wura ma ta baza a kurum za nda welewele bazlam ana taf masakəŋa ya tsa.
7 Kamala taŋa ya,
ka ta gəsum ba i ahər a nda medzibe gà mburma ata aà madə̀ɗà akaba tsidze.
8 Akahər ata ka,
kurum mandza ŋa i luvuŋ.
Ama kinehe ka,
kurum i təv dzaydzay ŋa,
aɗaba ana kurum mandza ŋa i təv ilik ŋa nda gà BATSAH kwa ŋa ya.
Aɗaba taŋa,
zazamum mede gà mburma ana i təv dzaydzay ŋa ya.
9 I tsik kataya ka,
agəra gà dukw ana ŋgwal ŋa kalkal lele nda ndzer ŋa ya.
Tar ka,
i təv dzaydzay ŋa ata.
10 Mərum aba aà masəra dukw ana a da a gər a BATSAH kwa ŋa ya.
11 Kà lə̀mum aà megemir gà mburma ana ta ge a megemir masakəŋa i luvuŋ a tsa.
Ama ka,
patum a tar à megemir tar ana ŋgwal ŋa tsiye parakka aà are ivaɗ.
12 Aɗaba megemir tar ana ta ge a nda akəl a ka,
ku mege aà meɗiver zləm a bəɗ tekeɗe ka,
a tsahən tsa,
hwarwa a ge a kwiŋa.
13 Na gà dukw ata tàa pata aba parakka lele ka,
a ŋgeter a ba,
meme na tə ndzaya kuɗa.
14 *Aɗaba dukw tserdze,
ku mege awara,
a pèt a aba ka,
i təv dzaydzay ŋa.
Agəra taŋa na ta gwa:
«Kər ana riŋ ika mendze are ya ka,
piɗeke,
hitsera i luvuŋ gà məməta ya,
dite na ki ndze a aà dzaydzay ŋa
i təv Kiristi ya.»
15 Kamala taŋa ya,
kurum ka,
gwim metsehe a mede kurum.
Mede kurum ma ta ge kamala biy gà mburma ana tə sər duwa tsiye tsa.
Say ma ge ka,
kamala biy gà ɓəzla metsehe ana tə sər duwa ya ivaɗ.
16 Ki gwim megemir ŋa kəla pat,
kà mətsum aà mendze taf masakəŋa tsa.
Aɗaba bəra aaha ka,
ŋgwal bəra tsa.
17 Aɗaba taŋa,
ka ti nwim gà mburma ana metsehe tar a riŋ tsiye tsa.
Say dzum zləm ka,
a matsaraka dukw ana a sàs a BATSAH kwa ŋa,
ki gekwe a ya ivaɗ.
18 Ka ta kwayum à guzum tsa,
aɗaba taŋa ka,
à dzik a aà kurum metsehe ya,
à gis aàba kurum aà mege dukw ana ŋgwala tsiye.
Say ràhum ka,
nda Mezite Mesife Mbulum lele ivaɗ.
19 Làhum ba dimis mazàmbàɗà à Mbulum,
nda gà asiŋ dimis ana pampam Mezite Mesife Mbulum a vəl a kwa ya.
Ki lèhwim a dimis ata ka,
a Batsah kwa ŋana.
Zàmbaɗum à ŋgat nda gəzləŋ ilik.
20 Gwim kəkaaha a Mbulum Tsir kwa,
agəra gà dukw ana tserdze ya ka,
nda zləm Yesuw Kiristi BATSAH kwa ŋa ya.
Gwimer kəkaaha kəla pat.
Mendze gà məkəs nda gà zal
21 Kurum ana ki zlìbwim a à Yesuw Kiristi ya ka,
hənum ba à gər a bəɗ.
22 Kurum gà məkəs,
hənum à gər a bəɗ a gà zal kurum,
kamala ana BATSAH kwa ŋa a waya ya.
23 Aɗaba zal na batsah ŋa ika gər məkəs a,
kamala Yesuw Kiristi ana batsah ŋa ika gər gà mburma Mbulum a.
Gà mburma Mbulum ata ka,
ti ne ka,
ba ŋgar.
Dite ŋgat na a mbil à ter a ya.
24 Aɗaba taŋa,
say gà məkəs ta həna à gər a bəɗ a gà zal tar lele,
kamala gà mburma Mbulum ana ta həna à gər a bəɗ a Yesuw Kiristi ya.
25 Kurum gà zal tekeɗe,
wayum gà məkəs kurum,
kamala Kiristi ana a riŋ a weye a gà mburma Mbulum a,
dite ka,
a mət agəra tar a.
26 A bara tar herrè lele,
aruwaŋ a da aà tar a.
A ne à tar gà tsəɗaŋŋa ka,
agəra bazlam ana a tsik a tar a.
Kamala taŋa ya na ti ne biy Mbulum a.
27 Aɗaba a sasar tə dara aka miɗ ŋgar a ka,
aruwaŋ ma ge aà tar tsa.
Ku mege dukw ana ŋgwal ŋa tsiye tekeɗe,
ma ge i təv tar tsidze.
Dite gà mburma ti sle a metsike aà tar dukw ana ŋgwal ŋa tsiye asa tsa.
Ti ndze a i təv mezlibe ŋgar ana ti zlibe a dər a.
28 Kamala taŋa ya,
kurum gà zal tekeɗe,
wayum gà məkəs kurum,
kamala ba kurum ŋa ya.
Aɗaba wur ana a waya məkəs ŋgar a ka,
a waya taŋa ka,
ba ŋgar mbaŋa.
29 Wura a riŋ na ba ŋgar a ze ahər a ka,
a riŋ tsa.
Ku weke a zim a dukw mezime,
dite a gebe a gər lele seyiŋ ivaɗ,
kamala Yesuw Kiristi ana a ge a gər a gà mburma Mbulum a.
30 Aɗaba kwa gà mburma ŋgar ata ka,
ka nekwa ba ŋgar.
31 *Aɗaba taŋa Mbulum a gwa i wakita ŋgar a:
«Asləka a miyek a à gà tsir ŋgar nda mama ŋgar,
aà mendze nda məkəs ŋgar,
dite ti ne ba ilik.»
32 Ama bazlam ata ka,
a ɗif a kwe a à duwa ŋgiɗ,
tsəka,
agəra taŋa ɗekɗek tsa.
Ama iye i dzala ka,
ti tsik bazlam ata ka,
agəra gà mburma Mbulum ana nda gà Kiristi ya mbaŋa.
33 Aɗaba taŋa kurum tekeɗe,
say ku weke ma waya məkəs ŋgar kamala ba ŋgar ŋa ya.
Kurum gà məkəs tekeɗe,
hənum à gər a bəɗ a gà zal kurum mbaŋa.