Mege megemir gà mburma Mbulum ka, ilik
3
1 Gà damər gà,
akahər ana iye riŋ ika magər kurum a ka,
i fàfəlawa a kurum kamala ana i fèfil a ka,
a gà mburma ana tàa ŋgat Mezite Mesife Mbulum a gəzləŋ tar a tsa.
Aɗaba kurum akahər ata ka,
kamala gà ɓəza ya mba,
na i təv megìse kurum ana kə̀ gəsum Yesuw Kiristi ya,
agəra ana ki zezemwim a dukw gər ahəɗ a.
2 Aɗaba taŋa i dzeŋgewa a kurum ka,
dukw ana kuɗa ihər tsiye pəra,
tsəka,
Yàa dzeŋge a kurum dukw ana mawùràba ŋa ya tsidze.
Kà nwim ka,
kamala gà ɓəza ndirkiz ana ta vile a ter a ka,
awah ɗekɗek,
ɗaf ka,
ti sle a aà mazəma ŋa zukw tsiye.
Ama haa kinehe tekeɗe ka,
kà slwim aà mazəma ŋa zukw tsa.
3 Aɗaba kurum ka,
hiywe kamala gà mburma ana ti dzele a aka dukw gər ahəɗ a mba.
Kurum ihər ki gwim a are aka gà misle ŋgiɗ ika magər kurum,
dite ki geywim aàba a maàga asa mbaŋa dze ana,
meme?
Na kurum ihər ki gwim a kataya asa ana,
taŋa ana,
kamala gà misle ŋgiɗ ana ti zezem a gər ahəɗ mba ya tsiye.
Kaɗəŋ,
taŋa ka,
kà zùm aba nda gà tar tsidze.
4 Na wura a gweɗe a ka,
a zezem a iye Pul,
dite misle ŋgiɗ pam asa,
a zezem a Apalus ana,
taŋa ana,
kurum kà nwim ka,
kamala gà asiŋ gà misle ŋgiɗ ana taf masakəŋa ya tsiye?
5 Apalus dze ana,
weke?
Dite iye Pul ana,
weke ɗar ɓav a?
Mər ka,
gà ɓəzla megemir Mbulum məfara ŋa,
a slər mə̀r a təv kurum,
na dite ka,
ki giswim a Yesuw Kiristi nda gəzləŋ kurum a ɗekɗek pəra.
Kərga taŋa ya,
mìi ge a ka,
ku weke,
kamala ana Mbulum a ɗifer dər a.
6 Mər mì ne ka,
kamala gà ɓəzla mifìte ya.
Iye na i dza ba aà metsìkè bazlam Mbulum ika magər kurum,
kamala wele ana a dzava duwa ya.
Dite Apalus ŋgat ka,
a daha,
a səkah à megemir Mbulum ika magər kurum asa mbaŋa,
kamala wele ana a dze a yam aà dukw ata ya,
dite ka,
ma ge ba ya.
Ama Mbulum na mala meɗè dər ŋa,
dite na a ge a ba ya.
7 Kamala taŋa ya,
wele ana a dzeve a duwa ya ka,
a sle duwa tsa.
Dite wele ana à dze ahər a yam a tekeɗe,
a sle duwa ɓav tsa.
Say Mbulum ilik na a sle a aà duwa ya.
Aɗaba ŋgat na a sìkèh a dər,
dite a ge a ba ya.
8 Gà wele ana a dzeve a duwa ya,
nda wele ana à dze ahər a yam a ka,
tar ka,
ilik.
Ama kəla ka,
Mbulum a vile a ter a dukw mayaba tar,
ku weke a ŋget a ka,
kamala biy megemir ŋgar ana a ge ya.
9 Kamala taŋa ya,
mə̀r nda Apalus ka,
mì gewa akaba mege megemir Mbulum i təv ilik ŋa məma,
mə̀r gà ɓəzla mege megemir ŋgar.
Ama kurum kà nwim ka,
kamala guvah Mbulum a.
Dite kurum kà nwim asa ka,
kamala ga ana Mbulum à zlèzle a ya asa mbaŋa.
10 Mbulum a giŋ ŋgwal ŋa hinne,
na dite a slər iye,
i dzar ba aà megemir ŋgar ika magər kurum a.
Iye i ne ka,
kamala wur ana à zlèzle a ga ka,
a sər are mazlazla ŋa ya.
I dzàha ka,
ɓəŋɓəŋ lele.
Ama kinehe ka,
gà misle ŋgiɗ ti zlèzl aaka a kuɗa.
Ku weke na à zlèzl aaka a ka,
ma ge metsehe lele,
na dite a de a ndaka vatwa ŋa ya.
