Filipiya 2

Fə̀rum aà Yesuw, ka zazamum ŋgat

1 Kurum kà sərum ka, kurum riŋ mandza ŋa i təv ilik ŋa nda gà Yesuw Kiristi. Kamala taŋa ya na a vile a kurum a ndzəɗa a gəzləŋ kurum ɓəŋɓəŋ a. Meweye ŋgar ana a waya kurum a, na à me aà kurum a à arəv a. Kà sərum, kurum riŋ mandza ŋa ka, ndìɓèkke i təv ilik ŋa nda gà Mezite Mesife Mbulum. Kwa ihər ki weyekwe a ba ilik ilik tserdze ika magər kwa, dite na gà mburma ti ndzekwe a are tsehe mbaŋa ya. 2 Aɗaba taŋa na kinehe i ge a kurum a kamkam a: Wayum ba ika magər kurum ilik ilik tserdze. Kamala taŋa ya, ndzum ka, madzala gà gər kurum ma ge ka, ilik. Bazlam kurum tekeɗe, ma ge ka, ilik mbaŋa. Na kàa gwim kamala taŋa ya ka, i ŋgeye a ba i gəzləŋ ga ndzəɗakkà. 3 Ka tə dzalum ka, ba kurum ɗekɗek tsa. Dite ka tə sə̀ŋgə̀rum à ba kurum ɓav tsa asa. Hənum à gər kurum a bəɗ tiɓìzl ivaɗ. Fə̀rum aà gà asiŋ gà misle ŋgiɗ kamala ana tar ka, gà ŋgwal ŋa hinne, tə za dər kurum a. 4 Ka ta gwim dukw ana a ge a ŋgulum a ba kurum a ɗekɗek tsa. Ama ki yehwim a ŋgwal ahəm ndaka təv gà misle ŋgiɗ mbaŋa. 5 Gwim gà dukw ata ka, kəla pat, kamala madzala gà gər Yesuw Kiristi ana a waya ya.

6 Aɗaba ku mege tar nda Mbulum ilik tekeɗe ka,

a sasar na a ne a kamala Mbulum a tsa.

7 Aka dzala aka təv mendze ata ŋgwal ŋa ya tsidze.

A waya ka, a ge a meslire ivaɗ.

Ta wa ŋgat ka,

kamala ana ta wa mburma tserdze ya mbaŋa.

8 I təv ana ŋgat a ne mburma ya ka,

a həna à gər ŋgar a bəɗ, a gəs ahəm aà Mbulum

tsikw haa a təv ana a mət a.

Məməta ŋgar ata a mət a ka,

tə ndwandway ŋgat aà dizl magə̀làwà ŋa

kamala ana ŋgat ka, mala makə̀ɗà mburma ya.

9 Aɗaba taŋa na Mbulum a zla ŋgat,

a səkah à ŋgat ika gər gà duwa ya tserdze ya.

Dite a ɗer zləm ana a za gà zləm

gà dukw ŋgiɗ tserdze ya mbaŋa asa.

10 A ge dər kataya ka,

na dite gà dukw ana a ge tar tserdze ya,

tàa tsaraka zləm Yesuw ka, ti dere a,

tì dzer a gurmits a bəɗ, tì zèmbeɗe a à ŋgat,

ku mege gà na i gəza mbulum,

nda gà na ika gər ahəɗ a, kige tsa,

gà na i təv gà məməta i biye tekeɗe ya.

11 Ku weke a gweɗe a parakka:

«Yesuw Kiristi na Batsah ŋa ika gər

gà duwa ya tserdze ya.» Kamala taŋa ya,

tì zlibe a à Mbulum Tsir ŋgar mbaŋa.

Gà mburma Mbulum ka, ti ne təv dzaydzay ŋa

12 A kurum gà masla gà ana i waya kurum hinne ya. Agəra ana kà sərum meme na Yesuw a gəs ahəm aà Mbulum a ka, kurum tekeɗe, gəsum ahər mbaŋa. Akahər ana iye i təv kurum a ka, kàa gəsum ahər ahəm lele. Ama kinehe, iye riŋ i təv kurum asa tsa tekeɗe ka, ki sìkèhwim a à metsehe, ki gwim a kataya hiywe. Kamala megweɗe ya: Mimbile ana Mbulum a mbəl à kurum a ka, say ki gwim a megemir ŋa nda ahər kurum ŋa mbaŋa. Ki gwim a ka, nda magəɗa Mbulum i ba slàɓ slàɓ, ki mirwim ahər aba a dzəŋdzəŋ lele. 13 Aɗaba Mbulum a riŋ a ge a megemir i gəzləŋ kurum, na dite ki gwim a dukw ana a tsehin ahər a ya. A vile a kurum a ndzəɗa aà megemir ana ki gwim a ya mbaŋa.

