Ku weke ma ge zlapa ka, à Mbulum ilik
4
1 A sèsiŋ ka,
ku weke ma sər dər,
mə̀r ka,
gà ɓəzla megemir Yesuw Kiristi.
Aɗaba Mbulum a dza dukw ŋgar ana makàhà ŋa akahər ata ya ka,
ahər a mə̀r,
na dite mìi ɗif a dər a mburma parzakkà ya.
2 Ama kəla ka,
wele ana mala ga ŋgar aka məsakar à duwa a ahər a ka,
a waya ŋgat ma ne ka,
mala ndzer.
3 Iye ka,
dukw ana ki dzelwim a nda təv ga ya ka,
aka giŋ i gər a ndzìhhe tə tsa.
Ku mege gà misle ŋgiɗ a sàs a tar mesire dər,
wànà Yàa ge kalkal a,
tsəna,
Yàa ge tsiye tekeɗe ya ka,
i dzele a duwa ɓav tsa.
Ku mege iye ŋa tekeɗe,
i sle aà megweɗe a ka,
Yàa ge megemir kalkal,
kige tsa,
Yàa ge tsa tekeɗe ka,
i sle a tsa.
4 Ama iye ka,
i sər bakal ana ika gər gà ya tsa kəla.
Kamala megweɗe ya ka,
iye mala ndzer.
Ama i sər ɓav tsa.
Yesuw BATSAH kwa ŋa ilik na a ta giŋ a seriye ga ya,
tsəka,
misle ŋgiɗ a riŋ tsa.
5 Aɗaba taŋa,
ka ta geywim aba seriye ika magər kurum ŋgaŋ ŋgaŋ kataya tsara tsa.
Vavum pat ana Batsah kwa a tike məpaslà ahər ŋa ya ivaɗ.
A pat ana aka màra ya ka,
ŋgat na à pèt a à gà dukw ana makàhà ŋa i luvuŋ kinehe ya parzakkà lele ya.
Dite gà dukw ana gà mburma ti dzele a i gà gəzləŋ tar a tekeɗe ka,
a ta pèt a aba parakka lele mbaŋa.
A pat ata ka,
Mbulum a ti zlibe a à ku mege weke kalkal kamala megemir ŋgar ana a ge ya.
6 Gà damər gà,
i tsik gà bazlam ata aka gər mə̀r nda Apalus ka,
aɗaba kurum,
dite na i waya ka,
ka sinkwim ba à duwa ilik te ya.
A sèsiŋ ka,
ka walum ikaba mburma ya tsa.
Ki gwim a ka,
kamala ana a riŋ mewetse ŋa i wakita Mbulum a,
tsəka,
ka tə səkahum dər aaka tsa.
Kamala megweɗe ya,
wura ilik ma ge zlapa nda wele ana a ɗifer a à duwa ya,
dite ka,
à fir a aà misle ŋgiɗ kamala za ya tsa asa mbaŋa.
7 Weke na a gwaɗak,
kər ka,
kà za gà misle ŋgiɗ nda dukw ana kə̀ ŋgat nda təv megìse ya?
Mbulum tsiye na a ge megemir ata dze ya?
Dite aàmala na ki ge a dər zlapa kamala ana kì ge ka,
nda ahər yak a?
Pul a ɗif a kwa à vatwa ana ki zezemekwe a ya
8 Ama kurum ki dzelwim a,
ki gweɗwim a ka:
Waytsa maa mbər meŋgete dukw ana Mbulum a vile a ya tserdze.
Ki gweɗwim a asa:
Mər ka,
gà Əbay ŋa na ika vatwa Mbulum a.
Na kataya ka,
kurum tserdze ka,
gà Əbay ŋa,
ku mege mə̀r gà Əbay ŋa tə tsa tekeɗe ya.
Na mege kurum gà Əbay i təv Mbulum ndzer ka,
ana ka,
ŋgulum.
Na mege kataya ka,
ana ka,
mə̀r tekeɗe,
ki gekwe akaba a Əbay ata nda gà kurum tserdze mbaŋa.
9 Ama ka,
kataya tsa.
Mər gà ɓəzla meslire Yesuw Kiristi,
i samata ka,
kamala ana Mbulum aka ne à mə̀r gà ɓəzla dəba mburma tserdze ya.
Mər mì ne asa ka,
kamala gà mburma ana seriye aka gəs tar,
dite ta bets a tar ika miɗ mburma ya.
Mər ka,
kamala gà ɓəzla mesewere are ana ti sèwèr a ter a ɗa ika gər ahəɗ ka,
fìyye mburma ta fir ahər a ya,
nda gà ku mege ika miɗ gawla Mbulum tekeɗe ya.
10 Kamala taŋa ya,
mə̀r ka,
kamala gà ɓəzla falày ana taf masakəŋa ya,
na aɗaba Yesuw Kiristi ya.
Ama waytsa kurum ka,
gà ɓəzla masəra duwa lele,
na i təv magàwà ba kurum ana kə̀ gawum ba nda gà ŋgat a.
