Efesiya 2

Məmbə̀lara i məməta ya, a mesife

1 Piŋŋe kurum ka, kamala ana gà məməta ŋa ya, na ika miɗ Mbulum a, aɗaba ana kì gewim gà dukw ana ŋgwal ŋa tsa pampam a. 2 Kà zazamawum ɗa ka, mede gà mburma ana ɗa ika gər ahəɗ a. Kà dzawum zləm ka, a Əbay gà sitene ana mandza ŋa aà gəza mbulum a. Əbay gà sitene ata na a riŋ a ge a mege megemir i ba gà mburma ana a sàs a tar medzè zləm a bazlam Mbulum tsidze ya. 3 Akahər ata piŋŋe ka, kwa tserdze kà gawakwa ɗa ka, kamala tar a mbaŋa. Kì gewakwa ka, gà dukw ana ŋgwal ŋa tsa, a sàs a kwa ya. Kà dzalawakwa ka, aka mege gà dukw ana a da a kwa gər a ɗekɗek. Agəra taŋa na seriye Mbulum a ta gis a kwa zləmana ŋa kamala gà misle ŋgiɗ a.

4 Ama kinehe ka, kataya asa tsa. Mbulum ka, ka ndzekwar are tsehe hinne. Aɗaba ŋgat ka, a waya kwa ivaɗ, 5 ku mege kwa kamala gà məməta ana ta mite a i bakal a tekeɗe ya. Aɗaba taŋa na a mbəlara iɗəm a kwa, a vəl a kwa akaba mesife awiya ŋa nda gà Yesuw Kiristi ya. Ama ka, ma ta məts a kurum gər tsa: A mbəl à kwa ka, agəra ŋgwal ŋgar ana a vəl biy taf a. 6 A mbəl akabara à kwa i məməta ya ka, nda gà Yesuw Kiristi ya, aɗaba ana kwa mandza ŋa i təv ilik ŋa nda gà ŋgat a. A dza kwa i gər ŋa, nda gà Yesuw Kiristi, dite mekwere kwa ma ge ilik nda gà ŋgat tserdze. 7 Kərga taŋa ya, aka ge a kwa dukw ŋgwal ŋa hinne nda ahər Yesuw Kiristi. A ge dər kamala taŋa ya ka, aɗaba a sasar məpàtà dər a gà mburma ana ti dere a a təv ŋgar ika miɗ a, dite na ti sir a dər ka, meme na ŋgwal ŋgar ana a vəl biy taf ka, batsah ŋa hinne, a za gà dukw ana tserdze ya.

8 Mbulum a mbəl à kurum nda ŋgwal ŋgar ka, aɗaba ana kàa gəsum ŋgat nda gəzləŋ kurum a, tsəka, aɗaba megemir kurum ana ki gwim a tsa. A ge a kurum ŋgwal ŋgar ata biy taf a ka, 9 aɗaba wày ka, ki gwimer megemir ata ka, ŋgwal ŋa ya tsa. A ge a kurum biy taf ka, dite wura ma ta ge dər zlapa tsa. 10 Aɗaba ŋgat na a ge kwa ya. A vəl a kwa mesife awiya ŋana nda ahər Yesuw Kiristi, dite ki gekwa dər megemir ŋgwal ŋana. Mbulum a ge aba megemir ata ya daga piŋŋe ka, dite kwa ka zazamakwa ndaka vatwa ŋa lele.

Kàa nekwa ba ilik nda ahər Yesuw

11 Aɗaba taŋa iye ihər i tsik a kurum ŋa, ma ta məts a kurum gər tsa: Dzalum aka mendze kurum ana piŋŋe kà ndzum ɗa ya. Kurum ka, gà Yahuda tsa, gwala kurum ka, pam. Gà Yahuda ka, gà masasa ŋa fit. Tə zalawa a kurum ka, gà Kirde. Ama ti tsik taŋa ka, aà dukw ana ɗa i bəra gà mburma ta ge a nda ahər tar a pəra. 12 Ma ta məts a kurum gər tsa: Akahər ata ka, kà sərum ɗa Yesuw Kiristi tsa. Kurum ka, gà mbəlakw məfàrà ŋa ana ika magər gà Yahuda ana tar gà mburma Mbulum a. Mbulum aka tsik duwa a gà mburma ŋgar ata. Aka mbər megweɗe a tar ka: «I vile a kurum a duwa i sida ya.» Ama kurum gà mbəlakw ka, kurum iɗəm tsa. Kàa slwim madzala aka duwa a təv Mbulum tsidze. Kurum ɗa ika gər ahəɗ ka, kàa sərum ɗa Mbulum tsa. 13 Akahər ata kurum ka, diriŋ nda Mbulum. Ama kinehe ka, kurum mandza ŋa i təv ilik ŋa nda gà Yesuw Kiristi. Kurum ka, diriŋ nda Mbulum asa tsa, aɗaba ana Yesuw Kiristi a dza à məmbəz ŋgar ka, agəra kurum a.