14 I huɗ megemir kurum ana ki gwim a tserdze ya ka, ka sayum ahəm aà Mbulum tsa, kà mbetswim aba ahəm nda təv ŋgar ŋgùrà ŋgùrà nda maàga tsa asa mbaŋa, 15 na dite ka, ki ndzwim a tsəɗaŋŋa, bakal a ge a i təv kurum tsidze ya. Ki nwim a gà ɓəza Mbulum ana ta ge a bakal asa tsiye ya. Kurum riŋ mandza ŋa ka, i liwiŋ gà ɓəzla məbànà mburma nda gà na ta ge a dukw ana ŋgwal ŋa tsa ika gər ahəɗ aaha ya. Kurum ika magər tar ka, kamala gà màwùsàwùs ana dzaydzay tì div a aà gəza mbulum ndaavəɗ a. 16 Dite kurum asa mbaŋa na ki tsikwim a ter a bazlam ana a vile a mesife a mburma ya ya. Na kàa gwim kamala taŋa ya ka, a pat ana Yesuw Kiristi à mère a ya ka, i ŋgeye a ba ika miɗ ŋgar, aɗaba kurum. Aɗaba i sir a dər, megemir gà ana i ge nda mawura ba ŋa tserdze ya ka, i ya ba ka, taf masakəŋa tsa.

17 Megìse kurum ana kə̀ gəsum Mbulum a ka, a ne kamala dukw taf masakəŋa ana kà kə̀ɗumar a. Ama na bəla ta kiɗ a iye ka, a ne a kamala ana i dzar à məmbəz gà kamala dukw taf masakəŋana ya mbaŋa. I səkah dər aaka ka, aka biy kurum ana kà vəlumar a. Na kataya ka, i ta ŋgeye a ba hinne, dite maŋgayaba ata a ge a i təv kurum mbaŋa. 18 Kurum tekeɗe, ŋgeywim ba. Kamala taŋa ya, ki ŋgeyekwe a ba tserdze a təv ilik ŋa.

Gà Timute nda Apafaruditus

19 Na Yesuw BATSAH kwa ŋa a waya ka, i dzala, i gwa, i ti slirehe a Timute a təv kurum bise, na dite i təv ana à mère a a təv ga ya ka, a dere a, a ɗifiŋ a dər, meme na kàa ndzum a. Dite à mìŋehe a à arəv kamala na a mà a kurum dərraha ya mbaŋa. 20 Wura a riŋ i faha na a dzele a gà gər aka megemir Yesuw Kiristi kamala iye ya ilik tsidze, say ŋgat ilik. Ŋgat ka, a waya mazlàkà kurum ndzer. 21 Gà asiŋ gà mburma tserdze tə dzalawa ka, ba tar ɗekɗek, tsəka, tə dzalawa aka megemir Yesuw Kiristi tsa. 22 Ama Timute ka, kà sərum mede ŋgar ana ŋgwal ŋa ya. Mər nda ŋgat məma, mì tsikewa bazlam ŋgwal ŋa ana biy Yesuw Kiristi ya, a mburma. A zlàkawa iye aà megemir kamala kəla ana à zlèk a tsir ŋgar a. 23 Kamala taŋa ya, i dzala ka, i gwa, na tàa sèsiŋ ikaba seriye ga aaha ya tsara ka, i slirehe a ŋgat a təv kurum a faka. 24 Iye tekeɗe, i sər, na BATSAH kwa ŋa aka waya ka, i ti dehe a a təv kurum bise mbaŋa.

25 Kurum ka sərum damər kwa Apafaruditus, dite ŋgat mala meslire kurum ana kà slərumara ŋgat a təv ga ya ya, na dite à zlèk a iye i təv dukw ana a slewa aà iye hinne ya. Iye nda ŋgat ka, maa ge akaba megemir hinne i təv ilik ŋa. Maa ge akaba guvəl məma, aɗaba Mbulum. Ama kinehe, i gwa ka, ŋgulum i slirehe a ŋgat, i me a dərraha a təv kurum. 26 Aɗaba a waya madaha a təv kurum hinne, gər aka wiser, ki kìvwimeriŋa, aɗaba ana ŋgat a tsaraka ka, ta gwa là, kàa tsarakum dukw məməta ŋgar aaha a gəs ɗa ŋgat a ya. 27 Ama dukw məməta ka, aka gəs ŋgat kaɗəŋ, aka à mimìte dər. Zàkwayiya ka, a ndze are tsehe a Mbulum, tsèkwìr aka mbəl. Ama ka, ŋgat ɗekɗek tsa na a ndzer are tsehe ya. Iye tekeɗe ka, Yàa ndzer are tsehe mbaŋa. A mbəl à ŋgat ka, aɗaba mesewere are ŋgiɗ ma tə səkah aka gər gà asa tsa. 28 Aɗaba taŋa i waya hinne na i mèhe a à ŋgat a təv kurum bise ya. Aləka kàa ŋgatumar, aka màha ka, ki ŋgeywim a ba, na dite i dəba ŋa ya, iye tekeɗe ka, i dzele a duwa asa tsiye. 29 Kamala taŋa ya, na bəla aləka aka ndzeha ka, gəsum ŋgat nda maŋgayaba lele, aɗaba ŋgat ka, damər kurum ana ika vatwa BATSAH kwa ŋa ya. Zlə̀bum à medzibe gà mburma ata kamala ŋgat a ya. 30 Aɗaba a zeha ka, kwizikw, aka à mimìte, agəra mege megemir Yesuw Kiristi. A dzala i gər ŋgar ka, a gwa, ku mege i mite a tekeɗe ka, à zlèk a iye. Kamala taŋa ya, a zla təv mendze ata ka, avukw kurum, na dite à ndìv a à mege megemir ŋa kamala ana zləmana kurum ki zlèkwim a iye ya.