Yesuw Kiristi aka ne à kurum gà awiya ŋa
3
1 Kurum kà sərum ka,
kàa mbalum akabara i məməta ya nda gà Yesuw Kiristi ya.
Aɗaba taŋa,
dzalum ka,
aka gà dukw ana i gər ŋa i Mbulum,
i təv ŋgar ana ŋgat mandza ŋa iɗəm a ya.
Ŋgat ka,
a riŋ mandza ŋa ika tseke ahər mezime Mbulum.
2 Kamala taŋa ya,
dzalum gà gər ka,
aka gà dukw ana tar riŋ i təv Mbulum a,
tsəka,
aka dukw ana ika gər ahəɗ a tsa.
3 Aɗaba kurum kà sərum ka,
kàa matum.
Ama Mbulum aka mbəlara à kurum i məməta ya.
Dite mesife kurum ana awiya ŋa ya tekeɗe,
ar ka,
makàhà ŋa i təv Yesuw Kiristi i mbulum.
4 Ndzer kaɗəŋ,
Yesuw Kiristi na a ne mesife kurum a.
Aləka i təv ana à mère a ya ka,
kurum tekeɗe,
ta ŋget a kurum a nda gà ŋgat,
i təv ndzəɗa ŋgar ana tì zlibe a dər a mbaŋa.
5 Aɗaba taŋa,
miyakum à dukw ana ŋgwala tsa,
kà dzalawum i gəzləŋ kurum a.
Fə̀rum aà dukw ata ka,
kamala ana aka mət,
a sle a aà makwàrà kurum asa tsiye ya.
Miyakum à mege mezelme nda təv muva,
nda mege dukw hwarwa ana pampam a,
nda gà ka ti nwim gà mìbìylà ŋa tsa mbaŋa.
Ama meeweke ba kurum ma ta kwara kurum asa tsidze.
Izittè ka ta gwim are aka dukw mburma tsa asa mbaŋa,
aɗaba ana kàa gwim are aka duwa kamala taŋa ya ka,
dukw ata a ne a kamala mbulum kurum a.
6 Agəra gà dukw ata gà ŋgwala tsiye ka,
Mbulum a ta gis a dər gà mburma ana ta gəs ahər ahəm tsiye tserdze,
a seriye.
7 Akahər ata ka,
kurum tekeɗe,
kàa gwim medzibe gà dukw ata mbaŋa.
8 Ama kinehe ka,
miyakum aba à gà dukw ata tserdze ya:
Gà matsəɓatsəɓ nda gà dukw ana ta wir aà kurum a tərfə̀ɗ tərfə̀ɗ a,
nda mene are a gà misle ŋgiɗ.
Ka tə ndavayum a gà misle ŋgiɗ tsa,
dite ka tsikwim manəsa bazlam aà wura tsa asa mbaŋa.
9 Ka tə sasayum aàba pàrsa tsa,
aɗaba kà sərum ka,
kàa miyakum aba à mendze kurum ana akahər ata ya,
nda gà dukw ana kà gewim tserdze ya.
Aɗaba kwìtsìɓ kàa yum ikaba dukw ana miviya ŋa,
kamala miviya petek a.
10 Kàa ŋgatum mede ana awiya ŋa ya ivaɗ.
A ne ka,
kamala awiya petek ana ŋgulàɗə̀ɗɗa kà dzum akaba ya.
Mbulum na a vəl a kurum madzala gà gər ata ya.
A riŋ a ne a dər awiya ŋa kəla pat,
na dite ki nwim a kamala ŋgat a ya.
Dite ka,
ki ti sirwim a ŋgat lele,
à sìkèh a aka miɗ aka miɗ mbaŋa.
11 Aɗaba taŋa,
duwa a riŋ na à dzik a ikaba kurum a pampam a asa tsa.
Gà Yahuda nda gà na tar gà Yahuda tsiye ka,
tar ka,
ilik.
Gà mburma ana tə sasa ba ya,
nda gà na tàa sasa ba tsiye tekeɗe,
pam tsa asa.
Na mege kurum ka,
gà slele,
kige tsa,
gà mburma ana i kusak tə sər duwa tsiye,
nda gà bəla gà ɓele,
kige tsa gà mburma ana ti ziwe a gər tar a tekeɗe,
ar ka,
pampam tsa asa mbaŋa.
Mbulum à dzèye a ikaba tar a pampam asa tsəka,
aɗaba ana Yesuw Kiristi a kwere a tar tserdze ya.
Dite ŋgat asa na a riŋ mandza ŋa i gəzləŋ gà mburma ata a kwere a tar,
ti ne gà biy ŋgar a.
12 Mə məts a kurum gər tsa:
Mbulum a pala kurum,
na dite kà nwim gà biy ŋgar a.
Ŋgat na a waya kurum a ya.