Mər ka,
ndzəɗa mə̀r a riŋ tsa,
ama kurum ka,
ɓəŋɓəŋ gà ndzəɗa ŋa hinne.
Mər ka,
ta fir aà mə̀r a bəsənnà kamala za ya.
Ama kurum ka,
tì zlibe a à kurum a ivaɗ.
11 Haa kinehe mbakum,
mə̀r ka,
may a ge a mə̀r a hinne.
Dite yam tekeɗe,
à kiɗ a mə̀r mbaŋa.
Mì dzayawa akaba ka,
gà makwàtsak gà petek duwa kìtsèw kìtsèw masakəŋa pəra.
Ta gazlawa mə̀r ka,
hinne.
Mì sùwayawa ku mege a ŋga,
təv mendze mə̀r a riŋ araha tsa.
12 Mì gewa megemir bàlaarì nda ahər mə̀r ŋa,
na dite mìi mete a à may tsiye.
Na bəla mburma tàa vəl a mə̀r mezelme ka,
mìi heme a a Mbulum,
dite a pise a ter a ahəm a ivaɗ.
Na bəla tàa vəl a mə̀r mesewere are ka,
mì gəsawa gəzləŋ pəra,
mì màwa a tar dər aɗəm tsa.
13 Na bəla gà mburma tàa ndavaya a mə̀r ka,
mì fàfəlawa a tar aaka nda himmè bazlam lifeɗiɗe ivaɗ.
Mər mì ne ka,
kamala gwastak a masakəŋa,
na i təv are gà mburma gər ahəɗ tserdze ya.
Haa kinehe mbakum,
ta fə̀rawa aà mə̀r ka,
kamala aruwaŋ ana mburma ta faɗawa,
səlak səlak tə ndawa dər a dala ya.
14 Dukw ana i wetse i faha ya,
i tsik taŋa ka,
aà mandàɗà dər aka kurum hwarwa agəra dukw ana ki gwim a ya tsa.
Awaŋ,
i tsik a kurum kamala taŋa ya ka,
aɗaba ana,
kurum gà ɓəza gà,
i waya kurum hinne ya.
A sèsiŋ ka,
i ɗif a kurum a à metsehe,
dite ka,
ki mwimere a aka vatwa ana ŋgwal ŋa ya.
15 Ku mege gà asiŋ gà mburma ŋgiɗ a riŋ lufùw na ti ɗif a kurum a à duwa aka gər Yesuw Kiristi ya tekeɗe,
dede kurum ka,
ilik pəra.
Iye na i ne dede kurum a.
Kurum kà nwim gà ɓəza gà ka,
aɗaba ana akahər ata,
iye i lah metsike a kurum bazlam ŋgwal ŋana,
dite kə̀ gəsum Yesuw Kiristi nda gəzləŋ kurum ilik a.
16 Aɗaba taŋa,
iye ihər i ge a kurum a kamkam:
Zazamum ka,
mede gà ana i de a ya.
17 A sèsiŋ ka,
ki gwim a kamala taŋa ya.
Aɗaba taŋa na i sləraha Timute a təv kurum mbaŋa ya.
Dite ma daha ka,
mə̀ mà aka meɗìfè kurum à mede gà ana i dawa ika vatwa Yesuw Kiristi ya.
Dukw ana i dzeŋge a kurum a ya ka,
kamala ana i dzeŋgewa a gà mburma tserdze,
ku mege i ŋga ya mbaŋa.
Ŋgat ka,
kəla gà ana mandərkwasla ŋa ika vatwa Mbulum a.
Dite ŋgat asa ka,
a ge a megemir Mbulum ndaka vatwa ŋa lele asa mbaŋa.
18 Ama i sər,
gà misle ŋgiɗ a riŋ ika magər kurum a,
tì sìŋgìr a à ba tar,
aɗaba ana tə dzala ka,
i dehe a a təv tar asa tsiye.
19 Ama na mege BATSAH kwa ŋa aka waya ka,
i dehe bise.
Na Yàa daha ka,
i ŋget a a gà na tə sə̀ŋgèrawa à ba tar ata ya kuɗa.
Tsam ka,
i ti sir a dər,
wànà gà bazlam tar ata ŋgùrà ŋgùrà ya ana,
taf masakəŋa pəra ya,
tsəna,
tàa ŋgat ndzəɗa i təv Mbulum a nda ndzer a ya.
20 I tsik kamala taŋa ya ka,
aɗaba ana *mekwere Mbulum ana a kwere a ya,
a sir a aba ka,
i ndzəɗa ya,
tsəka,
bazlam ɗekɗek ka,
a ge a ŋgulum tsa.
21 A sàs a kurum ana,
dukùla?
Wànà i təv ana i dehe a a təv kurum ana,
i daha nda gà megwiymbiɗ i ahər a,
na dite i ɗif a kurum a dər à metsehe ya ya?
Tsəna,
ki mbiɗwim a à madzala gà gər kurum,
na dite i dehe a ka,
nda gà ŋgwal bazlam ana lifeɗiɗe,
ki sirwim a dər ka,
i waya kurum a ya?