Mege megemir ana Pul a ge agəra gà mburma ana
gà Yahuda tsiye
3
1 Aɗaba taŋa na iye Pul,
iye ihər i heme a a Mbulum agəra kurum.
Ta gəs iye a daŋgay ka,
aɗaba kurum ana gà Yahuda tsiye,
agəra ana iye mala meslire Yesuw Kiristi ya.
2 Wànà kàa tsarakum maɗə̀và zləm megemir ana Mbulum a viliŋ ahər aɗaba kurum a tsiye?
Kà sərum ŋgwal ŋa ŋgar ata a viliŋ ahər a.
3 Mbulum aka ɗifiŋ à dukw ana piŋŋe makàhà ŋa akahər ata ya,
kərga na i lah mewetse a kurumaha zaakwa ya mbaŋa.
4 Na kàa dzeŋgwim dukw ata ka,
ki sirwim a dər ka,
meme na iye i sər dukw ana makàhà ŋa aka gər Yesuw Kiristi piŋŋe ya lele kuɗa.
5 Aɗaba akahər ata ka,
gà mburma tə sər dukw ata ka,
makàhà ŋa tsa.
Ama kinehe ka,
Mbulum aka slərra Mezite Mesife ŋgar a,
aà meɗìfè dər parakka a gà ɓəzla meslire ŋgar a,
nda gà ɓəzla məma à guma ŋgar ana a ndzək tar a.
6 Dukw ata Mbulum a ɗif dər a ka,
kurum gà mburma ana gà Yahuda tsiye tekeɗe,
ki ta ŋgetwime a dukw ana a vile a a gà Yahuda ya mbaŋa.
Kurum nda gà Yahuda ka,
kàa nwim ba ilik.
Aɗaba kurum tekeɗe,
kurum i dukw ana Mbulum aka mbər megweɗe i sida ya ka,
i ta vile a a gà mburma Yesuw Kiristi ya mbaŋa.
A ta vile a a kurum a gà dukw ata tserdze ya ka,
agəra ana kàa gəsum bazlam ŋgwal ŋana nda gəzləŋ kurum a.
7 Mbulum aka giŋ ŋgwal ŋa,
aka viliŋ ndzəɗa asa,
dite a zle iye kamala mala meslire ŋgar a,
aà metsìkè bazlam ŋgwal ŋa ata a mburma.
8 Iye ka,
wele na kə̀la ŋa ika magər gà mburma Mbulum kwizikw a.
Ama kə̀la ka,
aka viliŋ vatwa aà metsìkè bazlam mipise ahəm ana a dere a ndàra i təv Yesuw Kiristi ya,
a gà mburma ana gà Yahuda tsiye.
Mipise ahəm ata batsah ŋa ya ka,
gà mburma ti sle a aà masəra ŋa fit tsa,
aɗaba ana a za ndzəɗa tar a.
9 Aka viliŋ vatwa aà meɗìfè dər a mburma tserdze ka,
meme na dukw ana a tsik piŋŋe nda akəl ka,
dite ka,
a ge a ba kaɗəŋ a.
Mbulum ana a ge dukw tserdze ya,
na a kaha dukw ata aà gà mburma ya ya.
A kaha dukw ata ka,
daga piŋŋe,
akahər ana aka ge gər ahəɗ zukw tsa haa kinehe ya.
10 Ama kinehe ka,
Mbulum aka pàt dər i magər gà mburma ŋgar.
Dite gà gawla ŋgar nda gà Əbay tar ana i gər ŋa ya,
tə samata tar,
tə sər dər ka,
metsehe ŋgar i təv gà dukw ŋgiɗ pampam.
11 Kərga taŋa ya,
a ge kataya ka,
kamala ana a gwa ka,
i ta ge a mba,
akahər ana aka ge gər ahəɗ zukw tsiye.
A ge taŋa ka,
nda ahər Yesuw Kiristi Batsah kwa ŋana.
12 Arəv a de a à kwa ya asa tsa na aà mesirike a təv Mbulum a,
aɗaba ana kə̀ gə̀sakwa Yesuw Kiristi nda gəzləŋ,
kwa riŋ mandza ŋa i təv ilik ŋa nda gà ŋgat a.
13 Aɗaba taŋa,
iye ihər i ge a kurum a kamkam:
Ma tə tsəɓ a kurum aɗaba ana iye ihər i sèwèr a are agəra kurum a tsa.
Seyiŋ ivaɗ tsa,
mesewere are gà ata ka,
à zlèk a kurum hinne.
Mawàyà mburma Yesuw Kiristi ana a waya tar a
14 Aɗaba taŋa,
iye ihər i dze a gurmits a bəɗ a Mbulum Tsir kwa.
15 Gà mburma ŋgar ana i gər ŋa ya,
nda gà na ika gər ahəɗ a ka,
tar riŋ mandza ŋa i bəra tsir tar,
kamala gà ɓəza ana ti ndze a nda gà tsir tar a.
Aɗaba ŋgat na a ne Tsir kwa ana ndzer a.
16 Iye ihər i hemer a ka,
dite Mezite Mesife ŋgar mə vəl a kurum ndzəɗa ka,
ka mə̀rum aàba ika vatwa ŋgar ɓəŋɓəŋ lele.
Aɗaba ŋgat ka,
a be gà dukw tserdze.
Dukw ana tserdze ya ka,
i ahər ŋgar.
17 Iye ihər i hemer a asa ka,
dite Yesuw Kiristi ma ndza i gəzləŋ kurum,
aɗaba ana kàa gəsum ŋgat nda gəzləŋ a.
Iye ihər i hemer a asa mbaŋa ka,
dite ka wayum ba ilik ilik tserdze.
Na kàa wayum ba ka,
ki ŋgetwime a ndzəɗa ɓəŋɓəŋ lele kamala dizl ɗaf ana a ŋge zlile ya,
nda gà kamala ga ana madzàha ŋa lele,
a mbezle a tsiye.
18 Na kàa gwim kamala taŋa ya ka,
kurum nda gà mburma Mbulum ŋgiɗ ana tserdze,
ki slwim a aà masəra dər,
meme na mawàyà mburma Yesuw Kiristi BATSAH kwa ŋa a waya kwa ka,
hinne ya.
Ku mege kurum i ŋga tekeɗe ka,
mawàyà mburma ŋgar a riŋ i fata pəra.
19 Iye ihər i hemer a ka,
dite ka sərum meweye ŋgar ana a waya kwa ya,
dite mege bəla ki slekwe a à masəra ŋa fit tsa tekeɗe ya.
Dite gà dukw ana i təv Mbulum tserdze ya ka,
mà rah a gəzləŋ kurum mbaŋa.
20 Zlə̀bakwa à Mbulum,
aɗaba ana a sle à mege duwa tserdze ya.
Ama dukw ata ka,
à zè a biy ana ki wizekwe a ya,
ndəna kà dzalakwa i gà gər kwa ya mbaŋa.
A ge a gà dukw ata ka,
nda ndzəɗa ŋgar ana a riŋ a ge a dər megemir i gəzləŋ kwa ya.
21 Kwa gà mburma ŋgar ka,
zlə̀bakwa à ŋgat kəla pat aà biybiy ika magər kwa,
aɗaba kwa riŋ mandza ŋa i təv ilik ŋa nda gà Yesuw Kiristi.
*Amin.