14 Ŋgat na a zlakwara mendzeye lele aka magər kwa ya. Aɗaba piŋŋe ka, gà Yahuda nda gà na gà Yahuda tsiye ka, dzə̀ɓar ika magər tar pampam. Ama kinehe ka, aka sər ba à kwa, aka gaw akaba kwa a təv ilik ŋa kuɗa. Aɗaba piŋŋe ŋa ata ka, mene are ika magər kwa, kamala zlagam a. Ama kinehe ka, Yesuw Kiristi aka mbazla dər iɗəm nda məməta ŋgar a. 15 Aka mbete à məpala ahəm gà Yahuda ana piŋŋe ta gwaɗawa ka: «Ge naha,» kige tsa «ge naaka» ya. I dəba ŋa ŋa ya, a gaw akaba tar nda gà mburma ana gà Yahuda tsiye, fit a təv ilik ŋa. A gaw akaba tar ata ka, tar ka, gwala sula asa tsa. A ne à tar ba awiya ŋa, gwala ilik pəra, aɗaba ana tar mandza ŋa i təv ilik na nda gà ŋgat a. Kərga taŋa ya, a zla a tarəra mendze lele aka magər a. 16 Aka mbete à mene are ana ika magər tar a, nda məməta ŋgar ana aà dizl magə̀làwà ŋa ya. A gaw akaba gà gwala ata sula ya, a ne à tar ba ilik. Dite a sər ba aà tar nda gà Mbulum.

17 Kərga taŋa ya na Yesuw Kiristi a dara aka gər ahəɗ, aà metsìkè bazlam ŋgwal ŋa ana biy mandza zayya ika miɗ Mbulum a, a kurum ana kà ndzùm aàba diriŋ nda gà Mbulum a piŋŋe ya, dite a kwa, gà Yahuda ana bise nda ŋgat a asa mbaŋa. 18 Aɗaba kwa tserdze, ku mege gà Yahuda, ku mege gà Yahuda tsa tekeɗe ya ka, kə ŋgatakwa vatwa aà mesirikaha a təv Mbulum Tsir kwa ka, nda təv Yesuw Kiristi. Ama ki slekwe a aà mesirike a təv ŋgar ka, ndaka vatwa ilik ŋa nda ndzəɗa Mezite Mesife Mbulum.

19 Aɗaba taŋa kurum ana gà Yahuda tsiye ka, gà mbəlakw nda gà slele asa tsa. Ama kurum ka, kàa nwim gà ɓəza gà kwite ana ika ahəɗ ata ya, ilik nda gà mburma Mbulum. Aɗaba kurum kinehe tekeɗe ka, kàa nwim gà asiŋ ŋgar asa kamala tar a mbaŋa. 20 Kurum ka, kàa nwim gà kur mazlazla ga. Gà ɓəzla meslire Yesuw nda gà ɓəzla məma à guma Mbulum ka, tar ti ne madzàha ga. Dite Yesuw Kiristi ka, ŋgat a ne madəŋ kur ana dəŋdəŋ a. 21 Aɗaba kur ata na ga a ndze a ɓərɓər, dite à rèh a lele ya. Kamala taŋa ya, ga ata ka, ma ne ga Mbulum ana a ndze iɗəm i fata ya. 22 Kurum nda gà misle ŋgiɗ tekeɗe, kà nwim ga ata Mezite Mesife Mbulum a ndze a iɗəm a, aɗaba ana kurum mandza ŋa i təv ilik ŋa nda gà Yesuw Kiristi ya.