Mege wusa Pul a gà mburma pampam
16
1 Ama kinehe ka,
a sèsiŋ ki sirwim a damər kwa duwa naha,
məkəs ŋa,
a dehiŋa,
zləm ŋgar Febe.
A riŋ a ge a mege megemir ika magər gà mburma Mbulum i Kankiriya.
2 A təv ana aka ndzeha ka,
gəsum ŋgat nda zləm BATSAH kwa ŋa lele.
Ki giswim a ka,
kamala ana gà mburma Mbulum ta gewa ya.
Zlakum ŋgat i təv dukw ana a sle ahər a ya tserdze.
Aɗaba ŋgat mbaŋa ka,
aka zlak mburma hinne,
ku mege iye tekeɗe,
aka zlak iye.
3 Gwimiŋ wusa a gà Piriskila nda zal ŋgar Akila.
Tar nda gà iye ka,
maa ge akaba megemir Yesuw Kiristi.
4 Akahər ata,
mburma tàa à mekìɗe iye ka,
tə daha,
tə zlak iye.
Ta gwa,
ku mege ta misek a à mə̀r tsa tekeɗe ka,
mìi zlèk a ŋgat pəra.
I ge a taraha wusa hinne.
Ama ka,
iye ɗekɗek tsa na a ge a ter a wusa ŋa ya,
mə̀r nda gà ɓəzla magəsa Mbulum ana ika magər gà na tar gà Yahuda tsiye tserdze mbaŋa.
5 I wizeha gà mburma Mbulum ana ti yahawaba gər aà mahàmà a Mbulum i ma tar a asa.
Taŋa gwimiŋ wusa a masla gà Apaynitus ana i waya ŋgat hinne,
a lah magəsa Yesuw Kiristi ika ahəɗ Asiya ya.
6 Ki gwimiŋ wusa a Mariya ana a ge megemir hinne ika magər kurum a mbaŋa.
7 Dite ki gwimiŋ a wusa a gà mburma gà,
gà Andaranikus nda Yuniyas asa mbaŋa.
Mər nda gà tar ka,
tàa dza akaba mə̀r a daŋgay dze.
Tar sula məma ka,
gà ɓəzla meslire Mbulum.
Mburma tə sər tar lele,
ta waya tar hinne asa.
Tar nda gà iye ka,
tar na a lah megìse Yesuw Kiristi ya.
8 Gwimiŋ wusa a masla gà Ampiliyatus ana i waya ŋgat hinne,
kwa nda gà ŋgat magàwà ŋa i ahər BATSAH kwa ŋa ya.
9 Ka wizwimiŋ Urubanus ana kwa nda gà ŋgat kwa ihər ki gekwe a akaba megemir Yesuw Kiristi ya mbaŋa asa.
Dite ki gwim a wusa a masla gà Istakis ana i waya ŋgat hinne ya asa.
10 Ama gwim wusa a Apelis,
mala magəsa Yesuw Kiristi ndzer ŋana,
ti sèwèrer are hinne tekeɗe ka,
aka məsak dər tsiye.
Ki gwimiŋ wusa a gà mburma ana i bəra Aristubul a.
11 Ka wizwimiŋ Hirudiyan kəla gà ma gà mbaŋa,
dite ka wizwimiŋ gà mburma Mbulum ana i bəra Narkis a asa.
12 Gwim wusa a gà Tirifina nda Tirufusa gà damər kwa gà məkəs ŋa ana ta ge a megemir a BATSAH kwa ŋa ya.
Dite ki gwim a wusa a Persis,
məkəs ana kà wayakwa ŋgat agəra ana a mə̀r aba aà megemir BATSAH kwa ŋa hinne ya.
13 Ki gwimiŋ wusa a Rufus,
wele ana a ge megemir BATSAH kwa ŋa ndzer lele ya,
dite a mama ŋgar ana a ne à iye kamala kəla ŋgar a mbaŋa.
14 Ki wizwimiŋ a gà Asinkiritus nda Filigun nda gà *Hermes,
dite nda gà Paturubas,
nda gà Hermes,
dite asa nda gà asiŋ gà mburma Mbulum ŋgiɗ ana ti yahawaba gər a təv tar a.
15 Taŋa,
ki gwim a wusa a gà Filulugus nda Yuliya məkəs ŋa,
dite a gà Neriyus nda damər ŋgar məkəs ŋa mbaŋa.
Ki gwimiŋ a gà Ulumpas nda gà asiŋ gà mburma Mbulum ŋgiɗ ana ti yahawaba gər a təv tar a tserdze mbaŋa asa.
16 Ki geywim ba wusa ika magər kurum ilik ilik tserdze nda gəzləŋ ilik.
Gà mburma Mbulum ana ti yahawaba gər ɗa ika ahəɗ aaha pampam a,
ta ge a kurumaha wusa aàba aàba ilik ilik tserdze mbaŋa.
