Efesiya 4

Ba ilik

1 Kərga taŋa ya, iye ka, iye i daŋgay, aɗaba ana iye mala meslire Yesuw Kiristi BATSAH kwa ŋa ya. Iye ihər i ge kurum a kamkam: Ama mede kurum ma ge ka, kamala biy ana Mbulum a waya, a zal a kurum dər a. 2 Hənum à gər kurum a bəɗ kəla pat. Dzum akaba ahəm lifeɗiɗe lele, dite gəsum gəzləŋ i təv gà dukw ana ŋgwal ŋa tsa ika magər kurum a. Ama ka, wayum ba kurum ilik ilik tserdze ivaɗ. 3 Gwim metsehe, sələk ma ge ika magər kurum tsa. Kaslum ba kurum, madzala gər kurum ma ge ka, ilik, kamala ana Mezite Mesife Mbulum ana a ləm akaba à kwa ya. Ndzum nda zayzay lele ika magər kurum. Mendze kurum ma ge ka, ilik. 4 Aɗaba gà mburma ti ne ka, ba Yesuw Kiristi ilik pəra. Mezite Mesife Mbulum tekeɗe, ilik, nda dukw ana Mbulum a zal a kurum dər, a vile a kurum a ya ka, ilik mbaŋa, tsəka, sula tsa. 5 BATSAH kwa ŋa ka, ilik. Megìse ana ki gìsekwe a Mbulum nda gəzləŋ a tekeɗe ka, ilik mbaŋa. Ama vatwa metsìlwìɓè à mburma a yam tekeɗe, ilik mbaŋa asa. 6 Mbulum tekeɗe ka, ilik. Ŋgat na Tsir gà mburma ana tserdze ya. A kwere a gà dukw ana tserdze ya, a ge a megemir nda tar, dite ŋgat a riŋ a ndze a i təv tar mbaŋa.

7 Ama kə̀la ka, kwa tserdze kàa ŋgatakwa ndzəɗa aà megeye gà megemir pampam, ku weke, kamala ana Yesuw Kiristi a vəl a kwa ya, 8 kərga na mewetse ŋa i wakita Mbulum, a tsik aà Yesuw Kiristi ka, a gwa:

«Aka tsəl a gər ŋa,

aka ndzək dər gà mburma ŋgiɗ asa,

a dzaya a taraba ndzəɗa aà megeye

gà megemir ana pampam ɗa ika gər ahəɗ a.»

9 Aɗaba la dze ya na a sasar aà megweɗe mifefile ata, a gwa ka: «aka tsəl a gər ŋa» ya? Ama a sasar ka, a lah meterra a bəɗ aka ahəɗ a dzekwiŋ. 10 Wele ata na a tarəra a bəɗ aka ahəɗ a, dite na a tsəl a gər ŋa diriŋ a, aà makwàrà gà dukw tserdze, ku mege i ŋga ya. 11 Ŋgat na a dzaya ba ndzəɗa aà megeye gà megemir pampam a mburma ya. A ne à gà asiŋ gà mburma ŋgiɗ kamala gà ɓəzla meslire ŋgar a, gà asiŋ ŋa gà ɓəzla məma à guma ŋgar. Gà asiŋ ŋa ibam, gà ɓəzla metsìkè bazlam ŋgar a gà na tàa gəs ŋgat nda gəzləŋ zukw tsiye. Dite a ndzək gà misle ŋgiɗ pam asa, a ne à tar gà ɓəzla magəsa aba gər a gà mburma Mbulum, dite nda gà na ti dzeŋge a bazlam ŋgar a mburma ya. 12 A dzaya iba gà mburma ata ya ka, dite tə̀ zlak gà asiŋ gà mburma ana tàa gəs ŋgat a, aà megemir ŋgar lele, dite ka, gà mburma ŋgar ata ti ne kamala ba ŋgar a, ta ŋgat ndzəɗa hinne asa. 13 Na kamala taŋa ya ka, ki nekwe a ba ilik, aɗaba ana kàa gə̀sakwa ŋgat nda gəzləŋ tserdze, ŋgat ana Kəla Mbulum a, dite ka, kà sərakwa ŋgat a asa mbaŋa. Kərga taŋa ya na ki ɗekwiŋa, dite ki nekwe a gà mburma ana tàa sime ika vatwa Mbulum a nda ndzəɗa. Ama ki nekwe a ka, gà ŋgwal ŋa fit kamala ŋgat a.

