Kulusiya 2

1 A sèsiŋ ka, ki sirwim a dər, meme na i mə̀r aba hinne aɗaba kurum gà mburma Mbulum ana i Kulusiya ya, nda gà na i Lawdikiya ya, dite nda gà asiŋ gà mburma ana pampam tàa ŋgetiŋ zukw tsiye ya. 2 I mə̀r aba kataya ka, aà məma a kurumaha à arəv, dite ka wayum ba ika magər kurum ilik ilik tserdze, ka gawum ba a təv ilik ŋa. A sèsiŋ asa mbaŋa ka, sərum dukw ana Mbulum a pàt a kwa dər ndərzayya aka gər Yesuw Kiristi ya lele, madzala gà gər kurum ma ta ge wakit wakit tsa, na dite ka, ŋgat a ge a kurum a ŋgwal dukw ana a za duwa tserdze ya. Dukw ata a pàt a kwa dər a ka, à Yesuw Kiristi. 3 Ŋgat na a vile a kwa a vatwa, na dite ki nekwe a gà ɓəzla metsehe, ki slekwe a aà masəra duwa aka gər Mbulum a. Metsehe ata ka, ŋgwal dukw ana lele, à sìkim a ba nda siŋgwe tsiye.

4 Iye ihər i tsik a kurum a gà dukw ata ka, aɗaba wura ma ta bana kurum nda himmè bazlam, nda wirwir tsa. 5 Sərum dər ka, ku mege iye riŋ i təv kurum tsa, iye diriŋ aà kurum a tekeɗe, madzala gà gər gà ka, a riŋ i təv kurum kəla pat. I ŋgaya ba hinne, aɗaba ana i tsaraka ka, ki zezemwim a Mbulum terwihhwe ndaka vatwa ŋa lele, dite gəzləŋ kurum ibam, a ndze a ɓəŋɓəŋ i təv megìse kurum ana kə̀ gəsum Yesuw Kiristi ya ya.

Gwim metsehe nda təv gà ɓəzla məbànà mburma nda pàrsa

6 Kinehe ka, kàa gəsum Yesuw Kiristi nda gəzləŋ kurum, ŋgat na a ne Batsah kurum ŋa ya. Aɗaba taŋa, mede kurum tekeɗe ma ge ka, kamala ana kurum gà mburma ŋgar, kurum riŋ mandza ŋa i təv ŋgar a. 7 Ndzum ka, i ahər ŋgar, kamala dizl ɗaf ana nduŋŋa meŋgè zlile ŋa i biye ya. Megìse kurum ana kə̀ gəsum ŋgat nda gəzləŋ a ka, ma da aka miɗ aka miɗ, ma ge ɓəŋɓəŋ lele. Gəsum ka, dukw ana ti ɗif a kurum dər a, dite ka, ki gwim kəkaaha a Mbulum kəla pat mbaŋa.

8 Gwim metsehe, aɗaba wura ma ta bana kurum nda madzala gà gər ŋgar ana taf masakəŋa, a gweɗe a kurum a ka, waytsa i sər duwa hinne ya tsa. Aɗaba metsehe ata a dara ka, i madzala gà gər fəla tar ana ta ge a ya, nda gà i təv gà Əbay sitene ana ika gər ahəɗ a ɗekɗek pəra, tsəka, a dara i təv Yesuw Kiristi ya tsa. 9 Kà dzum aà tar zləm tsəka, aɗaba ana madzala gà gər Mbulum tserdze ka, i ba Yesuw Kiristi ya. Dukw ana a ne i təv Mbulum tserdze ya ka, i təv Yesuw Kiristi tekeɗe, kamala taŋa ya mbaŋa kaɗəŋ. 10 Ŋgat ka, Əbay ika gər gà gawla Mbulum nda gà Əbay tar ŋa ana tserdze ya. Na kurum riŋ mandza ŋa i təv ilik ŋa nda ŋgat ka, gà dukw ana i təv ŋgar a ka, tàa ne gà biy kurum mbaŋa.

11 Kurum mandza ŋa i təv ilik ŋa nda gà ŋgat ka, Mbulum a ge a aà kurum a lambà ana mburma ti sir a dər ka, kurum kàa nwim gà mburma ŋgar a. Akahər ata piŋŋe ka, Mbulum a tsik a gà Yahuda, a gwaɗa a tar ka, tə sasa ba, na dite mburma ti sir a dər ka, tàa ne gà biy ŋgar a. Ama kinehe ka, lambà ana ta ge a aà kurum a ka, nda ahər mburma asa tsa. Ta ge a ka, nda təv Yesuw Kiristi. Ŋgat na a ndzəkara kurum i madzala gà gər kurum ana akahər ata a dawa à kurum a bakal a ya. 12 Aɗaba i təv ana ti tsilwiɓ à kurum a yam a ka, a ne kamala ana tàa le akaba kurum a biye, a təv ilik ŋa nda gà Yesuw Kiristi ya. Dite i təv ana kà dumara i yam a tekeɗe ka, a ne kamala ana kà mbəlum akabara i məməta ya nda gà ŋgat a təv ilik ŋa ya asa mbaŋa, aɗaba ana kàa gəsum ŋgat nda gəzləŋ, ka sərum dər ka, Mbulum na a mbəlara à ŋgat i məməta ya, dite ka sərum dər asa ka, ŋgat na a sle a aà məmbala à kurum i məməta ya mbaŋa ya. 13 Akahər ata piŋŋe ka, Mbulum a fə̀r aà kurum kamala ana kurum ka, gà məməta ŋa ya, agəra gà bakal kurum ana kì gewim a, dite aɗaba ana Yesuw Kiristi aka ge aà kurum lambà ŋgar ata zukw tsiye asa mbaŋa. Ama kinehe ka, Mbulum aka vəl a kurum mesife ana awiya ŋa ya i təv ilik ŋa nda gà Yesuw Kiristi. Ŋgat na a pəl à kwa i bakal a tserdze ya. 14 Akahər ata piŋŋe ka, seriye Mbulum aka gəs kwa, aɗaba ana kàa zazamakwa məpala ahəm ŋgar tsiye. Ama i dəba ŋa ya ka, Mbulum a taya iba wakita ana a wetse aɗəm bakal kwa ya, a ndwandway aà dizl magə̀làwà ŋa, kamala megweɗe ya: Seriye ika gər kwa asa tsa. 15 I təv ana Yesuw Kiristi a mət aà dizl magə̀làwà ŋa ata ya ka, ndzawndzaw a ndzək dukw ahər aà gà sitene ya, nda gà Əbay tar ana gà ndzəɗa tar a riŋ hinne ya tserdze. A mba aà tar. A ndaɗa aka tar hwarwa ika miɗ mburma tserdze.

