Kulusiya 1

Wakita ana Pul a wetseha

a gà mburma Mbulum ana

i KULUSIYA ya

1 Iye Pul,

wele ana Mbulum a zla iye,

a ne à iye mala meslire Yesuw Kiristi ya.

Mì wetse a kurumaha wakita aaha ka,

mə̀r nda Timute,

damər kwa.

2 Mì wetseha ka,

a kurum gà mburma Mbulum ana i Kulusiya ya,

a kurum ana kà nwim gà damər mə̀r,

kurum riŋ mandza ŋa i təv ilik ŋa nda gà Yesuw Kiristi,

ki zezemwim a ŋgat nda gəzləŋ ilik a.

Mì heme a a Mbulum Tsir kwa,

dite ma ge a kurum ŋgwal ŋa,

mə vəl a kurum matasla yam a gəzləŋ zayya lele.

Pul a ge kəkaaha a Mbulum aɗaba gà mburma Mbulum ana

i Kulusiya ya

3 Ku mege ndeɗime tekeɗe,

i huɗ meheme mə̀r ana mì hamawa a Mbulum aɗaba kurum a ka,

mìi ger a kəkaaha,

a ŋgat ana Tsir Yesuw Kiristi BATSAH kwa ŋa ya.

4 Meheme ata mì hamawa a ka,

aɗaba ana mì tsaraka meɗè zləm kurum ana kə̀ gəsum Yesuw nda gəzləŋ,

dite kà wayum gà asiŋ gà mburma ŋgiɗ ana ika vatwa Mbulum a tserdze asa mbaŋa ya.

5 Kurum ihər ki gwim a kamala taŋa ya ka,

aɗaba ana kà tikwim madzala gà gər kurum aka ŋgwal dukw ana Mbulum a tike a kurum aba ya,

i təv ŋgar i gər ŋa,

kà sərum ka,

ki ta ŋgetwime a ya.

Ti ɗif a kurum à dukw ata Mbulum a gwa,

i tike a aba ya aɗaba kurum a ka,

i təv ana kà tsarakum bazlam ŋgwal ŋana ndzer a.

6 Ŋgwal bazlam ata a ɗe a zləm,

ku mege i ŋga,

ika gər ahəɗ tserdze.

Ar ka,

kamala dizl ɗaf ana a gil a ba,

dite ka,

a we a hinne ya.

Kamala taŋa ya,

kurum tekeɗe ka,

dukw ata a riŋ a de a aka miɗ aka miɗ ika magər kurum mbaŋa,

daga aà gər pat ana kà lah metserekwim bazlam ata ya ka,

kà sərum ndzer,

kàa ndzwim are tsehe a Mbulum,

aka ge a kurum ŋgwal ŋa.

7 Kà lah metserekwim bazlam ŋgwal ŋa ata i təv Apafəras a.

Ŋgat ka,

wele ana mì waya ŋgat hinne,

mìi ge a meslire Yesuw Kiristi i təv ilik ŋa ya.

A ge a meslire Yesuw Kiristi i liwiŋ kurum ka,

nda gəzləŋ ilik.

A ge a ka,

avukw mə̀r.

8 Ŋgat na a tsik a mə̀r bazlam aka gər mawàyà mburma kurum ana kà wayum gà asiŋ gà mburma ŋgiɗ,

nda ndzəɗa Mezite Mesife ana Mbulum a vəl a kurum a ya.

9 Aɗaba taŋa,

daga a pat ana mì tsaraka taŋa ya ka,

mì hamawa a Mbulum kəla pat,

aɗaba kurum.

Mər ihər mìi hemer a ka,

dite ma ɗif a kurum à dukw ana ŋgat a waya ya parakka,

a vile a kurum a metsehe ana Mezite Mesife ŋgar a vile a kurum a ya,

na dite ki sirwim a dukw ana a de a ndaka vatwa ŋgar a.

10 Kamala taŋa ya,

mede kurum ana ika vatwa Mbulum a,

a ge a ka,

kamala ana a sàs a Yesuw Kiristi BATSAH kwa ŋa ya.

Ki gwim a ka,

dukw ana a tsahən ahər a tserdze.

Ki gwim a ka,

dukw ana ŋgwal ŋa ya,

kamala dizl ɗaf ana a we a hinne gwètsik gwètsik a.

Dite ka,

ki sìkèhwim a à masəra Mbulum aka miɗ aka miɗ mbaŋa.