11 Mbulum aka mbər metike aɗəm Yesuw Kiristi,
a ne kamala ga ata ya.
Wura ilik a sle aà madzàha biy ŋgiɗ pam asa tsidze.
12 Ama madzàha ga ata ka,
gà misle ŋgiɗ tì zlèzl aaka a nda gura,
gà biy ŋgiɗ nda ndzemde ana à wìwizl a are ya,
gà biy ŋgiɗ asa ka,
nda kur ana tsakala ŋa hinne,
à sìkim a ba tsiye.
Ama gà misle ŋgiɗ ibam,
tì dze aaka a dizl,
kige tsa,
ti ndir ahər a vəza,
dite gà naha asa ka,
nda gùvùkw.
13 Ama pat ana Mbulum a ta ge a seriye a gà mburma ya ka,
ku mege weke,
dukw megemir ŋgar à pèt a aba ndərzayya lele.
Aɗaba a pat ata ka,
Mbulum a ti dzik a à megemir gà mburma ŋgar tserdze nda akwa,
dite ku weke a sir a dər kuɗa,
wànà megemir ana a gewa ya ana,
ŋgwal ŋa ya,
tsəna,
ŋgwal ŋa tsiye ya.
14 Wur ana akwa ata à gis a ga ŋgar ana a ge ya tsəka,
a ta ŋget a dukw mayaba ŋgar lele.
15 Ama na bəla akwa ata ndìrɓek à gis a ga ŋgar ata a ge ya ka,
a ta ŋget a dukw mayaba ŋgar tsidze.
Mbulum ka,
a ta mbil a à ŋgat dukw ŋgar,
ama ŋgat kəla ka,
kamala wele ana pitsew a bera i akwa ya gireŋ a.
16 Kurum kà sərum te tsiye,
kurum gà mburma Mbulum,
kà nwim ka,
kamala ga Mbulum batsah ŋana ŋgat mandza ŋa iɗəm,
dite ka,
Mezite Mesife ŋgar ibam,
a riŋ mandza ŋa i gəzləŋ kurum a?
17 Wur ana a nis a à ga Mbulum batsah ŋa ata ya ka,
Mbulum tekeɗe,
a dzeye a à ŋgat mbaŋa,
aɗaba ga ata ka,
tsəɗaŋŋa biy ŋgar ŋa.
Na a ne ga ata ŋgat mandza ŋa iɗəm a ka,
kurum.
Wura ma tə sə̀ŋgə̀r à ba ŋgar ika magər kurum tsa
18 Wura ilik ma ta bana ba ŋgar tsa.
Na wura a gweɗe a:
Waytsa iye ka,
mala metsehe kamala biy gà mburma gər ahəɗ aaha ta ŋgat a ka,
ma ne kamala wur ana a sər duwa tsiye,
ika magər kurum a ivaɗ,
na dite ka,
a ŋget a metsehe ndzer ŋana ya.
19 *I tsik kataya ka,
aɗaba dukw ana gà mburma gər ahəɗ ti tsik ahər,
ta gwa:
Ŋgwal metsehe iɗəm a ka,
Mbulum à fir ahər a kamala dukw falày taf masakəŋa ya.
Ar ka,
kamala ana mewetse ŋa a riŋ i wakita Mbulum ka,
ta gwa:
«Mbulum ka,
à gis a gà ɓəzla metsehe a seriye i huɗ wirwir tar ana ta geyewa ya.»
20 *Ika tseke ŋgiɗ mewetse ŋa a riŋ asa mbaŋa ka,
ta gwa:
«Əbay Mbulum a sər madzala gà gər gà ɓəzla metsehe.
A sər,
metsehe tar ata ka,
taf masakəŋa.»
21 Aɗaba taŋa,
iye ihər i tsik a kurum ŋa:
Wura ilik ma ge aba zlapa nda mburma i təv dukw ana wele ata a ge a ya tsa.
Sərum dər,
dukw tserdze ka,
i ahər kurum ivaɗ.
22 Mər nda Apalus nda gà Piyer ka,
mì ne gà biy kurum,
ku mege gər ahəɗ,
ku mege kwiye i təv məməta nda təv mesife ana a ndze a ya tekeɗe,
i ahər kurum mbaŋa.
Nda gà ku mege gà dukw ana ta ge a ba kinehe ya,
ndəna a ta ge a ba aka miɗ mba ya tekeɗe,
taŋa tserdze ti ne gà biy kurum mbaŋa asa.
23 Ama kurum ka,
gà mburma Yesuw Kiristi,
dite Yesuw Kiristi tekeɗe ka,
biy Mbulum mbaŋa asa.