Megìse ana Yesuw Kiristi a gəsara kwa ika vatwa ana

ŋgwala tsiye

16 Aɗaba taŋa, wura ilik ma ta pala a kurum ahəm agəra gà dukw ana ki zimwim a ya, kige tsa, ki swim a ya tsa. Dite wura ma gwaɗa a kurum ka, zazamum megirive aaha, kige tsa, megirive kəla kiye ana a mbəz a, nda gà bəla agəra pat mesifikaba ɓav tsa asa mbaŋa. 17 Aɗaba gà dukw ata tserdze ya ka, ti ne kamala mendzikiɗe ba duwa ya ɗekɗek pəra. Ti ɗifewa dər a mburma akahər ata ka, à dukw ana ndzer, a ta ge a ba aka miɗ mba ya. Dukw ndzer ŋa ata ka, Yesuw Kiristi à gər ŋgar. 18 Aɗaba taŋa, ka tə dzum zləm a dukw ana gà mburma ta gweɗe a ka, waytsa gà mə̀r ŋa, dite a sàs a tar metsike a kurum aà dukw ana ki gwim a ya tsa. Ama gà mburma ata ta gweɗe a ka, say məvəla ba mesewere are, nda mazàmbàɗà à gà gawla Mbulum, na ŋgwal ŋa ya. Dite ti tsikewa ka, aka gər dukw ana ta gwa, waytsa mi ŋgatar i sunwa ya ya kəla pat pəra. Medzìbe gà mburma ata ka, ŋgakŋgakəkka tə sə̀ŋgə̀rawa à ba tar taf masakəŋa, nda madzala gà gər gà mburma ana ika gər ahəɗ a ɗekɗek. 19 Tar ka, a sàs a tar mandza i təv ilik ŋa nda gà Yesuw Kiristi ana ŋgat BATSAH kwa ŋa ya tsa, tàa miyak dər. Ŋgat na a ne gər ŋa ya, dite gà mburma Mbulum ka, ti ne kamala ba ŋgar a. Gà na tar i ahər ŋgar a ka, a vile a ter a dukw ana a sle a ter a ya tserdze. Aɗaba tar ti ndze a ka, ndzəɗakkà nda gəzləŋ ilik, agəra ŋgat. Kamala taŋa ya, tì sìkèh a ika vatwa ŋgar kamala ana Mbulum a waya ya. A yaha gər a gà mburma ŋgar ata ka, na dite ti ne ba ilik nda gà ŋgat a, kamala ba mburma ana madzàvà ŋa ikaba nda gà mile ya.

20 Kurum kà sərum ka, kàa matum akaba nda gà Yesuw Kiristi a təv ilik ŋa. Kamala taŋa ya ka, gà sitene ta kwere a kurum asa tsa. Assàh, na kataya ana, aàmala na ki ndzwim a kamala kurum gà mburma ana ti zezem a gər ahəɗ a hiywe mba ya? Dite aàmala na ki zezemwim a gà məpala ahəm ata, ta gweɗe a kurum a ka: 21 Ka zlum dukw aaha tsa, kà mə̀ndzərum dukw ata tsa, dite bəla kà lə̀mum aà dukw ata tsa asa mbaŋa ya. 22 Na a dzeŋge a gà məpala ahəm ata ka, mburma ɗekɗek. A dara ka, i madzala gà gər tar a pəra, tsəka, i təv Mbulum a tsa. Aɗaba gà dukw ata tàa ləm ahər tserdze ya ka, ti ndze a tsa, ŋgulum ta ge a dər megemir pəra. 23 Malahalah ŋa, gà mburma ti dzele a ka, ta gweɗe a: Məpala ahəm ata ka, kamala dukw ana a vile a metsehe a mburma hinne ya, aɗaba ana ta fàr akaba ndzəɗa aà mazazama fəla tar terwihhwe, nda mahə̀nà à gər a bəɗ, nda gà məvəla ba mesewere are hinne mbaŋa. Ama tsaatsa, gà məpala ahəm ata ka, taf masakəŋa, biy na a ge a ŋgulum a mburma, dite ka, a kwere a dər meeweke ba ŋgar ɓav tsa.