Ki geywim aàba seriye ika miɗ gà na tə sər Mbulum tsiye tsa
6
1 Na bəla wura a riŋ ta ge a maàga nda misle ŋgiɗ ika magər kurum,
dite ka,
a de a a seriye ŋa aka miɗ gà na tə sər Mbulum tsiye asa ana,
meme?
Taŋa ka,
lele tsa.
Say a wiz a ka,
aà gà mburma Mbulum,
na dite ti ses a ter a ikaba seriye tar a ivaɗ.
2 Kurum kà sərum te tsiye,
gà mburma Mbulum na ti ta ge a seriye a gà mburma ana ika gər ahəɗ a tserdze ya?
Na kataya ana,
dite meme na ki slwim a aà masasa ikaba kəla bazlam ata ika magər kurum a te tsiye?
3 Kurum kà sərum,
ku mege gà gawla Mbulum tekeɗe ka,
kwa na a ta ge a ter a seriye ya mbaŋa ya.
Na ki gekwe a seriye a gà taŋa seyiŋ ana,
sakwàn nda gà bazlam ana ɗa ika gər ahəɗ a ya?
4 Ama na bəla hùrùm bazlam aka hitse ika magər kurum a ka,
ki dwim a à seriye ŋa aka miɗ gà na təv mendze tar a riŋ ika magər kurum gà mburma Mbulum tsiye ana,
meme?
5 Hwarwa a ge a kurum a te tsiye?
Wura a riŋ ilik na ika magər kurum matsaha ŋa,
a sle a aà masasa ikaba bazlam a gà asiŋ gà mburma Mbulum ana,
a riŋ te tsiye?
6 Dite aàmala na ki gwim a seriye aà gà asiŋ gà mburma Mbulum ŋgiɗ ika miɗ gà na tàa gəs Yesuw Kiristi tsiye ya?
7 Kaɗəŋ,
mege bazlam ana a riŋ ika magər kurum ki gwim a ya,
na a sər ba ka,
kurum riŋ ihər ki gwim a bakal a.
Na bəla wura aka ge a kurum dukw ana ŋgwala tsiye,
bəla a zla aà kurum duwa nda akəl a ka,
ŋgulum ki giswim a gəzləŋ pəra,
tsəka,
ki dwim a aba a seriye aka miɗ mburma ka,
ŋgwala tsa.
8 Ama kurum ka,
ki giswim a gəzləŋ tsa.
Kurum riŋ ihər ki gwim a dukw ana ŋgwala tsiye a gà misle ŋgiɗ ivaɗ dze ana,
meme?
Ki ndzekwim a duwa aà gà mburma ya nda akəl,
ku mege tar ka,
gà damər kurum ana ika vatwa Mbulum tekeɗe ibam a ya.
9 Kurum kà sərum ndzer:
gà na ta gewa dukw ana ŋgwala tsiye ka,
ta ŋget a təv mendze i *mekwere Mbulum ana a ta kwere a ya tsidze.
Ka banum ba kurum tsa,
sərum dər:
gà mburma ana ta gewa mezelme nda təv muva ya,
nda gà na ti dze a gurmits a bəɗ a dukw ana tə zalar mbulum tar a,
nda gà na ta gewa muva ya,
nda gà na ta waya mehinneha aà gà asləka ŋgiɗ kamala gà zal nda məkəs a,
10 nda gà ɓəzla akəl,
kige tsa gà ɓəzla məburnun,
nda gà na ta kweye a à guzum a,
nda gà na ta wele a aà mburma ya nda pàrsa ya,
nda gà ɓəzla makàzàlà duwa aà mburma ya nda ndzəɗa,
gà ɓəzla bakal ata tserdze ya ka,
ti sle a aà mada a mekwere Mbulum tsidze.
11 Akahər ata piŋŋe ka,
gà misle ŋgiɗ ika magər kurum ta gewa gà dukw ata mbaŋa.
Ama kinehe ka,
Mbulum aka bara gəzləŋ kurum tsəɗaŋŋa lele.
A ne à kurum gà mburma ŋgar gà tsəɗaŋŋa ŋana,
ti ne gà ŋgwal ŋa ika miɗ ŋgar a.