Mandəvandəv bazlam
17 Gà damər gà,
i ge a kurum a kamkam:
Gwim metsehe,
kaslum ba kurum i təv gà na ta me a kurum a à ŋgwaza nda təv bazlam Mbulum,
ti tsik a kurum a dukw ana kàa tsarakum ilik tsiye ya.
Dite ka,
ta gwitse a ikaba à kurum a,
ki sirwim aba a ahəm asa tsa,
gà misle ŋgiɗ tì dzèwe a ika vatwa Mbulum a.
Ama ka,
ka vəlum a tar are tsa,
sìrìkwim i təv tar a diriŋ.
18 Medzìbe gà mburma ata ta ge a megemir ka,
a *Kiristi BATSAH kwa ŋa tsa.
Ta ge a ka,
dukw ana a tsahən aà gəzləŋ tar a ɗekɗek pəra.
Ta mèhe a à arəv a gà mburma nda himmè bazlam gìŋgefkèffe ka,
nda dukw pàrsa masakəŋana,
dukw ana ti tsiker a ika arah a.
Kamala taŋa ya,
ta bene a dər gà mburma ana tə səraha aka bazlam ŋa tsiye.
19 Ama i təv kurum kinehe ka,
kataya tsa.
ku weke a sər metìkè ba kurum,
meme na kə̀ gəsum ahəm aà BATSAH kwa ŋa ya.
Agəra taŋa,
i ŋgaya ba hinne aɗaba kurum.
Ama a sèsiŋ mbaŋa ka,
ki nwim a gà ɓəzla metsehe aà mege dukw ana ŋgwal ŋa ya kəla.
Ki dwim a i təv dukw bakal a,
ki ndzwim a tsakàlàk diriŋ.
20 Kamala taŋa ya,
Mbulum,
mala məvəla zayzay a mburma,
a vile a kurum a ndzəɗa bise,
na dite ki hìnislwim a dər à ndzəɗa Əbay sitene ya.
Yesuw Kiristi BATSAH kwa ŋa ma ge a kurum ŋgwal ŋa,
mi pise a kurum ahəm.
21 Taŋa Timute ana mìi ge a megemir məma ya,
a ge a kurumaha wusa asa.
Gà ɓəza gà ma gà,
gà Lukiyus nda Yasun,
nda gà Susipatarus ta ge a kurumaha wusa mbaŋa.
22 Dite iye Tartiyus ana mì wetse a kurumaha wakita aaha məma ya tekeɗe,
i ge a kurumaha wusa nda zləm BATSAH kwa ŋa mbaŋa asa.
23 Gayus ana iye Pul,
i ma ŋgar,
dite gà mburma Mbulum tserdze ti yahawaba gər a ma ŋgar a tekeɗe,
a ge a kurumaha wusa asa mbaŋa.
Arastus,
mala maɗàmà siŋgwe gà mburma aaha i kwite aaha ya,
nda damər kwa Kwartus,
ta ge a kurumaha wusa asa mbaŋa.
24 Taŋa Yesuw Kiristi BATSAH kwa ŋa ma ge a kurum ŋgwal ŋa ilik ilik tserdze.
*Amin.
Pul a zàmbaɗa à Mbulum
25 Zàmbaɗakwa à Mbulum,
aɗaba ŋgat ka,
a sle a aà məvəla a kurum ndzəɗa i təv megìse ana kə̀ gəsum ŋgat a ɓərɓər lele.
Ar ka,
kamala ana i tsikewa a mburma i təv ana i màwa a tar à bazlam ŋgwal ŋana aka gər Yesuw Kiristi ya.
Bazlam ata piŋŋe ka,
makàhà ŋa.
Ama kinehe ka,
Mbulum aka pàt a kwa dər parakka,
a mà dər ka,
kamala taŋa ya mbaŋa.
Akahər ata piŋŋe ka,
Mbulum aka tike aaka zlìmbits.
26 Ama kinehe ka,
aka pàt dər kuɗa.
A pàt dər ka,
nda bazlam gà ɓəzla məma à guma Mbulum ana ta wetse aka gər Yesuw Kiristi ya.
Mbulum,
ŋgat mala mandza aà biybiy,
a sasar ka,
ti tsik a bazlam ŋa a mburma aà slàla aà slàla tserdze,
na dite ta gis a ŋgat nda gəzləŋ lele,
ta gis ahər a ahəm a.
27 Zàmbaɗakwa dər aà biybiy.
Ŋgat ilik na metsehe ŋgar a za dukw tserdze ya.
Ki zèmbeɗekwe a dər ka,
aɗaba Yesuw Kiristi.
*Amin.