Dukw hwarwa ana ika magər gà mburma Mbulum a
5
1 *Araha,
i tsarakawa ka,
ta gwa là,
bazlam mawùràba ŋa a riŋ ika magər kurum.
Kurum riŋ ihər ki gwim a mezelme,
kamala megweɗe ya ka,
misle ŋgiɗ ilik tàa həna nda məkəs tsir ŋgar.
Assàh,
taŋa dze ana,
meme?
Ku mege gà na tə sər Mbulum tsiye tekeɗe ka,
tàa ge medzibe bakal ata kamala taŋa ya ilik tsidze.
2 Dite ka,
kurum riŋ ihər ki sìŋgìrwim a à ba kurum ivaɗ asa dze ana,
meme na taŋa ya?
Ama ka,
ŋgulum ki tiwwim a ba kurum ivaɗ,
na ki delewim a wele ata ika magər kurum a ya.
3 Iye ka,
Yàa mbər mesèseha ikaba seriye ŋa ya,
kamala ana kwa tserdze mandza ŋa i təv ilik ŋa ya,
tsaatsa,
iye ka,
diriŋ aà kurum a.
Ama madzala gà gər gà ka,
a riŋ mandza ŋa i təv kurum.
4 I ge seriye ata ka,
nda zləm Yesuw BATSAH kwa ŋa.
Araha,
na dukw ana ki gwim a ya.
Yahum ba gər,
dite madzala gà gər gà tekeɗe,
a ndze a i təv kurum nda ndzəɗa Yesuw Kiristi BATSAH kwa ŋa mbaŋa.
5 Na kàa yahum ba gər kataya ka,
miyakum à wele ata a ahər Əbay sitene,
ma dzeye à slu ba ŋgar,
dite bəla Mbulum a ta mbil a à mesife ŋgar,
a pat ana Yesuw BATSAH kwa ŋa ata a ge a seriye a gà mburma ya.
6 Aàmala na ki gwim a zlapa kataya dze ya?
Ŋgwala tsa na taŋa ya.
Kurum kà sərum ti tsiye,
na bazlam ata ta gwa ka,
giɗe ana a kwasawa à duwa ya,
ku mege tə ndà aaka kwizikw tekeɗe ka,
a kwese a dər hinne ya?
Kamala taŋa ya,
bakal ŋa,
ku mege kwizikw tekeɗe ka,
wànə̀nə̀nna à sìkèh a aka miɗ aka miɗ,
haa a nis a à mayahaba gər kurum fit kweleŋ.
7 *Aɗaba taŋa,
zlum iɗəm bakal ata à sìkèh a kamala giɗe ata a kwasawa à duwa ya ika magər kurum a.
Kamala taŋa ya ka,
ki ndzwim a tsəɗaŋŋa,
kamala ɗaf ana giɗe ata ikəka tsəka,
a kwese a tsiye.
Taŋa i sər ndzer,
Mbulum aka bara gəzləŋ kurum agəra Yesuw Kiristi ana a mət aɗaba kwa ya.
Ŋgat a ne ka,
kamala kəla təmaŋ ana ta kəɗ a Mbulum biy *megirive Paska ya.
8 Aɗaba taŋa,
gə̀rə̀vakwa lele,
ama ki gìrìvekwe a kəla ka,
dukw bakal mege iɗəm tsa.
Aɗaba dukw bakal ata à sìkèh a,
a ne a kamala giɗe ata a kwasawa à duwa ya.
Dite ka,
ki nekwe a gà mburma ana gà ndzer ŋa tsəɗaŋŋa,
ki gekwe a dukw ana ŋgwala tsiye nda təv bakal asa tsa.
9 Wakita ana ndavana aaka i wetse a kurumaha ya ka,
Yàa tsik a kurumaha aɗəm,
i gwaɗa a kurum ka,
ka ndzawum i təv ilik ŋa nda gà na ta gewa mezelme nda təv muva ya tsa.
10 I tsik taŋa ka,
agəra gà mburma ana tə sər Mbulum tsiye tsa.
Aɗaba gà ɓəzla mege mezelme nda gà ɓəzla məburnun,
nda gà ɓəzla akəl nda gà na tə dzawa gurmits a bəɗ ika miɗ gà dukw ana ti neye dər mbulum tar a ka,
tar ika mege dukw gər ahəɗ dukw tar.
Na mege ki giswim a mendze nda gà tar tsəka,
ana ka,
bàlaarì,
ki ndzwim a à gər kurum i kusak pam.
11 Ama dukw ana i wetse a kurumaha ya ka,
i tsik ka,
agəra gà mburma ana ki zezemwim a Yesuw Kiristi ya seyiŋ ivaɗ.
Na wura a gweɗe a,
waytsa iye ka,
mala mazazama Yesuw,
dite ka,
a ge a mezelme nda gà bəla a ge a məburnun aka dukw mburma,
nda gà a dze a gurmits a bəɗ a dukw ana a zeler a mbulum ŋgar a,
nda gà a wele a aà mburma ya nda pàrsa,
kige tsa a kweye a à guzum,
nda gà bəla a ge a akəl ka,
taŋa ka,
ka ndzawum i təv ilik ŋa nda gà ŋgat tsa,
ku mege ɗaf tekeɗe,
ka zəmum akaba nda gà ŋgat tsa asa.
12-13 *Mege seriye gà mburma ana tə sər Mbulum tsiye ka,
ahəm gà tsa.
Mbulum na a ti ses a ter a ikaba seriye tar a dukw tar.
Ama biy kwa ka,
ki gekwe a seriye gà na tar riŋ i təv mayahaba gər kwa ya seyiŋ ivaɗ.
Ki gekwe a ka,
kamala ana mewetse ŋa a riŋ i wakita Mbulum a,
a gwa ka:
«Dalawum wur ana a gewa bakal a,
ika magər kurum a.»