14 Na kàa simekwa kataya ka, kwa gà ɓəza ndirkiz asa tsa. Gà ɓəzla pàrsa ana ta pasawa za a mburma nda wirwir a tekeɗe, ti sle a aà mendze a kwa a vatwa nda medzeŋge pàrsa tar asa tsa. Medzeŋge tar ata ka, à dzèdzeye a à mburma kamala himbiɗ ana kəzlah kəzlah à sìweye a à slə̀làh yam ika gər yam a. Ama kinehe ka, tsahakwa, na dite a sle aà kwe a kataya asa tsiye. 15 Sə̀kàhakwa à metsehe kwa, dite ki simekwe a kamala ŋgat ana batsah ŋa ika gər kwa ya ivaɗ. Ka wayakwa ba ika magər kwa ilik ilik tserdze, ka mayakwa ba à dukw ana ndzer a ika magər kwa. 16 Ŋgat na a gaw akaba gà mburma ŋgar fit a təv ilik ŋa, ti ne ba ilik, kamala dzerisl ba ana a gaw akaba slu ba mburma ya. Na dukw ana aà ba mburma tserdze a ge a megemir lele ka, asiŋ ba tekeɗe, a de a lele. Kərga taŋa ya, na gà mburma Yesuw Kiristi ya mbaŋa. Na gà mburma ata tàa waya ba ilik ilik tserdze ka, taŋa tì sìkèhiŋa, dite ti de a aka miɗ aka miɗ.

Mesife awiya ŋa ana i təv Yesuw Kiristi ya

17 Dukw ana i tsik a kurum a ya ka, nda zləm BATSAH kwa ŋa. Ama iye ihər ge a kurum a kamkam, aà megweɗe a kurum ka: Kà zazamum mede gà mburma ana tə sər Mbulum tsiye asa tsa. 18 Madzala gà gər tar ka, i luvuŋ. Tə sər dukw ana ndzer ŋa ya tsa. Mesife awiya ŋa ana Mbulum a vəl a ka, a riŋ i təv tar tsidze, aɗaba ana kuvəl i zləm tar a, ndàasun ŋana ka, na tə sər duwa tsidze ya. 19 Hwarwa a mba aà tar, aà mege gà dukw ana gà ŋgwal ŋa tsa i təv tar a asa tsa. Ku mege gà dukw ana biy metsike tsiye tekeɗe ka, ta vəlar gəzləŋ tar, ta ge a nda gà maŋgayaba lele pəra.

20 Ama kurum ka, Yesuw Kiristi aka tsik a kurum kamala taŋa ya tsa. 21 Wànà a kurum ana mandza ŋa nda ŋgat a dze ana, kàa dzum zləm a bazlam ŋgar tsiye, dite tàa dzeŋge a kurum dze ana, dukw ana ndzer, a ɗif a kwa dər a tsiye? 22 Kamala taŋa ya, miyakum à mede ana kà zazamawum ɗa akahər ata ya. Aɗaba mede ata ka, a nəsawa a kurum à gəzləŋ, agəra gà meeweke ana ta bazawa a kurum za ya. 23 Mbəɗum à gà madzala gà gər kurum nda gəzləŋ kurum, ti ne awiya ŋa. 24 Mbəɗum ibam, à ba ŋgiɗ nda mede awiya ŋa ana Mbulum a vəl, a ndzikiɗ ba biy ŋgar a. Mede ata ka, ndzer ŋa kalkal lele, a da a gər a Mbulum.

25 Aɗaba taŋa, kà sasum pàrsa asa tsa, ku mege weke ma tsik ndzer ŋgar a mburma. Aɗaba kwa ka, ilik na i təv Yesuw Kiristi ya. 26 Na duwa aka tsəɓ a kurum aà ba ka, pə̀lum aba dər tsara, tsəka, pat mà dəɗ ahər, ka tə də̀ɗum a bakal tsa. 27 Ka vəlum vatwa a Əbay sitene a gəzləŋ kurum tsa. 28 Wur ana a gewe a akəl a ka, mi miyak dər, ma ta ge asa tsa. Ma gewa megemir nda ndzəɗa ŋgar, dite ma ŋgat dukw maya ba ŋgar lele, mə vəlawa a gà ɓəzla matawak mbaŋa. 29 Mifefile ana ŋgwal ŋa tsiye ka, ma tə dara i bazlam kurum a tsa. Say ki tsikwim a ka, bazlam ana à zlèk a gà misle ŋgiɗ, aà masəkaha à megìse tar ika vatwa Mbulum a ivaɗ, dite na a vile a vatwa aà dukw ana a ge a ŋgulum a gà na tar riŋ tì dzer a zləm a. 30 Kà sawarum are a Mezite Mesife Mbulum tsa. Aɗaba Mezite Mesife ata ka, lambà ana Mbulum a ge aà kurum a. A ge aà kurum ka, aɗaba ana kurum gà mburma ŋgar a, dite a ta mbil a dər à kwa fit a pat ŋgar ana a tike ya mbaŋa. 31 Miyakum à məpala ba ahəm ana ika magər kurum a, gəzləŋ ma tərfə̀ɗ a kurum nda matsəɓatsəɓ asa tsa. Ama ki gwim maàga asa tsa. Mendeve ibam, ma ta ge ika magər kurum ɓav tsa asa. Ama ka, ka ta gwim ba swalwa ɓav tsa asa. 32 Ki sirwim a ba a ahəm ka, lifeɗiɗe lele, gà mburma na ti ndze a kurum a are tsehe ya ivaɗ. Pə̀lum aba à bakal ilik ilik tserdze, kamala Mbulum ana a pəl a kurum dər aɗaba kurum ana gà mburma Yesuw Kiristi ya.