11 Mər ihər mìi hemer a mbaŋa ka,

dite mə vəl a kurum ndzəɗa,

ki ndzwim a ɓəŋɓəŋ lele,

nda ndzəɗa ŋgar ana a za duwa tserdze ya.

Kamala taŋa ya,

ku mege ndeɗime tekeɗe,

ki slwim a aà magəsa gəzləŋ i təv duwa ya tserdze,

ki sìkèhwim a à mandza zayzay nda maŋgayaba i gəzləŋ kurum mbaŋa.

12 A sèsiŋ ka,

ki gwim a kəkaaha a Mbulum Tsir kwa kəla pat nda gà maŋgayaba ata i gəzləŋ kurum mbaŋa asa.

Aɗaba ŋgat na a vəl a kurum vatwa,

na dite ki ta ŋgetwime a dukw ana ŋgwal ŋa,

a ti dzeye a a gà mburma ŋgar a ya.

Dukw ata ka,

i təv dzaydzay ŋgar ana i gər ŋa,

à div a hinne ya.

13 Aɗaba Mbulum Tsir kwa ata na a beyera à kwa i ahər Əbay ana mandza ŋa i lùvùŋ a ya.

A ndzəkara iɗəm kwa ya ka,

a dza kwa a təv mekwere Kəla ŋgar ana mandərkwasla ŋa ya.

14 Nda ahər Kəla ŋgar ata na a mburuɗara kwa i ahər Əbay sitene ya,

a pəl a kwa dər à bakal,

dite na kə ŋgatakwa mezìwè gà gər kwa kuɗa ya.

Yesuw ka, Əbay ika gər gà dukw tserdze

15 Wura a sle a aà meŋgete a Mbulum nda are tsidze.

Ama Yesuw Kiristi ana gà mburma ta ŋgatar a ka,

a ndzikiɗ ba kalkal kamala Mbulum a.

A ɗif a kwa dər,

meme na a ndza ya ya.

Ŋgat ka,

maləkwara.

Mendze ŋgar ka,

piŋŋe,

à gər ana Mbulum aka ge gà duwa zukw tsiye.

16 Aɗaba Mbulum a ge dukw tserdze ka,

nda ahər ŋgar:

Gà dukw ana i gər ŋa ya,

nda gà dukw ana ika gər ahəɗ a mbaŋa.

A ge ka,

gà dukw ana a ŋgeter a ba

nda are ya ɗekɗek tsa.

Ama a ge ka,

gà dukw ana a ŋgatar ba tsiye mbaŋa.

Kamala megweɗe ya ka,

gà dukw ana

gà ndzəɗa tar riŋ hinne i gər ŋa ya,

gà gawla Mbulum,

nda gà Əbay tar ŋana tserdze.

Gà dukw ata Mbulum a geye tar tserdze ya ka,

nda ahər Kiristi,

Kəla ŋgar,

dite a dza tar a ahər ka,

a Kəla ŋgar ata mbaŋa asa.

17 Ŋgat a riŋ daga piŋŋe,

akahər ana

Mbulum aka ge gər ahəɗ zukw tsiye.

Ŋgat na a kesle a gà duwa tserdze

nda ndzəɗa ŋgar a.

18 Ŋgat Əbay ika gər gà mburma Mbulum mbaŋa.

Ŋgat na a kwere a tar,

kamala metsehe ana

i gər mburma a kwere a ba mburma ya.

Mesife awiya ŋa a dza ahər ba ka,

i təv ŋgar mbaŋa asa.

Aɗaba Mbulum a lah məmbə̀lara à ŋgat

i məməta ya,

na dite a ne à ŋgat Batsah ŋa ika gər

gà duwa tserdze,

ku mege awara tekeɗe ya.

19 Aɗaba Mbulum a waya ka,

Kəla ŋgar ma zla

ba ŋgar nda ndzəɗa fit kweleŋ.

20 A sàs a Mbulum mbaŋa ka,

Kəla ŋgar ma sər ba

à gà dukw tserdze nda ŋgat,

gà dukw ana ika gər ahəɗ a,

nda gà na i mbulum i gər ŋa ya mbaŋa.

Kamala taŋa ya,

a waya ka,

gà dukw ata ti ner are asa tsa,

tə ndza ika miɗ ŋgar zayzay lele ivaɗ.