Aɗaba taŋa,
say mede kurum ma ge ka,
ŋgwal ŋa,
kamala i gà mburma ŋgar ana a ne à tar gà awiya ŋa ya.
Gà asiŋ gà misle ŋgiɗ ti ndze a kurum are tsehe,
kə̀ gəsum ba lele,
Hənum ba à gər a bəɗ,
ki gwim ŋgwal a gà misle ŋgiɗ,
dite kə̀ gəsum gəzləŋ mbaŋa.
13 Sərum ba ika magər kurum lele.
Na bəla wura aka ge a kurum dukw ana ŋgwal ŋa tsiye ka,
ka ta mumar aɗəm à bakal ŋa tsa,
pə̀lumar dər seyiŋ ivaɗ.
Pə̀lum a ba à bakal kamala ana BATSAH kwa ŋa a pəl a kurum dər a mbaŋa.
14 Ndeyndey ŋa ka,
wayum ba ika magər kurum ilik ilik tserdze.
Aɗaba na kàa wayum ba kataya ka,
ki ndzwim a i təv ilik ŋa ndìɓèkke lele nda gəzləŋ ilik ŋa.
15 Matasla yam ana Yesuw Kiristi a vəl a kurum a ka,
mà rah a gəzləŋ kurum lele.
Aɗaba Mbulum a zal a kurum ka,
na dite kà nwim ba ilik,
ki ŋgetwime a mandza zayzay ata ya.
Gwim kəkaaha a Mbulum kəla pat.
16 Vəlum vatwa a bazlam Yesuw Kiristi,
tsìsl mà rah a gəzləŋ kurum lele,
ka dzalum aaka gà gər hiywe.
Ɗifwim aba à vatwa ika magər kurum.
Ɗifwim aba dər aba nda zèyezèye,
kamala ana Mbulum a vəl a kurum metsehe ya.
Zàmbaɗum à Mbulum nda gà dimis pampam.
Làhum gà dimis ana Mezite Mesife ŋgar a ɗif a kurum dər a.
Làhum gà dimis ata a Mbulum,
nda megèr kəkaaha i gəzləŋ kurum hinne.
17 Dukw ana ki gwim a ya,
ndəna ki tsikwim a tserdze ya ka,
gwim nda zləm Yesuw Kiristi BATSAH kwa ŋa.
Ki gwim kəkaaha a Mbulum Tsir kwa nda zləm ŋgar mbaŋa.
Meme na gà mburma Mbulum ti ndze a ika magər tar a
18 A kurum gà məkəs,
gəsum ahəm aà gà zal kurum lele,
aɗaba taŋa ka,
a tsahən aà BATSAH kwa ŋa.
19 Kurum gà zal tekeɗe,
wayum gà məkəs kurum lele mbaŋa,
kə kwarum akaba tar tsa.
20 A kurum gà ɓəza tekeɗe,
gəsum ahəm aà gà tsir kurum,
ku mege i təv dukula ya tserdze.
Aɗaba na kàa gwim kataya ka,
à tsehin a aà BATSAH kwa ŋa.
21 A kurum gà tsir gà ɓəza mbaŋa ka,
ka ti ɗifewim à metsehe a gà ɓəza kurum nda ndzəɗa tsa,
aɗaba ti ndze a sleɓerekrek.
22 A kurum gà ɓele ibam,
gəsum ahəm aà gà ɓəzla ga kurum i təv dukw ana ki gwim a ya tserdze.
Ka ta gwim a tar megemir ka,
tsèŋgèl tsèŋgèl i təv are tar a ɗekɗek tsa,
na dite ka,
ti zlibe a à kurum a ya.
Ama gwim a tar meslire ka,
terwihhwe nda ndzer ŋa,
aɗaba ana kurum ihər ki zlìbwim a à BATSAH kwa ŋa ya.
23 Mege megemir ana ki gwim a ya tserdze tekeɗe,
gwim ka,
nda gəzləŋ ilik.
Gwim ka,
kamala ana ki gwim a meslire batsah kwa ŋa ya,
tsəka,
a mburma tsa.
24 Kurum kà sərum ka,
ŋgat na a ta vile a kurum a dukw maya ba,
aɗaba megemir kurum a.
Ki ta ŋgetwime a dukw ana a tike aba ya,
i gər ŋa i Mbulum,
a gwa,
i ta vile a a gà mburma gà ya.
Ama wele batsah ŋa ata ki gwim a meslire ŋgar a ka,
Yesuw Kiristi.
25 Sərum dər,
gà mburma ana ta ge a dukw ana ŋgwala tsiye ka,
Mbulum a misek à ter a tsa,
seriye ŋgar à gis a tar.
Ku mege ŋgat weke tekeɗe ka,
pam tsa.
Aɗaba Mbulum ka,
a wele a ikaba mburma ya tsa.