A ge dər kamala taŋa ya ka,
aɗaba ana kə̀ gəsum Yesuw Kiristi BATSAH kwa ŋa nda gəzləŋ kurum a,
dite ka,
Mezite Mesife ŋgar ibam,
mandza ŋa i gəzləŋ kurum mbaŋa ya.
Ba kurum ma ne ka, biy mazlə̀bà à Mbulum
12 Bəla gà misle ŋgiɗ ika magər kurum a ka,
ta gweɗe a:
«Waytsa vatwa a riŋ aà mege gà dukw pampam tserdze.»
Haya kaɗəŋ,
ti sle aà mege ŋa.
Ama i təv gà dukw ata ta ge a tserdze ya kəla ka,
gà biy ŋgiɗ a riŋ iɗəm ta ge a ter a ŋgulum tsidze.
Ku mege vatwa a riŋ aà mege ŋa tekeɗe,
i waya tsa.
Aɗaba a sèsiŋ tsa na i ne a ɓele gà dukw ata ya.
13 Kurum kù gwaɗum:
«Dukw mezime ka,
aɗaba hitwis.
Hitwis tekeɗe ka,
aɗaba dukw mezime mbaŋa.»
Haya,
ar ka,
kamala taŋa ya dukw ŋgar.
Ama pat ŋgiɗ kəla ka,
ku mege hitwis,
ku mege dukw mezime tekeɗe,
Mbulum a dzeye akaba à tar a sula məma fit mbaŋa.
Ama i təv ba mburma ka,
kataya tsa,
aɗaba Mbulum a ge ka,
aà mege mezelme nda təv muva tsa.
A ge ka,
na dite ki zèmbeɗekwe a dər à Yesuw Kiristi BATSAH kwa ŋa ya ivaɗ.
Aɗaba ŋgat na a kesle a ba kwa ya mbaŋa.
14 Mbulum na a mbəlara à BATSAH kwa ŋa ata i məməta ya ya.
Kamala taŋa ya,
kwa tekeɗe,
a ta mbilere a à kwa ya nda ndzəɗa ŋgar a mbaŋa.
15 Kurum kà sərum te tsiye:
ba kwa ka,
magàwà ŋa nda ba Yesuw Kiristi ya?
Wànà i zle a mezehe ba Yesuw Kiristi,
dite i ge a dər muva ya?
Awaŋ,
a ge a ba tsa.
16 *Aɗaba kurum kà sərum ndzer:
na wura a vile a ba ŋgar a məkəs ana muva ŋa ya ka,
ba tar a ne ka,
ilik nda məkəs ata.
Aɗaba a riŋ mewetse ŋa i wakita Mbulum ka,
ta gwa:
«Gà mburma ata sula ya ka,
ba tar a ne ka,
ilik.»
17 Ama wur ana a vəl ba ŋgar a ahər a BATSAH kwa ŋa ya ka,
madzala gà gər ŋgar,
nda biy BATSAH kwa ŋa a ne ka,
ilik.
18 Aɗaba taŋa,
ki gwim mezelme nda təv muva tsidze,
tsakàlàk ndzum ihər a.
Gà asiŋ gà bakal ana pampam gà mburma ta gewa ya ka,
a ndze a aà ba tsa,
makàhà ŋa.
A dara ka,
i madzala gà gər ŋgar a pəra.
Ama wur ana a ge a mezelme nda təv muva ya ka,
a nis a à ba ŋgar fit nda ahər ŋgar ŋa.
19 Kurum kà sərum te tsiye:
ba kurum a ne ka,
ga Mezite Mesife Mbulum a?
Mbulum a vəl a kurum Mezite Mesife ŋgar ata ka,
aà dite ma ndza i gəzləŋ kurum a.
Aɗaba taŋa,
ba kurum a ne ka,
biy kurum asa tsa.
20 Mbulum aka mbùrùɗara kurum a təv ŋgar a nda dukw ana tsakala ŋa hinne ya.
Aɗaba taŋa,
zlə̀bum à Mbulum nda gà dukw ana ba kurum a ge a ya fit dze.