4
1 Kurum gà ɓəzla ga tekeɗe ka,
gəsum gà ɓele kurum ndaka vatwa ŋa lele,
kà fə̀rum aà tar ka,
kamala za ya tsa.
Aɗaba kurum kà sərum,
kurum tekeɗe ka,
Batsah kurum ŋa a riŋ i Mbulum,
à gis a kurum lele mbaŋa.
Hamum a Mbulum kəla pat, dite ka nwim gà ɓəzla metsehe
2 Ku mege ndeɗime tekeɗe ka,
ndiɗikwime gər aà mahàmà a Mbulum,
ka ti yum ba tsidze.
I təv ana ki hemwimer a ya ka,
gwimer kəkaaha mbaŋa,
3 dite hamumar aɗaba mə̀r asa.
Hamumar ka,
dite mə vəl a mə̀r vatwa aà metsìkè bazlam ŋgar a mburma,
dite mìi ɗif a ter a à dukw ana makàhà ŋa aka gər Yesuw Kiristi ya parakka lele.
Aɗaba kurum kà sərum,
agəra ana i ɗif a dər kamala taŋa ya,
na kinehe ta gəs iye a daŋgay a.
4 Hamumar,
na dite i sle a aà metsìkè bazlam ata a mburma ndərzayya lele ya.
Aɗaba taŋa na a ne megemir gà ya.
5 Gwim metsehe aɗaba mede kurum ana ki dwim a ya.
Ma ge ka,
ŋgwal ŋa lele,
na nda təv gà mburma ana tàa gəs Mbulum nda gəzləŋ zukw tsiye.
Ku mege ndeɗime,
megìse kurum mə̀ pàt,
ki gwim taŋa hiywe.
6 Bazlam kurum ana ki tsikwim a ter a ya,
ma ge ka,
himmè lifeɗiɗe lele,
dite ka sərum dər mbaŋa ka,
meme na ki fèfilwim a ter aaka a lele,
a gà na ta wiz aà kurum a bazlam a ya.
Mege wusa
7 Tikikus na a me a kurum a dər tserdze ka,
meme na i ndza kinehe kuɗa ya ya.
Ŋgat ka,
damər kwa ana kà wayakwa ŋgat hinne ya.
Aɗaba a riŋ a ge a megemir BATSAH kwa ŋa ka,
nda gəzləŋ ilik mbaŋa.
Mìi ge a megemir ka,
mə̀r məma,
aɗaba Yesuw Kiristi.
8 Iye ihər i slirehe a ŋgat a təv kurum,
aà metsìkè a kurum ka,
meme na i ndza ɗa ya,
dite ka,
aà məma a kurumaha à arəv asa mbaŋa.
9 I slirehe a tar ka,
tar nda Unesimus,
kəla gà kwite kurum.
Ŋgat tekeɗe ka,
damər kwa ana mandərkwasla kwa,
kà wayakwa ŋgat lele ya,
a riŋ zezem a Yesuw Kiristi ka,
nda gəzləŋ ilik mbaŋa.
Tar sula məma,
ti tsik a kurum a dukw ana a ge ɗa ba i faha ya.
10 Aristarkus ana mə̀r mandza ŋa ɗa i daŋgay məma ya,
a ge a kurumaha wusa mbaŋa.
Dite Markus,
kəla damər Barnabas tekeɗe,
a ge a kurumaha wusa mbaŋa asa.
Na aka ndzeha a təv kurum ka,
gəsum ŋgat lele.
Aɗaba Yàa mbər metsike a kurumaha aba ya piŋŋe,
dukw ana kà gwim agəra ŋgat a.
11 Yesuw ana tə zalar Yustus a,
a ge a kurumaha wusa mbaŋa.
Gà mburma ata makər a ɗekɗek,
na tar ika magər gà Yahuda,
tar riŋ mìi ge akaba a megemir nda gà iye,
aɗaba mekwere Əbay Mbulum a.
Tàa zlak iye ka,
hinne.
12 Apafəras ana a dara i kwite kurum a tekeɗe,
a ge a kurumaha wusa asa mbaŋa.
Ŋgat ka,
mala megemir Yesuw Kiristi.
Ku mege ndeɗime tekeɗe ka,
a hamawa a Mbulum aɗaba kurum.
A mə̀rawa aba ka,
hinne.
A hamawa ka,
na dite ki ndzwim a ɓəŋɓəŋ lele,
ki nwim a gà bàba gà mburma ika miɗ Mbulum,
dite ki sirwim a dukw ana Mbulum a waya ya lele,
ki dzwìmer a zləm a.
13 Iye ka,
Yàa ŋgatar nda are gà,
meme na a riŋ a ge a megemir hinne,
aɗaba kurum,
dite agəra gà mburma Mbulum ana i Lawdikiya ya,
nda gà na i Hiyerapulis a mbaŋa ya.
14 Luka,
mala dàkwtar ana kà wayakwa ŋgat hinne ya,
tar nda Demas ta ge a kurumaha wusa asa mbaŋa.
15 Ki gwim wusa a gà mburma Mbulum ana i Lawdikiya ya.
Dite ki gwim wusa a məkəs ana tə zalar Nimfa ya,
nda gà mburma Mbulum ana ti yahawaba gər a ma ŋgar a tserdze mbaŋa.
16 Na kàa dzeŋgwim wakita aaha ka,
ka slərumaha a gà mburma Mbulum ana i Lawdikiya ya,
ti dzeŋge mbaŋa te.
Dite kurum tekeɗe ibam,
ki ti dzeŋgwim a wakita gà ana i wetseha a gà Lawdikiya,
ti slir a kurumehe a ya mbaŋa.
17 Gweɗwimiŋ a Arkipus ka,
mə̀ mə̀r aba,
mà ndəv à megemir ana Yesuw Kiristi a vəlar a ahər a.
18 Iye Pul,
nda ahər gà ŋa,
na naha,
i tsìmìɗ dər,
i wetse a kurumaha bazlam aaha ya.
I ge a kurumaha wusa.
Mə̀ məts a kurum gər tsa,
na iye ɗa mandza ŋa i daŋgay gədzə̀zlzla ya.
Mbulum ma ge a kurum ŋgwal tserdze.