Meɗìfè à metsehe aka gər gà dukw ŋgiɗ pampam
4
1 Aɗaba taŋa,
gà damər gà ana i waya kurum hinne ya,
ndzum ka,
nda gà ndzəɗa ɓəŋɓəŋ lele,
na i huɗ mendze kurum ana kurum mandza ŋa i təv ilik ŋa nda gà BATSAH kwa ŋa ya.
I waya kurum hinne,
ki kìvwimiŋŋa,
a sèsiŋ na i ŋget a kurum a asa ya.
Iye ihər i ŋgeye a ba aɗaba kurum.
Kurum kà nwim ka,
gà ɓəzla sida megemir gà ana i ge ŋgwal ŋa ya.
2 A kurum gà Avudiya nda Sintike,
i ge a kurum a kamkam,
agəra ana kurum riŋ mandza ŋa i təv BATSAH kwa ŋa ya ka,
sərum ba lele.
3 A kər masla gà ana ma ihər ki geme a megemir ŋa ilik a,
iye ihər i gik a kamkam mbaŋa:
Zlak gà məkəs ata,
aɗaba tàa mə̀r aba hinne,
na i təv ana mì ge akaba mege megemir metsìkè bazlam ŋgwal ŋana biy Yesuw Kiristi a mburma ya,
tar nda gà Kilemas,
nda gà asiŋ gà ɓəzla megemir ana mì ge akaba megemir i təv ilik ŋa ya.
Tar ata tserdze ya ka,
Mbulum aka wetseye gà zləm tar a wakita a təv gà mburma ana ti ta ŋget a mesife awiya ya.
4 Ŋgeywim ba kəla pat,
agəra ana kurum mandza ŋa nda gà Yesuw BATSAH kwa ŋa a təv ilik ŋa ya.
I tsik a kurum a asa:
Ŋgeywim ba.
5 Mburma tserdze ta fə̀r aà mede kurum,
tə sər dər ka,
meme na kà gəsum mburma lele,
ki gwim a ter a ŋgwal ŋa ya.
Mə̀ məts a kurum gər tsa,
na mimè ana BATSAH kwa ŋa à mère a bise ya.
6 Ka tə dzalum duwa kwizikw tsidze.
Ama ɗifwim à gà dukw ana tàa sle aà kurum tserdze ya ka,
a ahər a Mbulum ivaɗ.
Hamumar,
mà zlak kurum,
dite ki gwimer a kəkaaha mbaŋa.
7 Na kàa gwim kataya ka,
Mbulum a vile a kurum a matasla yam a gəzləŋ zayya lele.
A zè a dukw ana gà mburma ti sle a aà mesire nda metsehe tar a.
Na kàa ŋgatum matasla yam ata ka,
zayya a kesle a gəzləŋ kurum nda gà madzala gà gər kurum kuɗa,
na dite duwa a ge a kurum a tsa,
agəra ana kurum mandza ŋa i təv ilik ŋa nda gà Yesuw Kiristi ya.
8 Gà damər gà,
araha na dukw ana a zeha aà metsike a kurum a:
Dzalum aka dukw ana ŋgwal ŋa,
mburma tə zləbawa dər a,
nda gà aka dukw ana ndzer,
ki dzèkwer a gurmits a bəɗ a asa,
dite aka dukw ana pàrsa iɗəm tsa,
tsəɗaŋŋa lele,
gà dukw ana a tsahən aà mburma,
tə zàmbaɗawa dər a asa mbaŋa.
Gwim metsehe a mege gà dukw ata.
9 Zazamum ka,
gà dukw ana i ɗif a kurum dər,
dite kà zazaɗum ba dər aba à dukw ana kà tsarakumara ika arah ga ya,
kà ŋgatumar ka,
meme na i ge a ya mbaŋa.
Kamala taŋa ya,
Mbulum ana a vile a kwe a matasla yam a gəzləŋ kwa ya ka,
a ti ndze a nda gà kurum.
Pul a ge a tar wusa agəra dukw ana ta vəlar a
10 I ge kəkaaha a BATSAH kwa ŋa,
dite i ŋgayaba hinne agəra ana kà dzalum gà gər aka iye ya asa.