A ge dər kataya ka,

agəra məməta Kəla ŋgar ana

a dza à məmbəz ŋgar aà dizl magə̀làwà ŋa ya.

21 Akahər ata ka,

kurum tekeɗe,

kurum mandza ŋa diriŋ aà Mbulum a,

ka nwim gà ɓəzla mene are ŋgar,

aɗaba madzala gà gər kurum ana ka dzalawum ŋgwala tsa,

dite nda gà dukw ana ki gewim ŋgwala tsiye asa mbaŋa.

22 Ama kinehe ka,

Mbulum aka gəs masla nda kurum,

aɗaba Kəla ŋgar ana a ne mburma,

dite a vəl mesife ŋgar a.

Aɗaba taŋa,

na kinehe a ne dər à kurum gà tsəɗaŋŋa ŋa,

a de à kurum a a təv Mbulum,

ki nwim a gà mburma ŋgar ana gà ŋgwal ŋa ya,

dite ka,

wura a sle aà mimè a kurum a à bakal asa tsiye.

23 Ama kə̀la ka,

say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a.

Ndzum ka,

ɓəŋɓəŋ lele,

madzala gà gər kurum ma ta ge wakit wakit tsa.

Tikwim madzala gà gər kurum ka,

aka dukw ana ka tsarakum i huɗ bazlam ŋgwal ŋana ya kəla pat.

Bazlam ŋgwal ŋa ata ka,

ti tsikeye a gà mburma ana ika gər ahəɗ a tserdze.

Aɗaba Mbulum a slər iye,

Pul,

na dite i ɗif a dər a mburma mbaŋa ya.

Mege megemir Pul ana a ge aɗaba gà mburma Mbulum a

24 Kinehe ka,

iye ihər i ŋgeye a ba aɗaba mesewere are ana i sèwèr a agəra kurum a.

Kamala na akahər ata Yesuw Kiristi a sèwèr are ya ka,

iye tekeɗe,

i sèwèr a are aɗaba gà mburma ŋgar mbaŋa.

Gà mburma ata ka,

ti ne kamala ba ŋgar a.

Mesewere are ana i sèwèr a kamala taŋa ya ka,

i zlèk a kurum aà mesewere are ana ki sèwèrekwe a aɗaba ŋgat a,

na dite megemir ŋgar ma da aka miɗ aka miɗ a.

25 Mbulum a zla iye ka,

a ne à iye mala meslire kurum,

kurum ana kə̀ gəsum ŋgat a.

A gweɗiŋ ka,

ɗif à bazlam gà a mburma tserdze parakka,

dite a kurum tekeɗe,

a ge a kurum a ŋgulum mbaŋa.

26 Daga aà gər ana Mbulum a ge gər ahəɗ a,

bazlam ata ka,

makàhà ŋa aà mburma ya,

dèrze ikəka,

wura a sər tsa.

Ama kinehe ka,

aka pàt dər a gà mburma ŋgar parakka lele.

27 A waya meɗìfè a tar dər ka,

à dukw ana ŋgwal ŋa ndzer,

a za dukw tserdze ya,

dite ka,

à zlèk a gà mburma tserdze,

ku mege i ŋga tekeɗe ya.

Na a ne dukw ata makàhà ŋa piŋŋe,

dite araha,

a pàt aba kinehe ya ka,

Yesuw Kiristi na a riŋ mandza ŋa i gəzləŋ kurum a.

Aɗaba taŋa,

kàa tikwim madzala gà gər kurum a təv mezlibe ŋgar ana ti zlibe a à ŋgat a,

ka sərum ka,

ki ndzwim a a fata ndzer.

28 Yesuw Kiristi ata na mə̀r ihər mìi tsik a bazlam ŋgar a mburma tserdze ya.

Mìi tsik a ter a aba ya,

mìi ɗif a ter a à duwa ka,

nda metsehe ana Mbulum a vəl a mə̀r a mbaŋa.

Aɗaba a sàs a mə̀r ka,

gà mburma ti ne kamala ana Mbulum a waya ya,

agəra ana tar mandza ŋa i təv ilik ŋa nda gà Yesuw Kiristi ya.

29 Aɗaba taŋa na iye ihər i mir a aba aà megemir ŋa hinne,

nda ndzəɗa Yesuw Kiristi ana a viliŋ a ba ya,

na dite ka,

araha,

i ge a dər megemir ŋa mbaŋa ya.