Ku mege piŋŋe tekeɗe ka,
kàa dzalum aka iye kaɗəŋ.
Ama kàa ŋgatum vatwa aà mezleke iye tsa pəra,
na dite a ndza hinne kamala taŋa ya ya.
11 I tsik taŋa ka,
agəra ana duwa a sle a aà iye ya tsa,
aɗaba ana Yàa sinike ba aà mendze zayya i təv gà dukw ana i ŋgatawa ya,
12 ku mege hinne,
ku mege zaakwa pəra tekeɗe ya.
Dite ku mege dukw mezime a riŋ aà iye mbes mbès mbes nda gà bəla a riŋ tsa,
dite ku mege kuɗa duwa a giŋ a tsa,
i dəba ŋa ya,
duwa a sle aà iye a hinne asa mbaŋa tekeɗe ka,
Yàa mbər mesire iba à gà mesewere are ya,
nda mendze ana barbarərra ya.
13 I sər magəsa gəzləŋ i təv duwa tserdze ka,
say nda təv Yesuw Kiristi ana a viliŋ a ndzəɗa ya.
14 Ama ka,
ku mege kataya tekeɗe ka,
kàa gwim ŋgwal ŋa lele aà mezleke iye i huɗ mesewere are gà ana i sèwèr a kinehe ya.
15 *A kurum gà mburma ana i Filipiya ya,
kurum kà sərum,
aka ana i dza ba aà metsìkè a kurum bazlam ŋgwal ŋa ana biy Yesuw Kiristi ika ahəɗ Makaduniya ya ya,
dite i zazəɗ dər aka miɗ,
i da à kurum a ka,
say kurum ɗekɗek na kà zlakum iye ya,
tsəka,
aɗaba gà asiŋ gà mburma Mbulum ŋgiɗ a riŋ mì ndzawa i təv tar ka,
tàa viliŋ duwa tsa.
16 *I təv ana iye riŋ mandza ŋa i Tesalunike ya tekeɗe ka,
kàa zlakum iye sik diŋ.
Kurum na kà slirwimiŋaha duwa,
aɗaba dukw ana a sle aà iye ya.
17 Ama siŋgwe kurum tsa na a sèsiŋ i ŋget a ya.
Seyiŋ tsa ivaɗ,
gəzləŋ ga a ŋgeye a ba,
aɗaba i sər ka,
Mbulum a pise a kurum a ahəm,
agəra dukw ana kà vilwimiŋ taf masakəŋa ya.
18 Yàa ŋgat dukw ana kà slirwimiŋara nda ahər Apafaruditus a,
aka ndzera aà iye ya.
I samata dukw ata ka,
a za i gər a dukw ana a sle aà iye ya.
I dəba dukw ata kà slirwimiŋara ya ka,
duwa aka sle aà iye ilik asa tsa.
I ndze a ka,
barbarərra lele kuɗa.
Gà dukw ata ka,
gà ŋgwal ŋa ndzer,
kamala dukw taf masakəŋa ana ta vile a a Mbulum,
a ze a hwaŋŋa lele ika miɗ ŋgar,
a tsahən ahər hinne ya.
19 Mbulum ana i ge a meslire ŋgar a ka,
Əbay ŋa hinne,
ŋgaɓɓa.
A ta vile a kurum a gà dukw ana ti sleye aà kurum a tserdze ya.
A ta vile a ka,
nda ahər Yesuw Kiristi.
20 Gà mburma tə̀ zlə̀b à Mbulum Tsir kwa ka,
aà biybiy.
*Amin.
Mege wusa
21 Gwimiŋ wusa a gà na Yesuw Kiristi a pala tar i faka,
ti ne gà mburma ŋgar a ilik ilik tserdze.
Gà damər kwa ana tar mandza ŋa ɗa i təv ga i faha ya,
ta ge a kurumaha wusa mbaŋa.
22 Gà asiŋ gà mburma Mbulum ana ɗa i faha ya tserdze,
ta ge a kurumaha wusa mbaŋa asa.
Ndeyndey ŋana ka,
gà damər kwa ana ta ge a meslire i ga i bəra batsah Əbay gà Ruma ya.
23 Yesuw Kiristi BATSAH kwa ŋa mi pise a kurum ahəm ilik ilik tserdze.